Jeremias

33 An pulong ni Jehova inabot kan Jeremias ha ikaduha nga higayon, samtang priso pa hiya ha Bungsaran han Gwardya,+ nga nasiring: 2 “Ini an siring ni Jehova nga naghimo han tuna, ni Jehova nga nagporma hito ngan nag-establisar hito hin marig-on; Jehova an iya ngaran, 3 ‘Tawaga ako, ngan babatunon ko ikaw ngan andam ako magsumat ha imo hin dagku ngan diri masabtan nga mga butang nga diri ka maaram.’”+

4 “Kay ini an siring ni Jehova nga Dios han Israel mahitungod han mga balay hini nga syudad ngan han mga balay han mga hadi han Juda nga ginpanruba tungod han pan-atake nga mga bungdo ngan han espada,+ 5 ngan mahitungod han mga nagkakaabot basi makiggirra ha mga Caldeo, nga ginpupuno ini nga mga lugar han patay nga mga lawas han akon mga ginpamatay tungod han akon kasina ngan han akon kapungot, an mga tawo nga tungod han ira karaotan igintago ko an akon nawong tikang hini nga syudad: 6 ‘Kitaa, ipapahiuli ko hiya ngan tatagan hin kahimsog,+ ngan tatambalon ko hira ngan tatagan hin hura nga kamurayawan ngan kamatuoran.+ 7 Ngan ibabalik ko an mga nabihag ha Juda ngan an mga nabihag ha Israel,+ ngan paririg-unon ko hira sugad han akon ginbuhat ha tinikangan.+ 8 Ngan puputlion ko hira ha ira pagin salaan tungod han ngatanan nira nga sala ha akon,+ ngan papasayloon ko an ira pagin salaan tungod han ngatanan nira nga sala ngan pagtalapas ha akon.+ 9 Ngan ha akon magigin usa hiya nga ngaran nga nagpapalipay, usa nga kadayawan, ngan usa nga butang nga matahom ha atubangan han ngatanan nga nasud ha tuna nga makakabati mahitungod han ngatanan nga kaopayan nga akon ihahatag ha ira.+ Ngan mahahadlok gud ngan mangungurog an ngatanan nga nasud+ tungod han ngatanan nga kaopayan ngan kamurayawan nga akon ihahatag ha iya.’”+

10 “Ini an siring ni Jehova: ‘Hini nga lugar nga iyo tatawagon nga waray sulod, nga waray tawo o inataman nga hayop, ha mga syudad han Juda ngan ha mga kalye han Jerusalem nga ginbayaan, nga waray tawo o umurukoy o inataman nga hayop, mababatian utro 11 an aringasa han pagrayhak ngan an aringasa han paglipay,+ an tingog han karaslon nga lalaki ngan an tingog han karaslon nga babaye, an tingog han mga nasiring: “Pagpasalamat kan Jehova han mga hugpo, kay hi Jehova maopay;+ an iya maunungon nga gugma nagpapabilin ha kadayonan!”’+

“‘Magdadara hira ha balay ni Jehova hin mga halad ha pagpasalamat,+ kay ibabalik ko an mga nabihag tikang hini nga tuna, sugad han ha tinikangan,’ nasiring hi Jehova.”

12 “Ini an siring ni Jehova han mga hugpo: ‘Hini nga tuna nga waray sulod, nga waray tawo o inataman nga hayop, ngan ha ngatanan nga syudad hini, magkakaada utro mga panabsaban diin papapahuwayon han mga paraataman hin panon an ira mga panon.’+

13 “‘Ha mga syudad ha kabukiran, ha mga syudad ha kahamub-an, ha mga syudad ha sur, ha tuna han Benjamin, ha mga lugar ha palibot han Jerusalem,+ ngan ha mga syudad han Juda,+ an mga panon maagi utro ha ilarom han mga kamot han nag-iihap hito,’ nasiring hi Jehova.”

14 “‘Kitaa! Maabot an mga adlaw,’ nasiring hi Jehova, ‘nga tutumanon ko an maopay nga saad nga akon iginyakan mahitungod han panimalay ni Israel ngan han panimalay ni Juda.+ 15 Hito nga mga adlaw ngan hito nga panahon, magpapatubo ako hin matadong nga saha* tikang ha tulin ni David,+ ngan magpapadapat hiya hin hustisya ngan katadongan ha tuna.+ 16 Hito nga mga adlaw an Juda tatalwason+ ngan an Jerusalem maukoy nga may seguridad.+ Ngan ini an itatawag ha iya: Hi Jehova an Aton Katadongan.’”+

17 “Kay ini an siring ni Jehova: ‘Diri gud mawawad-an hin tawo tikang ha katulinan ni David nga malingkod ha trono han panimalay ni Israel,+ 18 ngan an mga saserdote nga Levita diri gud mawawad-an hin tawo nga matindog ha akon atubangan basi maghalad hin bug-os nga mga halad nga sinunog, magsunog hin mga halad nga tikang ha lugas, ngan maghalad hin iba pa nga mga halad nga hayop.’”

19 Ngan inabot utro kan Jeremias an pulong ni Jehova, nga nasiring: 20 “Ini an siring ni Jehova, ‘Kon mabungkag niyo an akon ginhimo nga kasabotan mahitungod han adlaw ngan an akon ginhimo nga kasabotan mahitungod han gab-i, basi pugngan an adlaw ngan an gab-i ha pag-abot ha husto nga panahon hito,+ 21 dida la mabubungkag an akon kasabotan kan David nga akon surugoon,+ nga tungod hito diri hiya magkakaada hin anak nga lalaki nga maghahadi ha iya trono,+ ngan mabubungkag liwat an akon kasabotan ha mga saserdote nga Levita, nga akon mga surugoon.+ 22 Sugad la nga an hugpo han langit diri maiihap ngan an baras ha dagat diri matatakos, padadamuon ko liwat an tulin* ni David nga akon surugoon ngan an mga Levita nga nag-aalagad ha akon.’”

23 Ngan inabot utro kan Jeremias an pulong ni Jehova, nga nasiring: 24 “Waray mo ba maobserbari an ginsisiring hini nga katawohan, ‘Isasalikway ni Jehova an duha nga pamilya nga iya ginpili’? Ngan gintatratar nira nga waray pagrespeto an akon kalugaringon nga katawohan, ngan diri na nira hira gintatagad nga nasud.

25 “Ini an siring ni Jehova: ‘Sugad la nga ginhimo ko an akon kasabotan mahitungod han adlaw ngan han gab-i,+ an mga balaud* han langit ngan han tuna,+ 26 diri ko gud liwat isasalikway an tulin* ni Jacob ngan ni David nga akon surugoon. Makuha ako ha iya tulin* hin mga magmamando ha katulinan* ni Abraham, ni Isaac, ngan ni Jacob. Kay titirukon ko utro an mga nabihag ha ira+ ngan malolooy ako ha ira.’”+