Solomoni Israaꞌeelan kawoti simmin, Yihoowi a, ‘Taani neeyyo ay immana mala koyay?’ yaagiis. Solomoni hagaadan giis: ‘Taani yelaga gidiyo gishshawu, oottanabaa erikke. Hayyanaa ne asaa kaalettanawu tawu eraa imma.’ Yihoowi hagaadan giis: ‘Neeni erancha gidanawu oychido gishshawu, taani nena saꞌan deꞌiya asa ubbaappe aadhida erancha oottana. Taani nena keehi dure oottana. Neeni tawu azazettikko, adussa wodiyaa daana.’

Solomoni Xoossaa garuwa keexxiyoogaa doommiis. I loꞌꞌo worqqaa, biraa, mittaanne shuchaa goꞌettiis. SHaꞌan qoodettiya qara asay Xoossaa garuwa oottiis. Laappun layttay aadhin, garoy Yihoowawu anjjettanawu giigiis. Xoossaa garuwan, yarshshuwaa wottido yarshshiyo sohoy deꞌees. Solomoni yarshshiyoosaa sinttan gulbbatidi hagaadan woossiis: ‘Abeet Yihoowa, ha keettay neeyyo bessiyaagaa keena gita woy loꞌꞌo gidenna, shin nu goynuwaa ekka; qassi nu woosaa siya.’ Garuwanne Solomona woosaa Yihoowi waati xeellidee? I woosaa wurssosaara, tamay saluwaappe wodhidi yarshshiyoosan deꞌiya yarshshuwaa miis. Yihoowi he garuwan ufayttiis. Israaꞌeelati hegaa beꞌidi ufayttidosona.

Solomoni erancha gidiyoogan Israaꞌeelan ubbasan, haahuwan deꞌiya biittatunkka erettiis. Asay ba metuwan Solomoni maaddana mala akko yees. Saaba Kawiyaakka deexo oyshatun a paaccanawu yaasu. A i giyoobaa siyada, hagaadan gaasu: ‘Asay nebaa taayyo yootidobaa taani ammanabeykke; shin asay taayyo yootidoogaappe aaruwan neeni erancha gidiyoogaa taani haꞌꞌi akeekaas. Ne Xoossay, Yihoowi nena anjjiis!’ Israaꞌeela asawu deꞌoy loꞌꞌo; qassi asay ufayttees. SHin hanotay laamettana hanees.

Solomoni Yihoowawu goynnido wode, Israaꞌeela biittay sarotettan deꞌiis. SHin Solomoni hara biittaappe daro maccaasaa ekkiis; qassi eti eeqawu goynnoosona. Leddan leddan, Solomoni laamettidi, eeqawu goynniis. Yihoowi hanqqettiis. I Solomonayyo hagaadan giis: ‘Israaꞌeela Kawotettay pooshettidi naaꞌꞌawu shaahettana. Taani dariya baggaa ne ashkkarawu immana; qassi ne zaree haaranay guuxxiyaagaa xalla.’

Yihoowi kuuyidobaa hara ogiyankka qonccissiis. Solomona ashkkaratuppe issoy, Iyorbbaami ogiyan hemettiiddi Xoossay erissidobaa yootiya Akiiyaara gayttiis. Akiiyi ba maayuwaa 12 kessi pooshshidi, Iyorbbaamassi hagaadan giis: ‘Yihoowi Israaꞌeela kawotettaa Solomona zariyaappe ekkidi, naaꞌꞌu kessi shaakkana. Tammu pooshota neeyyo ekka; ayssi giikko, neeni tammu zaretu bolli kawotana.’ Solomoni hegaa siyidi, Iyorbbaama woranawu koyiis! Yaatiyo gishshawu Iyorbbaami Gibxxe baqatiis. Wurssettan, Solomoni hayqqin, a naꞌay Robiꞌaami kawotiis. He wode Iyorbbaami saro gi qoppidi Israaꞌeela simmiis.

Israaꞌeela cimati Robiꞌaamawu, ‘Neeni asaa maara oyqqikko, eti neeyyo ammanettana’ yaagidosona. SHin Robiꞌaama a yelaga laggeti, ‘Neeni asawu iitana koshshees! Etawu oosuwaa yaa deexetta!’ yaagidosona. Robiꞌaami ba yelaga laggetu zoriyaa siyiis. I asawu iitin, eti makkalidosona. Eti Israaꞌeela kawotettaa geetettida, tammu zaretu bolli Iyorbbaama kawoyidosona. Hara naaꞌꞌu zareti Yihudaa kawotettaa geetettidosona; eti Robiꞌaamawu ammanettidi deꞌidosona. Israaꞌeela 12 zareti haꞌꞌi shaahettidosona.

Iyorbbaami ba asay Robiꞌaama kawotettaa giddon deꞌiya Yerusalaame biidi goynnanaadan koyibeenna. Aybissakko eray? Iyorbbaami eti ba bolli denddidi Robiꞌaama maaddana giidi yayyiis. Hegaa gishshawu i worqqaappe naaꞌꞌu maratu misileta medhidi, asaayyo, ‘Yerusalaamee keehi haaho. Intte hagan goynnana danddayeeta’ yaagiis. Asay worqqaa maratu misiliyawu goynniyoogan, zaarettidi Yihoowa dogiis.