Tammu zaretu Israaꞌeela kawotettan iita kawoti daroti deꞌikkokka, etappe keehi iitay Akaaba. I Baꞌaalawu goynniya iita maccaasiyo ekkiis. I sunttay Elzzaabeelo. Eti Baꞌaala goynoy biittan kumanaadan oottidosona; qassi Yihoowi kiittin Xoossay erissidobaa yootiyaageeta woridosona. Yaatin, Yihoowi waatidee? I Xoossay erissidobaa yootiya Eelaasi Akaabayyo kiitaa odanaadan kiittiis.

Eelaasi Kawuwaa Akaaba iitatettaa gaasuwan Israaꞌeelan iri bukkennaagaa ayyo yootiis. Heezzu layttappe daro wodiyawu, kattay mokkibeenna; qassi asay namisettiis. Yihoowi zaarettidikka Eelaasa Akaabakko kiittiis. Kawoy, ‘Neeni meto medhiya asa! Ha ubbabay ne mooruwan haniis’ yaagiis. Eelaasi hagaadan giis: ‘Ha koshawu gaasoy tana gidikke. Hegaa gaasoy neeni Baꞌaalawu goynniyoogaa. Nuuni ane paacci beꞌana. Israaꞌeelatanne Baꞌaala sunttan hananabaa odiyaageeta Qarmmeloosa Deriyaa shiishsha.’

Asay deriyaa bolli shiiqiis. Eelaasi hagaadan giis: ‘Intte kuuyite. Tumu Xoossay Yihoowa gidikko, a kaallite. Baꞌaala gidikko, a kaallite. Ane paaccays. Baꞌaala sunttan hananabaa yootiya 450 asati yarshuwaa giigissidi, bantta xoossaa woossona; taanikka yarshshuwaa giigissada Yihoowa woossana. Siyidi tamaa kiittiyay tumu Xoossaa.’ Asay hegaa maayiis.

Baꞌaala sunttan hananabaa yootiyaageeti yarshshuwaa giigissidosona. Gallassa kumettaa, ‘Hay Baꞌaalaa, nu woosaa siya!’ yaagidi bantta xoossaa woossidosona. Baꞌaali eta woosaa siyana xayin, Eelaasi a bolli qilliicciis. I hagaadan giis: ‘Qaalaa xoqqu oottidi woossite! Ooni erii, i xiskkidabaa gidikko, issi uri a denttana koshshees!’ Omarssi gakkanaassi, eti woossiyoogaa aggibookkona. Yaatinkka i siyibeenna.

Eelaasi yarshshiyoosan ba yarshshuwaa wottidi, a bolli haattaa tigiis. Yaatidi i, ‘Abeet Yihoowa, hayyanaa neeni tumu Xoossaa gidiyoogaa asay ero’ yaagiis. Sohuwaara, yarshshuwaa maanaadan Yihoowi saluwaappe tamaa yeddiis. Asay, ‘Yihoowi tumu Xoossaa!’ yaagiis. Eelaasi, ‘Baꞌaala sunttan hananabaa yootiyaageeta yeddoppite!’ yaagiis. He gallassi, Baꞌaala sunttan hananabaa yootiya 450ta woridosona.

Guutta shaaray abbaappe kiyin, Eelaasi Akaabayyo, ‘Wolqqaama iraa gunttay siyettees. Ne paraa gaariyan uttada, ne soo ba’ yaagiis. Saloy dulkkiis, carkkoy carkkiis; qassi wolqqaama iray bukkiyoogaa doommiis. Wurssettan, koshay xayiis. Akaabi ba paraa gaariyaa keehi eesuwan laaggiis. Yihoowi maaddin, Eelaasi he paraa gaariyaappe eesuwan woxxiis! SHin Eelaasa meto ubbay qaarettidee? Ane beꞌoos.

Baꞌaala sunttan hananabaa yootiyaageetu bolli aybi gakkidaakko Elzzaabeela siyada, keehi hanqqettaasu. A Eelaasawu, ‘Baꞌaala sunttan hananabaa yootiyaageetudan, neeni wontto hayqqana’ yaagada kiittaasu. Eelaasi keehi yayyidi, bazzo baqatiis. I, ‘Yihoowa, taayyo gidana. Taani hayqqana’ yaagiis. Eelaasi daafuridi issi mittaa matan xiskkiis.

Issi kiitanchay a beegotissidi loddan, ‘Dendda; denddada ma’ yaagiis. Eelaasi hoꞌꞌo shuchaa mishuwan uukettida komppo oyttaanne xaaruwaa haattaa beꞌiis. Beꞌidi miidi uyiis; yaatidi guyye zinꞌꞌiis. Kiitanchay a naaꞌꞌanttuwaa denttidi, ‘Ma. Neeni baana ogiyawu neeyyo wolqqaa koshshees’ yaagiis. Hegaa gishshawu Eelaasi haranttuwaa miis. Mi simmidi i Koreba Deriyaa gakkanaashin, 40 gallassaanne 40 qammaa hemettiis. Yan Eelaasi gonggolo giddo xiskkanawu geliis. SHin Yihoowi a haasayissiis. I, ‘Eelaasaa, hegan ay oottay?’ yaagiis. Eelaasi hagaadan giis: ‘Israaꞌeela asay nenaara maacettido maachaa koliis. Eti neeyyo yarshshiyoosaa qolidosonanne ne erissidobaa yootiyaageeta woridosona. Haꞌꞌi eti tanakka woranawu koyoosona.’

Yihoowi a, ‘Baada, deriyaa huuphiyan eqqa’ yaagiis. Koyro, wolqqaama carkkoy gonggoluwan carkkiis. Naaꞌꞌantto, Yan biittay qaaxxiis; hegaappe simmin tamay kiyiis. Wurssettan, Saasukkidi haasayiyo minttettiya haasayaa Eelaasi siyiis. I ba maayuwan ba somꞌꞌuwaa kammidi gonggoluwaappe gaxi kiyidi eqqiis. I ayssi baqatidaakko Yihoowi a he wode oychiis. Eelaasi, ‘Taani tarkka attaas’ yaagiis. SHin Yihoowi ayyo hagaadan giis: ‘Neeni nerkka attabaakka. Israaꞌeelan haꞌꞌikka taayyo goynniya 7,000 asay deꞌees. Baada, ta erissidobaa yootanaadan ne sohuwan Elssaaꞌa suntta.’ Yihoowi yootidobaa oottanawu Eelaasi sohuwaara biis. Neeni Yihoowi koyiyoobaa oottiyo wode i nenakka maaddana gaada qoppay? Ee, i maaddana. Kosha wode aybi hanidaakko ane beꞌoos.