Xoossay Oonee?

1, 2. Darotoo asay oychiyo oyshay aybee?

NAATI daro oyshaa oychoosona. Neeni etawu issibaa zaariyo wode, ‘Aybissi?’ gi zaaretti darotoo oychoosona. Neeni he oyshaa zaaranawu maliyo wode, haꞌꞌikka ‘Aybissi?’ gi oychana danddayoosona.

² Nuuni yelaga woy gastta gidin, ubbaykka oychana koyiyoobay deꞌees. Nuuni biyo ogiyaanne saatiyaa eranawu oychana danddayoos. Woy deꞌuwaabaanne sinttanaabaa eranawu oychana danddayoos. SHin nuuni ha oyshatuyyo suure zaaruwaa demmennaba gidikko, oychiyoogaa aggana danddayoos.

3. Daro asay eti oychiyo oyshawu zaaro demmana danddayennabadan qoppiyoy aybissee?

³ Nuuni oychiyo oyshatu zaaroy Geeshsha Maxaafan deꞌii? Issoti issoti hegaadan qoppana danddayoosona; shin eti Geeshsha Maxaafay akeekanawu keehi metiyaabadan qoppoosona. Eti oyshaa zaariyay asttamaaretu, qeesetu woy pastteretu xalla giidi qoppana danddayoosona. Harati qassi oyshaa zaaruwaa erenna gishshawu keehi yeellatana danddayoosona. Ne qofay aybee?

4, 5. Neeni eranawu oychiyo oyshati awugeetee? Neeni hegaa zaaruwaa aggennan koyana koshshiyoy aybissee?

⁴ Neeni kaallidi deꞌiya oyshatu zaaruwaa eranawu koyennan aggakka: Deꞌuwawu halchidobi aybee? Asay hayqqiyo wode waanii? Xoossay ay mala Xoossee? Erettida Asttamaaree Yesuusi, “Woossite; intte ekkana. Koyite; intte demmana. Kare yiidi xeesite; intteyyo karee dooyettana” yaagiis. (Maatiyoosa 7:7) Suure zaaruwaa demmana gakkanaashin oychiyoogaa aggoppa.

⁵ Ee, neeni aggennan ‘koyiyaaba’ gidikko, Geeshsha Maxaafaappe zaaruwaa demmana. (Leemiso 2:1-5) He zaaroti akeekanawu metokkona. Ne tamaariyoobay haꞌꞌi ufayttada deꞌanaadaaninne sinttappekka loꞌꞌo deꞌuwaa hidootan naaganaadan maaddana. Daro asay akeekanawu metootiyo issi oyshaa ane beꞌoos.

XOOSSAY NUUSSI QOPPII?

6. Issi issi asay eti metootiyo wode Xoossay qarettennabadan qoppiyoy aybissee?

⁶ Daro asay Xoossay nuussi qarettennabadan qoppees. Eti Xoossay nuussi qarettiyaakko, alamee hagaa mala gidenna giidi qoppoosona. Ubbasan olay, ixoynne barchee kumiis. Asay harggees, tuggateesinne hayqqees. Issi issi asay, ‘Xoossay nuussi qoppiyaaba gidikko, ha meto ubbaa ayssi xayssennee?’ giidi qoppees.

7. (a) Haymaanootiyaa kaalettiyaageeti asay Xoossaa meqettaa iita gaanaadan tamaarissiyoy ayba ogiyaanee? (b) Iitabay gakkanaadan oottiyay Xoossaa gidennaagaa nuuni ammanettana danddayiyoy aybissee?

⁷ Issi issitoo, haymaanootiyaa kaalettiyaageeti asay Xoossaa meqettaa iita giidi qoppanaadan oottoosona. Iitabay gakkiyo wode, eti hegee Xoossaa shene goosona. Qassi hegee hananaadan oottiday a goosona. Eti yaagiyoogan, Xoossaa moorancha oottoosona. SHin Xoossay iitabay gakkanaadan mule oottennaagaa Geeshsha Maxaafay tamaarissees. Yaaqooba 1:13y Xoossay oonanne iitaban paaccennaagaa yootees. He xiqisee, “Ooninne paacettido wode, ‘Tana Xoossai paaccees’ gooppo. Aissi giikko, Xoossai iitan paacettanau danddayenna; qassi i ba huuphen oonanne paaccenna” yaagees. Hegaa gishshawu, Xoossay iitabay gakkenna mala teqqennaba gidikkokka, iitabay gakkanaadan i mule oottenna. (Iyyooba 34:10-12 nabbaba.) Ane issi leemisuwaa beꞌoos.

8, 9. Nu bolli metoy gakkanaadan oottiyay Xoossaa giyoogee likke gidennay aybissee? Leemisuwaa yoota.

⁸ Bantta soo asaara deꞌiya issi yelagaa qoppa. Aaway a keehi siiqees; qassi i suurebaa waati kuuyanaakko tamaarissees. SHin he naꞌay ba aawaa bolli makkalidi son deꞌikke giidi kiyiis. I iitabaa oottidi metuwan geliis. Naꞌay sooppe kiyiyo wode diggibeenna gishshawu, aaway mooranchee? Gidennaagee qoncce! (Luqaasa 15:11-13) He aawaagaadan, asay makkalidi iitabaa oottiyo wode Xoossay diggibeenna. Hegaa gishshawu, iitabay gakkiyo wode, hegee gakkanaadan oottiday Xoossaa gidennaagaa nuuni hassayana koshshees. Xoossaa moorancha kessiyoogee likke gidenna.

⁹ Iitabay gakkenna mala Xoossay teqqennan aggido gaasoy deꞌees. Hegaa xeelliyaagan Geeshsha Maxaafay yootiyoobaa SHemppo 11n beꞌana. SHin Xoossay nuna siiqiyoogaanne nu bolli metuwaa gattiyay a gidennaagaa ammanettana danddayaasa. Metuwaa xayssana danddayiyay a xalla.—Isiyaasa 33:2.

10. Iita asay moorido ubbabaa Xoossay giigissanaagaa nuuni ammanettana danddayiyoy aybissee?

¹⁰ Xoossay geeshsha. (Isiyaasa 6:3) I oottiyo ubbabay boree baynnaagaanne loꞌꞌoba. Hegaa gishshawu an ammanettana danddayoos. Issi issitoo balabaa oottiyo gishshawu, asan hegaadan ammanettana danddayokko. Asaa haariya keehi loꞌꞌo urawukka gidin, iita asati moorido ubbabaa zaarettidi giigissiyo wolqqi deꞌenna. Xoossaagaa keena wolqqi deꞌiyo asi baawa. Iita asay moorido ubbabaa giigissana danddayiyo wolqqaykka koshshaykka awu deꞌees. I iitabaa ubbaa merinawu xayssana.—Mazamure 37:9-11 nabbaba.

ASAY METOOTIYO WODE XOOSSAWU AYBI SIYETTII?

11. Neeni metootiyo wode Xoossawu aybi siyettii?

¹¹ Alamiyan haniyaabaanne ne bolli gakkiya metuwaa beꞌiyo wode Xoossawu aybi siyettii? Geeshsha Maxaafay Xoossay ‘xillobaa dosiyoogaa’ yootees. (Mazamure 37:28) Hegaa gishshawu, suurebaynne suure gidennabay a keehi qofissees. I asay metootanaadan koyenna. Beni saꞌan iitatettay kumidoogaa Xoossay beꞌido wode ‘a wozanay keehippe seelettidoogaa’ Geeshsha Maxaafay yootees. (Doomettaabaa 6:5, 6) Xoossay laamettibeenna. (Milkkiyaasa 3:6) Geeshsha Maxaafay Xoossay neessi qoppiyoogaa yootees.—1 PHeexiroosa 5:7 nabbaba.

12, 13. (a) Nuuni harata siiqiyoynne etassi qoppiyoy aybissee, qassi alamiyan gakkiya metuwaa xeelliyaagan nuussi aybi siyettii? (b) Xoossay metuwaanne pirdda pacaa ubbaa xayssanaagaa ammanettana danddayiyoy aybissee?

¹² Geeshsha Maxaafay Xoossay nuna ba leemisuwan medhidoogaakka yootees. (Doomettaabaa 1:26) Hegee, Xoossay nuna baagaadan loꞌꞌo eeshshay deꞌiyoogeeta oottidi medhiis giyoogaa. Hegaa gishshawu, neeni suure asaa bolli gakkiya metuwaa beꞌiyo wode azzaniyaaba gidikko, Xoossay hegaa beꞌiyo wode keehi azzanees! Hegaa waati eriyoo?

¹³ Geeshsha Maxaafay, “Xoossai siiqo” yaagees. (1 Yohaannisa 4:8) Xoossay ubbabaa siiqoy denttettin oottees. Xoossay siiqiyo gishshawu nuunikka siiqoos. Ane hagaa qoppa: Neessi wolqqi deꞌiyaakko, alamiyan deꞌiya metuwaanne pirdda pacaa ubbaa xayssikkii? Neeni asaa siiqiyo gishshawu, hegaa xayssanaagee qoncce. Xoossay shin? Ayyo wolqqay deꞌiyo gishshawunne i nuna siiqiyo gishshawu, metuwaanne pirdda pacaa ubbaa xayssana. Ha maxaafaa doomettan qonccida, Xoossay qaalaa gelido ubbabay polettanaagaa ammanettana danddayaasa! SHin neeni ha ubbabaa ammanettanawu Xoossaabaa gujjada erana bessees.

XOOSSAY NEENI A ERANAADAN KOYEES

14. Xoossaa sunttay oonee, nuuni he sunttaa xeegana koshshiyoogaa waati eriyoo?

¹⁴ Neeni issi urawu lagge gidana koyikko, koyro ayyo yootiyoobay aybee? Ne sunttaa. Xoossaayyo suntti deꞌii? Daro haymaanooteti a sunttay Xoossaa woy Godaa goosona; shin hegeeti a suntta gidennan, “kawuwaa” woy “prezddanttiyaa” giyoogaadan, boncho sunttata. Xoossay ba sunttay Yihoowa gidiyoogaa yootiis. Mazamure 83:18y, “Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona” yaagees. Geeshsha Maxaafaa xaafida asati Xoossaa sunttaa shaꞌan qoodettiya sohuwan xaafidosona. Yihooway neeni a sunttaa erada xeeganaadan koyees. Neeni a dabbo gidanaadan i ba sunttaa neeyyo yootees.

15. Yihoowa giyo sunttaa birshshettay aybee?

¹⁵ Yihoowa giyo Xoossaa sunttawu daro birshshettay deꞌees. He sunttaa birshshettay, Xoossay ba gelido qaalaa ubbaanne ba halchuwaa polana danddayiyoogaa bessees. I hegaa oottennaadan aybinne diggana danddayenna. He sunttan xeegettana danddayiyay Yihoowa xalla.a

16, 17. (a) “Ubbaappe Wolqqaama” giyoogee woygiyoogee? (b) ‘Merinaa Kawuwaa’ giyoogee woygiyoogee? (c) ‘Medhidaagaa’ giyoogee woygiyoogee?

¹⁶ Qommoora beꞌido, Mazamure 83:18y Yihoowaabaa, ‘Ne xalaalay Ubbaappe Xoqqiya Xoossaa’ yaagees. Qassi Ajjuutaa 15:3y, “Ubbaappe Wolqqaama Xoossau ne oosoi gitanne garamissiyaagaa. Asa zare ubbaa Kawuwau, ne ogee xillonne tuma” yaagees. “Ubbaappe Wolqqaama” giyo boncho sunttaa birshshettay aybee? Hegaa birshshettay saluwan saꞌan Yihoowaagaa keena wolqqaama uri baynnaagaa bessees. Qassi 1 Ximootiyoosa 1:17n, Yihooway ‘merinaa Kawuwaa’ geetettiis. ‘Merinaa Kawuwaa’ giyo boncho sunttay i ubba wode deꞌiyoogaa bessees. I merinaappe merinaa gakkanawu deꞌiyoogaa Mazamure 90:2y yootees. Hegee maalaalissiyaaba!

¹⁷ Medhidaagee Yihoowa xalla. Ajjuutaa 4:11, “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7iis” yaagees. Ee, saluwan deꞌiya kiitanchatanne xoolintteta, saꞌan deꞌiya mittaa ayfiyaa, qassi abban deꞌiya moliyaa gujjin, ubbabaa Yihooway medhiis!

YIHOOWA DABBO GIDANA DANDDAYAY?

18. Issi issi asay Xoossaa dabbo mule gidana danddayokko gi qoppiyoy aybissee? Hegaa xeelliyaagan Geeshsha Maxaafay woygii?

¹⁸ Issi issi asay Yihoowassi deꞌiya maalaalissiya eeshshaabaa nabbabidi, abaa eroogaappe guyyiyan yayyidi, ‘Xoossay keehi wolqqaama, i keehippe xoqqa, qassi i haahuwan deꞌees; yaatin i tawu waanidi qarettana danddayii?’ giidi qoppees. SHin nuuni hegaadan qoppanaadan Xoossay koyii? Mule koyenna. Yihooway nuukko shiiqanawu koyees. Geeshsha Maxaafay, “Xoossai nuuppe ooyyoonne haaho gidenna” yaagees. (Oosuwaa 17:27) Xoossay neeni akko shiiqanaadan koyees; qassi ‘ikka neekko shiiqanaagaa’ yootiis.—Yaaqooba 4:8.

19. (a) Neeni waanada Xoossaa dabbo gidana danddayay? (b) Yihoowa eeshshatuppe neeni keehi dosiyoogeeti awugeetee?

¹⁹ Neeni waanada Xoossaa dabbo gidana danddayay? Yesuusi, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagiis. (Yohaannisa 17:3) Neeni aggennan tamaarikko, Yihoowanne Yesuusa erana. Yaatiyoogan, merinaa deꞌuwaa demmana danddayaasa. Leemisuwawu, “Xoossai siiqo” gidiyoogaa erida. (1 Yohaannisa 4:16) SHin ayyo hara loꞌꞌo daro eeshshatikka deꞌoosona. Yihooway “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa” gidiyoogaa Geeshsha Maxaafay yootees. (Kessaabaa 34:6) Yihooway “kehanne atto giyaagaa.” (Mazamure 86:5) I gencciya woykko danddayiyaanne ammanettiya Xoossa. (2 PHeexiroosa 3:9; 1 Qoronttoosa 1:9) Neeni Geeshsha Maxaafaa nabbabiyo wode, a loꞌꞌo eeshshaabaa loyttada erana.

20-22. (a) Neeni Xoossaa beꞌana danddayennaba gidikko, akko waana shiiqana danddayay? (b) Issi issi asay neeni Geeshsha Maxaafaa xannaꞌiyoogaa agganaadan koyikko, waatana koshshii?

²⁰ Neeni Xoossaa beꞌana danddayennaba gidikko, akko waana shiiqana danddayay? (Yohaannisa 1:18; 4:24; 1 Ximootiyoosa 1:17) Neeni Yihoowabaa Geeshsha Maxaafaappe nabbabiyo wode, tumuppe i deꞌiyoogaa eraasa. (Mazamure 27:4; Roome 1:20) Yihoowabaa loytta tamaariyo wode, a kaseegaappe aaruwan siiqaasa, qassi akko keehi shiiqaasa.

²¹ Neeni Yihooway nu Aawaa gidiyoogaa akeekana. (Maatiyoosa 6:9) I nuussi deꞌuwaa immiis; qassi nuuni keehi ufayssiya deꞌuwaa deꞌanaadan koyees. Hegee siiqiya aaway ba naatuyyo amottiyooba. (Mazamure 36:9) Ee, Geeshsha Maxaafay neeni Yihoowa dabbo gidana danddayiyoogaa tamaarissees. (Yaaqooba 2:23) Hagaa qoppa. Saluwaa saꞌaa medhida Yihooway neeni assi dabbo gidanaadan koyees!

²² Issi issi asay neeni Geeshsha Maxaafaa xannaꞌiyoogaa agganaadan koyees. Eti neeni ne haymaanootiyaa laammana giidi yayyana danddayoosona. SHin Yihoowa dabbo gidennaadan nena ooninne teqqanaadan oottoppa. I neeyyo ooppenne aadhiya Dabbo.

23, 24. (a) Neeni oychiyoogaa aggana bessennay aybissee? (b) Nuuni kaalliya shemppuwan ay beꞌanee?

²³ Geeshsha Maxaafaa xannaꞌiyo wode neeni akeekenna issi issibay deꞌana danddayees. Asi maaddanaadan oychanawu yeellatoppa. Nuuni guutta naatudan nuna kawushshana koshshiyoogaa Yesuusi yootiis. (Maatiyoosa 18:2-4) Naati daro oyshaa oychoosona. Xoossay neeni zaaruwaa demmanaadan koyees. Hegaa gishshawu, neeni tamaariyoobay tuma gidiyoogaa shaakka eranawu Geeshsha Maxaafaa loytta xannaꞌa.—Oosuwaa 17:11 nabbaba.

²⁴ Yihoowabaa erana danddayiyo aybippenne aadhiya ogee Geeshsha Maxaafaa xannaꞌiyoogaa. Nuuni kaalliya shemppuwan, Geeshsha Maxaafay hara ay maxaafaappekka dumma gidiyoy aybissakko beꞌana.