Guyyeppe, Israaꞌeelati Yihoowa aggidi, zaarettidikka eeqa xoossatuyyo goynnidosona. Laappun layttawu, Midiyaamati Israaꞌeelatu mehiyaa wuuqqidosonanne eta kattaa xayssidosona. Midiyaamatuppe attanawu, Israaꞌeelati kooppotuuninne deretun qosettidosona. Eti Yihoowi banttana ashshanaadan woossidosona. Woossin, Geedoona giyo issi bitaniyaakko Yihoowi kiitanchaa kiittiis. Kiitanchay, ‘Yihoowi neeni mino olancha gidanaadan dooriis’ yaagiis. Geedooni, ‘Taani Israaꞌeelata waatada ashshana danddayiyaanaa? Taani aynne maaddikke’ yaagiis.

Geedooni Yihoowi bana dooridoogaa waati eranee? I dorssaa ikisiyaa saꞌan wottidi Yihoowayyo hagaadan giis: ‘Maallado, xaazay ikise xalaalan deꞌidi, biitta ubbay mela gidikko, taani Israaꞌeelata ashshanaadan neeni koyiyoogaa erana.’ Wonttetta gallassi, ikisee keehi irxxidi musiis; shin biittay mela! Qassi kaallidi, Geedooni wonttetta gallassi dorssaa ikisee mela gidin, saꞌay irxxanaadan oychiis. Hegee hanin, Geedooni bana Yihoowi dooridoogaa wurssettan ammaniis. I Midiyaamata olanawu ba wotaaddarata shiishshiis.

Yihoowi Geedoonawu hagaadan giis: ‘Taani Israaꞌeelati xoonanaadan oottana. SHin ne wotaaddarati keehi daro gidiyo gishshawu, neeni olaa nerkka xoonidabadan qoppana danddayaasa. Yayyiya uri soo simmanaadan yoota.’ Hegaa gishshawu 22,000 wotaaddarati soo simmin, 10,000 asay attiis. Hegaappe simmin Yihoowi hagaadan giis: ‘Haꞌꞌikka wotaaddarati keehi daro. Neeni eta shaafaa ehaada, haattaa uyanaadan etawu yoota. Haattaa uyiiddi, morkkiyaa wochiyaageetu xallaa ashsha.’ Uyiyo wode naagetti uttidaageeti 300 asa xalla. Qoodan guutta ha asati 135,000 Midiyaama wotaaddarata xoonanaagaa Yihoowi yootiis.

He galla omarssi, Yihoowi Geedoonawu, ‘Haꞌꞌi Midiyaamata oliyo wodee gakkiis!’ yaagiis. Geedooni ba asatuyyo malkkatatanne eexxiya xomppiyaa yeggido xaarota immiis. I etayyo, ‘Taakko xeellidi, taani oottiyoogaa oottite’ yaagiis. Geedooni ba malkkataa punnidi, ba xaaruwaa menttidi, ba xomppiyaa xoqqu ootti oyqqidi, ‘Yihoowa bisuwaanne Geedoona bisuwaa’ yaagidi waassiis. Aara deꞌiya 300 asay ubbay hegaadan oottiis. Midiyaama asay keehi yayyidi ubbasaara baqatiis. Asay shabbirettidi, issoy issuwaa woriyoogaa doommiis. Haꞌꞌikka, Yihoowi Israaꞌeelati bantta morkketa xoonanaadan maaddiis.

Elqqaana giyo issi bitaniyawu, Haanno giyoonne Piniino giyo naaꞌꞌu machoti deꞌoosona; shin i Haanno keehi siiqees. Piniiniyyo daro naati deꞌiyo gishshawunne Haanniyo naꞌi baynna gishshawu, Piniina Haanno ubbatoo borawusu. Layttan layttan, Seelon deꞌiya Xoossaa Dunkkaaniyan goynnanawu Elqqaani ba soo asaa ekki bees. Issi wode eti yan deꞌishin, i siiqiyo Haanna keehi azzanidoogaa akeekiis. I, ‘Haannee, hayyanaa yeekkoppa. Neeyyo ta deꞌays. Taani nena siiqays’ yaagiis.

Guyyeppe, Haanna woossanawu barkka baasu. A bana Yihoowi maaddanaadan woossiyo wode, yeekkiyoogaa aggana danddayabeykku. A hagaadan gaada qaalaa gelaasu: ‘Yihoowa, neeni taayyo attuma naꞌa immikko, taani a neeyyo immana, i ba deꞌo laytta ubban neeyyo oottana.’

Qeese Ubbatu Halaqay Eeli Haanna siiphotiyoogaa beꞌiis; beꞌidi i a mattottaasu giidi qoppiis. Haanna, ‘CHii, ta godawu, taani mattottabeykke. Tana metida issi wolqqaamabay deꞌees; taani hegaabaa Yihoowayyo yootaydda deꞌays’ yaagada zaaraasu. Eeli ba balaa akeekidi iyyo, ‘Neeni koyiyoobaa Xoossay neeyyo immo’ yaagiis. Haanna ufayttada ba ogiyaa baasu. Issi laytta gakkennan, a attuma naꞌa yelaasu; yelada Sameela gaada sunttaasu. Haanna ay keena ufayttidaakko qoppana danddayay?

Haanna Yihoowayyo qaalaa gelidoogaa dogabeykku. A Sameela xanttiyoogaa aggosaara, i Xoossaa Dunkkaaniyan oottanaadan efaasu. A Eelayyo, ‘Taani yelanawu woossido naꞌay hagaa. A deꞌo laytta ubban, taani a Yihoowayyo immaas’ yaagaasu. Elqqaaninne Haanna layttan layttan Sameela oychanawu boosona; biyo wode ooratta qoliyaa ayyo ekki boosona. Yihoowi Haanniyyo hara heezzu attuma naatanne naaꞌꞌu macca naata immiis.