TIMIRTTE 5
Gasttati Kaalettiyoogaa Goꞌꞌaa
GASTTATI AYBIN AYBIN KAALETTIYOONAA?
Naatuyyo gasttati immiyo kaaletoynne zoree koshshees. Intte naatussi kaaletuwaanne zoriyaa immana bessiyay inttena. Gidikkokka, hara gastta uri intte naata maaddananne zorana danddayees.
GASTTATU KAALETOY KEEHI KOSHSHIYOY AYBISSEE?
Daro biittatun, yelagati gasttatuura aattiyo wodee keehi guutta. Hagaa qoppite:
Asttamaaretuppenne hara gasttatuppe daro tamaareti deꞌiyo timirtte keettan naati daro wodiyaa aattoosona.
Timirtte keettaappe simmiyo wode, aawaykka aayyiyaakka ooso sohuwan deꞌiyo gishshawu, issi issi yelagati banttarkka takkoosona.
Amarkkan oosettida issi xinaatee bessiyoogaadan, layttay 8ppe biidi 12 gakkanawu deꞌiya naati, elektiroonike miishshan galla galla ammakaayiyan usuppun saatiyaa aattoosona.a
Hold On tu Yur Kids giyo maxaafay hagaadan gees: “Yelagati aayetu, aawatu, asttamaaretunne hara gasttatu zoriyaa, leemisuwaanne kaaletuwaa kaalliyoogaappe, . . . bantta mala yelagatuugaa kaalloosona.”
KAALETUWAA IMMIYO OGIYAA
Intte naatuura wodiyaa aattite.
GEESHSHA MAXAAFAY YOOTIYO MAARAA: “Na7i waanidi de7ana bessiyaakko tamaarissa; yaatikko, i cimidikka hegaa aggenna.”—Leemiso 22:6.
Naati banttana yelidaageeti kaalettanaadaaninne maaddanaadan darotoo koyosona. Qassi naati panttatettaa wodiyankka, hara naati banttana zoriyoogaappe yelidaageeti zoranaadan koyiyoogaa eranchchati yootoosona. Dottoree Loorens Istinbergi Yu end Yur Adolesent giyo maxaafan hagaadan giis: “Naꞌi naatettaappe biidi gastta gidana gakkanawu qofaaninne eeshshan ubbatoo kaalliyo waannati A yelidaageeta.” I gujjidi, “Naati intte qofaa ubbatoo ammanennaba woy intte yootiyo ubbabaa maayennaba gidikkokka, intte qoppiyoobaa eranawunne intte yootiyoobaa siyanawu koyoosona” yaagiis.
Intte naꞌi intte kaaletuwaa koyiyo gishshawu, A kaalettanawu intteyyo danddayettida ubbabaa oottite. Intte naatuura wodiyaa aattite; qassi intte qofaa, intte xoqqu ootti xeelliyoobaanne intte deꞌuwan hanidabaa etawu yootite.
Leemiso gidiya gasttatuura laggetanaadan oottite.
GEESHSHA MAXAAFAY YOOTIYO MAARAA: “Aadhdhida eranchcha asatuura hemettiya asi aadhdhida eranchcha gidees.”—Leemiso 13:20.
Keehi koshshiyaabaa xeelliyaagan intteegaadan qoppiyaanne oottiya, qassi intte naata maaddananne zorana danddayiyay gastta ura qoppana danddayeetii? He uri intte naꞌaara woy intte naꞌeera wodiyaa aattanaadan hanotaa giigissana danddayeetii? Hegee intte naatuban aawatiyay hara ura gidees giyoogaa gidenna. SHin intte naꞌa intte loohissiyoogaa bolli, A aynne qohennaagaa intte ammanettiyo gastta uri minttettiyoogee maaddana danddayees. Ximootiyoosi yelaga gidikkonne, kiitettida PHawuloosaara laggetidoogan keehi goꞌettidoogaanne Ximootiyoosaara laggetiyoogan PHawuloosikka goꞌettidoogaa Geeshsha Maxaafay yootees.—Piliphphisiyuusa 2:20, 22.
Ha wodiyan, daro so asay issi keettan woy issi heeran deꞌenna; qassi darotoo eta yelidaageetu aawatinne aayoti, ishatinne michchoti, hegaadankka hara dabboti hara biittan deꞌana danddayoosona. Intte hanotay hegaa mala gidikko, intte intte naatu bolli beꞌanawu koyiyo eeshshay deꞌiyo gastta urappe intte naati tamaaranaadan hanotaa giigissanawu baaxetite.
a He xinaatee bessiyoogaadan, yelagati elektiroonike miishshan galla galla amakaayiyan uddufun saate gidiyaagaa aattoosona. Naatinne yelagati Interneettiyaa baggaara tamaaranawu woy so ooso oottanawu goꞌettido wodee he xinaatiyan gujettibeenna.