2 Hashetiyoogaa

HEGEE AYBEE?

Azinaynne machchiyaa hashetidi oottiyaaba gidikko, eti horophphilliyaa laaggiiddi issisaa biya waanna uranne A maaddiya ura mala. Metoy merettiyo wodekka, aqo laggeti “taani” giyoogaappe “nuuni” giidi qoppoosona.

GEESHSHA MAXAAFAY YOOTIYO MAARAA: “Eti issi asa gidiyoogaappe attin naa77u asa gidokkona.”—Maatiyoosa 19:6.

“Aqo deꞌoy giiga gidanaadan azinaynne machchiyaa hashetana bessees.”—Kiristtofera.

HASHETIYOOGEE KOSHSHIYO GAASUWAA

Metoy merettiyo wode, hashetenna azinaynne machchiyaa he metuwaa giigissanawu qoppiyoogaa aggidi, issoy haraa mooranchcha goosona. Guutta metoy dere keena gidees.

“Hashetiyoogee aqo deꞌuwan keehi koshshiyaaba. Ta azinaynne taani hashetennaba gidikko, nuuni aqo lagge gidennan, issi keettan issippe coo deꞌiya asatu mala; hegaa mala asati keehi koshshiyaabaa kuuyiyo wode maayettokkona.”—Aleksandiro.

AY OOTTANA DANDDAYAY?

NENA QORA

• Ta demmiyo miishsha ubbaa tabaadan xeelliyaanaa?

• Loytta allaxxanawu, ta aqo laggee tanaara deꞌennaadan koyiyaanaa?

• Ta aqo laggee ba dabbotuura keehi siiqettiyaaba gidikkokka, taani etaara gayttanawu koyikkinaa?

NE AQO LAGGIYAARA HAASAYA

• Nu aqo deꞌuwaara gayttidaagan nuuni loytti hashetiyoy aybiinee?

• Nuuni kaseegaappe giigissana koshshiyaabay aybee?

• Kaseegaappe aaruwan hashetanawu ay oottana danddayiyoo?

MAADDIYA HARA QOFAA

• Intte naaꞌꞌay, ya baggaaranne ha baggaara eqqidi teenisiyaa kaassan annaacettiyaabadan qoppite. SHin he kaassan neeni ne aqo laggiyaa baggaa gidada aara hashetada kaaꞌanawu waatana danddayay?

• ‘Taani waata xoonanee?’ gaada qoppiyoogaappe, ‘Nuuni naaꞌꞌay waati xoonanee?’ gaada qoppa.

“Ooni suurekko ooni balakko qoppiyoogaa aggaaga. Hegee intte aqo deꞌuwan sarotettaynne issippetettay deꞌanaadan maaddiyaaba gidenna.”—Eetaana.

GEESHSHA MAXAAFAY YOOTIYO MAARAA: “Issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:3, 4.