Cima Ishanttanne Michchontta Nashsha

1-2. (a) Cimida ishanttanne michchontta nuuni waati xeellana koshshiyaakko Leemiso 16:31ppe ay tamaarana danddayiyoo? (b) Nuuni ha huuphe yohuwan zaarana oyshati awugeetee?

ALMAAZE giyo alꞌꞌo shuchchaa massidi giigissana xayikko, phoolenna woy xeellanawu loꞌꞌenna. Yaatiyo gishshawu, issi uri giigibeenna almaaziyaa beꞌiyaakko, I beꞌiyoobay aybakko akeekennan aggananne he alꞌꞌobaa yedhdhi kanttana danddayees.

² Cimida ishanttinne michchontti he almaazetudan keehi alꞌꞌo. Xoossaa Qaalay cimidaageetu puuluntta kallachchan leemisees. (Leemiso 16:31 nabbaba; 20:29) Gidoppe attin, he alꞌꞌobaa nuuni akeekennan aggana danddayoos. Yelagati cimidaageeti alꞌꞌo gidiyoogaa akeekiyo wode, duretettaappe keehi aadhdhiya alꞌꞌobaa demmoosona. Ha huuphe yohuwan heezzu oyshatu zaaruwaa beꞌana: Yihooway ammanettida cima ishanttanne michchontta alꞌꞌobadan xeelliyoy aybissee? Cimida ishanttinne michchontti Yihoowa dirijjitiyawu keehi koshshiyoy aybissee? Nuuni eti oottidobaappe tamaaranawu waatana danddayiyoo?

YIHOOWAY AMMANETTIDA CIMA ISHANTTANNE MICHCHONTTA ALꞌꞌOBADAN XEELLIYOY AYBISSEE?

3. Mazamure 92:12-15y yootiyoogaadan, Yihooway ammanettida cima ishanttanne michchontta alꞌꞌobadan xeelliyoy aybissee?

³ Ammanettida cima ishanttinne michchontti Xoossaa Yihoowawu alꞌꞌo. I eti ay mala asakko ereesinne etassi deꞌiya keehi loꞌꞌo eeshshata nashshees. Cimidaageeti ammanettidi daro layttawu haggaaziyoogan demmido aadhdhida eratettaa yelagatuyyo yootiyo wode I ufayttees. (Iyy. 12:12; Lee. 1:1-4) Eti gencciyoogaakka Yihooway nashshees. (Mil. 3:16) Metoy eta gakkikkonne, eti Yihoowa mintti ammanidi deꞌidosona. Eta hidootay tumaa eti koyro erido wodeegaappe aaruwan mino. Eti “ceeggidikka” Yihoowa sunttaa ubbatoo awaajjiyo gishshawu I eta siiqees.—Mazamure 92:12-15 nabbaba.

4. Cima ishanttanne michchontta minttettana danddayiyaabay aybee?

⁴ Intte cimidaba gidikko, kase oottidobaa Yihooway hassayiyoogaa ammanettite. (Ibr. 6:10) Sabbakiyo oosuwaa intte minnidi oottidoogee saluwan deꞌiya nu Aawaa ufayssees. Keehi azzanttiya metootakka intte genccideta. Geeshsha Maxaafay yootiyo xillotettaa maarata intte naagidetanne etawu exatideta, keehi koshshiya oosota Yihoowa dirijjitiyan ammanettidi oottidetanne harata loohissideta. Yihoowa dirijjitee laammido darobaa meezetanawu intteyyo danddayettida ubbabaa oottideta. Ubba wode haggaaziya harata intte minttettideta. Intte ammanettiyaageeta gidiyo gishshawu Xoossaa Yihooway inttena keehi siiqees. ‘Xoossay ba asata yeggennan’ agganawu qaalaa geliis. (Maz. 37:28) I hagaadan giis: “Intte puulummana gakkanaashinkka, taani inttena maaddana.” (Isi. 46:4) SHin, intte cimido gishshawu hagaappe simmin Yihoowa dirijjitiyan maaddikke giidi qoppoppite. Intte keehi maaddeeta!

CIMIDAAGEETI YIHOOWA DIRIJJITIYAN KEEHI MAADDOOSONA

5. Cimidaageeti hassayana koshshiyoobay aybee?

⁵ Cimidaageeti Yihoowa dirijjitiya daro ogiyan maaddana danddayoosona. Etayyo kaseegaa keena wolqqay baynnaba gidikkonne, eti daro layttan demmido keehi darobay etawu deꞌees. Kaallidi deꞌiya beni wodenne ha wodiyan hanidabati bessiyoogaadan, Yihooway eta ubbatoo dumma dumma ogiyan goꞌettana danddayees.

6-7. Yihooway baayyo ammanettidi oottida cimidaageeta waati anjjidaakko Geeshsha Maxaafaappe yoota.

⁶ Cimido wodekka Yihoowawu aggennan minni oottiyoogan ammanettida loꞌꞌo leemiso gidiya asatubaa Geeshsha Maxaafay yootees. Leemisuwawu, Muusee Yihooway kiittin hananabaa yootiyaagaa gididi oottiyoogaa doommido wodenne Israaꞌeela deriyaa kaalettiyaagaa gidanaadan doorettido wode ayyo layttay 80 heera. Hananabaa yootiya Daaneelayyo layttay 90ppe darennan waayi aggana, gidikkonne Yihooway ba gishshaa haasayanaadan A goꞌettiyoogaa aggibeenna. Qassi kiitettida Yohaannisi ayyaanay denttettin Ajjuutaa maxaafaa xaafiyo wode ayyo layttay 90ppe darennan waayi aggana.

⁷ Ammanettida hara daroti erettida asa gidokkona, qassi etabaa asay akeekennan aggana danddayees. SHin Yihooway etabaa akeekiisinne ammanettido gishshawu eta woytiis. Leemisuwawu, “Xoossau yayyiya xillo asa” giidi Geeshsha Maxaafay Simoonabaa guuttaba xallaa yootikkonne, Yihooway abaa erees; qassi guutta naꞌaa Yesuusa beꞌiyo, he naꞌaanne A aayyiyo xeelliyaagan hananabaa yootiyo maataa ayyo immiis. (Luq. 2:22, 25-35) Hananabaa yootiya amꞌꞌee Haannibaakka qoppa. Iyyo layttay 84 gidikkonne A “Beeta Maqidasiyaappe kiyennan de7aasu.” A ubbatoo beeta maqidasiyaa biyo gishshawu guutta naꞌaa Yesuusa beꞌanaadan oottiyoogan Yihooway O anjjiis. Simoonikka Haannakka Yihoowawu alꞌꞌo.—Luq. 2:36-38.

8-9. Amꞌꞌe gidida issi michchiyaa Yihoowa dirijjitiyan oottidobay aybee?

⁸ Ha wodiyan, ammanettida daro cimati yelagatussi keehi loꞌꞌo leemiso. Michchee Loys Dideri hanotaa qoppa. A Kanaadan dumma aqinye gidada haggaaziyoogaa doommiyo wode iyyo layttay 21. Hegaappe simmin, anne I azinay Jooni yuuyidi xomoosiyo oosuwaa daro layttawu oottidosona. Guyyeppe eti Kanaada Beeteelen 20ppe dariya layttawu haggaazidosona. Loysiyyo layttay 58 gidido wode, anne Jooni Yukreenen haggaazanaadan odettiis. Eti waatanee? Hara biitti biidi haggaazanawu keehi cimida giidi qoppanee? Eti maddabettido sohuwaa bin, Jooni yan Macara Konttiyaa yara gididi haggaazanaadan sunttettiis. Laappun layttappe guyyiyan Jooni hayqqin, yan maddabettido sohuwan takkanawu Loysa kuuyaasu. Haꞌꞌi Loysiyyo layttay 81. A Yukreene Beeteele keetta asaara Yihoowawu ammanettada haggaazawusu, qassi eti O keehi siiqoosona.

⁹ Loysi mala amꞌꞌeta eta azinati paxa deꞌiyo wodiyaagaadan harati akeekennan aggana danddayoosona; shin eti haꞌꞌikka keehi alꞌꞌo. Yihooway daro layttawu bantta azinata maaddida, qassi ayyo ammanettidi ha wodiyan aggennan oottiya michchontta keehi nashshees. (1 Xim. 5:3) Eti qassi yelagata minttettana danddayoosona.

10. Tooni loꞌꞌo leemiso gidiyaabaa ay oottidee?

¹⁰ Ammanettida daro cimati sooppe kare kiyana danddayokkona. Leemisuwawu, Toona giyo ishay cimata xeelliyo sohuwan ha wodiyan deꞌees. I Naase 1942n Amarkkan, Penssliveniyan xammaqettiyo wode ayyo layttay 20. I xammaqetti simmin sohuwaara, wotaaddara gidanaadan awu odettiis. I hegaa ixxis giido gishshawu, naaꞌꞌu layttanne baggaa A qachchidosona. Inne A machchiyaa Hilda naaꞌꞌu naata tumaa keettan dichchidosona. Daro layttawu, Tooni cimata shiishshiyaagaa gididi heezzu gubaaꞌiyan haggaaziis, qassi woradaa shiiquwaa xomoosiyaagaa gididi oottiis. I issi qasho keetti biidi shiiqota kaalettiisinne Geeshsha Maxaafaa xannaꞌissiis. Toonayyo layttay 98, shin I Yihoowayyo oottiyoogaa aggana koyenna. I ba gubaaꞌiyan deꞌiya ishanttuuranne michchonttuura baassi danddayettida ubban Yihoowayyo minnidi oottees!

11. Sooppe kare kiyana danddayennaageeta nashshiyoogaa waati bessana danddayiyoo?

¹¹ Sooppe kare kiyana danddayenna cimidaageeta bonchchiyoogaa waati bessenna danddayiyoo? Danddayettikko, shiiqota shiiqanaadan woy siyanaadan qassi sabbakanaadan cimati eta maaddana danddayoosona. Nuuni eta biidi oychchiyoogan woy biiduwan etaara haasayiyoogan etawu qoppiyoogaa bessana danddayoos. Nuuni cima ishanttuuranne michchonttuura haasayiyo wode, amaridaageeti haasayanawu metootana woy banttabaa yootiyoogee bessennaba giidi qoppana danddayoosona. SHin, nuuni takki giidi eta oychchidi eti Yihoowa dirijjitiyan demmido ufayssiyaabaa yootiyo wode siyikko, hegee nuna keehi minttettana.

12. Nu gubaaꞌiyan ay mala ishanttanne michchontta demmana danddayiyoo?

¹² Loꞌꞌo leemiso gidiya ammanettida cimidaageeta nu gubaaꞌiyan demmana danddayiyoogee ufayssiyaaba. Haareti giyo michchiyaa Amarkkan, Niwu Jersen deꞌiya ba gubaaꞌiyan daro layttawu ammanettada Yihoowawu haggaazaasu. Guyyeppe A ba naꞌeera deꞌanawu harasaa baasu. A mati biido gubaaꞌiyan deꞌiya ishantti O loytti eranawu iira daro wodiyaa aattidosona, yaatidi A alꞌꞌo gidiyoogaa akeekidosona. A tumaa 1925 heeran siyido wode haggaazuwan demmidobaa yootiyoogan eta minttettaasu. He wode, A sabbakishin oyqqidi O amarida wodiyawu qachchana danddayiyo gishshawu achchaa geeshshiyo buruushiyaa ubbatoo ekkada bawusu. Qassi 1933n A naaꞌꞌuttoo issi saaminttaa qashettaasu. I azinay Yihoowa Markka gidenna, shin O maaddiis. A qashuwan deꞌiyo wode heezzu bantta guutta naatussi koshshiyaabaa I kunttees. Haareti mala ammanettida cimidaageeta bonchchana bessiyoogee qoncce!

13. Yihoowa dirijjitee cimidaageeta nashshiyoogaappe nuuni ay tamaariyoo?

¹³ Cimida ishanttanne michchontta Yihoowaynne A dirijjitee nashshees. Yihooway ba dirijjitiyaanne eta huuphiyan huuphiyan daro ogiyan waati anjjidaakko eti beꞌidosona. Eti bantta balaappe maaddiyaabaa tamaaridosona. Eta ‘aadhdhida eratettaa pulttodan’ xeella, qassi etappe tamaara. (Lee. 18:4) Neeni eta loytta eranawu baaxetikko, ne ammanoy minnananne darobaa tamaarana!

LEEMISO GIDIYA CIMIDAAGEETUPPE LOYTTA GOꞌETTA

14. Zaarettido Wogaa 32:7y yelagati waatanaadan minttettii?

¹⁴ Cimidaageeta kasetada haasayissa. (Zaarettido Wogaa 32:7 nabbaba.) Eti loytti xeellennaageeta, loddan heemettiyageetanne haasayiyaageeta gidana danddayoosona. SHin eti haꞌꞌikka minnidi oottanawunne Yihoowa sinttan “lo77o sunttai” deꞌiyoogeeta gidanawu koyoosona. (Era. 7:1) Yihooway eta nashshiyo gaasuwaa hassaya. Eta ubbatoo bonchcha. Elssaaꞌa mala gida. I Eelaasaara issippe deꞌido wurssetta gallassan appe shaahettennan agganawu minttidi woossiis. Elssaaꞌi heezzutoo hagaadan giis: “Taani neeppe shaahettikke.”—2 Kaw. 2:2, 4, 6.

15. Nuuni cimidaageeta oychchana danddayiyo oyshati awugeetee?

¹⁵ Cimidaageeta kehatettan oyshata oychchiyoogan etassi qoppiyoogaa bessa. (Lee. 1:5; 20:5; 1 Xim. 5:1, 2) Hagaa mala oyshata oychcha: “Neeni yelagatettan deꞌiyo wode, tumaa demmidoogaa ammananaadan oottidabay aybee?” “Nena gakkidabay neeni Yihoowakko shiiqanaadan waati maaddidee?” “Yihoowa haggaazuwan neeni ufayttada deꞌanaadan nena maaddidabay aybee?” (1 Xim. 6:6-8) Yaatada eti bantta taarikiyaa yootiyo wode loytta ezgga.

16. Cimida urinne yelaga uri issippe haasayiyoogee eta waati minttettana danddayii?

¹⁶ Cimida urinne yelaga uri issippe haasayiyo wode, naaꞌꞌaykka minettoosona. (Roo. 1:12) Yelagatoo, Yihooway ba asawu koshshiyaabaa kunttiyoogaakka intte loytti akeekana; qassi cimidaagee bonchchettidabadan qoppana. I Yihooway bana waati anjjidaakko neeyyo yootiyoogan ufayttana.

17. Nuuni ammanettida cimidaageeti puulaa yaa gujjoosona giyoy aybissee?

¹⁷ Cimiyo wode asatettaa puulay xayiyaaba gidikkonne, Yihoowawu ammanettiyaageeti puulaa yaa gujji gujji boosona. (1 Tas. 1:2, 3) Hegee tuma giyoy aybissee? Daro layttatu giddon, Xoossaa ayyaanay banttana loohissanaadan eti eeno giido gishshataassanne loꞌꞌo eeshshati deꞌiyoogeeta gidanaadan eta maaddido gishshataassa. Cimida alꞌꞌo ishanttanne michchontta nuuni loyttidi eriyo wode, eta bonchchoos, etappe tamaaroos, qassi kaseegaappe aaruwan eta keehi alꞌꞌobadan xeelloos!

18. Nuuni kaalliya huuphe yohuwan xannaꞌanabay aybee?

¹⁸ Yelagati cimata nashshiyo wodenne cimati yelagata nashshiyo wode gubaaꞌee minni minni bees. Cimidaageeti gubaaꞌiyan deꞌiya yelagata nashshiyoogaa waati bessana danddayiyaakko kaalliya huuphe yohuwan beꞌana.