Yihoowa Markkatuppe woqqaa gidiyaageeta eray? Nuuni ne shooro, nenaara oottiyaageeta woy nenaara tamaariyaageeta gidana danddayoos. Woy Geeshsha Maxaafaabaa neeyyo yootidaageeta gidana danddayoos. Nuuni oonee, qassi nuuni nu ammanuwaabaa asau yootiyoy aybissee?

Nuuni coo asa. Nuuni dumma dumma wogaaninne hanotan diccida asa. Nuuppe issoti issoti kase hara haymaanootiyaa kaalliyaageeta; harati qassi Xoossan ammanennaageeta. SHin Yihoowa Markka gidanaappe kase, nuuni ubbay Geeshsha Maxaafay tamaarissiyoobaa loyttidi pilggida. (Oosuwaa 17:11) Nuuni tamaaridobaa ammanidi, Xoossaa Yihoowayyo goynnanau kuuyida.

Nuuni Geeshsha Maxaafaa xannaꞌiyoogan goꞌettoos. Hara ubba asaagaadan, nuuni metootoos, qassi polo gidokko. SHin Geeshsha Maxaafaa baaso siraataa galla galla oosuwan peeshshiyoogan, nu deꞌoy kaseegaappe giiganaadan oottida. (Mazamure 128:1, 2) Nuuni Geeshsha Maxaafaappe tamaarido loꞌꞌobaa hara asau yootiyo gaasotuppe issoy hegaa.

Nuuni Xoossaa azazuwaadan deꞌoos. Geeshsha Maxaafay yootiyo he azazoti nuuni woppa deꞌuwaa deꞌiyaageeta, harata bonchiyaageeta, ammanettiyaageetanne kehiyaageeta gidanaadan maaddoosona. He baaso siraatati asay payyanne mino gidana mala maaddoosona; qassi so asay issippetettaynne loꞌꞌo kanddoy deꞌiyoogaa gidana mala minttettoosona. Nuuni ‘Xoossay asa somꞌꞌo xeellennaagaa’ erido gishshau, zariyaanne polotikaa dummatettaa gaasuwan ooyettenna alame yuushuwan deꞌiya tumu ishanttu maabaraa yame. Nuuni coo asa gidikkokka, keehi dumma asa gidida.—Oosuwaa 4:13; 10:34, 35.

• Yihoowa Markkati hara asaara issi mala gidiyoy aybiinee?

• Yihoowa Markkati Geeshsha Maxaafaa xannaꞌiyoogan tamaarido loꞌꞌobay aybee?

Yihoowa Markkata giya sunttaa daro asay ooratta haymaanoote sunttadan qoppees. Gidikkokka, 2,700⁠ppe dariya layttappe kase, tumu Xoossaa ashkkarati a “markkata” geetettidosona. (Isiyaasa 43:10-12) Nuuni 1931 gakkanaashin, Geeshsha Maxaafaa Tamaareta geetettoos. Yaatin Yihoowa Markkata giya sunttaa nuuni dooridoy aybissee?

Hegee nu Xoossaa shaakkidi erissees. Beni kushiyan xaafettida Geeshsha Maxaafaa xuufetun, Yihoowa giya Xoossaa sunttay shaꞌan qoodettiya sohuwan deꞌees. Daro Geeshsha Maxaafaa birshshettatun, he sunttay Godaa woy Xoossaa giyaagaa mala boncho sunttatun laamettiis. Gidikkokka, “Hagee yeletaappe yeletaa gakkanau taani hassayettanau merinau ta suntta” yaagidi, ba sunttay Yihoowa gidiyoogaa tumu Xoossay Muuseyyo yootiis. (Kessaabaa 3:15) Yaatiyoogan, worddo xoossatu ubbaappe bana dummayiis. Nuuni Xoossaa boncho sunttan xeesettiyoogan ceeqettoos.

Hegee nuuni yootiyo kiitaa qonccissees. Xillo gidida Aabeelappe doommin, beni wode deꞌida daro asay Yihoowa ammaniyoogaa markkattidosona. Asaa naatu taarikiyan, Nohee, Abrahaami, Saara, Muusee, Daawitinne harati, maayida shaaraa keena ‘daro markkatuura’ qoodettidosona. (Ibraawe 11:4–12:1) Issi uri mooribeenna asa gishshau pirdda keettan markkattiyoogaadan, nuunikka Xoossaa xeelliyaagan tumay qonccanaadan wozanappe koyoos.

Nuuni Yesuusa leemisuwaa kaalloos. I ‘ammanettida tumancha markka’ gidiyoogaa Geeshsha Maxaafay yootees. (Ajjuutaa 3:14) Yesuusi i Xoossaa ‘sunttaa erissidoogaanne’ Xoossaabaa ‘tumaa markkatidoogaa’ yootiis. (Yohaannisa 17:26; 18:37) Hegaa gishshau, tumuppe Yesuusa kaalliyaageeti Yihoowa sunttan xeegettana, qassi a sunttaa asau erissana bessees. Yihoowa Markkati hegaadan oottanau baaxetiiddi deꞌoosona.

• Geeshsha Maxaafaa Tamaareti Yihoowa Markkata giya sunttaa dooridoy aybissee?

• Yihoowayyo markkati saꞌan awudeppe doommidi deꞌidonaa?

• Yihoowayyo waanna Markkay oonee?

Geeshsha Maxaafay Kiristtoosa hayquwaappe simmin, worddo asttamaareti beni Kiristtaanetu giddon denddidi Geeshsha Maxaafaa tumaa geellayanaagaa kasetidi odiis. (Oosuwaa 20:29, 30) Guyyeppe hanidabaykka hegaa. Eti Yesuusi tamaarissidobaa eeqa goyno wogaara walakkin, worddo Kiristtaane ammanoy doommiis. (2 Ximootiyoosa 4:3, 4) Tumuppe Geeshsha Maxaafay tamaarissiyoobaa ha wodiyan loytti eriyoogaa waatidi akeekana danddayiyoo?

Yihooway tumaa qonccissiyo wodee gakkiis. I ‘Wurssetta wodiyan eray daranaagaa’ kasetidi yootiis. (Daaneela 12:4) Tumaa koyiya amarida asati, 1870n woosa keettati tamaarissiyo darobay Geeshsha Maxaafan baynnaba gidiyoogaa akeekidosona. Yaatiyo gishshau, Geeshsha Maxaafay tamaarissiyoobaa akeekanau pilggiyoogaa doommidosona; qassi eti Geeshsha Maxaafaa akeekanaadan Yihooway maaddiis.

Geeshsha Maxaafaa akeekan xannaꞌidosona. Nuussi leemiso gidiya, he gooba Geeshsha Maxaafaa Tamaareti, nuuni ha wodiyan xannaꞌanau goꞌettiyo hiillaa kaallidosona. Eti Geeshsha Maxaafaa dumma dumma qofaa tobbidosona. An deꞌiya issi issi qofay akeekanau metiyo wode, hegaa qonccissiya hara xiqisiyaa koyoosona. Eti pilggidi akeekidobay Geeshsha Maxaafan deꞌiya hara qofaara moggees giidi kuuyiyo wode, hegaa xaafidi oyqqoosona. Geeshsha Maxaafaa qofaa Geeshsha Maxaafay birshshanaadan oottiyoogan, Xoossaa sunttaanne a Kawotettaa, i asaa naatuyyoonne saꞌau halchidobaa, hayqqidaageetu hanotaanne dendduwaa hidootaa xeelliyaagan tumaa zaarettidi akeekidosona. Hegaadan pilggidi, eti daro worddo ammanuwaappenne meeziyaappe naxa kiyidosona.—Yohaannisa 8:31, 32.

Geeshsha Maxaafaa Tamaareti, 1879n tumaa aahuwan erissiyo wodee gakkidoogaa akeekidosona. Yaatiyo gishshau, he laytti Yihoowa Kawotettaa Erissiya Wochiyo Keelaa attamiyoogaa doommidosona; hegee hanno gakkanaassi attamettiiddi deꞌees. Nuuni ha wodiyan 750⁠ppe dariya qaalan 240 biittan deꞌiya asau Geeshsha Maxaafaa tumaa yootoos. Hagaappe kase tumu eray hagaadan keehi daribeenna!

• Kiristtoosa hayquwaappe simmin, Geeshsha Maxaafaa tumay waanidee?

• Nuuni Xoossaa Qaalaa tumaa zaarettidi akeekanaadan maaddiday aybee?

Yihoowa Markkati daro layttau Geeshsha Maxaafaa birshshettata daruwaa goꞌettidosona, attamissidosona, qassi asau immidosona. SHin, asay ‘tumaa eraanaadan’ loytti maaddiya ooratta birshshettaa giigissana koshshiyoogaa guyyeppe akeekida; Xoossaa sheneekka ubba asay tumaa eranaadaana. (1 Ximootiyoosa 2:3, 4) Hegaa gishshau, 1950n asay galla galla goꞌettiyo qaalan, Ooratta Alamiyaa Birshshettaa, Geeshsha Maxaafaa shaahoy kiyidoogaa erissiyoogaa doommida. Ha birshshettay hanno gakkanau 130⁠ppe dariya qaalan suure birshshettiis.

Akeekanau metenna Geeshsha Maxaafay koshshiis. Qaalatu hanotay wodiyaappe wodiyan laamettees; qassi Geeshsha Maxaafaa birshshettati daroti akeekanau metiya, giishin qoncce gidenna woy asay goꞌettiyoogaa aggido qaalata goꞌettoosona. Koyro xaafettida Geeshsha Maxaafaa xuufiyaa mala gidida, kushiyan xaafettida beni wode xuufeti beettidoogee, Geeshsha Maxaafay xaafettido Ibrayisxxe, Aramaykkenne Giriike qaalata loytti akeekanau maaddiis.

Xoossaa Qaalaa suure qonccissiya birshshettaa koshshiis. Geeshsha Maxaafaa birshshiyaageeti, ayyaanaa kaaletuwan xaafettidaagaa banttau koyidoogaadan gidennan, beni xaafettidaagaadan suure birshshana bessees. SHin daro Geeshsha Maxaafaa birshshettatun, Yihoowa giya Xoossaa sunttaa goꞌettibookkona.

Xaafissidaagaa bonchissiya Geeshsha Maxaafay koshshiis. (2 Sameela 23:2) Hagan beꞌiyoogaadan, beni kushiyan xaafettida Geeshsha Maxaafaa xuufetun Yihoowa sunttay 7,000 gidiya sohotun deꞌees; hegee Ooratta Alamiyaa Birshshettan zaarettidi ba sohuwan xaafettiis. (Mazamure 83:18, NW) Daro layttau minni pilggidi giigissido, ha Geeshsha Maxaafay Xoossaa qofaa loytti qonccissiyo gishshau, nabbabanau ufayssiya maxaafa. Neeni haasayiyo qaalan Ooratta Alamiyaa Birshshettay deꞌin aggin, neeni Yihoowa Qaalaa galla galla nabbabanaadan minttettoos.—Yaasa 1:8; Mazamure 1:2, 3.

• Ooratta Geeshsha Maxaafaa birshshettay koshshiyoy aybissee?

• Xoossaa sheniyaa eranau koyiya ubbay galla galla ay oottiyaakko loꞌꞌo?