‘Ta Qumay Xoossay Koyiyoobaa Oottiyoogaa’

Kawuwaa Daawiti Medhidaagaa yettan sabbiyo wode, “Abeet ta Xoossawu, taani neeni koyiyoogaa oottanawu dosais; ne higgee ta wozanaa giddon de7ees” yaagiis. (Maz. 40:8) Daawita daro metoy gakkidaba gidikkokka, i Xoossay koyiyoobaa oottiyoogan keehi ufayttiis. Tumu Xoossawu oottiyoogan ufayttida Yihoowa ashkkaray Daawita xalla gidennaagee qoncce.

Kiitettida PHawuloosi Masiyaa woykko Kiristtoosa xeelliyaagan Mazamure 40:8n deꞌiya qofaa yootiis. PHawuloosi hagaadan giis: “Kiristtoosi ha sa7aa yaana haniiddi, hagaadan yaagiis; ‘Neeni yarshshonne imo koyabaakka; shin taayyo bolla giigissadasa. Neeni xuuggiyo yarshshuwaaninne nagaraa yarshshuwan mulekka ufaittakka. Taani he wode, “Xaatta maxaafan tabai xaafettidoogaadankka, Xoossawu, taani neeni koyiyoogaa oottanawu yaas” yaagaas’ yaagiis.”—Ibr. 10:5-7.

Yesuusi saꞌan deꞌiyo wode meretaa beꞌiyoogan, laggetuura wodiyaa aattiyoogaaninne haratuura qumaa issippe miyoogan ufayttiis. (Maa. 6:26-29; Yoh. 2:1, 2; 12:1, 2) SHin i keehi ufayttidoy saluwan deꞌiya ba Aaway koyiyoobaa oottiyoogaana. Yesuusi, “Ta qumai tana kiittidaagee koyiyoobaa oottanaagaanne a oosuwaa polanaagaa” yaagidoy hegaassa. (Yoh. 4:34; 6:38) Yesuusi erissiyo ashkkarati tumu ufayssaa waati demmana danddayiyaakko bantta Godaappe tamaaridosona. Eti wozanappe ufayttidi Kawotettaa mishiraachuwaa asawu yootidosona.—Luq. 10:1, 8, 9, 17.

‘BIIDI TANA KAALLIYAAGEETA OOTTITE’

Yesuusi bana kaalliyaageeta hagaadan giidi azaziis: “Intte biidi, asa ubbaa tana kaalliyaageeta oottite; Aawaa sunttan, Na7aa sunttaaninne Geeshsha Ayyaanaa sunttan eta xammaqite. Taani inttena azazidobaa ubbaa eti naagana mala, eta tamaarissite; taani wodiyaa wurssettai gakkanaassikka ubba wode inttenaara de7iyoogaa akeekite.” (Maa. 28:19, 20) He azazuwaa polanawu asa demmiyo soho ubban sabbakana, koyiyaageeta zaaretti oychananne eta Geeshsha Maxaafaa xannaꞌissana koshshees. Hegee keehi ufayssiya ooso.

Asay nuuni yootiyoobaa siyin aggin, nuuni haggaazuwan ufayttanaadan oottiya waannabay loꞌꞌobaa qoppiyoogaa. Issi issi asay nuuni yootiyoobaa sheneho giikkokka, nuuni aggennan mishiraachuwaa yootiyoy aybissee? Kawotettaa mishiraachuwaa yootiyoogeenne erissiyo ashkkara oottiyoogee, nuuni Xoossaanne nu shooruwaa siiqiyoogaa bessiyaaba gidiyoogaa eriyo gishshataassa. Hegee xayikko, nuuni nu shemppuwawukka nu shoorotu shemppuwawukka hirggiyoogee attenna. (Hiz. 3:17-21; 1 Xim. 4:16) Hagaappe kaallidi, nu ishatuppe daroti wayssiya haggaazo moottan mishettidi haggaaziyoogaa aggennaadan maaddida issi issibaa beꞌana.

DEMMIYO INJJE UBBAA GOꞌETTITE

Nuuni haggaazuwan loꞌꞌo oyshaa oychiyoogee darotoo loꞌꞌo ayfiyaa demissees. Amaliyo giyo michiyaa issi gallassi maallado issi bitanee dubbushan uttidi gaazeexaa nabbabiyaagaa beꞌaasu. Akko shiiqada i gaazeexaappe ufayssiyaabaa demmidaakkonne oychaasu. I demmibeennaagaa yootin, Amaliya, “Taani Xoossaa Kawotettaa mishiraachuwaa ekkada yaas” yaagaasu. Hegaappe denddidaagan, bitanee Geeshsha Maxaafaa xannaꞌanawu eeno giis. Amaliya he dubbushan heezzu asaa Geeshsha Maxaafaa xinaatiyaa doomissaasu.

Janesa ooso keettaa ba haggaazo mootta oottaasu. Issi zabaynnaynne aara issippe oottiyaara Wochiyo Keelan kiyida issi huuphe yohuwaa dosido gishshawu, Janesa etawu ubba wode maxeetiyaa immiyoogaa doommaasu. Iira oottiya hara bitaneekka Wochiyo Keelaaninne Beegottite! maxeetiyan kiyiya dumma dumma qofaa dosidoogaa akeekada ayyookka ubba wode immiyoogaa doommaasu. Hegaa beꞌada iira oottiya hara maccaasiyaakka baassi maxeetiyaa immana mala oychaasu. Janesa, “Yihooway tana keehi anjjiis” yaagaasu. Iira oottiya 11 asati guyyeppe ubba wode ippe maxeetiyaa ekkiyoogaa doommidosona.

LOꞌꞌOBAA QOPPITE

Woradaa xomoosiya issi ishay, aassiyaageeti sooppe soo biidi haggaaziyo wode keettaawaa haasayissi simmidi, hara wode yaanaagaa yootidi coo baana koshshennaagaa yootiis. Coo aggidi biyoogaappe, keettaawaa hagaadan giidi oychiyoogee loꞌꞌo: “Geeshsha Maxaafaa waatidi issippe xannaꞌana danddayiyaakko bessoo?” woy “Ha allaalliyaa gujjidi tobbanawu awude, aappun saatiyan zaarettada yoo?” Woradaa xomoosiya he ishay i xomoosido issi gubaaꞌiyan deꞌiya ishati hegaadan oottiyoogan issi saaminttan 44 asaa xinaatiyaa doomissidoogaa yootiis.

Asaa haasayissi simmidi takkennan, ubba guutta gallassappe guyyiyan zaarettidi oychiyoogee loꞌꞌo ayfiyaa demissees. Aybissi giikko, hegaadan oottiyoogee nuuni ashkke asati Geeshsha Maxaafaa akeekanaadan maaddanawu wozanappe koyiyoogaa bessees. Yihoowa Markkatuura Geeshsha Maxaafaa xannaꞌiyoogaa doommidoy aybissakko issi maccaasiyo oychin, “Eti tawu wozanappe qoppidi tana keehi siiqiyoogaa bessiyaabaa oottido gishshawu xannaꞌiyoogaa doommaas” yaagaasu.

Madayo giyo michiyaa Aqinyetettaa Haggaazuwaa Timirtte Keettan tamaara simmada takkennan, 15 asata Geeshsha Maxaafaa xannaꞌissiyoogaa doommaasu; qassi 5 asata hara uri xannaꞌissanaadan immaasu. I xinaatetuppe amaridaageeti ubba wode gubaaꞌe shiiquwaa shiiqoosona. Madaya daro asaa xinaatiyaa doomissanaadan maaddidabay aybee? Etaara gayttido koyro gallassi nuuni yootiyoobaa siyanawu koyida asata zaarettidi demmana gakkanaashin minnidi koyana bessiyoogaa a timirtte keettan tamaaridobaappe akeekaasu. Daro asati Geeshsha Maxaafaa tumaa eranaadan maaddida issi michiyaa, “Yihoowabaa tumaa eranawu koyiya asata maaddana danddayiyoy aggennan zaarettidi oychiyoogaana gidiyoogaa akeekaas” yaagaasu.

Zaarettidi oychanawunne Geeshsha Maxaafaa xannaꞌissanawu minnidi oottana koshshiyoogee tuma. SHin hegaappe demmiyo ayfee keehi ufayssiyaaba. Nuuni Kawotettaa mishiraachuwaa minnidi yootiyoogan harati “tumatettaa eranaadan” maaddana danddayoos; qassi eti hegaappe denddidaagan atotettaa demmana danddayoosona. (1 Xim. 2:3, 4) Hegee nuuni aybippenne aaruwan woppaanne ufayssaa demmanaadan oottees.