Looxee ba aawaa ishaa Abrahaamaara Kanaane biittan deꞌees. Wurssettan, Abrahaamayyoonne Looxeyyo keehi daro mehee deꞌiyo gishshawu, ubbawu biittay gidibeenna. Abrahaami Looxeyyo hagaadan giis: ‘Nuuni issi sohuwan issippe deꞌana danddayokko. Hayyanaa neeni awugaa baggi baana koyiyaakko doora; qassi taani hara baggi baana.’ Hegee Abrahaamee ba xallaa siiqiya asa gidennaagaa bessees.

Looxee Sadooma katamaa matan deꞌiya keehi loꞌꞌiya biittaa beꞌiis. Hegan daro haattaynne maatay deꞌees. Hegaa gishshawu, i he sohuwaa dooridi ba soo asaara yaa biis.

Sadoomaaninne hegaa matan deꞌiya Gamoora kataman asay keehi iita. Eti keehi iita gidiyo gishshawu, Yihoowi he katamata xayssanawu qofaa qachiis. SHin Xoossay Looxanne a soo asaa ashshanawu koyido gishshawu, Looxeyyo hagaadan gaana mala naaꞌꞌu kiitanchata kiittiis: ‘Eesotite! Ha katamaappe kiyite! Yihoowi ha katamaa xayssana hanees.’

Looxee eesuwaara kiyibeenna. I takkiis. Hegaa gishshawu, naaꞌꞌu kiitanchati Looxe kushiyaa, a maccaasee kushiyaanne a naaꞌꞌu macca naatu kushiyaa oyqqidi, katamaappe eta kessanawu dirbbanttiiddi hagaadan gidoosona: ‘Eesotite! Intte shemppuwaa ashshite, guyye xeelloppite. Intte guyye xeellikko, hayqqana!’

Eti Zooꞌaara katamaa gakkiyo wode, Sadoomaaninne Gamooran tamaynne dinnee bukkanaadan Yihoowi oottiis. He naaꞌꞌu katamati muleera xayidosona. Looxe maccaasiyaa Yihoowayyo azazettennan ixxada guyye xeellido wode, maxine shucha gidaasu! SHin Looxeenne a naaꞌꞌu macca naati Yihoowayyo azazettido gishshawu xayibookkona. Looxe machiyaa azazettennan ixxido gishshawu, eti keehi azzanennan waayi aggana. SHin, eti Yihoowa azazuwaa azazettido gishshawu keehi ufayttidosona.

Abrahaami ba naꞌay Yisaaqi Yihoowa siiqanaadaaninne i gelido qaala ubban ammanettanaadan tamaarissiis. SHin Yisaaqa layttay 25 heera gidido wode, Abrahaami keehi deexxiyaabaa oottanaadan Yihoowi oychiis. Hegee aybee?[1]

Xoossay Abrahaamayyo, ‘Hayyanaa, ne mexi issi naꞌaa Mooriyaa biittan deꞌiya issi deriyaa efaada, a yan yarshsha’ yaagiis. Abrahaami Yihoowi ayssi hegaadan azazidaakko aynne erenna. SHin i Yihoowayyo azazettiis.

Wonttetta galla guuran, Abrahaami Yisaaqaaranne naaꞌꞌu ashkkaratuura Mooriyaa biis. Heezzu gallassappe guyyiyan, eti deriyaa haahuwan beꞌidoosona. Abrahaami yarshshuwaa yarshshanawu Yisaaqaara biyo wode, ba ashkkarati yan takkanaadan yootiis. Abrahaami Yisaaqa mittaa toossidi, i billamaa oyqqiis. Yisaaqi ba aawaa, ‘Nuuni yarshshana mehee awan deꞌii?’ yaagiis. Abrahaami, ‘Ta naꞌawu, Yihoowi hegaa giigissana’ yaagiis.

Eti wurssettan deriyaa gakkidi, yarshshiyoosaa gimbbidosona. Yaatidi Abrahaami Yisaaqa kushiyaanne tohuwaa qachidi yarshshiyoosan a zinꞌꞌissiis.

Abrahaami billamaa ekkiis. He wode Yihoowa kiitanchay saluwaappe hagaadan giis: ‘Abrahaamaa! Naꞌaa bollan ne kushiyaa wottoppa! Neeni ne naꞌaa yarshshanawu eeno giido gishshawu, ne Xoossaa ammaniyoogaa taani haꞌꞌi eraas.’ He wode Abrahaami kacee mittan oyqetti uttido dorssa orggiyaa beꞌiis. I Yisaaqa eesuwan birshshidi, he dorssa orggiyaa a gishshaa yarshshiis.

He gallassappe doommidi, Abrahaama Yihoowi ba dabbo giis. I ayssi giidaakko eray? Abrahaami Yihoowi koyido ubbabaa oottiis; haray atto, Yihoowi ayssi yootidaakko erenna wodekka Abrahaami oottiis.

Yihoowi, ‘Taani nena anjjana; ne naata woy ne zerettaa corayana’ yaagidi, Abrahaamayyo kase gelido qaalaa zaarettiis. Yihoowi loꞌꞌo asa ubbaa Abrahaama zariyaa baggaara anjjanaagaa hegee bessees.