Koshaa wode, Yihoowi Eelaasa, ‘Siraafita ba. Issi amꞌꞌiyaa neeyyo qumaa immana’ yaagiis. I katamaa penggiyaa gakkiyo wode, issi hiyyeesa amꞌꞌiyaa mittaa mixiyaaro beꞌiis. I issi bule haattaa o oychiis. A haattaa ehaanawu biishin, i guyyessan Eelaasi o xeesidi, ‘Guutta baso oyttakka ekkada yarkkii’ yaagiis. SHin amꞌꞌiyaa hagaadan gaasu: ‘Taayyo neessi immiyo oytti baawa. Tawu deꞌiyay ta naꞌaassinne taassi guutta oyttaa uukkana xallawu gidiya xiillenne zayte.’ Eelaasi, ‘Neeni taayyo guutta oyttaa uukkikko, ne xiilleenne zaytee iray zaarettidi bukkana gakkanaashin wurenna giidi Yihoowi qaalaa geliis’ yaagiis.

Hegaa gishshawu amꞌꞌiyaa soo baada, Yihoowi erissidobaa yootiyaagawu oyttaa uukkaasu. Yihoowi qaalaa gelidoogaadan, amꞌꞌeeyoonne i naꞌaayyo koshaa wode qumay wuribeenna. I otuwan xiilleenne i xaaruwan zaytee ubbatoo kumetta.’

Hegaappe simmin issi metoy merettiis. Amꞌꞌee guutta naꞌay keehi sahettidi hayqqiis. Eelaasi maaddanaadan a minttada woossaasu. Eelaasi i kiyuwaappe naꞌaa ekkiis; ekkidi i keettaa bolli keexettida issi kifiliyaa kiyiis. I naꞌaa arssan zinꞌꞌissidi, ‘Yihoowa, hayyanaa ha naꞌaa hayquwaappe dentta’ yaagidi woossiis. Yihoowi oottidobay maalaalissiyaaba gidiyoy aybissakko neeni eray? Nuuni eriyoogaadan, hegaappe kase oonikka hayquwaappe denddi erenna gishshataassa. Qassi ha amꞌꞌiyaanne i naꞌay Israaꞌeela asa gidokkona.

SHin naꞌay paxidi, shemppiyoogaa doommiis! Eelaasi amꞌꞌeeyyo, ‘Beꞌa! Ne naꞌay paxiis’ yaagiis. A keehi ufayttada, Eelaasayyo hagaadan gaasu: ‘Neeni tumuppe Xoossaa asa. Neeni Yihoowi yootiyoobaa xallaa haasayiyo gishshawu taani hegaa erays.’

Kawuwaa Akaabi Iziraaꞌeelan ba kawo keettaa maskkootiyaara, Naabuta giyo bitaniyaa woyniyaa gadiyaa beꞌana danddayees. Akaabi he gadiyaa koyido gishshawu, Naabuteppe shammanawu maliis. SHin Laata gadiyaa bayzziyoogee Yihoowa Higgiyaa kanttiyoogaa gidiyo gishshawu, Naabutee gadiyaa ayyo bayzzennan ixxiis. Naabutee suurebaa oottidoogawu Akaabi a bonchidee? CHii. Akaabi hanqquwaa suulliis. I keehi yiillotidi ba aqiyo kifiliyaappe kiyennaaninne qumaa meennan ixxiis.

A machiyaa, iita Kawiyaa Elzzaabeela ayyo hagaadan gaasu: ‘Neeni Israaꞌeela kawo. Neeni koyiyo aybanne ekkana danddayaasa. Ne he gadiyaa ekkanaadan ta oottana.’ Elzzaabeela katamaa cimati naabutee Xoossaa cayiis gi mootidi a shuchan caddidi woranaadan etawu dabddaabbiyaa xaafaasu. Cimati a yootidoogaadan ootti simmin, a Akaaba, ‘Naabutee hayqqiis. Woyniyaa gadee neegaa’ yaagaasu.

Elzzaabeela worido suure asi Naabute xalla gidenna. A Yihoowa siiqiya daro asaa woraasu. A eeqawu goynnaasu; qassi hara iitabaa oottaasu. Elzzaabeela oottido iitaba ubbaa Yihoowi beꞌiis. Yaatin i o waatanee?

Akaabi hayqqin, a naꞌay Yoraami kawotiis. Yihoowi Elzzaabeelonne i soo asaa qaxxayanawu Yeeha kiittiis.

Yeehu ba paraa gaariyan, Elzzaabeela deꞌiyo Iziraaꞌeela biis. Yoraami Yeehuura gayttanawu paraa gaariyan yiidi, a, ‘Nu giddon sarotetti deꞌennee?’ yaagiis. Yeehu, ‘Ne aayyiyaa, Elzzaabeela iitabaa oottishin, saroy baawa’ yaagiis. Yoraami ba paraa gaariyaa guyye zaaridi baqatanawu maliis. SHin Yeehu wonddafiyaa dukkin, Yoraami hayqqiis.

Yaatidi, Yeehu Elzzaabeeli kawo keetti biis. A i yiyoogaa siyada, tiyettadanne pixettada, ba pooqiyaa maskkootiyaara naagawusu. Yeehu gakkido wode, a Yeeha karada sarotaasu. Yeehu i matan eqqida i ashkkarata, “O duge oli aggite!” yaagiis. Eti Elzzaabeelo maskkootiyaara kare sugin, a saꞌan kunddada hayqqaasu.

Hegaappe simmin, Yeehu Akaaba 70 attuma naata woriis; qassi biittaa Baꞌaala goynuwaappe geeshshiis. Yihoowi ubbabaa eriyoogaanne iitabaa oottiyaageeta bessiya wodiyan qaxxayiyoogaa neeni akeekadii?