Daro asay ayyaanaaban kaaletuwaanne minttettiyaaba demmenna gishshau, goynniyo sohuwaa biyoogaa aggiis. SHin, neeni Yihoowa Markkati shiiqiyo Kiristtaane shiiquwaa baana koshshiyoy aybissee? Neeni yaappe demmanabay aybee?

Siiqiyaanne qoppiya asaara shiiqiyoogan demmiyo ufayssaa. Koyro xeetu layttan deꞌida Kiristtaaneti gubaaꞌetun darajjayettidosona; qassi eti Xoossau goynnanau, Geeshsha Maxaafaa xannaꞌanaunne issoy issuwaa minttettanau shiiqoosona. (Ibraawe 10:24, 25) Eti ufayssiya hanotan tumu lagge gidida ayyaana ishatuura issippe shiiqiyoogan ufayttoosona. (2 Tasalonqqe 1:3; 3 Yohaannisa 14) Nuuni eta leemisuwaa kaalliyoogan hegaadan ufayttoos.

Geeshsha Maxaafay tamaarissiyoobaa oosuwan peeshshiyoogan demmiyo goꞌꞌaa. Beni wodeegaadan attuma asay, macca asaynne naati ubbay issippe shiiqoosona. Gooba asttamaareti Geeshsha Maxaafay yootiyoobaa nuuni ubba galla waatidi oosuwan peeshshanaakko akeekana mala maaddoosona. (Zaarettido Wogaa 31:12; Nahimiyaa 8:8) SHiiquwaa yiya ubbay Kiristtaane hidootaa qonccissiya ogiyan qofaa immananne mazamuriyaa yexxana danddayees.—Ibraawe 10:23.

Minnidi Xoossaa Ammaniyoogan Demmiyo Anjjuwaa. Kiitettida PHauloosi ba wodiyan deꞌiya issi Gubaaꞌiyan deꞌiyaageeta hagaadan giis: “Taani . . . inttena be7anau laamotais. Taani giyoogee, inttekka taakka issi wode minettana. Intte ta ammanuwan, qassi taanikka intte ammanuwan minettana.” (Roome 1:11, 12) SHiiqotun nu mala Kiristtaanetuura gayttiyoogee nu ammanuwaa minttees; qassi Geeshsha Maxaafay yootiyoobaara moggidi deꞌanau maaddees.

Ha saaminttan nuuni shiiqiyo shiiquwaa yaada hegaa ne huuphe beꞌana danddayaasa. Nena ufayssan mokkana. Ubba shiiquwankka shiiqanau miishsha qanxxakka; qassi muxuwaati shiiqenna.

• Nuuni gubaaꞌiyaa shiiquwaara gayttidaagan o leemisuwaa kaalliyoo?

• Gubaaꞌiyaa shiiquwaa shiiqiyoogan ayba ogiyan goꞌettana danddayiyoo?

Nuuni wolqqaama wora giddoora biyaaba woy carkkuwaa hanotay iita gidikkokka, gubaaꞌiyaa shiiquwaa aggennan shiiqoos. Metiyaabaynne oosuwaara gayttidaagan galla galla daafurssiyaabay deꞌishinkka, Yihoowa Markkati bantta mala Kiristtaanetuura issippe shiiqanau keehi baaxetiyoy aybissee?

Hegee nuuni ayyaanaaban minnanaadan maaddees. Nunaara gubaaꞌiyan issippe shiiqiyaageetuura gayttidaagan PHauloosi, “Issoi issuwau qoppoos” yaagidi xaafiis. (Ibraawe 10:24) Ha qonccissoy “akeekan qoppoos” giyoogaa; hegee issoy issuwaa loyttidi eriyoogaa bessees. Hegaa gishshau, PHauloosi yootidobay nuuni haratussi qoppanaadan minttettees. Hara Kiristtaaneta eriyoogan, etappe amaridaageeti nuugaa mala metuwaa waatidi xoonidaakko akeekoos; qassi nuunikka nu metuwaa xoonanaadan eti maaddana danddayoosona.

Laggetettaa minttanau maaddees. Nuuni gubaaꞌiyan issippe shiiqiyoy, nunaara coo erettiya asatu xallaara gidennan, nuuyyo mata lagge gididaageetuura. Hara wodetun nuuni ufayssiya hanotan issippe wodiyaa aattoos. Hegaadan issippe shiiqiyoogaa goꞌꞌay aybee? Nuuni issoy issuwaa nashshanaadan oottees; hegee qassi siiqoy minnanaadan oottees. Nu laggeta metoy gakkiyo wode, eta sohuwaara maaddoos; aybissi giikko, nuuni issoy issuwau mata lagge. (Leemiso 17:17) Nuuni gubaaꞌiyan deꞌiya ubbatuura laggetiyoogan “issoi issuwaassi issi mala qofaa” qoppiyoogaa bessoos.—1 Qoronttoosa 12:25, 26.

Xoossaa sheniyaa oottiyaageeta lagge oottada dooranaadan nena minttettoos. Hegaa mala laggeta Yihoowa Markkatu giddoppe demmana danddayaasa. Neeni nunaara shiiqennaadan aybinne teqqanaadan oottoppa.

• Gubaaꞌiyaa shiiquwaa shiiqiyoogee keehippe goꞌꞌiyoy aybissee?

• Neeni gubaaꞌiyaa shiiquwaa yaada Yihoowa Markkatuura erettanay awudee?

Beni Kiristtaaneti shiiquwan mazamuriyaa yexxoosona, woossoosona, Geeshsha Maxaafaa nabbabidi tobboosona; shin hara haymaanoote wogaa kaallibookkona. (1 Qoronttoosa 14:26) Nu shiiquwankka hegaa mala hanotaa akeekana danddayaasa.

Geeshsha Maxaafaappe goꞌꞌiyaabaa tamaaroos. Ubba gubaaꞌeti Woggaa gallassi Geeshsha Maxaafay nu deꞌuwaunne nuuni deꞌiyo wodiyau maaddiyaabaa ay yootiyaakko Geeshsha Maxaafaappe 30 daqiiqa haasayaa siyanau shiiqoosona. Nuuni ubbay nu Geeshsha Maxaafaa kessidi kaallana danddayoos. He haasayaappe simmin, issi saatiyau “Wochiyo Keelaa” Xinaatiyaa xannaꞌoos; gubaaꞌiyaa shiiqida asay xannaꞌanau giigida Wochiyo Keelaappe tobbiyo wode qofaa immana danddayees. Hegaadan tobbiyoogee Geeshsha Maxaafaa kaaletuwaa nu deꞌuwan oosuwan peeshshanau maaddees. Alame yuushuwan 110,000⁠ppe dariya gubaaꞌeti ubbay issi mala qofay deꞌiyo Wochiyo Keelaa xannaꞌoosona.

Tamaarissiyo hiillaa kaseegaappe loyttanau maaddiyaabaa. Qassi saaminttaa giddon issi galla omarssi, aginan aginan giigiya Kiristtaanetu Deꞌuwaanne Haggaazuwaa SHiiquwaa Xannaꞌiyo Xuufiyaa goꞌettidi Kiristtaanetu Deꞌuwaanne Haggaazuwaa SHiiquwaa giyo heezzu prograamee deꞌiyo shiiquwaa shiiqoos. Koyroogee, ishantti kasetidi nabbabido Geeshsha Maxaafaa shaahuwaa loytti akeekanaadan maaddiya, Xoossaa Qaalan Deꞌiya Alꞌꞌobaa giyo kifiliyaa. Hegaappe simmin, asaara Geeshsha Maxaafaa qofaa waati tobbanaakko ootti-besuwan qonccissiyo Minnada Haggaaza giyo kifilee deꞌees. Tamaareti nabbabiyoogaaninne haasayiyoogan qarattanaadan timirtte keettaa xomoosiyaagee zorees. (1 Ximootiyoosa 4:13) Wurssettan, Geeshsha Maxaafaa maaraa galla galla deꞌuwan waatidi oosuwan peeshshana danddayiyaakko Kiristtaaneti Deꞌiyo Deꞌuwaa giyo kifiliyan tamaaroos. Ha kifiliyan Geeshsha Maxaafaa qofaa loytti akeekanaadan maaddiyaabaa oysha zaaruwankka tobboos.

Nu shiiqota shiiqiyo wode, Geeshsha Maxaafaa loytti tamaariyo hanotan neeni ufayttanaagee attenna.—Isiyaasa 54:13.

• Yihoowa Markkatu shiiquwan ay siyana gaada naagana danddayay?

• Nu shiiqotuppe neeni ha saaminttan yaana koyiyo shiiqoy awugee?

Yihoowa Markkati gubaaꞌiyan shiiqiyo wode loytti maayiyoogaa ha brooshuriyan deꞌiya misiletuppe akeekadii? Nuuni shiiquwaa biyo wode loytti maayiyoynne alleeqettiyoy aybissee?

Nu Xoossaa bonchanau. Xoossay nu meraa xallaa xeellennaagee qoncce. (1 Sameela 16:7) Gidikkokka, nuuni Xoossaayyo goynnanau shiiqiyo wode, anne nu mala Kiristtaaneta bonchanau wozanappe koyoos. Nuuni pirdda keettan issi daannaa sinttan eqqana koshshiyaaba gidikko, nu hanotay a maataa bonchiyoogaa bessiyaaba gidana koshshiyoogee qoncce. Hegaara issi mala hanotan, nuuni shiiquwau maayiyoonne alleeqettiyo hanotay ‘saꞌaa ubba pirddiya,’ Xoossaa Yihoowanne nuuni ayyo goynniyo sohuwaa bonchiyoogaa bessees.—Doomettaabaa 18:25.

Nu deꞌuwan kaalliyo maaraa qonccissanau. Kiristtaaneti “Xoossau yayyais giya” asatudan “kiphataaninne banttana shiishshi ekkiyoogan” maayanaadan Geeshsha Maxaafay minttettees. (1 Ximootiyoosa 2:9, 10) ‘Kiphatan’ maayiyoogaa giyoogee bau deꞌiyaabaa asa bessiyoogaappe, asho gaytotettau denttettiya ogiyan woy bollaa bessiya ogiyan maayiyoogaappe haakkiyoogaa giyoogaa. Qassi ‘bana shiishshi ekkiyoogee’ maari baynna maayuwaa gidennan, suure maayuwaa maayanaadan maaddees. Ha baaso siraatata goꞌettidi dumma dummabaa doorana danddayoos. Nuuni loyttidi maayiyoogee “nuna ashshiyaa Xoossaabaa tamaarissiyoogaa ubbaban galatissanau” danddayees. (Tiitu 2:10; 1 PHeexiroosa 2:12) Nuuni shiiquwau loytti maayiyoogee Yihoowa goynuwaa asay bonchanaadan maaddees.

Neeni loytta maayabeennaba gidikkokka, shiiquwau Kawotettaa Addaraashaa yaana danddayaasa. Nu maayoy alꞌꞌuwan shamettidaagaa woy shacciyaagaa gidana xayikkonne, geeshshanne suure gidana bessees.

• Nuuni Xoossaayyo goynniyo wode maayiyo hanotay ay keena koshshiyaabee?

• Nuuni maayiyoogaaranne alleeqettiyoogaara gayttidaagan kaaleto gidiya baaso siraatati awugeetee?

Issi Yihoowa Markkaara Geeshsha Maxaafaa xannaꞌaydda deꞌiyaaba gidikko, xannaꞌanaappe kase neeni xannaꞌiyo xuufiyaa zaarettiyoogee erettidaagaa. Gubaaꞌiyaa shiiquwaa baanaappe kase hegaadan oottiyoogee keehippe goꞌꞌees. Nuuni loꞌꞌobaa meezetiyaaba gidikko, loꞌꞌo ayfiyaa ayfoos.

Awude qassi awan giigettanaakko kuuya. Qofay shaahettennan neeni xannaꞌana danddayiyoy awudee? Oosuwaa doommanaappe kase guuraaneeyye woy naati zinꞌꞌi simmin qammaanee? Neeni daro saatiyaa xannaꞌanau danddayennaba gidikkokka, woqqu saatiyaa xannaꞌanau danddayiyaakko kuuya; yaatada he saatiyan xannaꞌennaadan diggiyaabaa oottoppa. Injje sohuwaa koya; qassi eraadooniyaa, televizhiiniyaanne moobayliyaa gorddiyoogan qofay shaahettanaadan oottiyaabaa digga. Xannaꞌanaappe kase woossiyoogee, hirggissiyaabaappe woppu gaanaadan oottiyo gishshau, qofay shaahettennan Xoossaa Qaalaa xannaꞌanau maaddees.—Piliphphisiyuusa 4:6, 7.

Xuufiyan malaata; qassi shiiquwan zaaranau giigetta. Xannaꞌiyo xuufiyan deꞌiya qofaa akeekanau mala. Huuphe yohuwaa woy shemppuwaa qoppa; ubba sima huuphe yohoti waanna qofaara ayba ogiyan gayttiyaakko qoppa; qassi waanna qofaa qonccissiya misiletanne zaareto oyshata akeeka. Yaatada menttota huuphiyan huuphiyan nabbabada, oyshau zaaruwaa koya. Xiqiseta kessada nabbaba; qassi he xiqiseti qofaa waatidi minttiyaakko qoppa. (Oosuwaa 17:11) Oyshau zaaruwaa demmiyo wode, shiiquwan hassayada zaaranau he menttuwan deꞌiya amarida qaalata woy qofaa malaata. Yaatada koyiyaaba gidikko, shiiquwan kushiyaa denttada qantta zaaruwaa zaarana danddayaasa.

Saaminttan saaminttan shiiquwan tobbiyo dumma dumma qofaa pilggiyoogan, Geeshsha Maxaafaa eraa gujja erada kaseegaa bolli ‘minjjana’ danddayaasa.—Maatiyoosa 13:51, 52.

• SHiiquwau giigettanau ay meeze oottana danddayay?

• SHiiquwan oyshaa zaaranau ayba ogiyan giigettana danddayay?

Benippe doommidi, so asay issippe wodiyaa aattanaadan, ayyaanaaban bantta hanotaa minttanaadaaninne issoy issuwaara keehi siiqettanaadan Yihooway koyees. (Zaarettido Wogaa 6:6, 7) Hegaa gishshau, Yihoowa Markkati saaminttan saaminttan so asay issippe gonniyo wodiyaa keeroosona; he wode, so asau ayyaanaaban koshshiyaabaa ufayssiya hanotan tobboosona. Neeni nerkka deꞌiyaaba gidikkokka, dooridobaa Geeshsha Maxaafaa goꞌettada xannaꞌiyoogan Xoossaara deꞌiya dabbotaa minttana danddayaasa.

Yihoowakko shiiqanau maaddees. “Xoossaakko shiiqite; ikka inttekko shiiqana.” (Yaaqooba 4:8) Nuuni a Qaalaa, Geeshsha Maxaafaappe a eeshshaabaanne a oosuwaabaa keehi tamaariyo wode Yihoowa loyttidi eroos. Kiristtaanetu Deꞌuwaanne Haggaazuwaa SHiiquwaa prograamiyan kiyida Geeshsha Maxaafaa nibaabiyaa he saaminttan issippe nabbabanau amarida wodiyaa keeriyoogan so asaa goynuwaa doommana danddayettees. Geeshsha Maxaafaappe nabbabiyo kifiliyaa so asa ubbay kayan kayan nabbabana mala immana danddayettees; yaatidi tamaaridobaa ubbay tobbana danddayees.

So asaa dabbotay minnanaadan oottees. So asay issippe Geeshsha Maxaafaa nabbabiyo wode, azinaynne machiyaa, yelidaageetinne naati issoy issuwaara keehi siiqettoosona. Hegee eti ufayttiyo, woppu giyo, qassi saaminttan saaminttan yeemottidi naagiyo wode gidana koshshees. Naatu layttaadan, yelidaageeti Wochiyo Keelaaninne Beegottite! maxeetiyan woy jw.org websaytiyan kiyayaabappe keehi goꞌꞌiya huuphe yohuwaa tobbanau doorana danddayoosona. Intte naata timirtte keettan gakkida metoy aybakko, qassi eti hegaa waati giigissana danddayiyaakko haasayana danddayeeta. Etaara JW Brodkastingiyaa (tv.jw.org) beꞌi simmdi issippe tobbana danddayeeta. SHiiquwan yexxiyo mazamuriyaa meezetana danddayeeta; qassi so asaa goynuwaappe simmin kaaꞌana danddayeeta.

Saaminttan saaminttan issippe Yihoowayyo goynnanau keerido ha dumma wodee, so asa ubbay Xoossaa Qaalaa xannaꞌiyoogan ufayttanaadan maaddees; qassi Yihooway intte oottiyoobaa keehi anjjana.—Mazamure 1:1-3.

• So asaa goynuwau nuuni wodiyaa keerana koshshiyoy aybissee?

• He wodee so asa ubbau ufayssiyaagaa gidanaadan yelidaageeti waatana danddayiyoonaa?

Ha asati keehi ufayttiyoy aybissee? Eti gita shiiqotuppe issuwaa shiiqidaageeta. Layttan heezzutoo shiiqanaadan azazettida beni deꞌida Xoossaa ashkkaratuugaadan, nuuni gita shiiquwan issippe shiiqanau yeemottidi naagoos. (Zaarettido Wogaa 16:16) Layttan nuuni heezzutoo, giishin, naaꞌꞌu kayan issi issi gallassawu shiiqiyo woradaa shiiquwaanne heezzu gallassi gita shiiquwawu shiiqoos. Nuuni ha shiiqotuppe goꞌettana danddayiyoy ayba ogiyaanee?

Gita shiiqoti ishanttu maabaraa minttoosona. Israaꞌeelati Yihoowa “kunttida yaa7an” galatidi ufayttidoogaadan, nuunikka gita shiiqotun issippe Yihoowayyo goynniyoogan ufayttoos. (Mazamure 26:12; 111:1) He shiiqoti hara gubaaꞌiyan deꞌiya woy ubba hara biittan deꞌiya Yihoowa Markkatuura gayttanaadaaninne laggetanaadan oottoosona. Laaxaa saatiyan, shiiquwaa sohuwan qumaa issippe moos; hegaa mala shiiqoti nuuni issoy issuwaara keehi siiqettanaadan oottoosona. (Oosuwaa 2:42) Nuuni yan alame yuusho ‘ishanttu’ maabaraa issippe gatti oyttiya siiquwaa akeekoos.—1 PHeexiroosa 2:17.

Nuuni ayyaanaaban diccanaadan maaddoosona. Israaꞌeelati Geeshsha Maxaafaappe etau qonccissidi yootido ‘qaalaa akeekidoogankka’ goꞌettidosona. (Nahimiyaa 8:8, 12) Geeshsha Maxaafaappe gita shiiqotun tamaariyoobaa nuunikka xoqqu oottidi xeelloos. Ubba prograamiyaa huuphe yohoy Geeshsha Maxaafaappe ekettida qofa. Minttettiya haasayatuppe, simppoozemetuppenne hanettidabaa ootti-bessiyoogaappe Xoossaa sheniyaa nu deꞌuwan waatidi polanaakko tamaaroos. Ha waayissiya wodiyan Kiristtaaneti banttana gakkida metuwaappe xooni kiyidoogaa eti yootiyo wode siyiyoogee nuna minttettees. Heezu gallassa gita shiiquwan beꞌiyo diraamay nuuni Geeshsha Maxaafaa taarikiyaa loyttidi akeekanaadaaninne goꞌꞌiyaabaa tamaaranaadan maaddees. Gita shiiqo ubban, banttana Xoossau geppidaageeti xammaqettoosona.

• Gita shiiquwaa wodee ufayssiyaagaa gidiyoy aybissee?

• Neeni issi gita shiiquwaa shiiqiyoogan waanada goꞌettana danddayay?

Yesuusi hayqqanaappe guuttaa kasetidi, “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagidi yootiis. (Maatiyoosa 24:14) SHin alame yuushuwan mishiraachuwaa sabbakiyo oosoy waani polettanee? Yesuusi saꞌan deꞌiyo wode oottidobaa leemisuwaa kaalliyoogaana.—Luqaasa 8:1.

Nuuni asau eta son yootanau baaxetoos. Yesuusi bana kaalliyaageeti sooppe soo biidi mishiraachuwaa sabbakanaadan loohissiis. (Maatiyoosa 10:11-13; Oosuwaa 5:42; 20:20) Koyro xeetu layttan wonggeliyaa yootidaageeti banttau imettida moottan sabbakidosona. (Maatiyoosa 10:5, 6; 2 Qoronttoosa 10:13) Hegaara issi mala hanotan, ha wodiyan sabbakiyo oosoy loꞌꞌo hanotan daraajjayettido gishshau, ubba gubaaꞌiyau haggaaziyo moottay imettees. Hegee Yesuusi ‘wonggeliyaa mishiraachuwaa asaassi yootanaadaaninne loytti markkattanaadan’ azazidoogaa nuuni polanaadan maaddees.—Oosuwaa 10:42.

Nuuni asaa demmiyo soho ubban etau yootanau baaxetoos. Yesuusi abbaa lanqqiyan woy asay haattaa duuqqiyo ollaa mataaninne hegaa mala, daro asay deꞌiyo sohuwan sabbakiyoogankka leemiso gidees. (Marqqoosa 4:1; Yohaannisa 4:5-15) Nuunikka asaa demmiyo soho ubban, giishin ogiyan, zalꞌꞌe heeran, dubbushan woy silkkiyan Geeshsha Maxaafaabaa asau yootoos. Qassi hanotay injjetiyo wode nu shoorotuyyo, nunaara oottiyaageetuyyo, nunaara tamaariyaageetuyyoonne nu dabbotuyyo yootoos. Ha ubba ogetun asau markkattanau baaxetiyoogee, alame yuushuwan miilooniyan qoodettiya asay Yihooway “ashshiyo mishiraachchuwaa” siyanaadan oottiis.—Mazamure 96:2.

Neeni Xoossaa Kawotettaa mishiraachuwaa yootana danddayiyo uri deꞌii, qassi he mishiraachoy sinttappe eta ay keenaa goꞌꞌiyaabakko qoppana danddayay? Ha mishiraachuwaa neessi danddayettida keenan sohuwaara haratuyyo yoota!

• Sabbakettana bessiya “mishiraachchoi” aybee?

• Yihoowa Markkati sabbakiyoogan Yesuusa leemisuwaa kaalliyoy ayba ogiyaanee?

“Aqinye” giyo Amaaratto qaalay darotoo, ooratta mootti biidi oottiyaanne haratuyyo hanotaa giigissiya uraa qonccissees. Yesuusi shemppo ashshiya oosuwaa oottanaunne asaa naati bashshaappe attanaadan saꞌaa yiido gishshau, i aqinye mala gaana danddayoos. (Maatiyoosa 20:28) Ha wodiyan, Yesuusa kaalliyaageeti banttau danddayettida keenan asaa a “kaalliyaageeta” oottiyoogan a leemisuwaa kaalloosona. (Maatiyoosa 28:19, 20) Issoti issoti aqinye gididi oottoosona.

Aqinyee kumetta wodiyaa haggaaziyaagaa. Yihoowa Markkati ubbay wonggeliyaa mishiraachuwaa yootoosona. SHin issoti issoti kumetta wode aqinye gididi aginan aginan 70 saatiyaa haggaazanau bantta hanotaa giigissidosona. Aqinye gidanau daroti bantta oosuwaappe poxxidosona. Harati qassi Kawotettaa mishiraachuwaa yootiyaageeti keehi koshshiyo heeran haggaazanau dumma aqinye gididi oottanaadan doorettoosona; eti aginan aginan 130 woy hegaappe daro saatiyaa haggaazoosona. Aqinyeti deꞌuwau koshshiyaabaa Yihooway kunttanaagaa ammanettiyoogan, banttau deꞌiyaabay gidana giidi deꞌoosona. (Maatiyoosa 6:31-33; 1 Ximootiyoosa 6:6-8) Aqinye gididi kumetta wodiyaa haggaazana danddayennaageeti kaafiya aqinye gididi haggaazana danddayiyo wode, issi aginan 30 woy 50 saatiyaa haggaaziyoogan bantta sibikate oosuwaa aassana danddayoosona.

Aqinyiyaa denttettiyay Xoossaanne asaa siiqiyoogaa. Yesuusaagaadan, nuuni ha wodiyan daroti Xoossaabaanne a halchuwaabaa erana koshshiyoogaa akeekoos. (Marqqoosa 6:34) Hegaa gishshau, nuuni eriyo ammanttiya hidootaa etau yootiyoogan ha wodiyan eta maaddana danddayoos. Aqinyee shooruwaa siiqiyoogaappe denddidaagan, ayyaanaaban harata maaddanau ba wodiyaanne ba wolqqaa goꞌettees. (Maatiyoosa 22:39; 1 Tasalonqqe 2:8) Hegaa gishshau, a ammanoy minnees, kaseegaappe aaruwan Xoossaakko shiiqees, qassi keehi ufayttiyaagaa gidees.—Oosuwaa 20:35.

• Aqinye giyoogee woygiyoogee?

• Issoti issoti kumetta wode aqinye gidanaadan denttettidabay aybee?

Yihoowa Markkati Geeshsha Maxaafaa tamaareta gidiyoogan erettoosona. Kumetta wodiyaa Kawotettaa mishiraachuwaa yootiyaageeti loytti ‘yootanawu’ maaddana mala etawu dumma timirtte keettay giigiis.—2 Ximootiyoosa 4:5.

Aqinyetettaa Haggaazuwaa Timirtte Keettaa: Issi asi kumetta wodiyaa aqinye gididi issi layttaa haggaazi simmidi, matan deꞌiya Kawotettaa Addaraashan giigida timirtte keettan usuppun gallassaa tamaarees. He timirtte keettaa halchoy he aqinyee kaseegaappe aaruwan Yihoowakko shiiqanaadan, haggaazo qommo ubban loꞌꞌo ayfiyaa demmanaadan, qassi hegaadan ammanettidi haggaaziyoogaa aggennaadan maaddiyoogaa.

Kawotettaa Mishiraachuwaa Yootiyaageetu Timirtte Keettaa. Naaꞌꞌu aginawu giigida ha timirttee gooba aqinyeti bantta heeraappe harasan Kawotettaabaa yootiyaageeti keehi koshshiyo sohuwan haggaazanaadan loohissiyo timirtte. Hegee eti saꞌan ooppenne aaruwan Yihoowawu oottida Yesuus Kiristtoosa leemisuwaa kaallidi, “Hekko, tana kiitta” yaagoosona giyoogaa mala. (Isiyaasa 6:8; Yohaannisa 7:29) Diccido heeraappe haahosaa biidi haggaazanawu, kaseegaa keena injjetenna deꞌuwaa deꞌanawu eeno gaana koshshennan aggenna. He heeraa wogay, carkkuwaa hanotaynne qumay kase meezetoogaappe keehi dumma gidana danddayees. Qassi ooratta qaalaa tamaarana koshshennan aggenna. Ha timirtte keettay machibeenna ishatinne gelibeenna michoti, qassi aqo oyqqida Kiristtaaneti hegaa mala sohuwan haggaaziyoogan Yihoowa dirijjitiyan darobaa oottanawu maaddiya eeshshay deꞌiyoogeeta gidanaadan maaddees; eta layttay 23⁠ppe 65 gakkanaassi gidana bessees.

Giiliyaade Geeshsha Maxaafaa Timirtte Keettaa. “Giiliyaade” giya Ibraysxxe qaalay “Guupettida Markkata” giyoogaa. Giiliyaade timirtte keettan, 1943⁠ppe doommidi tamaarida 8,000⁠ppe dariya misoonaaweti, ‘asa ubbawu’ markkattidi loꞌꞌo ayfiyaa ayfana mala kiitettidosona. (Oosuwaa 13:47) Leemisuwau, misoonaaweti koyro Peeru biitti biyo wode, yan gubaaꞌee baawa; shin haꞌꞌi 1,000⁠ppe dariya gubaaꞌeti deꞌoosona. Misoonaaweti Jaappaane biittan haggaaziyoogaa doommiyo wode, yan deꞌiya Yihoowa Markkati tammaa gakkokkona; shin ha wodiyan 200,000⁠ppe daro. Tamaareti he timirtte keettan Geeshsha Maxaafaa loytti tamaaroosona. Kumetta alamiyan oottiyo Kawotettaa oosoy keehi loꞌꞌonne giiga hanotan oosettanaadan maaddana mala, dumma aqinyeti woy misoonaaweti, macara biiruwan oottiyaageeti woy woradaa xomoosiyaageeti shoobettidi he timirtte keettan koshshiya loohissuwaa demmoosona.

• Aqinyetettaa Haggaazuwaa Timirtte Keettaa halchoy aybee?

• Kawotettaa Mishiraachuwaa Yootiyaageetu Timirtte Keettay giigidoy oossee?