Aqo Oyqqanawu Qoppada Issippe Aattiyo Wode Yihoowa Bonchchissa

1-2. Aqo oyqqanawu qoppidi issippe wodiya aattiyogaa xeelliyagan amaridaageeti woygidonaa?

AQO oyqqanawu qoppidi issippe aattiyo wodee keehi ufayssiyagaa gidana danddayees. Neeni hegawu haꞌꞌi issippe wodiya aattaydda deꞌikko, hegee ufayssiya wode gidanaadan neeni koyiyogee qoncce. Qassi darotuyyo hegee ufayssiya wode. Toophphiyan deꞌiya Xiyono,a giyo michchiya hagaadan gaasu: “Taani ta deꞌuwan keehi ufayttido wodetuppe issoy ta azinaynne taani aqo oyqqanawu qoppidi issippe aattido wodiya. Nuuni keehi koshshiya allaalleta haasayida; qassi miiccida. Tana siiqiyanne taanikka siiqiyo ura demmidoogaa akeekido wode keehi ufayttaas.”

² Gidikkokka, Nezerlandden deꞌiya Aleesha giyo ishay hagaadan giis, “Nuuni aqo oyqqanawu qoppidi issippe aattido wodiyan taani ta machchiyo loytta eridoogee ufayssiyaba gidikkonne, paacciyabay merettido wodeti deꞌoosona.” Aqo oyqqanawu qoppidi wodiya aattiyageeta gakkana danddayiya issi issi paacetanne eti he wodiyan Yihoowa bonchchissanaadan maaddiya Geeshsha Maxaafay yootiyo maarata ha huuphe yohuwan beꞌana. Qassi galchchan deꞌiya harati eta waati maaddanaakko beꞌana.

HEGAA HALCHCHOY AYBEE?

3. Aqo oyqqanawu qoppidi wodiya aattiyogaa halchchoy aybee? (Leemiso 20:25)

³ Aqo oyqqanawu qoppidi issippe wodiya aattiyogee ufayssiyaba gidikkokka, hegee eti aqo oyqqanaadan oottana danddayiyo gishshawu keehi koshshiyaba. Aqo laggeti deꞌuwan deꞌido wode ubban issoy issuwa siiqanawunne bonchchanawu bantta bullachchaa gallassi Yihoowa sinttan qaalaa geloosona. Nuuni qaalaa geliyobay ayba gidikkokka, hegaabaa kasetidi loytti qoppana koshshees. (Leemiso 20:25 nabbaba.) Aqo oyqqanawu qaalaa geliyogawukka hegee hanees. Aqo oyqqanawu qoppidi wodiya aattiyogee issoy issuwa eranawunne loꞌꞌobaa kuuyanawu maaddees. Kuuyiyobay aqo oyqqanaagaa woy agganaagaa gidana danddayees. Eti shaahettikko, issippe aattido wodee hada attiis giyogaa gidenna. Hegee eti issoy issuwara aqo oyqqana woy aggana koshshiyakko eranaadan maaddiis giyogaa.

4. Aqo oyqqanawu qoppidi wodiya aattiyogaa nuuni bessiyagaadan xeellana koshshiyoy aybissee?

⁴ Aqo oyqqanawu qoppidi wodiya aattiyogaa bessiyagaadan xeelliyogee keehi koshshiyoy aybissee? Aqo oyqqibeennaageeti bessiyagaadan qoppikko, ekkanawu woy gelanawu qoppennan issi uraara wodiya aattokkona. Shin bessiyagaadan qoppana koshshiyay aqo oyqqibeennaageetu xalaala gidokkona. Nuuni ubbay bessiyagaadan qoppana koshshees. Leemisuwawu, aqo oyqqibeennaageeti aqo oyqqanawu qoppidi issippe wodiya aattikko, amarida asay eti aqo oyqqana koshshiyabadan qoppees. Hegaadan qoppiyogee aqo oyqqibeenna Kiristtaaneta waati qohii? Amarkkan deꞌiya aqo oyqqabeenna Meleeso giyo michchiya hagaadan gaasu: “Issi ishaynne michchiya aqo oyqqanawu qoppidi wodiya aattikko issi issi Yihoowa Markkati eti aqo oyqqana koshshiyabadan qoppoosona. Hegaa gaasuwan amaridaageeti issoy issuwawu loꞌꞌo aqo lagge gidana xayikkonne, aqo oyqqanawu qoppidi wodiya aattiyogaa aggokkona. Harati qassi aqo oyqqanawu qoppidi issippe wodiya aattokkona. Hegee eti keehi unꞌꞌettanaadan oottana danddayees.”

ISSOY ISSUWARA LOYTTI ERETTIYOGAA

5-6. Aqo oyqqanawu qoppidi wodiya aattiyageeti issoy issuwabaa erana koshshiyabay aybee? (1 PHeexiroosa 3:4)

⁵ Neeni aqo oyqqanawu qoppada issippe wodiya aattikko, aqo oyqqanawu woy agganawu kuuyanaadan aybi maaddanee? Issoy issuwa loytti eriyogee nena maaddana. Neeni issi uraara aqo oyqqanawu qoppada wodiya aattiyogaa doommanaappe kase he uraabaa amaridabaa erennan aggakka. Shin haꞌꞌi ‘wozanaa giddon deꞌiyabaa’ eriyo injjiya demmadasa. (1 PHeexiroosa 3:4 nabbaba.) Neeni aqo oyqqanawu qoppada wodiya aattikko, he uri Yihoowara dabbotido dabbotaa, A eeshshaanne A qofaa loytta erana danddayaasa. Guyyeppe neeni hagaa mala oyshata zaarana koshshees: ‘Ha uri tawu loꞌꞌo aqo lagge gidanee?’ (Lee. 31:26, 27, 30; Efi. 5:33; 1 Xim. 5:8) ‘Nuuni issoy issuwara wozanappe siiqettana danddayiyoo? Nuuni issoy issuwa mooruwa aggi aadhdhanawu metootiyoo?’b (Roo. 3:23) Issoy issuwa loytti eriyo wode, keehi koshshiyabay intte issi mala gidiyogaa gidennan, intte maayettidi deꞌana danddayiyogaa woy aggiyogaa gidiyogaa hassaya.

⁶ Neeni aqo oyqqanawu qoppada issippe aattiyo wode he uraabaa erana koshshiya harabay aybee? Neeni he ura loytta siiqanaappe kase keehi koshshiya amaridabata haasayanawu koyana danddayaasa; leemisuwawu, A halchchuwabaa oychchana danddayaasa. Shin payyatettaara, miishshaa metuwara woy kase hanida iitabaara gayttidabaa haasayana koshshii? Aqo oyqqanawu qoppidi wodiya aattiyogaa doommiyo wode he ubbabaa haasayana koshshenna. (Yohaannisa 16:12​ra gatta xeella.) Nebaa issi issibaa yootanawu bessiya wodee gakkibeennabadan neeyyo siyettikko, hegaa awu qonccissa. Shin he uri loꞌꞌobaa kuuyanawu guyyeppe hegaabaa erana koshshees. Yaatiyo gishshawu hegaabaa he wode qoncciyan haasayite.

7. Aqo oyqqanawu qoppidi wodiya aattiyageeti issoy issuwa loytti eranawu waatana danddayiyonaa? (“Haahosan Deꞌiya Uraara Aqo Oyqqanawu Qoppada Aattiyo Wode” giya saaxiniyakka xeella.) (Misiliyakka xeella.)

⁷ Neeni issi uraa waata loytta erana danddayay? Neeni oyshaa oychchiyogaaninne I yootiyobaa ezggiyogan he uraa loytta erana danddayaasa. Intte naaꞌꞌaykka intteyyo tumuppe siyettiyabaa haasayana koshshees. (Lee. 20:5; Yaaq. 1:19) Issippe haasayanawu metootennaadan maaddiyabata issippe oottana danddayeta; leemisuwawu issippe maana, asi dariyo heeran hemettananne sabbakana danddayeta. Qassi laggetuuranne so asaara issippe aattiyo wode issoy issuwabaa loytti erana danddayeta. Hegaa bollikka, dumma dumma hanotatuuninne dumma dumma asaara deꞌiyo wode I bessiyo eeshshaa eranawu issi issibaa oottanawu halchcha. Nezerlandden deꞌiya Aschiwini hegaadan oottanawu baaxetidoogaa beꞌa. I Alishiira aqo oyqqanawu qoppidi aattido wodiyabaa hagaadan giis: “Nuuni issoy issuwa eranaadan maaddiya oosota koyida. Hegeeti darotoo oottanawu metennabata; leemisuwawu, qumaa issippe kattoos woy harabata issippe oottoos. Yaatiyo wode issoy issuwawu deꞌiya shugonne mino miyyeta akeekida.”

8. Aqo oyqqanawu qoppidi wodiya aattiyageeti issippe xannaꞌiyogan waani goꞌettana danddayiyonaa?

⁸ Ayyaanaabaa xannaꞌiyogankka loytti erettana danddayeta. Intte aqo oyqqikko, intte aqo deꞌuwan Xoossaa kaseyanawu so asaa goynuwawu wodiya bazzana koshshees. (Era. 4:12) Hegaa gishshawu, intte aqo oyqqanawu qoppidi aattiyo ha wodiyan issippe xannaꞌanawu wodiya bazzana danddayeta. Aqo oyqqanawu qoppidi wodiya issippe aattiyageeti so asa gidiichchibeennaageenne ishay michcheeyyo huuphe gidiichchibeennaagee qoncce. Gidikkonne, ubbatoo issippe xannaꞌiyogan intte ayyaanaaban ay malakko erana danddayeta. Amarkkan deꞌiya Maksanne Layso giyo aqo laggeti harabankka goꞌettidosona. I hagaadan giis: “Nuuni aqo oyqqanawu qoppidi issippe wodiya aattiyogaa doommido heeran, hegaabaa, aqo deꞌuwabaanne so asaa deꞌuwabaa yootiya xuufeta xannaꞌiyogaa doommida. Nuuni he xuufeta xannaꞌido gishshawu haasayiyogaa doommanawu deexxiya keehi koshshiya yohota haasayana danddayida.”

QOPPANA KOSHSHIYA HARABATA

9. Aqo oyqqanawu qoppidi wodiya aattiyageeti hegaabaa oossi yootanaakko kuuyiyo wode ay qoppana koshshii?

⁹ Hegaabaa oossi yootana koshshii? Hegee intte kuuyiyoba. Intte aqo oyqqanawu qoppidi wodiya aattiyogaa doommido heeran hegaabaa amarida asawu yootanawu kuuyana danddayeta. (Lee. 17:27) Yaatiyo wode, harati intte hanotaa xeelliyagan oychchiyo darobaappenne issibaa kuuyanaadan inttena denttettiyogaappe naagettana danddayeta. Shin intte hegaabaa ooyyonne yootana xayikko, harati erennaadan yayyidi etappe haakkana danddayeta. Hegee iitabaa kaalettana danddayees. Yaaniyo gishshawu loꞌꞌobaa zoriyanne koshshiyaban maaddiya amaridaageetussi yootiyogee loꞌꞌo gidana danddayees. (Lee. 15:22) Leemisuwawu, so asaappe, kayma gidida laggetuppe woy cimatuppe amaridaageetussi yootana danddayeta.

10. Aqo oyqqanawu qoppidi wodiya aattiyageeti hegee Yihoowa bonchchissiyagaa gidanaadan waatana danddayiyonaa? (Leemiso 22:3)

¹⁰ He wodee Yihoowa bonchchissiyagaa gidanaadan waatana danddayetii? Intte siiqoy gujji gujji biyo wode kaseegaappe aaruwan siiqetteeta. Yihoowa azzanttiya aybanne oottennaadan inttena aybi maaddana danddayii? (1 Qor. 6:18) Pokkobaa haasayennaadan, asi baynnasan issippe takkennaadaaninne likkiyappe aattidi uyennaadan naagettana koshshees. (Efi. 5:3) Hageeti intte inddan gayttanawu keehi qaaqqatanaadaaninne suurebaa oottanawu metootanaadan oottana danddayoosona. Intte issoy issuwa bonchchanawunne Yihooway kessido maarata kaallanawu waatana danddayiyakko ubbatoo haasayiyogee loꞌꞌo. (Leemiso 22:3 nabbaba.) Toophphiyan deꞌiya Daawitanne Almmaazo maaddidabaa beꞌa. Eti hagaadan giidosona: “Nuuni daro asay deꞌiyosan, woy hara nu laggeti deꞌiyosan wodiya issippe aattoos. Nuuni kaame giddon woy issi keettan nurkka takki erokko. Hegaa gishshawu paaccana danddayiya hanotatuppe naagettida.”

11. Aqo oyqqanawu qoppidi wodiya aattiyageeti siiqiyogaa waati qonccissanaakko kuuyiyo wode ay qoppana koshshii?

¹¹ Aqo oyqqanawu qoppidi wodiya aattiyageeti issoy issuwa siiqiyogaa bessiyogee koshshiyabee? Intte siiqoy gujji gujji biyo wode suure ogiyan intte siiquwa qonccissanawu kuuyana danddayeta. Shin intte inddan gayttanawu keehi qaaqqatiyo wode loꞌꞌobaa kuuyanawu keehi metootana danddayeta. (Sii. 1:2; 2:6) Qassi intte siiquwa qonccissiyo wode intte naagettennan aggidi, Yihoowa ufayssennabaa oottana danddayeta. (Lee. 6:27) Hegaa gishshawu, intte aqo oyqqanawu qoppidi wodiya issippe aattiyogaa doommido heeran, Yihooway kessido maarata, qassi intte siiquwa bessanawu oottanabatanne oottennabata haasayite.c (1 Tas. 4:3-7) Inttena hagaadan oychchite: ‘Nu heeraa asay nuuni issoy issuwawu bessiyo siiquwa waati xeellii? Yaatiyogee nuuni inddan gayttanawu qaaqqatanaadan oottana danddayii?’

12. Aqo oyqqanawu qoppidaageeti maayettana xayikko ay akeekana koshshii?

¹² Metoy merettikko waati giigissana danddayetii? Issi issitoo intte maayettana xayikko, hegee intte issoy issuwawu haniya aqo lagge gidana danddayekketa giyogee? Gidennan aggana danddayees; aqo laggeti ubbay issi issitoo maayettokkona. Issoy issuwa bonchchiyogeenne haray koyiyobaa kaseyanawu eeno giyogee aqo deꞌoy minnanaadan oottees. Hegaa gishshawu, intte metuwa haꞌꞌi giigissiyogee intte aqo deꞌoy giiga gidanaakkonne bessiyaba gidana danddayees. Inttena hagaadan oychchite: ‘Merettida metuwabaa woppu giidi bonchchuwan haasayana danddayiyoo? Nu mooruwa ammanidi giigissanawu baaxetiyoo? Nuuni eesuwan maayettiyoo, maarotaa oychchiyoonne atto giyoo?’ (Efi. 4:31, 32) Shin intte aqo oyqqanawu qoppidi issippe aattiyo wode darotoo maayettennaba woy palamettiyaba gidikko hanotay intte aqo oyqqi simminkka giigennaba gidana danddayees. He uri neeyyo hanennaagaa neeni akeekikko, aqo oyqqanawu qoppidi issippe wodiya aattiyogaa agganawu kuuyiyogee intte naaꞌꞌawukka keehi loꞌꞌo gidana danddayees.d

13. Aqo oyqqanawu qoppidi wodiya aattiyageeti ay keena wodiya takkanaakko kuuyanaadan eta aybi maaddanee?

¹³ Hegawu aattiyo wodee ay keena gidana koshshii? Eesuwan kuuyiyobay iitabaa kaalettana danddayees. (Lee. 21:5) Yaaniyo gishshawu intte issoy issuwa loytti eranawu adussa wodiya issippe aattana koshshees. Shin intte bessiyagaappe aaro wodiya takkana koshshenna. Geeshsha Maxaafay hagaadan gees: “Koyiyoobai polettennan gam77iyoogee azzanissees.” (Lee. 13:12) Hegaa bollikka, intte issippe daro wodiya aattikko hegee intte pokkobaa oottanaadan paacettiyo wode eqettanawu keehi metootanaadan oottana danddayees. (1 Qor. 7:9) Intte aqo oyqqanawu qoppidi aattiyo wodee ay keena gidana koshshiyakko loytti qoppiyogaappe inttena hagaadan oychchana danddayeta, ‘Nuuni issibaa kuuyanawu issoy issuwabaa erana koshshiya harabay deꞌii?’

HARATI WAATI MAADDANA DANDDAYIYONAA?

14. Aqo oyqqanawu qoppidi issippe wodiya aattiyageeta harati ayba ogetun maaddana danddayiyonaa? (Misiliyakka xeella.)

¹⁴ Aqo oyqqanawu qoppidi wodiya aattiyageeta nuuni erikko eta waati maaddana danddayiyoo? Nuuni etaara qumaa maanawu, so asaa goynuwawu, woy allaxxanawu shoobbana danddayoos. (Roo. 12:13) He wodetun eti issoy issuwa loytti erana danddayoosona. Issisaa etaara biyogan, kaamiyan eta efiyogan, woy eti issoy issuwara haasayanaadan eta intte soo efiyogan maaddana danddayeta. (Gal. 6: 10) Qommoora ibaa denttido Alisha onne Aschiwina ufayssidabaa hassayawusu. A hagaadan gaasu, “Amarida ishanttinne michchontti nuuni asi deꞌiyosan issippe takkanawu koyikko etakko baana danddayiyogaa nuussi yootido wode keehi ufayttida.” Aqo oyqqanawu qoppidi wodiya aattiyageeti neeni etaara gidanaadan oychchikko, ne hegaa ne laggeta maaddiyo maatadan qoppana danddayaasa. Asi baynna sohuwan eti banttarkka takkanaadan neeni mule oottana koshshenna; shin eti bantta buzo allaalliyabaa haasayanaadan hanotaa injjeya.—Pili. 2:4.

15. Aqo oyqqanawu qoppidi wodiya aattiyageeta laggeti maaddana danddayiyo hara ogee aybee? (Leemiso 12:18)

¹⁵ Aqo oyqqanawu qoppidi wodiya issippe aattiyageeta nuuni haasayiyoban woy haasayennan aggiyobankka maaddana danddayoos. Issi issitoo nuuni nu huuphiya naagiyogan aybanne haasayennan aggiyogee koshshana danddayees. (Leemiso 12:18 nabbaba.) Leemisuwawu, issi ishaynne michchiya aqo oyqqanawu qoppidi wodiya aattiyogaa doommidoogaa nuuni haratussi yootanawu keehi koyana danddayoos; shin eti hara uri yootanaadan koyennan aggana danddayoosona. Aqo oyqqanawu qoppidi wodiya issippe aattiyageeta zigirana, woy eta buzo allaalliyabaa denttidi eta borana koshshenna. (Lee. 20:19; Roo. 14:10; 1 Tas. 4:11) Qassi eti aqo oyqqanaadan denttettiyabaa nuuni haasayana woy oychchana bessenna. Elzzo giyo michchiyanne I azinay hagaa hassayoosona, “Nuuni nu bullachchaabaa haasayennan deꞌishin harati hegaabaa nuna oychchido wode yeellatida.”

16. Issi ishaynne michchiya aqo oyqqanawu qoppidi issippe wodiya aattiyogaa aggikko nuuni waatana koshshii?

¹⁶ Issi ishaynne michchiya aqo oyqqanawu qoppidi wodiya aattiyogaa aggikko shin? Hegaabaa yootanaadan nuuni eta iisettana woy etappe issi urawu exatana koshshenna. (1 PHe. 4:15) Leeꞌo giyo michchiya hagaadan gaasu: “Ishaynne taani aqo oyqqanawu qoppidi wodiya aattiyogaa aggidoogaa xeelliyagan harati bantta qofaa haasayishin siyaas. Hegee tana keehi azzanttiis.” Issi ishaynne michchiya aqo oyqqanawu qoppidi issippe wodiya aattiyogaa aggikko, nuuni eti iitabaa kuuyidabadan qoppana koshshenna. Hegee eti loꞌꞌobaa kuuyanaadan maaddido gishshawu eti issippe aattido wodee hada giyogaa gidenna. Shin eti kuuyidobaa gaasuwan azzanananne barkka attidabadan qoppana danddayoosona. Yaatiyo gishshawu nuuni eta maaddiyo ogeta koyana danddayoos.—Lee. 17:17.

17. Aqo oyqqanawu qoppidi wodiya aattiyageeti ubbatoo oottana koshshiyabay aybee?

¹⁷ Nuuni beꞌidoogaadan, aqo oyqqanawu qoppidi wodiya aattiyogee paacciyaba gidana danddayees; shin hegee ufayssiyabakka gidana danddayees. Jeseka hagaadan gaasu: “Tumaa haasayanawu aqo oyqqanawu qoppidi wodiya issippe aattiyogee baaxeyiyaba. Shin nu wodiyanne wolqqaa goꞌettidi issoy issuwa loytti eranawu baaxetidoogan keehi ufayttaas.” Intte aqo oyqqanawu qoppidi wodiya issippe aattikko, issoy issuwa loytti eranawu baaxetiyogaa aggoppite. Intte yaatiyogee loꞌꞌobaa kuuyanaadan maaddana.