Yisaaqi Irbbiqo machiyo wode ayyo layttay 40. I o keehi siiqiis. Guyyeppe, eti mentte naaꞌꞌu attuma naata yelidosona.

Bayra naꞌay Eesawa, qassi kaaloy Yaaqooba. Eesawi karen peꞌiyoogaa dosees; qassi i shankkan gooba. SHin Yaaqoobi son peꞌiyoogaa dosees.

He wode, issi aaway hayqqiyo wode bayra naꞌawu daro gadiyaanne miishshaa immees. Hegee laataa geetettees. Yisaaqa son he laatay Yihoowi Abrahaamayyo gelido qaalaarakka gayttidaba. He qaalaabay Eesawa qofissibeenna; shin hegee keehi koshshiyaaba gidiyoogaa Yaaqoobi erees.

Issi gallassi Eesawi shankkaa biidi gallassa kumettaa gamꞌꞌidi soo yiyo wode keehi daafuriis. I Yaaqoobi kattiyo loꞌꞌo qumay sawuwaa tonggu gin, ‘Tana ha zoꞌo woxiyaappe miza; tana namisay worees!’ yaagiis. Yaaqoobi, ‘Taani ne laataa ekkanaadan, ane taayyo koyro qaalaa gela’ yaagiis. Eesawi hagaadan giis: ‘Tana ta laataabay aynne qofissenna! Neeni laataa ekkana danddayaasa. Taani maana koyays.’ Eesawi hegaadan oottidoogee loꞌꞌo gaada qoppay? CHii, loꞌꞌo gidenna. Eesawi keehi alꞌꞌobaa issi shaate woxiyan aattidi immiis.

Yaaqoobi keehi ceeggido gishshawu, ba bayra naꞌaa anjjiyo wodee gakkiis. SHin Irbbiqa kaalo naꞌay Yaaqoobi anjjuwaa ekkanaadan maaddaasu. Eesawi hegaa erido wode, keehi hanqqettidi ba mentte ishaa woranawu halchiis. Yisaaqinne Irbbiqa Yaaqoobi qohettennaadan naaganawu koyido gishshawu hagaadan giidosona: ‘Eesawi hanqquwaa agganaashin, ne aayee ishaa Laabaanakko baada a matan deꞌashsha.’ Yaaqoobi ba aawaanne aayee zoriyaa siyidi ba shemppuwaa ashshanawu eesuwan biis.

Yihoowi Abrahaamanne Yisaaqa naagidoogaadan, Yaaqooba naaganawu qaalaa geliis. Yaaqoobi deꞌiyo sohoy Haaraane geetettees; i yan machiis, daro naata yeliisinne keehi duretiis.

Wurssettan Yihoowi Yaaqooba, ‘Neeni ne yelettido biitti guyye simma’ yaagiis. Hegaa gishshawu, Yaaqoobinne a soo asay adussa ogiyaa manddariyoogaa doommidosona. Biishin ogiyan amarida ashkkarati Yaaqooba, ‘Ne ishaa Eesawi yiiddi deꞌees, qassi aara 400 attuma asay deꞌees!’ yaagidosona. Yaaqoobi bananne ba soo asaa Eesawi qohanawu koyiis giidi yayyiis. I Yihoowa, ‘Hayyanaa ta ishaappe tana ashsha’ yaagidi woossiis. Wonttetta gallassi Yaaqoobi Eesawayyo daro deeshshaa, dorssaa, miizzaa, gaameelaanne hariyaa imotaa yeddiis.

He galla qammi Yaaqoobi barkka deꞌiiddi kiitanchaa beꞌiis! Kiitanchay aara baaxetiyoogaa doommiis. Eti wonttana gakkanaashin baaxetidosona. Yaaqoobi qohettikkokka baaxetiyoogaa aggibeenna. Kiitanchay, ‘Tana yedda’ yaagiis. SHin Yaaqoobi, ‘Neeni tana anjjennan yeddikke’ yaagiis.

Kiitanchay wurssettan Yaaqooba anjjiis. Yaaqoobi Eesawi bana qohanaadan Yihoowi oottennaagaa eriis.

Wonttetta gallassi maallado Yaaqoobi haahuwan Eesawanne 400 attuma asata beꞌiis. Yaaqoobi ba soo asaappe sinttawu biidi, ba ishaa sinttan laapputoo ziggiis. Eesawi Yaaqoobakko woxxidi a qoommiis. Naaꞌꞌu ishantti yeekkidi sigettidosona. Yaaqoobi sigettanawu oottidoban Yihoowawu aybi siyettana gaada qoppay?

Takkidi Eesawi guyye simmidi ba soo biis; Yaaqoobikka ba ogiyaa biis. Yaaqoobayyo muleera 12 attuma naati deꞌoosona. Eta sunttay Roobeela, Simoona, Leewa, Yihudaa, Daana, Nifttaaleema, Gaada, Aseera, Yisaakoora, Zaabiloona, Yooseefanne Biniyaama. He attuma naatuppe issoy Yihoowi ba asaa ashshanawu goꞌettido Yooseefa. I waati goꞌettidaakko neeni eray? Ane hegaa xannaꞌoos.