Addaameenne Hewaana Edene ataakiltte sohuwaappe kiyi simmidi, daro naata yelidosona. Eta bayra naꞌay Qaayeeli goshshancha; qassi kaalo naꞌay Aabeeli henttancha.

Issi gallassi Qaayeelinne Aabeeli Yihoowayyo yarshshuwaa yarshshidosona. Yarshshoy aybakko eray? Hegee dumma imota. Yihoowi Aabeela yarshshuwan ufayttiis; shin Qaayeelaagan ufayttibeenna. Hegee Qaayeeli keehi yiillotanaadan oottiis. Yihoowi Qaayeela yiilloy a iitabawu kaalettana danddayiyoogaa ayyo yootiis. SHin Qaayeeli siyibeenna.

Qassi Qaayeeli Aabeela, ‘Tanaara dembbaa hindda’ yaagiis. Eti dembbaa banttarkka biido wode, Qaayeeli ba ishaa shocidi woriis. Yihoowi waataneeshsha? Qaayeeli bantta soo asaappe shaahettidi haaho sohuwaa baanaadan oottiyoogan Yihoowi a qaxxayiis. Qaayeeli mule simmidi yaana danddayenna.

Hegaappe nuuni tamaariyoobi deꞌii? Issibay nuuni hanana bessees giidi qoppiyoogaadan hanana xayikko, yiillotiyoogaa doommana danddayoos. Nu wozanan yiilloy dari dari biyoogaa akeekikko, woy harati nuuni yiillotidoogaa akeekidi nuuyyo yootikko, yiilloy nuna xoonennan deꞌishin sohuwaara aggana koshshees.

Aabeeli Yihoowa siiqiyo gishshawunne suurebaa oottiyo gishshawu, Yihoowi a ubbatoo hassayees. Xoossay saꞌaa gannate oottiyo wode, Aabeela hayquwaappe denttana.

Guyyeppe, saꞌan deꞌiya asay dariis. Etappe daroti iita. Saluwan kiitanchatuppe amaridaageetikka iita gididosona. Eti saluwan deꞌiyoosaa aggidi, saꞌaa wodhidosona. Eti yaatidoy aybissakko eray? Eti ashuwaa maayidi macca naata ekkanaassa.

Kiitanchati he maccaasaappe attuma naata yelidosona. He attuma naati diccidi keehi minonne addettiyaageeta gididosona. Eti asaa qohoosona. Yihoowi hegaa coꞌꞌu gi xeellana danddayenna. Hegaa gishshawu, i iita asaa bashshaa haattan xayssanawu qofaa qachiis.

SHin issi bitanee dumma. I Yihoowa siiqees. A sunttay Noha. Ayyo machiyaanne Seema, Kaamanne, Yaafeeta giyo heezzu attuma naati deꞌoosona; he attuma naatu ubbawukka machoti deꞌoosona. Noheenne a soo asay Bashshaa Haattaappe attana mala gita markkabiyaa keexxanaadan Yihoowi ayyo yootiis. He markkabee haattan muukettenna gita saaxine mala. Yihoowi daro meheenne doꞌaykka attana mala markkabiyan gelissanaadankka Noheyyo yootiis.

Nohee markkabiyaa keexxiyoogaa sohuwaara doommiis. Noheenne a soo asay hegaa 50 gidiya layttan keexxi wurssidosona. Eti markkabiyaa Yihoowi azazidoogaadan keexxidosona. He wode, Nohee Bashshaa Haattaabaa asawu yootiis. SHin ooninne siyibeenna.

Wurssettan, markkabiyaa giddo geliyo wodee gakkiis. Aybi hanidaakko ane kaallidi tamaarana.