Genesis

16 Yana an asawa ni Abram nga hi Sarai waray magkaada hin mga anak,+ pero may-ada hiya surugoon nga Ehiptohanon nga an ngaran hi Hagar.+ 2 Salit hi Sarai nagsiring kan Abram: “Alayon, pamati ha akon! Ginpugngan ni Jehova nga magkaada ako mga anak. Alayon pakighilawas ha akon surugoon. Bangin magkaada ako hin mga anak pinaagi ha iya.”+ Salit hi Abram namati han ginsiring ni Sarai. 3 Paglabay hin napulo ka tuig nga pag-ukoy ni Abram ha tuna han Canaan, ginkuha han asawa ni Abram nga hi Sarai an iya surugoon nga Ehiptohanon nga hi Hagar ngan iginhatag hiya sugad nga asawa han iya bana nga hi Abram. 4 Salit nakighilawas hiya kan Hagar, ngan nagburod hiya. Han nahibaroan niya nga burod hiya, iya gintamay an iya agaron nga babaye.

5 Tungod hini hi Sarai nagsiring kan Abram: “Ikaw an hinungdan han pagpasakit nga ginbuhat ha akon. Ako an naghatag han akon surugoon ha imo mga butkon,* pero han nahibaroan niya nga burod hiya, iya ako gintamay. Hinaot hi Jehova an maghukom ha akon ngan ha imo.” 6 Salit hi Abram nagsiring kan Sarai: “Kitaa! Ikaw an may awtoridad ha imo surugoon. Buhata ha iya anoman an imo ginhuhunahuna nga pinakamaopay.” Katapos, ginpakaalohan ni Sarai hi Hagar, ngan linayas hiya ha iya.

7 Ha urhi naagian hiya han anghel ni Jehova didto ha burabod han katubigan ha kamingawan, an burabod ha dalan nga tipakadto ha Shur.+ 8 Ngan hiya nagsiring: “Hagar nga surugoon ni Sarai, diin ka tikang ngan tipakain ka?” Hiya binaton: “Linayas ako ha akon agaron nga babaye nga hi Sarai.” 9 Katapos, an anghel ni Jehova nagsiring ha iya: “Balik ha imo agaron nga babaye ngan mapainubsanon nga magpasakop ka ha iya.” 10 Katapos, an anghel ni Jehova nagsiring: “Padadamuon ko hinduro an imo katulinan,* nga tungod han ira duro nga kadamu diri na hira maiihap.”+ 11 An anghel ni Jehova nagsiring pa: “Yana burod ka, ngan mag-aanak ka hin lalaki, ngan ngangaranan mo hiya hin Ismael,* kay nabatian ni Jehova an imo pag-antos. 12 Magigin sugad hiya hin ihalas nga asno.* An iya kamot makontra ha ngatanan, ngan an kamot han ngatanan makontra ha iya, ngan mag-uukoy hiya nga hirani ha ngatanan niya nga kabugtoan.”*

13 Katapos, nagtawag hiya ha ngaran ni Jehova, nga nakikig-istorya ha iya: “Ikaw an Dios nga nakakakita,”+ kay hiya nagsiring: “Nakita ko gud ba dinhi hiya nga nakakakita ha akon?” 14 Ito an hinungdan nga an bubon* gintawag nga Beer-lahai-roi.* (Aada ito ha butnga han Kades ngan Bered.) 15 Salit hi Hagar nagkaada anak nga lalaki kan Abram, ngan ginngaranan ni Abram hin Ismael an iya anak nga igin-anak ni Hagar.+ 16 Hi Abram 86 anyos han igin-anak ni Hagar hi Ismael.