Oosuwa Kaalettiya Citaa Yara Gididi Mati Sunttettida Naaꞌꞌata
XIQIMITA 5, 2024 layttaa shiiquwan ha dumma erissoy odettiis: Ishaa Jodi Jedelinne Ishaa Jakob Ramppi Yihoowa Markkatu Oosuwa Kaalettiya Citaa yara gididi sunttettidosona. Ha naaꞌꞌu ishatikka Yihoowayyo ammanettidi daro layttaa haggaazidosona.
Jodi Jedelanne A machchiyo, Damariso
Ishaa Jedeli Amarkkan, Mizurin yelettiis; qassi A aawaynne aayyiya Yihoowa Markka. Eta soo asay Yihoowa Markkati darenna heeran deꞌidosona. Hegaa gishshawu, I he biittan dumma dummasaappe haggaazanawu yaa biida daro ishatuuranne michchotuura gayttiis. Eta siiqoynne issippetettay A keehi denttettiis. I naatettan, Xiqimita 15, 1983n haattan muukettiis. Haggaaziyogee A ufayssees, qassi naaꞌꞌantto xekka timirttiya wurssi simmidi, Masqqala 1989n ubba wode aqinye gididi haggaaziyogaa doommiis.
Ishaa Jedela aawaynne aayyiya I yelagatettan deꞌiyo wode Beeteele xomoosanaadan A michcheera issippe efoosona. Hegee naati Beeteelen haggaazanawu koyanaadan oottido gishshawu, guyyeppe eti naaꞌꞌaykka yan haggaaziyogaa doommidosona. Ishaa Jedeli Masqqala 1990n Wolkile Beeteele geliis. I koyro Geeshuwa Kifiliyan, qassi guyyeppe Akkamuwa Haggaazan oottiis.
He wode, matan deꞌiya Isppeene doonaa galchchati dicciyo gishshawu ishati koshshidosona. Hegaa gishshawu, Ishaa Jedeli he galchchatuppe issuwan shiiqiyogaanne Isppeenettuwa tamaariyogaa doommiis. Hegaappe simmin guuttaa takkidi, he woradan ubba wode aqinye gidada haggaaziya michchee Damarisiira gayttiis. Guyyeppe, O machchiisinne akka aara Beeteelen haggaaziyogaa doommaasu.
Eti banttana yelidaageeta heemmanawu 2005n Beeteeleppe kiyidosona. He wode eti ubba wode aqinye gididi haggaazoosona. Ishaa Jedeli Aqinyetettaa Haggaazaa Timirtte Keettan tamaarissiis, qassi Hosppitaaliyaara Gattiya Konttiyaninne Heeran Deꞌiya Keexuwa Konttiyan haggaaziis.
Ishaa Jedelinne michchiya Damarisa Worwike keexuwan maaddanaadan 2013n Beeteele zaarettidi xeegettidosona. Hegaappe simmin, eti Paterseneeninne Wolkilen haggaazidosona. Ishaa Jedeli Halchchuwa Kesuwanne Keexuwa Kifiliyan, qassi Hosppitaaliyara Gayttidabaa Erissiya Kifiliyan oottiis. Laappune 2023n, I Haggaaza Konttiya maaddiyagaa gididi sunttettiis. I baassi imettida oosota qoppidi hagaadan giis: “Ooratta oosoy imettiyo wode, issi issitoo yashshees. Shin Yihoowi hananaadan oottiyo gishshawu, he wode an ammanettana koshshiyogaa hassayana bessees.”
Jakob Ramppanne A machchiyo, Inggo
Ishaa Ramppi Amarkkan, Kaliforniyan yelettiis. I naatettan deꞌiyo wode, A aayyiya shiiqota shiiqiyogaa woy haggaaziyogaa aggikkonne, Geeshsha Maxaafaa A xannaꞌissanawu baaxetaasu. Hegaa bollikka, ammanettida Yihoowa Markka gidida ba aawa aayeekko I layttan layttan bees. I tumaabaa loytti eranawu koyanaadan A maaddaasu; ayyo 13 laytta gidiyo wode, I Geeshsha Maxaafaa xannaꞌanawu koyiis. I naatettan, Masqqala 27, 1992n, haattan muukettiis. A aayyiya ayyaanaaban zaarettada gazddaasu, qassi A aawaynne A kaaloti ayyaanaaban diccidi haattan muukettidosona.
Yelagatettan, Ishaa Ramppi ubba wode aqinye gididi haggaaziyageeti keehi ufayttiyogaa akeekiis. Hegaa gishshawu, I naaꞌꞌantto xekka timirttiya wurssi simmidi, Masqqala 1995n ubba wode aqinye gidiis. Aassiyageeti keehi koshshiyosan haggaazanawu 2000n Ekuwadore biis. Kanaadaappe yaada ubba wode aqinye gidada haggaaziya Inggiira I yan gayttiis, qassi O machchiis. I machchi simmin, eti Ekuwadoren, amarida aassiyageeti deꞌiyo issi kataman haggaazidosona. Haꞌꞌi yan gita galchchay deꞌees.
Guyyeppe Ishaa Ramppinne michchiya Ingga dumma aqinye gididi sunttettidosona, qassi hegaappe simmin woradaa oosuwa oottidosona. Hegaa bollikka, 2011n Giiliyade Timirtte Keettan 132tta kayan tamaaranawu shoobettidosona. Eti anjjetti simmidi, ichchashu biittatun, dumma dumma haggaazan oottidosona; leemisuwawu, Beeteelen, miisoone oosuwanne woradaa oosuwa oottidosona. Ishaa Ramppi Kawotettaa Mishiraachchuwa Yootiyageetu Timirtte Keettankka tamaarissiis.
Ishaa Ramppinne michchiya Ingga koronaa gaasuwan Amarkkaa simmidosona. Eti Wolkile Beeteele shoobettidosona, qassi Ishaa Ramppi Haggaaza Kifiliya oosuwawu loohiis. Guyyeppe, eti Ekuwadore macara biiruwawu kiitettin, Ishaa Ramppi Macara Biiruwa Konttiyan haggaaziis. Eti 2023n Worwike biidosona. Ichchashe 2024n, Ishaa Ramppi Haggaaza Konttiya maaddiyagaa gididi sunttettiis. I baassi imettida oosotubaa qoppidi, “Issi oosuwa dumma oottiyabay intte oottiyo sohuwa gidennan, inttenaara oottiya asaa” yaagiis.
Ha ishati minnidi oottiyobaa nashshoos, qassi “hegaa mala asata awudekka [bonchchoos.]”—Plp. 2:29.