TIMIRTTE 57

Gita Nagara Oottikko Waatuutee?

Attamettiyo Meran Giigidaagaa

Neeni Yihoowa wozanappe siiqiyaabanne A azanttiyaaba oottennaadan baaxetiyaaba gidikkonne, issi issitoo balana danddayaasa. SHin, issi issi nagaray haraappe iita. (1 Qoronttoosa 6:9, 10) Neeni gita nagara oottikko, Yihoowi nena siiqiyoogaa aggibeennaagaa hassaya. I neeyyo atto gaanawunne nena maaddanawu koyees.

1. Yihoowi nuussi atto gaanaadan ay oottana koshshii?

Yihoowa siiqiyaageeti gita nagara oottidoogaa akeekiyo wode, keehi azzanoosona. SHin, Yihoowi ba asawu, “Intte nagarai baaraadan zo77ikkokka, shachchaadan booxxana” yaagidi gelido qaalay eta minttettees. (Isiyaasa 1:18) Nuuni wozanappe nu nagaraappe simmikko, Yihoowi nuuyyo muleera atto gaana. Nuuni nagaraappe simmidoogaa waati bessiyoo? Nuuni oottidoban keehi azzanido gishshawu, iitabaa oottiyoogaa aggidi, Yihoowi atto gaanaadan woossoos. Yaatidi, nagaraa oottanaadan nuna denttettida iita qofaa woy meeziyaa agganawunne Yihoowi kessido geeshsha maaraadan deꞌanawu baaxetoos.—Isiyaasa 55:6, 7 nabbaba.

2. Nuuni nagaraa oottiyo wode, Yihoowi nuna cimatu baggaara waati maaddii?

Yihoowi nuuni gita nagara oottikko, ‘woosa keettaa cimata xeesanaadan’ yootiis. (Yaaqooba 5:14, 15 nabbaba.) He cimati Yihoowanne ayyo oottiyaageeta siiqoosona. Eti Yihoowaara zaarettidi dabbotanaadan nuna waati maaddanaakko tamaaridosona.—Galaatiyaa 6:1.

Nuuni gita nagaraa oottikko, cimati nuna waati maaddiyoonaa? Naaꞌꞌu woy heezzu cimati Geeshsha Maxaafaa xiqiseta goꞌettidi, nuuni oottidobay bala gidiyo gaasuwaa nuussi qonccissana. Qassi, eti nuuni zaarettidi nagaraa oottennaadan maaddiya qofaanne zoriyaa yootana. Nagaraa oottidi ba nagaraappe simmenna uri harata qohenna mala, cimati galchchaappe A kessoosona.

LOYTTA AKEEKA

Nuuni gita nagaraa oottiyo wode Yihoowi nuna maaddiyo ogiyaa loytta akeekanawunne hegawu galatanawu waatanaakko akeeka.

3. Nagaraa paaxikko paxoos

Nuuni ay nagara oottikkokka Yihoowi azzaniyo gishshawu, hegaa awu paaxiyoogee bessiyaaba. Mazamure 32:1-5 nabbabite; yaatidi ha oyshaa tobbite:

Nuuni nu nagaraa genttanawu maliyoogaappe Yihoowawu paaxiyoogee loꞌꞌo gidiyoy aybissee?

Nuuni nu nagaraa Yihoowawu paaxi simmidi, cimati maaddanaadan oychchiyo wode woppu goos. BIIDUWAA beꞌite; yaatidi kaallidi deꞌiya oyshaa tobbite.

BIIDUWAA: “Yihoowi ‘Ba Siiqiyo Uraa’ Seerees” (3:01)

Ha biiduwan beꞌidoogaadan, Kaneni Yihoowakko simmanaadan cimati waati maaddidonaa?

Nuuni cimatussi aynne genttennan tumaa yootana bessees; eti nuna maaddanawu koyoosona. Yaaqooba 5:16 nabbabite; yaatidi ha oyshaa tobbite:

Nuuni tumubaa yootiyoogee cimati nuna maaddanawu metootennaadan oottiyoy aybissee?

Misiliyaa: 1. Issi ishay keehi azzanidi ba somꞌꞌuwan kushiyaa wottidi hokkiis. 2. He ishay Yihoowa woossees. 3. He ishay issi cimaara silkkiyan haasayees. 4. He ishay heezzu cimatuura gayttiis. 5. He ishay ba kahay geeyido gishshawu ufayttees. — Ne nagaraa paaxa, cimatuyyo tumubaa yoota, qassi Yihoowa siiquwaa bessiya maaduwaa ekka

4. Yihoowi nagaranchchaa maarees

Gita nagaraa oottida uri Yihoowi kessido maaraa kaallanawu koyennaba gidikko, I galchchaappe kiyanaadan oosettees; qassi nuuni aara wodiya aattokko. Koyro Qoronttoosa 5:6, 11 nabbabite; yaatidi ha oyshaa tobbite:

Irshshoy munaqaa denttiyoogaadan, ba nagaraappe simmenna uraara wodiya aattiyogee galchchaa waati qohii?

Cimati nagaranchchata maariya Yihoowa leemisuwa kaalliyogan, galchchaappe kessidoogeeta biidi oychchoosonanne eta maaddoosona. Seeray seelliyabaa gidikkonne eti bantta nagaraappe simmanaadan maaddiyo gishshawu, daroti galchchawu simmidosona.—Mazamure 141:5.

Yihoowi nagaranchchata oyqqiyo ogee, I suurebaa oottiyagaa, maariyagaa, qassi siiqiyagaa gidiyogaa waati bessii?

5. Yihoowi nuuni nu nagaraappe simmiyo wode atto gees

Yesuusi issi uri ba nagaraappe simmiyo wode Yihoowawu aybi siyettiyaakko nuuni akeekanaadan maaddiya leemisuwaa yootiis. Luqaasa 15:1-7 nabbabite; yaatidi ha oyshaa tobbite:

Neeni hegaappe Yihoowabaa ay tamaaray?

Hizqqeela 33:11 nabbabite; yaatidi ha oyshaa tobbite:

Nuuni wozanappe azzanidoogaa bessanawu ay oottana koshshii?

Issi henttanchchay issi dorssee masunttaa qachchees. — Dorssaa heemmiya uradan, Yihoowi ba dorssatussi wozanappe qoppees

ISSI ISSI ASAY HAGAADAN GEES: “Taani ta nagaraa cimatuyyo yootikko eti tana galchchaappe kessana gaada yayyays.”

Neeni hegaadan qoppiya urawu woyga zaaruutee?

AY AKEEKADII?

Nuuni gita nagaraa oottiyaakkokka, wozanappe azzanidi iitabaa oottiyoogaa agganawu murttikko, Yihoowi nuuyyo atto gaana.

Zaaretuwaa

Nuuni nu nagaraa Yihoowawu paaxiyoogee loꞌꞌo gidiyoy aybissee?
Yihoowi nu nagaraa atto gaanaadan ay oottana koshshii?
Nuuni gita nagaraa oottikko, cimati maaddanaadan oychchana koshshiyoy aybissee?

Ha timirttiyaa wurssido gallassaa:

Halchchanabaa

Ne galchchaa cimata loytta era.

Harabaa:

Your other goal

PILGGA

Yihoowi Isiyaasa 1:18n yootidoogaadan, issi bitaniyawu I waati atto giidaakko akeeka.

Yihoowi Maariyoogaa Mule Siroppa (5:02)

Gita nagaraa oottidaageeta cimati waati maaddiyonaa?

“Cimati Nagaranchchata Siiqiyogaanne Maariyogaa Waati Bessana Danddayiyonaa?” (Wochchiyo Keelaa, Hosppune 2024)

Bantta nagaraappe simmennan ixxida nagaranchchatussi siiquwaanne maarotaa waati bessiyakko akeeka.

“Galchchaappe Kessidoogeeta Cimati Waati Maaddana Danddayiyonaa?” (Wochchiyo Keelaa, Hosppune 2024)

Tumaa aggida issi bitanee Yihoowi bana zaarettidi baakko ehiis giidi qoppiyoy aybissakko, “Yihoowakko Simmiyoogee Tawu Keehi Koshshiis” giyaagan beꞌa.

“Geeshsha Maxaafay Asay Laamettanaadan Oottees” (Wochchiyo Keelaa huuphe yohuwaa)