Nabbabiyaageetu Oyshaa
Hizqqeela shemppo 37n odettida, naaꞌꞌu gatimata issippe gattiyoogee aybiyyo leemisoo?
Israaꞌeelati Hidootaa Biittaa zaaretti guyye simmidi issippetettan deꞌanaagaa qonccissiya ufayssiya hidootaa Yihooway Hizqqeelawu yootiis. He hiraagay wurssetta gallassatun Xoossaa asaa giddonkka issippetettay deꞌanaagaa bessiyaaba.
Yihooway hananabaa yootiya Hizqqeeli naaꞌꞌu gatimatu bolli xaafanaadan yootiis. I issi gatimaa bolli “Hagee Yihudaagaanne aara de7iya Israa7eela asaagaa,” qassi haraa bolli “Hagee Efireemaagaa; ikka qassi Yooseefaagaanne aara de7iya Israa7eela asaagaa” yaagidi xaafana. He naaꞌꞌu gatimati Hizqqeela kushiyan “issi gatima” gidana.—Hiz. 37:15-17.
“Efireemi” aybiyyo leemisoo? Huuphessa tammu zaretu kawotettaa koyro kawoy Iyorbbaami, guyyeppe wolqqaama gidida Efireema zare. (Zaa. 33:13, 17; 1 Kaw. 11:26) Ha zaree Yooseefa naꞌaa Efireema yara. (Qoo. 1:32, 33) Yooseefa aaway Yaaqoobi hara naatuppe a dummayidi anjjiis. Hegaa gishshawu, tammu zaretu kawotettaa leemiso gidida gatimay “Efireemaagaa” geetettidoogee bessiyaaba. Huuphessa Israaꞌeela kawotettaa Asooreti 740n K.K. omooddidosona; Hizqqeeli he naaꞌꞌu gatimatubaa hiraagaa xaafidoy hegaappe daro wodee aadhiina. (2 Kaw. 17:6) Hegaa gishshawu, he wode Israaꞌeelatuppe dariya baggay, Asooreta xoonida Baabloona Haaruwan ubbasan laalettidi deꞌees.
Tohossa naaꞌꞌu zaretu kawotettaanne geella huuphessa kawotettaappe attidaageeta 607n K.K., Baabilooneti omooddidosona. Yihudaa zare gidida kawoti ha naaꞌꞌu zareta haaridosona; qassi qeeseti Yerusalaamen deꞌiya beeta maqidasiyan oottiyo gishshawu Yihudan deꞌoosona. (2 Odi. 11:13, 14; 34:30) Hegaa gishshawu, ha naaꞌꞌu zaretu kawotettay ‘Yihudaa’ gatiman leemisettidoogee bessiyaaba.
Leemiso gidida ha naaꞌꞌu gatimati awude issippe gayttidonaa? Israaꞌeelati beeta maqidasiyaa zaarettidi keexxanawu 537n K.K. Yerusalaame simmido wode. Naaꞌꞌu zerettaa kawotettaaninne tammu zerettaa kawotettan deꞌiya amarida asati omoodduwaappe simmidi, zaarettidi issippetettaa medhidosona. Israaꞌeela naati zaarettidi shaahettokkona. (Hiz. 37:21, 22) Eti zaarettidi Yihoowayyo issippe goynnidosona. Israaꞌeelati issippetettaa medhanaagaa hananabaa yootiya Isiyaasikka Ermmaasikka kasetidi yootidosona.—Isi. 11:12, 13; Erm. 31:1, 6, 31.
Tumu goynuwaa xeelliyaagan ha hiraagan qonccida keehippe koshshiya tumay aybee? Hegee, Yihooway bawu goynniyaageeti “issuwaa gidana” mala oottanaagaa yootidoogaa. (Hiz. 37:18, 19) Eti issuwaa gidanaagaa yootido qaalay nu wodiyan polettidee? Ee, polettiis. Koyro, Xoossaa asay zaarettidi loddan loddan darajjayettidonne issippetettaa medhido, 1919n he hiraagay polettiyoogaa doommiis. Seexaanay eti muleera shaahettanaadan oottanawu baaxetiis; shin polettibeenna.
He wode, zaarettidi issuwaa gididaageetuppe daroti Yesuusaara saluwan kawonne qeese gidanawu hidootiyaageeta. (Ajj. 20:6) Eti leemiso hanotan Yihudaa gatimaa mala. Giddoppe attin, wodeppe guyyiyan, saꞌan deꞌanawu hidootiya daroti ayyaanaaban Ayhuda gididaageetuura issippetettaa medhiyoogaa doommidosona. (Zak. 8:23) Eti Yooseefa gatimaa mala; qassi Kiristtoosaara haaranawu hidootokkona.
Ha wodiyan ha naaꞌꞌu citati, hiraagan ‘ta ashkkaraa Daawita’ geetettida, issi Kawuwaa, Yesuus Kiristtoosa kaaletuwan issippetettan oottoosona. (Hiz. 37:24, 25) Yesuusi bana kaalliya ubbay “issuwaa gidana mala” woossiis; hegee ‘A Aaway a giddon deꞌiyoogaadan qassi ikka ba Aawaa giddon deꞌiyoogaadaana.’a (Yoh. 17:20, 21) Qassi Yesuusi ayyaanan tiyettida ba amarida wudee ‘hara dorssatuura’ ‘issi wude’ gidanaagaa kasetidi yootiis. Eta ubbaa “heemmiyaageekka issuwaa gidana.” (Yoh. 10:16) Yesuusi yootidobay, sinttappe eta hidootay ayba gidikkokka ha wodiyan deꞌiya Yihoowa asaa giddon deꞌiya ayyaanaabaa issippetettaa loytti qonccissees.
a Yesuusi ba yuussawu malaata gidiya leemisuwaa kaseti yootido wode, kasiyaa kaallidi hananabaa yootiis. Koyro, sintta xeera gididi oottiya, ayyaanan tiyettida amarida ishanttu cita gidana ‘ammanettida wozannaama ashkkaraabaa’ yootiis. (Maa. 24:45-47) Kaallidi, saluwan deꞌanawu hidootiya ubbatuyyo haniya leemisuwaa yootiis. (Maa. 25:1-30) Wurssettan, Kiristtoosa ishantta maaddanawu deꞌiya, saꞌan deꞌanawu hidootiya asatubaa yootiis. (Maa. 25:31-46) Hegaadan, Hizqqeela hiraagan odettidabay koyrottidi saluwan deꞌanawu hidootiyaageetuura gayttidaagan ha wodiyan hananabaa qonccissees. Tammu zerettaa kawotettay saꞌan deꞌanawu hidootiyaageetuyyo darotoo leemiso gidana xayikkokka, ha hiraagan odettida issippetettay saꞌan deꞌanawu hidootiyaageetu giddooninne saluwan deꞌanawu hidootiyaageetu giddon deꞌiya issippetettaa hassayanawu maaddees.