Kiristtaaneti Ushshaa Waati Xeellana Koshshii?

Kumetta saꞌan ushshaara gayttidaagan asaa xeelay dumma dumma. Amaridaageeti bantta laggetuura issi issitoo ushshaa uyoosona. Harati mule uyennan agganawu kuuyidosona. Harati qassi likkiyaappe aatti uyidi mattottoosona. SHin, Geeshsha Maxaafay ushshaa xeelliyaagan woygii?

1. Ushshaa uyiyoogee balee?

Geeshsha Maxaafay ushshaa uyiyoogee bala geenna. Xoossay nuussi immido loꞌꞌo imotatu darotuppe issoy “asaa wozanaa ufaissiya woiniyaa” gidiyoogaa Geeshsha Maxaafay yootees. (Mazamure 104:14, 15) Geeshsha Maxaafay amarida ammanettida attuma asatinne macca asati ushshaa uyidoogaa yootees.—1 Ximootiyoosa 5:23.

2. Geeshsha Maxaafay ushshaa uyiyaageeta zoriyoobay aybee?

Yihoowi nuuni likkiyaappe aatti uyennaadaaninne mattottennaadan azaziis. (Galaatiyaa 5:21) A Qaalay, ‘Daro woine eessaa uyiyaageetuura zuppetoppa’ yaagees. (Leemiso 23:20) Nuuni ushshaa uyikko, nu qoppiyoobaa, haasayiyoobaanne oottiyoobaa moorana woy nu payyatettaa qohana danddayiyaagaa keenaa likkiyaappe aattidi uyana koshshenna. Nuuni likkiyaappe aattennan agganawu metootikko, mule uyennan aggana koshshees.

3. Ushshaara gayttidaagan harati kuuyiyoobaa waati bonchchana danddayiyoo?

Ushshaa uyiyoogee woy aggiyoogee issi uri bawu kuuyiyooba. Ushshaa darissennan uyiya ura borananne abaa yiggana woy uyanawu koyenna uri uyanaadan A iisettana koshshenna. (Roome 14:10) Nuuni uyiyoogee harata xubbiyaaba gidikko, uyanawu koyokko. (Roome 14:21 nabbaba.) Nuuni ‘[nuna] goꞌꞌiyaabaa gidennan harata goꞌꞌiyaabaa’ koyoos.—1 Qoronttoosa 10:23, 24 nabbaba.

LOYTTA AKEEKA

4. Neeni ushshaa uyanaakko woy agganaakko kuuya

Ushshaara gayttidaagan Yesuusa qofay aybee? Hegaa zaaruwaa eranawu I koyro oottido maalaaliyaabaa qoppa. Yohaannisa 2:1-11 nabbabite; yaatidi ha oyshata tobbite:

• Ushshaanne A uyiya asaa xeelliyaagan Yesuusa qofay aybakko ha maalaaliyaabaappe ay tamaarana danddayiyoo?

• Yesuusi ushshaa uyiyoogaa diggibeenna gishshawu, issi Kiristtaanee ushshaa darissennan uyiya ura waati xeellana koshshii?

SHin issi Kiristtaanee ushshaa uyana danddayees giyoogee uyiyoogee awudenne A qohenna giyoogaa gidenna. Leemiso 22:3 nabbabite; yaatidi kaallidi deꞌiya hanotatun ushshay waati qohana danddayiyaakko tobbite:

• Kaamiyaa laagganaappe woy maashiniyan oottanaappe kase.

• SHahaarido wode.

• Ushshaa uyennaadan dottoree yootikko.

• Likkiyaappe aattennan agganawu metootikko.

• Higgee neeni ushshaa uyennaadan diggikko.

• Kase likkiyaappe aatti uyiyo gishshawu mule uyennan agganawu kuuyida uri ne matan deꞌiyo wode.

Bullachchan woy asay wodiyaa aattanawu shiiqiyo sohuwan neeni ushshaa asaa sintti aattana koshshii? Kuuyanawu nena aybi maaddanaakko akeekanawu, BIIDUWAA beꞌite.

BIIDUWAA: Taani Ushshaa Asaa Sintti Aattana Koshshii? (2:41)

Roome 13:13​nne 1 Qoronttoosa 10:31, 32 nabbabite. Xiqiseta huuphiyan huuphiyan nabbabidi ha oyshaa tobbite:

• Ha maaraa oosuwan peeshshiyoogee Yihoowa ufayssiyaabaa kuuyanawu nena waati maaddana danddayii?

5. Ay keenaa uyanaakko kuuya

Neeni ushshaa uyikko, hagaa hassaya: Ushshaa uyennaadan Yihoowi diggana xayikkonne, darissennaadan diggiis. Aybissi? Hooseꞌa 4:11, 18 nabbabite; yaatidi ha oyshaa tobbite:

• Issi uri likkiyaappe aattidi uyikko hananabay aybee?

Nuuni likkiyaappe aattidi uyennaadan aybi maaddana danddayii? Nuuyyo danddayettennabaa akeekana koshshees. Leemiso 11:2 nabbabite; yaatidi ha oyshaa tobbite:

• Neeni ay keenaa uyanaakko kuuyiyoogee loꞌꞌo gidiyoy aybissee?

6. Issi uri likkiyaappe aatti uyiyoogaa agganaadan maaddanabay aybee?

BIIDUWAA: ‘Ufayssi Baynna Deꞌuwaa Deꞌiyoogaa Aggaas’ (6:32)

• Biiduwan beꞌidoogaadan, Dimitira ushshay waati qohidee?

• I ushshaa uyiyoogaa sohuwaara aggana danddayidee?

• I likkiyaappe aatti uyiyoogaa wurssettan waati aggidee?

Koyro Qoronttoosa 6:10, 11, nabbabite; yaatidi ha oyshata tobbite:

• Mattottiyoogee ay keena qohii?

• Likkiyaappe aattidi uyiya uri laamettana danddayiyoogaa bessiyaabay aybee?

Maatiyoosa 5:30 nabbabite; yaatidi ha oyshaa tobbite:

• Kushiyaa qanxxi oliyoogee Yihoowa ufayssanawu issibaa aggi bayiyoogaa bessiya leemiso. Neeni likkiyaappe aattada uyiyoogaa agganawu baaxetikko, ay oottana danddayay?a

Koyro Qoronttoosa 15:33 nabbabite; yaatidi ha oyshaa tobbite:

• Hagaa keenaa uya giidi ne laggeti waati iisettana danddayiyoonaa?

AY AKEEKADII?

Yihoowi nuuni ufayttanaadan ushshaa immikkonne, likkiyaappe aattennaadaaninne mattottennaadan azaziis.

Zaaretuwaa

• Geeshsha Maxaafay ushshaabaa ay yootii?

• Likkiyaappe aattidi uyiyoogee waati qohii?

• Ushshaara gayttidaagan harati kuuyiyoobaa waati bonchchana danddayiyoo?

PILGGA

Yelagati ushshaara gayttidaagan loꞌꞌobaa kuuyanawu waatana danddayiyoonaa?

Ushshaa Gaasuwan Gakkiyaabaa Qoppa (2:31)

Likkiyaappe aattada uyiyoogaa agganawu ay oottana danddayiyaakko akeeka.

“Ushshaa Bessiyaagaadan Xeelliyoogaa” (Wochchiyo Keelaa, Usuppune 1, 2010)

Issi Kiristtaanee ba ushshaa burccukkuwaa haratuugaara xoqqu oottana woy domꞌꞌissana koshshii?

“Nabbabiyaageetu Oyshaa” (Wochchiyo Keelaa huuphe yohuwaa)

“Taani Kase Daassa Barmmeele Mala” giyaagan, issi bitanee likkiyaappe aattidi uyiyoogaa waati aggidaakko beꞌa.

“Geeshsha Maxaafay Asay Laamettanaadan Oottees” (Wochchiyo Keelaa huuphe yohuwaa)