Yihoowa Markkati Kase Bantta Haymaanootiyan Deꞌidaageeta Waatiyonaa?

Nuuni asa ubbaa siiqanawu, bonchchanawunne etawu kehanawu nuussi danddayettida ubbabaa oottoos. Issi Yihoowa Markkay goynuwan shuggikko woy goynniyogaa aggikko, nuuni Aa koyidi haasayissoos, A siiqiyogaa yootoos, qassi Xoossaakko simmanawu koyanaadan maaddoos.—Luqaasa 15:4-7.

Issi issitoo, issi uri galchchaappe A kessiyabaa oottana danddayees. (1 Qoronttoosa 5:13) Shin nuuni A keehi siiqiyo gishshawu, I galchchaappe kiyenna mala kasetidi maaddanawu baaxetoos. A galchchaappe kessikkokka, Geeshsha Maxaafay minttettiyogaadan nuuni A siiqiyogaanne bonchchiyogaa aggokko.—Marqqoosa 12:31; 1 Pheexiroosa 2:17.

Issi ura galchchaappe kessanaadan oottiyabay aybee?

Issi Kiristtaanee gita nagaraa oottidi laamettanawu koyana xayikko, galchchaappe A kessana koshshiyogaa Geeshsha Maxaafay geeshshi yootees.b (1 Qoronttoosa 5:11-13) Issi asa galchchaappe kessanaadan oottana danddayiya gita nagarata Geeshsha Maxaafay qonccissees. Leemisuwawu, wodiraa laammiyogaa, mattottiyogaa, shemppo woriyogaa, so asaa qohiyogaanne wuuqqiyogaa malabata yootees.—1 Qoronttoosa 6:9, 10; Galaatiya 5:19-21; 1 Ximootiyosa 1:9, 10.

Gidoppe attin, gita nagaraa oottida ura nuuni galchchaappe coo kessiigokko. Galchchaa cimatic I ba ogiya laammanaadan koyro maaddanawu maloosona. (Roome 2:4) Eti I laamettanawu koyanaadan ashilaalidi ashkketettaaninne kehatettan maaddanawu maloosona. (Galaatiya 6:1) Yaatiyogee I nagaraa oottidoogaa akeekidi laamettanaadan denttettana danddayees. (2 Ximootiyosa 2:24-26) Shin I Geeshsha Maxaafay nagara giyobaa oottiyogaa aggennabanne cimati A darotoo maaddanawu malinkka laamettennaba gidikko, galchchaappe A kessan bessees. Qassi cimati I Yihoowa Markka gidennaagaa galchchawu erissoosona.

Nagaraa oottiyogaa aggenna ura galchchaappe kessiyogee aybin maaddii? Hegee maaddiyo issibay, galchchay Xoossay kandduwa geeshshatettawu kessido maaraa naageesinne izaawu qohana danddayiyobaappe naagettees. (1 Qoronttoosa 5:6; 15:33; 1 Pheexiroosa 1:16) Hegaa bollikka, izaawu nagaraa oottiyogaa aggidi laamettanawu baaxetanaadan maaddees.—Ibraawe 12:11.

Yihoowa Markkati galchchaappe kessidoogeeta waatiyonaa?

Geeshsha Maxaafay galchchaappe kessido uraara Kiristtaaneti “zuppetiyogaa . . . Agganaadan,” qassi “he bitaniyara haray atto qumaakka” meennaadan yootees. (1 Qoronttoosa 5:11) Hegaa gishshawu, galchchaappe kessido uraara zuppetokko. Shin nuuni A muleera phenqqeshokko. Nuuni A bonchchoos. I nu galchchaa shiiquwa shiiqana danddayees, qassi Yihoowa Markkati yan A sarotana danddayoosona.d I ayyaanaaban bana maaddana mala cimata oychchanakka danddayees.

Aqo laggeenne naati Yihoowa Markka gidikkokka, galchchaappe kessido uraabay shin? I ba soo asaara Yihoowayyo goynnana xayikkonne, eti ashuwan dabbo gidiyogee attibeenna. I ba aqo laggiyaranne ba naatuura issi keettan kaseegaadankka deꞌiyo gishshawu, eti issoy issuwa siiqana koshshees.

Galchchaappe kessido uri cimati baakko yaanaadan oychchana danddayees, qassi eti he wode Geeshsha Maxaafaappe A siiquwan zorananne zilꞌꞌetti laamettidi Xoossaakko simmanaadan kehatettan minttettana danddayoosona. (Zakkaariyasa 1:3) I nagaraa oottiyogaa aggidi Geeshsha Maxaafaa maaraadan deꞌanawu tumuppe koyiyogaa oottiyoban bessikko, zaarettidi galchchan walahettana danddayees. Nagaraa oottidaagee ba ogiya laammido wode Qoronttoosan deꞌiya Kiristtaaneti oottidoogaadan, galchchay “wozanappe ayyo atto gaananne A minttettana.”—2 Qoronttoosa 2:6-8.

Issi wode galchchaappe kessidoogeetuyyo haꞌꞌi aybi siyettii?

Galchchaappe kessin guyyeppe Xoossaakko simmida issi issi Yihoowa Markkati yootidobaa akeeka.

“Taani galchchawu simmanawu maacido wode, taani galchchaappe haakkido unddenna layttatun oottidobaa ubbaa cimati eranawu koyana gaada qoppaas. Shin eti, ‘Neeni haꞌꞌi oottiyobaa qoppanaadan koyoos’ yaagidosona. Eti yaagin, taani woppu gaas.”—Maariyo, Amarkkaa.

“Galchchay taani simmin keehi ufayttiis. Eti tana bonchchidosona. Ta ayyaana ishatinne michchoti ta nagaray atto geetettidoogaa taani akeekanaadaaninne kaseban zilꞌꞌettiyogaa agganaadan tana maaddidosona. Cimati taani zaarettada minnana mala maaddanawu ubbatoo ta miyyiyan deꞌoosona. Eti tana minttettidosonanne Yihoowi tana nashshiyogaanne siiqiyogaa aggibeennaagaa akeekanaadan maaddidosona.”—Malkoma, Seera Liyone.

“Yihoowi ba dirijjitiya geeshshatettawu murttiyogan ba asaa siiqiyogaa bessiyogee tana ufayssees. Harati iitatettadan xeellana danddayiyobay oottana koshshiyabanne siiqiyogaa bessiyaba. Saluwan deꞌiya nu Aaway siiqiyanne atto giya Xoossaa gidiyo gishshawu A galatays.”—Sanddo, Amarkkaa.