Israaꞌeelati haranttuwaakka Yihoowa aggidosona; aggidi eeqa xoossatuyyo goynniyoogaa doommidosona. Amoona asati Israaꞌeelatuura olaa olettido wode he xoossati Israaꞌeelata aynne maaddibookkona. Daro layttawu, Israaꞌeelati metootidosona. Wurssettan eti Yihoowayyo, ‘Nuuni nagaraa oottida. Hayyanaa nuna morkketuppe ashsha’ yaagidosona. Israaꞌeelati bantta eeqata xayssidi Yihoowawu zaarettidi goynniyoogaa doommidosona. Yihoowi eti metootiiddi deꞌiyoogaa beꞌanawu koyibeenna.

Israaꞌeelati Amoonatuura olettiyo olaa kaalettanaadan doorettida olanchaa sunttay Yofttaaha. I Yihoowayyo hagaadan giis: ‘Olan xoonanaadan neeni nuna maaddikko, taani soo simmiyo wode, tana mokkanawu ta sooppe koyro kiyiya uraa taani neeyyo immana giidi qaalaa geliis.’ Yihoowi Yofttaahe woosaa siyidi i olan xoonanaadan maaddiis.

Yofttaahee soo simmiyo wode, assi mexi issi naꞌa gidida, a macca naꞌiyaa a mokkanawu sooppe koyro kiyaasu. A durawusunne karaabiyaa baqqawusu. Yofttaahee waatidee? I ba gelido qaalaa hassayidi hagaadan giis: ‘Hay poora ta naꞌee! Tana kawushsharggadasa. Taani Yihoowayyo qaalaa gela uttaas. Taani hegaa polanawu, Seelon deꞌiya Xoossaa Dunkkaaniyan neeni oottanaadan yeddana bessees.’ SHin a naꞌiyaa ayyo hagaadan gaasu: ‘Ta aawawu, neeni qaalaa gelidabaa gidikko, hegaa polana bessees. Taani deretun naaꞌꞌu aginawu ta macca laggetuura takkanaadan neeni eeno gaana mala oychays. Hegaappe simmin taani baana.’ Yofttaahe naꞌiyaa ba deꞌo laytta ubban ammanettada Xoossaa Dunkkaaniyan oottaasu. Layttan layttan, i laggeti o oychanawu Seelo boosona.

Qeese gididi Xoossaa dunkkaaniyan oottiya naaꞌꞌu attuma naati Qeese Ubbatu Halaqaa Eelayyo deꞌoosona. Eta sunttay Hofiniinanne Piinihaasa. Eti Yihoowa higgiyaa azazettokkona; qassi eti asaa keehi qohoosona. Israaꞌeelati yarshshuwaa Yihoowayyo ehiyo wode, Hofiniininne Piinihaasi loꞌꞌo ashuwaa banttawu ekkoosona. Ba naati oottiyoobaa Eeli siyiis, shin i aynne oottibeenna. Hegee hananaadan Yihoowi aggiiganee?

Sameeli Hofiniinappenne Piinihaaseppe keehi yelaga gidikkonne, i eta kaallibeenna. Yihoowi Sameelan ufayttiis. Issi galla qammi Sameeli, i xiskkidaashin a sunttaa xeesiyoogaa siyiis. I denddidi Eelakko woxxi biidi, ‘Hekko yaas’ yaagiis. SHin Eeli, ‘Taani nena xeesabeykke. Baada zinꞌꞌa’ yaagiis. Sameeli biidi arssan zinꞌꞌiis. Hegaappe simmin naaꞌꞌanttuwaa xeesiyoogaa siyiis. Heezzanttuwaa xeesiyoogaa Sameeli siyido wode, Sameela Yihoowi xeesiyoogaa Eeli akeekiis. Eeli Sameelawu neeni haranttuwaa xeesiyoogaa siyikko, hagaadan ga: ‘Yihoowa, yoota. Ne ashkkaray siyees.’

Sameeli biidi arssan zinꞌꞌiis. He wode, ‘Sameelaa, Sameelaa’ yaagidi xeesiyoogaa siyiis. I siyidi, ‘Yoota; ne ashkkaray siyees’ yaagiis. Yihoowi ayyo hagaadan giis: ‘Taani Eelanne a soo asaa qaxxayanaagaa ayyo yoota. A attuma naati Xoossaa Dunkkaaniyaa giddon iitabaa oottiyoogaa i erees; shin i aynne oottibeenna.’ Sameeli kase ubbatoo oottiyoogaadan, wonttetta gallassi maallado Xoossaa Dunkkaaniyaa penggiyaa dooyiis. Yihoowi yootidoobaa qeese ubbatu halaqawu odanawu i yayyiis. SHin Eeli a xeesidi hagaadan giis: ‘Ta naꞌawu, Yihoowi neeyyo yootidobi aybee? Ubbabaa taayyo yoota.’ Hegaa gishshawu Sameeli ubbabaa Eelayyo yootiis.

ASameeli dicciyo wode, Yihoowi a ubbatoo maaddiis. Xoossay erissidobaa yootiyaagaanne daanna gidanaadan Yihoowi Sameela dooridoogaa Israaꞌeela biittan asa ubbay eriis.