Zacarias

2 Ngan hinangad ako ngan nakita ko an usa nga tawo nga may ginkakaptan nga higot nga isurukol.+ 2 Salit nagpakiana ako: “Tipakain ka?”

Binaton hiya: “Susuklon ko an Jerusalem, basi hibaroan an kahilapad hito ngan an kahilaba hito.”+

3 Ngan kitaa! an anghel nga nakikiistorya ha akon ginawas, ngan gintapo hiya hin usa pa nga anghel. 4 Katapos, nagsiring hiya ha iya: “Dalagan ngadto ngan sumati ito nga batan-on nga lalaki, ‘“An Jerusalem pag-uukyan+ sugad hin waray pader nga syudad, tungod han ngatanan nga tawo ngan mga hayop ha sulod hito.+ 5 Ngan ako,” nasiring hi Jehova, “magigin usa nga pader nga kalayo ha palibot hito,+ ngan ako an magigin himaya ha butnga hito.”’”+

6 “Kadi! Kadi! Palagiw tikang ha tuna ha norte,”+ nasiring hi Jehova.

“Tungod kay akon kamo ginsarang ngadto ha upat nga hangin han langit,”+ nasiring hi Jehova.

7 “Kadi, Zion! Palagiw na, ikaw nga naukoy kaupod han anak nga babaye han Babilonya.+ 8 Katapos mahimaya,* an Dios nagsugo ha akon ngadto ha mga nasud nga nanguha han iyo mga butang sugad nga dinag-an, kay ini an ginsiring ni Jehova han mga hugpo:+ ‘An bisan hin-o nga kumamkam ha iyo, nakamkam han nawotawo han akon mata.*+ 9 Yana aalsahon ko an akon kamot kontra ha ira, ngan magigin dinag-an hira han ira mismo mga uripon.’+ Ngan mahibabaro gud kamo nga hi Jehova han mga hugpo an nagsugo ha akon.

10 “Singgit tungod ha kalipay, O anak nga babaye han Zion;+ kay ako tiabot,+ ngan maukoy ako ha butnga nimo,”+ nasiring hi Jehova. 11 “Hito nga adlaw, damu nga nasud an madapig kan Jehova,+ ngan hira magigin akon katawohan; ngan ako maukoy ha butnga nimo.” Ngan mahibabaro ka gud nga hi Jehova han mga hugpo an nagsugo ha akon nga kumanhi ha imo. 12 Tatag-iyahon ni Jehova an Juda sugad nga iya malon ha baraan nga tuna, ngan pipilion niya utro an Jerusalem.+ 13 Paghilom kamo ngatanan nga katawohan,* ha atubangan ni Jehova, kay nagbubuhat hiya tikang ha iya baraan nga urukyan.