Muuseenne Aarooni Paaroonawu, ‘Neeni ta asaa yeddennan ixxikko, taani ne biittan udunxxiyaa yeddana’ yaagidi, Xoossay kiittidoogaa yootanawu biidosona. Gibxxe asatu duretu keettaakka hiyyeesatu keettaakka udunxxee gawwattiiddi geliis. Biitta ubban he udunxxee kumiis. SHin Israaꞌeelati deꞌiyo Goshena biittan udunxxee baawa. Ha oyddantto boshaappe doommidi wodhida boshati qohidoy Gibxxe asaa xalla. Paarooni, ‘Ha udunxxiyaa digganaadan Yihoowa woossite. Intte asay baana danddayees’ yaagidi minttidi woossiis. SHin Yihoowi udunxxee kichanaadan oottin, Paarooni ba qofaa laammiis. Paarooni tamaaranee?

Yihoowi, ‘Paarooni ta asaa yeddennan ixxikko, Gibxxe asaa mehee sahettananne hayqqana’ yaagiis. Wonttetta gallassi mehee hayqqiyoogaa doommiis. SHin Israaꞌeelatu mehee hayqqibeenna. Haꞌꞌikka Paaroona wozanay muumin, i siyennan ixxiis.

Hegaappe simmin Yihoowi Muusee paaroonakko biidi carkkuwawu bidinttaa laalanaadan yootiis. Bidinttay buhe gididi carkkuwan kumiis; qassi Gibxxetu ubbaa bolli wodhiis. He bidinttay Gibxxe asaa ubbaa bollinne mehe ubbaa bolli sakkiya merkkoy wodhanaadan oottiis. Yaaninkka, Paarooni Israaꞌeelata yeddennan ixxiis.

Yihoowi Muusa Paaroonakko hagaadan giidi kiittiis: ‘Neeni haꞌꞌikka ta asaa yeddennan ixxadii? Wontto shachay ne biittan wodhana.’ Wonttetta gallassi, Yihoowi shachaa, dadaanne tamaa yeddiis. Hegee Gibxxe biitta ubban wodhida shacha ubbaappe aadhiya iita shachcha. Mitta ubbaanne gaden mokkidabaa ubbaa qohiis; shin Goshena biittan shachi wodhibeenna. Paarooni, ‘Hagee eqqanaadan Yihoowa woossa. Simmi hagaappe sinttan intte baana danddayeeta’ yaagiis. SHin shachay wodhiyoogaanne iray bukkiyoogaa aggin sohuwaara Paarooni ba qofaa laammiis.

Hegaappe guyyiyan Muusee, ‘Haꞌꞌi boolee shachaappe attida guuttabaa, gaden dicciya mittaakka ubbaa maana’ yaagiis. Miilooniyan qoodettiya boolee gadeeninne mittaa bolli attida ubbabaa miis. Paarooni, ‘Yihoowi ha Booliyaa diggana mala woossite’ yaagidi minttidi oychiis. SHin Yihoowi booliyaa diggi simmin, haꞌꞌikka Paaroona wozanay muumiis.

Yihoowi Muuseyyo, ‘Ne kushiyaa saluwaa dentta’ yaagidi yootiis. Sohuwaara saloy muleera xumiis. Heezzu gallassawu, Gibxxeti aybanne woy oonanne beꞌana danddayibookkona. Israaꞌeelatu keetta xallan pooꞌoy deꞌees.

Paarooni Muusessi, ‘Inttenne intte asay baana danddayeeta. Intte mehiyaa xalaalaa hagan yeggidi biite’ yaagiis. Muusee, ‘Nu Xoossaayyo yarshshana mala nuuni mehiyaa efaana koshshees’ yaagiis. Paarooni keehi hanqqettiis. I, ‘Kicha ta achappe! Naaꞌꞌantto taani nena beꞌikko, nena worana’ yaagiis.

Muusee naaꞌꞌantto Paaroona beꞌanawu malennaagaa yootiis. SHin i baanaappe kase Paaroonawu hagaadan giis: ‘Qammawu gina shaahuwan, Gibxxe biittan deꞌiya bayra attuma naꞌi ubbay, Paaroona bayra naꞌaappe doommidi, ashkkaratu bayra attuma naata gakkanaassi hayqqana.’

Yihoowi Israaꞌeelati dumma qumaa maanaadan yootiis. I hagaadan giis: ‘Intte orgge dorssa woy deeshsha shukkite; shukkidi suuttaappe amaridaagaa ekkidi, keettaa qoriyaa tiyite. Ashuwaa xiixxite, xiixxidi irshshoy baynna oyttaara miite. Maayuwaa maayite, intte caammaa wottite, baanawu giigetti uttite. Taani ha gallassi qammi inttena laꞌa kessana.’ Israaꞌeelati ay keena ufayttidaakko qoppana danddayay?

Qammawu gina shaahuwan, Yihoowa kiitanchay Gibxxen deꞌiya ubba keetti biis. Penggen suuttay tiyettibeenna keettan deꞌiya bayra attuma naati hayqqidosona. SHin kiitanchay suuttay tiyettido keettaa aggi aadhiis. Gibxxen duretu keettankka hiyyeesatu keettankka naꞌi hayqqiis. SHin Israaꞌeelatu naatuppe issoynne hayqqibeenna.

Paaroona attuma naꞌaykka hayqqiis. Paaroonawu hegaa danddayidi aattanawu ixettiis. I Muuseyyoonne Aaroonayyo sohuwaara hagaadan giis: ‘Denddite! Hagaappe kiyite! Biidi intte Xoossaayyo goynnite. Intte mehiyaa ekkidi biite!’

Aginay goobanaa uttin, Israaꞌeelati ubbay maaran Gibxxeppe kiyidosona. Israaꞌeela attuma asaa qooday 600,000; qassi daro maccaasaynne naati deꞌoosona. Qassi etaara hara daro asay biis; he asaykka Yihoowayyo goynnana danddayees. Israaꞌeelati wurssettan laꞌa kiyidosona!

Yihoowi eta waatidi ashshidaakko hassayanawu, eti layttan layttan hegaa mala dumma qumaa moosona. Hegee Paasikaa geetettees.