Halowiine Baalay Waani Doommidee?

Geeshsha Maxaafay yootiyobaa

Daro asay layttan layttan Xiqimita 31n bonchchiyo Halowiine baalaabaa Geeshsha Maxaafay aybanne yootenna. Gidoppe attin, Halowiine baalaa doomettaynne wogay Geeshsha Maxaafay tamaarissiyoobaara maayettenna.

Ha huuphe yohuwan

• Halowiine taarikiyanne wogaa

• Halowiine doomettay eeqaa goynuwara gayttidaba gidiyogee qofissiyabee?

• Ha baalay Halowiine geetettidoy aybissee?

Halowiine taarikiyanne wogaa

• Samhen: Halowiine baalaa doomettay, “2,000ppe dariya layttappe kase Kelittike asay bonchchiyo eeqaa goyno gidida” ha baalaara gayttidaba gidiyogaa Ze World Buuk Insaykiloopidee yootees. Gujjidikka hagaadan gees: “Kelittike asay ha baalaa wode hayqqidaageeti paxa deꞌiyaageetu giddon hemettana danddayoosona giidi ammanees. Samhene baalaa wode paxa deꞌiyaageeti hayqqidaageetuura gayttana danddayoosona.”—“Ha Baalay Halowiine Geetettidoy Aybissee? ” giyagaa xeella.

• Halowiine maayuwa, karameellaanne naatu kaassaa: Kelttikke asaappe amaridaageeti hayqqidaageetu ayyaanati “banttappe issuwa milatin eta aggi bayanaadan” yashissiya he maayuwa maayiyogaa issi xuufee yootees. Harati he ayyaanati hanqqettidi asaa qohennaadan laqilaqiyabata wottoosona.a

  

  Beni Awurooppan, Kaatolike qeeseti heeran deꞌiya eeqaa goynuwa meezeta kaalliyogaa doommidosona, qassi bantta haymaanootiya kaalliyageeti yashissiya maayuwa maayidi sooppe soo biidi guutta imotaa oychchanaadan oottidosona.

• Moytilliya, sharechchuwanne hegaa malabata: Hegeeti daro wodiyawu iita ayyaanaara gayttidabata. Halowiin Triviya giyo maxaafay hegaa malabata “aybippenne aadhdhiya wolqqay deꞌiyo meretata” giidi, he meretati “hayquwaara, hayqqidaageetuura woy hayqqiyoogaa yayyiyogaara gayttidaba” gidiyoogaa yootees.

• Halowiine lellehiya: Beni Inggilizen, asay “hayqqidaageetuyyo woossanawu sooppe soo biidi qumaa oychchees” qassi, “lellehiya woocidoogaa giddon, shemppoy nagaraappe geeyiyo sohuwan deꞌiyogaa bessiyaba giyo eexxiya shaamaa wottidoogaa” oyqqees. (Hallowiin—From Pagan Richuwal tu Parttii Nayit) Iita ayyaanay shiiqennaadan qaysire milatiyabaa woocidoogaa giddon eexxiya shaamaa wottiyogaa issi issi eranchchati yootoosona. Huuphessa Amarkkan, 1800 heeran lellehee keehi daroy deꞌiyonne woocanawu metenna gishshawu, qaysire milatiyabaa aggidi A goꞌettiyogaa doommidosona.

Halowiine doomettay eeqaa goynuwara gayttidaba gidiyogee qofissiyabee?

Ee. Issi issi asay Halowiine baalaa aynne qohenna ufayttiyobadan xeellikkokka, hegaara gayttidaagan oottiyobati Geeshsha Maxaafaa timirttiyara maayettokkona. Halowiine baalay hayqqidaageeta xeelliyagan worddobaa ammaniyogaaranne iita ayyaanaara woy daydanttatuura gayttidaba.

Halowiine baalaara gayttidaagan ammaniyobata Xoossay waati xeelliyakko bessiya xiqiseta akeeka:

• “Ayyaanata xeegiyaagee, shareechchiyaageenne haiqqida asaa ayyaanaa xeegiyaagee intte giddon de7oppo.”—Zaarettido Wogaa 18:10-12.

  Hegee woygiyogee? Hayqqidaageetuura gayttanawu woy gayttiyaba milatissidi oottiyobaa Xoossay ixxees.

• “Haiqqidaageeti aibanne erokkona.”—Eranchchaa 9:5.

  Hegee woygiyogee? Hayqqidaageeti aybanne erenna gishshawu, paxa deꞌiyageetuura haasayana danddayokkona.

• “Xalahetuura intte issippe [zuppetoppite]. Godaa burccukkuwaaninne qassi xalahetu burccukkuwan uyanau intte danddayekketa.”—1 Qoronttoosa 10:20, 21.

  Hegee woygiyogee? Xoossan nashettana koyiyageeti daydanttatuura gattiya aybippenne haakkana koshshees.

• “Xalahee halaqaa iita cimuwaa [teqqite]. . . . Aissi giikko, nuuni . . . iita ayyaana wolqqatuura [olettoos].”—Efisoona 6:11, 12.

  Hegee woygiyogee? Kiristtaaneti iita ayyaanaa wolqqata eqettoosona; nuuni etaara gattiya baalaa bonchchana koshshenna.