Tekinolojee Intte Naata Waati Qohii?
Ooratta moobayliyaa woy prograamiyaa goꞌettiyoogaa eriyoogee gita asaa metana danddayees. SHin naati tekinolojiyaa ubbatoo goꞌettiyo gishshawu, hegee etawu kana kaassa.
Intternneetiyaa daro saatiyawu goꞌettiya yelagata kaallidi deꞌiya metoti gakkana danddayiyoogaa amaridaageeti akeekidosona.
Eta moobayle etawu amale gidees.
Intternneetiyan harati eta qohana.
Eti koyennaba gidikkonne, pokkobaa bessiya misileta xeellana.
INTTE ERANA KOSHSHIYAABAA
AMALIYAA
Intternneetiyan deꞌiya issi issibatinne kaassati issi urawu amale gidanaadan giigissiyoobata. Rikliming Konverseshion giyo maxaafay hagaadan gees: “Nu silkkiyan deꞌiya appilekeeshineti nu silkkiyaappe xayennaadan hanidi giigoosona.” Zalꞌꞌiyawu giigida appilekesheneta nuuni darotoo goꞌettikko, hegaa giigissidaageeti daro woriyaa demmoosona.
QOPPANA KOSHSHIYAABAA: Intte naati bantta moobayliyaa bessiyaagaappe aaruwan goꞌettiyaaba intteyyo milatii? Eti bantta wodiyaa loytti goꞌettanaadan waati maaddana danddayeetii?—EFISOONA 5:15, 16.
INTTERNNEETIYAN HARATA QOHIYOOGAA
Issi issi asati intternneetiyaa iita ogiyan goꞌettoosona, hegee eti harata qohanaadan oottana danddayees.
Amarida asati hayttatanawu koyiyo gishshawu, intternneetiyaa bessenna ogiyan goꞌettoosona. Qassi issi uri gibiran shoobettibeennaagaa akeekiyaaba gidikko, qohettidabadan qoppana danddayees.
QOPPANA KOSHSHIYAABAA: Intte naati intternneetiyaa bessiyaagaadan goꞌettiyoonaa? (Efisoona 4:31) Eti shoobettibeennaagaa akeekiyo wode keehi hanqqettiyoonaa?
POKKOBAA BESSIYA MISILETA
Intternneetiyan pokkobaa beꞌiyoogee metennaba. Issi issi moobayleti yelidaageeti bantta naati beꞌiyoobaa eranaadan maaddiyaaba gidikkonne, issi issitoo hegee oottenna gishshawu naati iitabaa beꞌana danddayoosona.
Pokkobawu denttettiya kiitaa kiittiyoogee woy nabbabiyoogee higgiyan digettidaba. Pokkobaa bessiya, naatu misiliyaa haratussi kiittiya woy hegaa beꞌiya naati issi issi biittaa higgiyaa maaraadan oyshettana danddayoosona.
QOPPANA KOSHSHIYAABAA: Pokkobawu denttettiya misileta intternneetiyan beꞌanaadan woy yeddanaadan paacciyo paaciyaa intte naati eqettanaadan waati maaddana danddayeetii?—EFISOONA 5:3, 4.
AY OOTTANA DANDDAYEETII?
INTTE NAATA LOOHISSITE
Tekinolojiyaa goꞌettiyoogee naata waayissennaba gidikkonne, etawu maadoy koshshees. Intternneetiyaa waatidi maara goꞌettanaakko naata loohissennan, eti goꞌettanaadan paqqadiyoogee keehi qohiyoogaa issi maxaafay yootees.
GEESHSHA MAXAAFAY YOOTIYO MAARAA: “Na7i waanidi de7ana bessiyaakko tamaarissa; yaatikko, i cimidikka hegaa aggenna.”—LEEMISO 22:6.
Intte oottanawu koyido qofaa doorite, woy intte qofaa xaafite.
Intte naꞌi intternneetiyaa maara goꞌettanaadan yootite
Intte naati boorasennaadan maaddite
Intternneetiyan qohiyaabaappe intte naata naaganawu inttiyo danddayettida ubbabaa oottite
Intte naꞌassi moobayle deꞌikko, I hegaa aybawu goꞌettiyaakko kaalli kaalli xeellite
Gallassan gallassan ay keena wodiyaa goꞌettanaakko kuuyite
Naati bantta moobayliyaa asi baynnasan, ubba qassi qammi hiixa kifiliyan goꞌettennaadan diggite
So asay issippe qumaa miyo wode ooninne moobayliyaa goꞌettennaadan higgiyaa kessite