Yihoowi Muuseyyo hagaadan giis: ‘Taakko deriyaa pude haaya. Taani ta higgiyaa masettida shuchatun xaafana; xaafada hegaa neeyyo immana.’ Muusee deriyaa kiyidi 40 gallassaanne qammaa yan takkiis. I yan deꞌishin, Yihoowi masettida naaꞌꞌu shuchan Tammu Azazota xaafiis; yaatidi he shuchata Muusessi immiis.

Guuttaa takkidi, Israaꞌeelati Muusee banttana aggibayidabadan qoppidosona. Eti Aaroonayyo, ‘Issi uri nuna kaalettanaadan koyoos. Nuuyyo xoossaa medha’ yaagidosona. Aarooni, ‘Intte worqqaa taayyo immite’ yaagiis. I worqqaa seerissidi maraa eeqaa medhiis. Asay, ‘Ha maray nuna Gibxxe biittaappe kessida, nu Xoossaa’ yaagiis. Eti worqqaappe medhido marawu goynniyoogaa doommidosona; qassi baalaa bonchidosona. Hegee balee? Ee, bala; ayssi giikko, asay Yihoowa xalaalawu goynnanawu qaalaa geliis. SHin haꞌꞌi eti he qaalaa naagennaagaa bessiiddi deꞌoosona.

Yihoowi aybi hanettiiddi deꞌiyaakko beꞌidi Muuseyyo hagaadan giis: ‘Neeni asaakko duge wodha. Eti taayyo azazettennan ixxidi eeqawu goynniiddi deꞌoosona.’ Muusee masettida naaꞌꞌu shuchaa oyqqidi deriyaappe duge wodhiis.

Dunkkaanidosaa Muusee matiyo wode, asay yexxiyoogaa siyiis. He wode eti duriyaageetanne maraa eeqawu ziggiyaageeta i beꞌiis. Muusee keehi hanqqettiis. I masettida naaꞌꞌu shuchaa saꞌan olin, hegee meqerettiis. I sohuwaara he eeqaa xayssiis. Hegaappe simmin i Aaroona, ‘Neeni ha iitabaa oottanaadan ha asay nena waatidi ammanttidee?’ yaagidi oychiis. Aarooni hagaadan giis: ‘Hanqqettoppa. Ha asay keehi iita gidiyoogaa neeni eraasa. Eti banttawu eeqaa koyido gishshawu, taani eta worqqaa taman yeggin, ha maray kiyiis.’ Aarooni oottana bessennabaa oottiis. Muusee haranttuwaa deriyaa pude kiyiis; kiyidi asawu atto gaanaadan Yihoowa woossiis.

Yihoowi baayyo azazettanawu eeno giidaageeta atto giis. Israaꞌeelati Muusee eta kaalettiyo wode kaalliyoogee keehi koshshiyaba gidiyoogaa akeekadii?

Muusee Siinaa Deriyaa kiyin, Xoossaa Dunkkaaniyaa giyo, Israaꞌeelati Yihoowawu goynnana sohuwaa giigissanaadan Yihoowi ayyo yootiis. Eti he dunkkaaniyaa tookkidi baana danddayoosona.

Yihoowi, ‘Xoossaa Dunkkaaniyaa giigissanawu, asay immanaadan yoota’ yaagiis. Israaꞌeelati worqqaa, biraa, nahaasiyaa birataa, alꞌꞌo shuchata, alleequwaa, qacinaa, liinuwaa, mehiyaa galbbaanne hara darobaa immidosona. Eti darobaa immin, Muusee eta, ‘Gidees! Haraa ehooppite’ yaagiis.

Xoossaa Dunkkaaniyaa giigissiyoogan hiillaa eriya daro asay maaddiis. Yihoowi etawu oosuwaa eraa immiis. Issoti issoti suqqoosona, daddoosona woy alleeqissidi sikkoosona. Harati shuchaappe woy worqqaappe oottoosona, woy mittaa massoosona.

Asay Yihoowi yootidoogaadan Xoossaa Dunkkaaniyaa giigissiis. Eti he dunkkaaniyan Geeshsha Sohuwaa, Ubbaappe Aadhida Geeshsha Sohuwaappe shaakkiya loꞌꞌiya magalashuwaa giigissidosona. Ubbaappe Aadhida Geeshsha Sohuwan odooruwaappenne worqqaappe oosettida maachaa taabootay deꞌees. Xomppiyaa wottiyoobay, xarapheezaynne ixaanaa cuwayiyo saaxinee Geeshsha Sohuwan deꞌees. Yarshshiyo sohoy gitaynne nahaasiyaappe oosettida keree dabaaban deꞌees. Israaꞌeelati ‘Yihoowawu azazettana’ giidoogaa maachaa taabootay eta hassayissees. Maachay aybakko eray? Hegee qaalaa geliyo dummaba.

Yihoowi Aarooninne a attuma naati Xoossaa Dunkkaaniyan qeese gidi oottanaadan dooriis. Eti he dunkkaaniyaa naagoosonanne yan Yihoowayyo yarshshoosona. Ubbaappe Aadhiya Geeshsha Sohuwaa geliyay qeese ubbatu halaqa gidida Aaroona xalla. I ba nagaraa, ba soo asaa nagaraanne Israaꞌeela asaa ubbaa nagaraa gishshawu yarshshanawu layttaappe issitoo yaa gelees.

Xoossaa Dunkkaaniyaa oosoy Israaꞌeelati Gibxxeppe kiyoosappe issi laytta gidin wuriis. Haꞌꞌi eti Yihoowawu goynniyo sohoy deꞌees.

Yihoowi Xoossaa Dunkkaaniyaa ba bonchoy kumanaadaaninne shaaray kammanaadan oottiis. Israaꞌeelati he dunkkaaniyaa shaaray kammiyo wode deꞌiyoosaappe qaaxxokkona. SHin shaaray denddiyo wode baana bessiyoogaa eroosona. Eti Xoossaa Dunkkaaniyaa kolidi shaaraa kaalloosona.