Uuxa giyo biittan Yihoowayyo goynniya issi bitanee deꞌees. A sunttay Iyyooba. I ba son daro asay deꞌiyo keehi dure asa. I keha; qassi azinay hayqqido maccaasaanne aawu aaya baynna hiyyeesa naata maaddees. SHin Iyyoobi suurebaa oottiyo gishshawu, a ayba metoykka gakkennee?

Iyyoobi erana xayikkonne, Seexaanaa Dabloosi a xeelliiddi deꞌees. Yihoowi Seexaanaayyo hagaadan giis: ‘Ta ashkkaraa Iyyooba akeekada beꞌadii? Saꞌaa bollan a mala asi baawa. I taani yootiyoobaa siyees; qassi suurebaa oottees.’ Seexaanay hagaadan giis: ‘Iyyoobi neeyyo azazettees. Neeni a naagadasanne anjjadasa. Neeni ayyo gadiyaanne mehiyaa immadasa. Neeni appe ubbabaa ekkikko, i neeyyo goynniyoogaa aggana.’ Yihoowi, ‘Neeni Iyyooba paaccana danddayaasa. SHin neeni a woroppa’ yaagiis. Seexaanay Iyyooba paaccanawu oychin Yihoowi ayssi eeno giidee? Iyyoobi ammanettiyoogaa aggennaagaa i eriyo gishshataassa.

Seexaanay Iyyooba daro metuwan paacciyoogaa doommiis. I Iyyooba mehiyaanne hareta wuuqqana mala koyro Saaba biittaa asaa kiittiis. Hegaappe simmin tamay Iyyooba dorssaa ubbaa miis. Qassi Kaladaawe biittaa asati a gaameelata wuuqqidosona. Eti he mehiyaa heemmiya ashkkarata woridosona. Hegaappe kaallidi a wolqqaama metoy gakkiis. Iyyooba naati ubbay issi keettan issippe shiiqidi qumaa miishin he keettay eta bolli kunddin hayqqidosona. Iyyoobi keehi azzanikkokka, Yihoowayyo goynniyoogaa aggibeenna.

Iyyoobi keehi waayettanaadan Seexaanay koyido gishshawu, Iyyoobawu kumetta bollay masunxxanaadan oottiis. Iyyoobi keehi sahettiis. I ba bolli ha ubbabay ayssi gakkiyaakko erenna. SHin Iyyoobi haꞌꞌikka Yihoowayyo goynnees. Xoossay ha ubbabaa beꞌiis; beꞌidi Iyyooban keehi ufayttiis.

Seexaanay hegaappe guyyiyan Iyyooba paaccanawu heezzu asata kiittiis. Eti ayyo, ‘Neeni nagaraa oottada hegaa qosanawu malennan aggakka. Xoossay nena qaxxayiiddi deꞌees’ yaagidosona. Iyyoobi, ‘Taani aybanne iitabaa oottabeykke’ yaagiis. SHin i he wode ha meto ubbay gakkanaadan oottiyay Yihoowa giidi qoppiyoogaa doommiis; qassi baassi Xoossay suure pirddibeenna giidi yootiis.

Eelihu giyo bitanee eti haasayiyoobaa coꞌꞌu giidi siyiiddi takkiis. Guyyeppe hagaadan giidi zaariis: ‘Intte ubbay haasayidobay bala. Nuuni akeekana danddayiyoogaappe Yihoowi aadhees. I iitabaa mule oottana danddayenna. I ubbabaa beꞌees; qassi metoy gakkiyo wode asaa maaddees.’

Hegaappe simmin Yihoowi Iyyoobawu haasayiis. I hagaadan giis: ‘Taani saluwaanne saꞌaa medhiyo wode, neeni awan deꞌay? Neeni tana ayssi suure pirddenna gay? Neeni haasayaasa shin, issibay aybissi haniyaakko erakka.’ Iyyoobi ba mooruwaa ammanidi hagaadan giis: ‘Taani balaas. Taani kase nebaa siyaas; shin haꞌꞌi taani nena eraas. Neeni ubbabaa oottanawu danddayaasa. Taani haasayidobaa gishshawu, tawu atto ga.’

Iyyooba paacee wurin, Iyyoobi sahuwaappe paxanaadan Yihoowi oottiis; qassi ayyo kase deꞌiyaagaappe darissidi immiis. Iyyoobi ufayttidi daro layttaa deꞌiis. Iyyoobi metiya wodiyankka Yihoowayyo azazettido gishshawu, Yihoowi a anjjiis. Neeni aybi gakkikkokka, Iyyoobadan ubbatoo Yihoowawu goynnanee?

Gibxxe biittan, Yaaqooba soo asay Israaꞌeelata geetettiis. Yaaqoobinne Yooseefi hayqqi simmin, hara Paarooni haariyoogaa doommiis. Israaꞌeelati Gibxxetuppe keehi wolqqaamido gishshawu i yayyiis. Hegaa gishshawu, he Paarooni Israaꞌeelata aylle oottiis. I eti xuubiyaa medhanaadaaninne deexo oosuwaa oottanaadan giddiis. SHin Gibxxeti Israaꞌeelati deexobaa oottanaadan keehi giddikkokka, Israaꞌeelatu qooday yaa gujjiis. Paarooni hegaa dosibeenna gishshawu, Israaꞌeelati yeliyo attuma naata ubbaa woranaadan azaziis. Israaꞌeelati ay keena yayyidaakko qoppana danddayay?

Yokebeedo giyo Israaꞌeela maccaasiyaa loꞌꞌiya attuma naꞌaa yelaasu. Maccaasiyaa a ashshanawu keeshiyan yeggada, Nayle SHaafan deꞌiya ceeccaa giddon qosaasu. Naꞌaa michiyaa Miiriyaama haniyaabaa beꞌanawu naꞌaappe daro haakkennan takkaasu.

Paaroona naꞌiyaa bollaa meecettanawu shaafaa baada keeshiyaa beꞌaasu. Keeshiyaa giddon yeekkiya naꞌaa beꞌada a naꞌawu qarettaasu. Miiriyaama, ‘Neeyyo ha naꞌaa xanttanawu maccaasa issinno ehaanawu taani boo?’ yaagaasu. Paaroona naꞌiyaa ee, yaagin, Miiriyaama baada ba aayyiyo Yokebeedo ehaasu. Paaroona naꞌiyaa o, ‘Ha naꞌaa efaada, taayyo xanttashsha; taani neeyyo damoozaa qanxxana’ yaagaasu.

Yokebeeda naꞌay gitaa gidin, a Paaroona naꞌeessi ehaasu; Paaroona naꞌiyaa a Muusa gaada sunttada ba naꞌaadan dichaasu. Muusee Paaroona naꞌa gididi dicciis; qassi i koyiyo aybanne demmana danddayees. SHin Muusee Yihoowa mule dogibeenna. I Gibxxe biittaa asa gidennan, Israaꞌeela asa gidiyoogaa erees. Qassi i Yihoowawu haggaazanawu dooriis.

Muusee bawu layttay 40 gidin, ba asaa maaddanawu qofaa qachiis. I Gibxxe biittaa asa issoy Israaꞌeela aylliyaa wadhishin beꞌiis; Muusee he Gibxxe bitaniyaa keehi shocin i hayqqiis. Muusee anhaa shafiyaa giddon qottiis. Paarooni hegaa eridi, Muusa woranawu maliis. SHin Muusee Midiyaama biitti baqatiis. Yihoowi a yan naagiis.