Deꞌuwawu Halchchidobaa Akeekiyoogaa

ASAY DAROBAN DUMMA—NUUNI XAAFOOS, MISILIYAA MEDHOOS, ISSI ISSIBAA GIIGISSOOSINNE DEꞌUWAA XEELLIYAAGAN DENTTIYO KEEHI KOSHSHIYA OYSHATUBAA QOPPOOS: Salotinne saꞌay merettidoy aybissee? Nuuni waani merettidoo? Deꞌuwawu halchchidobi aybee? Sinttappe aybi hananee?

Issi issi asay he oyshata zaariyoogee keehi deexxiyaaba gi qoppidi he oyshata oychchenna. Harati qassi deꞌoy lodda laamiyan yiido gishshawu he oyshati pattennaba goosona. Taarikiyaanne bayoloojiyaa profeeseree Wiliyam Proovini, “Xoossa giyoobi baawa; halchchoykka baawa” yaagiis. I gujjidi, “Kandduwaa maarawu denddoy baawa; deꞌuwawu halchchidobi baawa” yaagiis.

SHin, issi issi asay he iita qofay bessennaba gees. Eti salotinne saꞌay suurenne likke gidida saynisiyaa higgiyaa kaalliyoogaa akeekoosona. Eti meretan qonccida maalaalissiya diizayiniyan keehi garamettoosona; hegaappe amaridaagaa malatissidi medhdhanawu asay malees. Qassi muttumurettida diizayinee hegaa giigissidaagee deꞌiyoogaa bessiyoogaa eta galla galla gakkiyaabay qonccissees.

Lodda laamiyan ammaniya issoti issoti bantta qofaa wotti yeggi qoppanaadan he naqaashay denttettiis. Kaallidi deꞌiya naaꞌꞌu leemisuwaa akeeka.

NARBBIYAA AKKAMIYA ALEKSE MARNOVA GIYO DOTTORIYAA. I hagaadan giis: “Taani tamaarido timirtte keettatun Xoossay baawa giyoogaabaanne lodda laamiyaabaa tamaaraas. Xoossan ammaniya ooninne eri baynnabadan qofettees.” SHin 1990n, I ba qofaa laammiyoogaa doommiis.

I hagaadan giis: “Asaa guuggiyaa gujjin, merettidabawu ammanttiya naqaashaa akeekanawu ubbatoo malaas. Maalaalissiya guuggee saluwaaninne saꞌan erettidaban keehi muttumurettidaba gidiyoogee bessiyaaba. SHin guuggee merettidoy issi asi eraanne akeekaa demmi simmin hayqqanaassee? Hegee hadanne bessennaba milatees. Hegaa gishshawu, taani hagaadan oychchiyoogaa doommaas: ‘Nuuni merettidoy aybissee? Deꞌuwawu halchchidobi aybee?’ Taani loytta wotta dentta qoppa simmada, Medhdhidaagee deꞌana bessees gaada qofaa qachchaas.”

Deꞌuwawu halchchidobaa xeelliyaagan Alekse eranawu koyidoogee I Geeshsha Maxaafaa pilgganaadan oottiis. Guyyeppe, dottorenne Xoossay baawa ga ammaniya A machchiyaa Geeshsha Maxaafaa xannaꞌiyoogaa doommaasu; qassi A xannaꞌiyoogaa koyro doommidoy ba azinay baliis gaada A ammanttanaassa! SHin haꞌꞌi naaꞌꞌaykka Xoossaa mintti ammanoosona; qassi I asawu halchchidobaa xeelliyaagan Geeshsha Maxaafay yootiyoobaa akeekoosona.

SAYNTTISTTE GIDIDA HIWABI YINO GIYO DOTTORIYAA. Hiwabi Yina piziksiyaa xannaꞌaasu, qassi daro layttawu, awaabaa pilggaasu. Hiwaba hagaadan gaasu: “Nuuni saynttistteti meretan haniyaabaa xannaꞌiyo wode ubban, keehi xoqqa maaray deꞌiyoogaa ubbatoo akeekoos; hegee laamettenna higgee deꞌiyoogaa bessiyaaba. Taani hagaadan oychchaas: ‘Ha higgeti waani doommidoonaa? Qumaa kattiyo tamaa loytti naagana koshshikko, awa ayfiyaa kaalettiya higgetussi aawatiyay oonee?’ ‘Xoossai salotanne sa7aa koiro medhdhiis’ giya Geeshsha Maxaafaa doometta qofay hegawu bessiya zaaro gidiyoogaa guyyeppe taani akeekaas.”—Doomettaabaa 1:1.

Guuggiyaa seeleti waati oottiyoonaa? Qassi awa ayfiyaappe hoꞌꞌoynne pooꞌoy waati kiyii? giyo oyshata gujjin, “waati” giidi oychchiyo daro oyshatu zaaruwaa akeekanaadan saynisee maaddiyoogee qoncce. Aleksenne Hiwaba akeekidoogaadan, “aybissi” giyo keehi koshshiya oyshata Geeshsha Maxaafay zaarees: Salotinne saꞌay merettidoy aybissee? Eti higgeta kaalliyoy aybissee? Nuuni merettidoy aybissee?

Geeshsha Maxaafay saꞌaa xeelliyaagan hagaadan gees: ‘Xoossay asi deꞌanaadaanappe attin, biittaa coo medhdhibeenna.’ (Isiyaasa 45:18) Ee, Xoossay saꞌawu halchchidobi deꞌees; qassi he halchchoy nuuni sinttappe demmanawu hidootan naagiyoobaara keehi gayttidaba gidiyoogaa kaalliya huuphe yohoy qonccissees.