Eray?

Wolwoluwaa medhdhanawu asay beni wode ceeccaa goꞌettii?

CEECCAY beni wode Gibxxen xuufiyaa xaafanawu goꞌettiyo hiraysoba gidiyoogan erettees. Giriiketuugaadan Roomatikka ceeccaa bolli xaafoosona.a Ceeccay xaafanawu goꞌettiyoogan eretteesippe attin, wolwoluwaa medhdhanawu goꞌettiyoogan darin erettenna.

“Toophphiyaa shaafatuppe hefintta baggaara de7iya” asati ‘kiitettiyaageeta shombboquwaa woy ceeccaa wolwoluwan wottidi’ kiittanaagaa hananabaa yootiya Isiyaasi 2,500ppe dariya layttappe kase yootiis. Guyyeppe, Meedoonatinne Parsseti Baabiloona katamaa woraajjido wode, Baabilooneti baqatennaadan digganawu eti “ceeccaappe medhdhido wolwolota” xuugganaagaa hananabaa yootiya Ermmaasi yootiis.—Isi. 18:1, 2; Erm. 51:32, NW.

Geeshsha Maxaafay Xoossaa ayyaanay kaalettin xaafettido gishshawu, beni wode asay wolwoluwaa medhdhanawu ceeccaa goꞌettiyoogaa biittaa bookkidi xannaꞌiyaageeti demmanaagee Geeshsha Maxaafaa tamaareta garamissenna. (2 Xim. 3:16) Eti demmidobay aybee? Gibxxeti ceeccaappe wolwoluwaa medhdhiyoogaa qonccissiya darobaa biittaa bookkidi xannaꞌiyaageeti demmidosona.

ASAY CEECCAAPPE WOLWOLUWAA WAATI MEDHDHII?

Gibxxetu duufuwaa bolli deꞌiya misiletinne woocidi giigissiyoobati asay ceeccaa waatidi buucciyaakkonne wolwoluwaa waatidi medhdhiyaakko bessoosona. Attumaageeti ceeccaa gomꞌꞌiya buuccidi issippe gattidi qachchoosona, yaatidi he qashota qassi issippe gatti qachchoosona. Ceeccaa gomꞌꞌiyawu heezzu zooze deꞌees. Yaatiyo gishshawu gomꞌꞌeta issippe gattidi mintti qachchiyo wode, qashoy keehi minnees. Ceeccaappe medhdhiyo wolwoloti 17 meetire adussa gidana danddayiyoogaanne hegaa shaariyo mittay 10 woy 12 gidana danddayiyoogaa Gibxxe biittaa taarikiyaabaa yootiya maxaafay qonccissees.

WOLWOLUWAA MEDHDHIYAAGEETI CEECCAA GOꞌETTIYOY AYBISSEE?

Gibxxen, Nayle shaafay goggiyo heeran daro ceeccay mokkees. Harabay qassi ceeccaappe wolwoluwaa medhdhiyoogee wayssenna. Asay wolwoluwaa medhdhanawu mittaa goꞌettiyoogaa doommikkonne, moliyaa oyqqiyaageetinne shankkanchchati guutta wolwolotanne haattaa pinnanawu maaddiyaabata ceeccaappe medhdhiyoogaa aggibeennaba milatoosona.

Keehi daro wodiyawu, ceeccaappe medhdhiyo wolwolota asay goꞌettiiddi takkiis. Kiitettidaageetu wode deꞌida, Pilutark giyo Giriike biittaa xaafee amarida asay he wodekka ceeccaappe medhdhido wolwoluwaa goꞌettiyoogaa yootiis.