Yaasu Yihoowa asaa daro layttawu kaalettidi, 110 layttan hayqqiis. A wode, Israaꞌeelati Yihoowayyo goynnidosona. SHin Yaasu hayqqi simmin, eti Kanaanetuugaadan, eeqawu goynniyoogaa doommidosona. Israaꞌeelati Yihoowa kaalliyoogaa aggin, i Kanaane kawoy Yaabini eti waayiyan deꞌanaadan oottana mala aggi bayiis. Asay Yihoowi maaddana mala woossiis. Yaatiyo gishshawu, eta kaalettanaadan i Baaraaqa sunttiis. I asay Yihoowakko simmanaadan maaddana.

Xoossay erissidobaa yootiya Deboora Baaraaqa xeesissaasu. A Yihoowi yootobaa ayyo hagaadan gaasu: ‘Qiishoona SHaafan Yaabina olanchatuura gayttanawu, 10,000 attuma asaa ekkada ba. Neeni yan Yaabina olanchatu gadaawaa, Sisaara xoonana.’ Baaraaqi iyyo, ‘Taani ne tanaara biikko baana’ yaagiis. A, ‘Taani nenaara baana; shin Sisaara woranay nena gidakka. Yihoowi macca asi a woranaagaa yootiis’ yaagaasu.

Deboora Baaraaqaaranne a olanchatuura olawu giigettanawu Taaboora Deriyaa baasu. Sisaari hegaa siyosaara, deriyaappe garssan deꞌiya wombban ba olaa gaaretanne wotaaddarata shiishshiis. Deboora Baaraaqawu, ‘Hachi gallassay Yihoowi neeyyo xoonuwaa immiyo gallassa’ yaagaasu. Baaraaqinne a 10,000 asay Sisaara wolqqaama olanchatuura gayttanawu deriyaappe wodhidosona.

He wode Yihoowi Qiishoona SHaafay kixxanaadan oottiis. Sisaara olaa paraa gaareta urqqay oyqqiis. Yaatin, Sisaari ba paraa gaariyaa aggidi baqatiis. Baaraaqinne a wotaaddarati Sisaara olanchata xoonidosona; shin Sisaari baqatiis! I baqatidi Yaaꞌeelo giyo maccaasee dunkkaaniyan qosettiis. A Sisaari uyanaadan maattaa ayyo immada, bullukkuwan a kammaasu. Daafurida olanchay xiskkiis. Yaatin, Yaaꞌeela akko loddan baada dunkkaaniyaa xishiyaa a huuphiyan xishaasu. Xishin i hayqqiis.

Baaraaqi Sisaara koyiiddi yiis. Yaaꞌeela ba dunkkaaniyaappe kiyaydda, ‘Haaya, giddo gela. Neeni koyiyo bitaniyaa nena bessana’ yaagaasu. Baaraaqi geliyo wode Sisaari zinꞌꞌosan hayqqiis. Israaꞌeelatu morkketa Yihoowi etawu aattidi immido gishshawu, Baaraaqinne Deboora Yihoowa mazamuriyan galatidosona. Hegaappe kaalliya 40 layttawu, Israaꞌeela biittay saruwan deꞌiis.

Israaꞌeelan koshay denddido wode, Naaꞌoomo giyo Israaꞌeela maccaasiyaa ba azinaaranne ba naaꞌꞌu attuma naatuura Mooꞌaaba biitti baasu. Guyyeppe Naaꞌoomi azinay hayqqiis. I attuma naati Urutonne Orppo giyo Mooꞌaabata ekkidosona. Guyyeppe, Naaꞌoomi naati hayqqidoogee azanttiyaaba.

Naaꞌooma koshaa wodee aadhidoogaa siyido wode, ba biitti simmanawu qofaa qachaasu. Urutanne Orppa iira biishin ogiyan Naaꞌooma etayyo hagaadan gaasu: ‘Intte ta naatussi loꞌꞌo maccaasa; qassi taassikka intte loꞌꞌo. Intte naaꞌꞌaykka azinaa gelanaadan taani koyays. Mooꞌaaba biitti intte soo biite.’ He maccaasati, ‘Nuuni nena siiqoos! Nu neeppe shaahettanawu koyokko’ yaagidosona. Naaꞌooma eti baanaadan yootiyoogaa aggabeykku. Wurssettan, Orppa guyye baasu; shin Uruta iira deꞌawusu. Naaꞌooma iyyo, ‘Orppa ba asaakkonne ba xoossatukko simmaasu. Neenikka iira ne aayee soo ba’ yaagaasu. SHin Uruta, ‘Taani neeppe shaahettikke. Ne asay ta asa, ne Xoossay ta Xoossaa gidana’ yaagaasu. Uruta yaagin, Naaꞌoomiyyo aybi siyettiis gaada qoppay?

Urutanne Naaꞌooma banggaa cahay doomettiyo wodiyan Israaꞌeela gakkidosona. Issi gallassi, Uruta Raꞌaabi naꞌaa, Booꞌeeza gaden shiishshishin attida kattaa qoranawu baasu. I Uruta Naaꞌoomippe duuxxennan deꞌiya Mooꞌaaba maccaasa gidiyoogaa siyiis. Uruta qorana mala kattaappe guuttaa agganaadan i ba oosanchatuyyo yootiis.

He galla omarssi Naaꞌooma Uruto, ‘Neeni hachi o gaden oottadii?’ yaagaasu. Uruta, ‘Booꞌeeza giyo bitaniyaa gaden oottaas’ yaagaasu. Naaꞌooma iyyo hagaadan gaasu: ‘Booꞌeezi ta azinaa dabbotuppe issuwaa. Hara macca naatuura a gaden oottiyoogaa aggoppa. Nena yan qohiyaabi baa.’

Cahay wurana gakkanaashin Uruta Booꞌeeza gaden oottaasu. Uruta mino oosanchanne loꞌꞌo maccaasa gidiyoogaa i akeekiis. He wode, issi uri attuma naata yelennan hayqqikko, a dabboy a maccaasiyo ekkees. Yaatiyo gishshawu Booꞌeezi Uruto ekkiis. Eti Yoobeeda giyo attuma naꞌaa yelin, i guyyeppe Kawuwaa Daawita aawaa aawa gidiis. Naaꞌoomi laggeti ufayttidosona. Eti, ‘Koyro, neeyyo keha Uruto Yihoowi immiis; qassi haꞌꞌi neeyyo naꞌaa naꞌay deꞌees. Yihoowi galatetto’ yaagidosona.