A3
Geeshsha Maxaafay Hanno Gakkanawu Waani Naagettidee?
Xoossay Geeshsha Maxaafaa qofawu Pulttonne A Naagiyagaa. Kaallidi deꞌiya qofaa xaafissidaageekka A:
“Yihoowa qaalay merinawu deꞌees.”—1 Pheexiroosa 1:25.
Geeshsha Maxaafaa beni Ibraawettuwaninne Aramattuwana woy Giriikettuwan kushiyan xaafidoogee hanno gakkanawu deꞌana xayikkokka, hegee tuma. Yaatin, ha wodiyan deꞌiya Geeshsha Maxaafaa qofay koyro Xoossay xaafissidoogaara muleera issi mala gidiyogaa waani ammanettana danddayiyo?
ZAARETTI XAAFIYAGEETI XOOSSAA QAALAY NAAGETTANAADAN OOTTIDOSONA
Maxaafay zaaretti xaafettanab koshshiyogaa yootida Xoossay beni essido wogay Ibraawettuwan Xaafettida Geeshsha Maxaafay naagettanaadan maaddidabaa. Leemisuwawu, Yihoowi Israaꞌeela kawoti xaafettida Higgiya banttawu zaaretti xaafanaadan azaziis. (Zaarettido Wogaa 17:18) Hegaadankka, Higgee naagettanaadan oottiyonne hegaa asaa tamaarissiyo aawatettaa Xoossay Leewa yaratuyyo immiis. (Zaarettido Wogaa 31:26; Nahimiya 8:7) Ayhudati omooddettidi Baabiloone bi simmin, zaaretti xaafiya citay, woykko xaafeti (Soferimeti) denddidosona. (Izira 7:6, tohossa qofaa) Guyyeppe, he xaafeti Ibraawettuwan Xaafettida 39 maxaafata darotoo zaaretti xaafidosona.
Xaafeti daro xeetu layttawu he maxaafata miciiridi zaaretti xaafidosona. Masooreta giyo Ayhuda xaafetu citay 500ppe 1500 M.L. gakkanaashin dumma dumma wodetun he wogaa kaalliis. Ibraawettuwan Xaafettida kumetta Geeshsha Maxaafaa Masooreti kushiyan zaaretti xaafidoogeetuppe bayratiyagee 1008/1009 M.Ln xaafettida Leningrad Kodekisiya. Shin Maxine Abbaa Matan Beettida Xaaxettida Maxaafatu giddon kushiyan xaafettida Geeshsha Maxaafaa xuufeti woy hegeetuppe attida 220 gidiyageeti deꞌiyogee 1950 heeran erettiis. He xuufeti Leningrad Kodekisiyappe shaꞌaappe dariya layttaa bayratoosona. Maxine Abbaa Matan Beettida Xaaxettida Maxaafata Leningrad Kodekisiyara geeddarissikko keehi koshshiya issibay erettees; Maxine Abbaa Matan Beettida Xaaxettida Maxaafati issoy issuwappe dummatiyo guuttabay deꞌikkonne, hegeetuppe awugeenne qofaa laammenna.
Giriikettuwan Xaafettida Geeshsha Maxaafaa 27 maxaafatubay shin? Yesuus Kiristtoosi kiittidoogeetuppe amaridaageetinne beni Yesuusa kaallidaageetuppe guutta asati he maxaafata xaafidosona. Beni Kiristtaaneti Ayhuda xaafetu wogaadan he maxaafata zaaretti xaafidosona. (Qolasiyasa 4:16) Rooma Kawoy Diyoqilaxiyaninne harati beni Kiristtaanetu xuufeta ubbaa xayssanawu malikkonne, kushiyan beni xaafettidaageetuppenne hegeetuppe attidaageetuppe daro shaꞌati hanno gakkanawu deꞌoosona.
Kiristtaanetu xuufeti hara doonatunkka birshshettidosona. Geeshsha Maxaafay koyro Armenettuwa, Gibxxettuwa (Coptic), Giꞌiize, Jorjjettuwa, Laatinenne Soorettuwa mala beni doonatun birshshettiis.
IBRAAWETTUWANINNE GIRIIKETTUWAN XAAFETTIDAAGEETA BIRSHSHIDO NAQAASHATA
Geeshsha Maxaafaa xuufeta beni zaaretti xaafidoogeeti ubbay issi mala ogiyan xaafettibookkona. Yaatin, koyro xaafettida qofaa waati erana danddayiyo?
Ha hanotay asttamaaree 100 tamaareti maxaafaappe issi shemppuwa zaaretti xaafanaadan yootiyogaa mala. Koyroogee guyyeppe xayikkonne, haranttuwa xaafettida 100 geeddarissiyogee koyroogaa qonccissees. Tamaareti ubbay amaridabaa balikkonne, eti ubbay baliyobay issi mala gidana danddayenna. Hegaadankka, eranchchati demmido Geeshsha Maxaafaa maxaafata beni zaaretti xaafidoogeetanne etappe attida daro shaꞌata geeddarissidi, zaaretti xaafidaageeti balidobaa erananne koyro xaafettido ogiya akeekana danddayoosona.
“Hagaa keena likke birshshettida, beni xaafettida hara ay xuufeenne baawa gaana danddayettees”
Geeshsha Maxaafan koyro xaafettida gamma qofay hanno gakkanawu laamettibeennaagaa waani ammanettana danddayiyo? Wiliyam H. Girin giyo eranchchay Ibraawettuwan Xaafettida Geeshsha Maxaafaabaa, “Hagaa keena likke birshshettida, beni xaafettida hara ay xuufeenne baawa gaana danddayettees” yaagiis. Geeshsha Maxaafaa eranchchay F. F. Birusi Ooratta Maachchaa giyo, Giriikettuwan Xaafettida Geeshsha Maxaafaabaa hagaadan giis: “Hegeeti likke gidiyogaa ooninne siranawu malenna, beni xaafeti xaafido darobatu naqaashaappe nu Ooratta Maachchaa xuufetu naqaashay keehi daro.” Qassikka I, “Ooratta Maachchay haymaanooteba gidenna hara xuufeta shiishshidoba gidiyakko, hegee likke gidiyogee mule siriyoba gidenna” yaagiis.
Maxine Abbaa Matan Beettida Xaaxettida Maxaafatun Isiyasa maxaafaa shemppo 40 (125ppenne 100ppe K.K. gidduwan xaafettidaba)
Issi shaꞌa gidiya layttappe guyyiyan Ibraawettuwan kushiyan xaafettidaagaara gatti xeelliyo wode, dariya baggi pitale gidiyo gishshawu, dummatiyoy guuttabaana
Masooreti 930 M.L. heeran Ibraawettuwan kushiyan xaafido keehi koshshiya Aleppo Kodekisiyan Isiyasa maxaafaa shemppo 40
Ibraawettuwan Xaafettidaagaa: Ibraawettuwan Xaafettida Geeshsha Maxaafaa Ooratta Alamiya Birshshettawu (1953-1960) kane xuufee Rudolf Kitteli goydido Bibiliya Hibirayka. Hegaappe simmin, Maxine Abbaa Matan Beettida Xaaxettida Maxaafatanne kushiyan beni xaafettida hara xuufeta pilggidoogaappe denddidaagan, Ibraawettuwan xaafettidaagee Bibiliya Hibirayka Istutgartenziya, qassi Bibiliya Hibirayka Kuwintta giyogeetun haranttuwa giigiis. Ha pilggetta oosotun Leningrad Kodekisee waanna xuufiyan zaaretti xaafettiis, qassi tohossa qofan Samaaretu Penttatuk, Maxine Abbaa Matan Beettida Xaaxettida Maxaafata, Giriiketto Septujenttiya, Aramatto Targamiya, Latin Vulget, qassi Sooretto Peshitta gatti xeellidi wottidoogee deꞌees. Ooratta Alamiya Birshshettaa 2013n zaaretti giigissidaageeti Bibiliya Hibirayka Istutgartenziyakka Bibiliya Hibirayka Kuwinttakka xeellidosona.
Giriikettuwan Xaafettidaagaa: B. F. Westikotanne F.J.A. Hortta giyo eranchchati koyro xaafettidaagaara keehi issi mala giidi qoppido waanna xuufiya 1853ppe 1881 gakkanawu deꞌiya wodiyan Giriikettuwan giigissiyo wode, kushiyan xaafettida Geeshsha Maxaafaa xuufetuppenne hegeetuppe attidaageetuppe he wode deꞌiyabaara gatti xeellidosona. Ooratta Alamiya Geeshsha Maxaafaa Birshshettaa Konttee 1950 heeran birshshidoogawu kanee he waanna xuufiya. Eti naaꞌꞌanttonne heezzantto xeetu layttaa M.Ln ceeccaa bolli xaafettidosona giyo hara xuufetakka goꞌettidosona. Ceeccaa bolli xaafettida haratikka hegaappe simmin beettidosona. Hegaa bollikka, Nestilinne Alanddi giigissido, qassi Geeshsha Maxaafaa Maabaratu Issippetettay giigissido waanna xuufetun mata wode pilggettidabay deꞌees. Ooratta Alamiya Birshshettaa 2013n zaaretti giigissidaageeti he pilggettan beettidabaappe amaridaagaa gelissidosona.
King Jems Verzhiniya mala beni birshshettatun deꞌiya, Giriikettuwan Xaafettida Geeshsha Maxaafaa amarida xiqiseti guyyeppe zaaretti xaafidaageeti gujjidobappe attin, ayyaanay kaalettin xaafettida Geeshsha Maxaafan deꞌennaagee he waanna xuufetuppe erettees. Gidoppe attin, daro birshshettati kaalliyo xiqisetu shaahoy 1550 heeran doomettidaba gidiyo gishshawu, he xiqiseta kessiyogee daro Geeshsha Maxaafatu xiqisetun issi issi paydoy paccanaadan oottees. He xiqiseti Maatiyosa 17:21; 18:11; 23:14; Marqqoosa 7:16; 9:44, 46; 11:26; 15:28; Luqaasa 17:36; 23:17; Yohaannisa 5:4; Oosuwa 8:37; 15:34; 24:7; 28:29; qassi Roome 16:24. He kiyida xiqiseti deꞌiyosan eta kessidoogee ha birshshettan tohossa qofan odettiis.
Marqqoosa 16 wurssetta adussa qofay (paydo 9-20), Marqqoosa 16 wurssetta qantta qofay, qassi Yohaannisa 7:53–8:11 qofay kushiyan koyro xaafettidaagan deꞌennaagee erettees. Hegaa gishshawu, he bala qofay ha birshshettan gelibeenna.
Daro eranchchati koyro xaafettidaagaara keehi issi mala giyo qofay ha birshshettan geliis. Leemisuwawu, kushiyan beni xaafettida issi issi xuufeti Maatiyosa 7:13 hagaadan goosona: “Xuntta penggiyara kanttite; ayssi giikko, bashshawu efiya penggee aaho, ogeekka woggaa; qassi he penggiyara kanttiyageeti cora.” Ooratta Alamiya Birshshettan “penggee” giyagee kase deꞌenna. Shin kushiyan xaafettidaagan deꞌiya naqaashaa gujji xannaꞌidoogee “penggee” giyagee koyro xaafettidaagan deꞌees giidi maacanaadan oottiis. Yaatiyo gishshawu, hegee ha birshshettan geliis. Hegaadan giigida darobay deꞌees. Shin giigissido hegeeti gitaba gidokkona, qassi hegeetuppe issoynne Xoossaa Qaalaa waanna qofaa laammenna.
Ceeccaa bolli 2 Qoronttoosa 4:13–5:4 200 M.L. heeran xaafettidaagaa
a Hagaappe guyyiyan, Ibraawettuwan Xaafettida Geeshsha Maxaafaa geetettees.
b Kushiyan xaafettida koyroogeeti moorettiyaban xaafettidoogee zaaretti xaafana koshshido gaasotuppe issuwa.