An Pahayag kan Juan
6 Ngan nakita ko han gintangtang han Kordero+ an usa han pito nga selyo,+ ngan nabatian ko an usa han upat nga buhi nga linarang+ nga an tingog pariho hin dalugdog, nga nasiring: “Kadi!” 2 Ngan nakita ko, ngan kitaa! usa nga kabayo nga busag,+ ngan an nasakay hito may pana; ngan gintagan hiya hin korona,+ ngan hiya sinulong nga nagdadaog ngan basi magin bug-os an iya kadaogan.+
3 Han gintangtang niya an ikaduha nga selyo, nabatian ko an ikaduha nga buhi nga linarang+ nga nasiring: “Kadi!” 4 May lain pa nga ginawas, usa nga kabayo nga pula an kolor, ngan an nasakay hito gintagan hin awtoridad ha pagkuha han kamurayawan ha tuna basi patayon nira an usa kag usa, ngan gintagan hiya hin daku nga espada.+
5 Han gintangtang niya an ikatulo nga selyo,+ nabatian ko an ikatulo nga buhi nga linarang+ nga nasiring: “Kadi!” Ngan nakita ko, ngan kitaa! usa nga kabayo nga itom, ngan an nasakay hito may ginkakaptan nga timbangan. 6 May nabatian ako nga pariho hin tingog ha butnga han upat nga buhi nga linarang nga nasiring: “Usa ka kwatrohan* nga trigo para ha usa ka denaryo*+ ngan tulo ka kwatrohan nga sebada para ha usa ka denaryo; ngan ayaw daota an lana han olibo ngan an bino.”+
7 Han gintangtang niya an ikaupat nga selyo, nabatian ko an tingog han ikaupat nga buhi nga linarang+ nga nasiring: “Kadi!” 8 Ngan nakita ko, ngan kitaa! usa nga kabayo nga duason, ngan an nasakay hito may ngaran nga Kamatayon. Ngan an Lubnganan* nagsisinunod hirani ha iya. Ngan gintagan hira hin awtoridad ha ikaupat nga bahin han tuna, ha pagpatay pinaagi hin hilaba nga espada ngan hin kakulang hin pagkaon+ ngan hin makamaratay nga peste ngan pinaagi han magpintas nga mga hayop ha tuna.+
9 Han gintangtang niya an ikalima nga selyo, nakita ko ha ubos han halaran+ an mga kalag*+ han mga ginpamatay tungod han pulong han Dios ngan tungod han ira pagpamatuod.+ 10 Ginuliat hira ha daku nga tingog, nga nasiring: “Soberano nga Ginoo, baraan ngan tinuod,+ tubtob san-o ka magpupugong ha paghukom ngan pagbulos para ha amon dugo ha mga naukoy ha tuna?”+ 11 Ngan an tagsa ha ira gintagan hin busag nga hilaba nga bado,+ ngan ginsidngan hira nga pumahuway hin halipot pa nga panahon, tubtob nga makompleto an kadamu han ira mga igkasi-uripon ngan han ira kabugtoan nga hirani na pamatayon pariho han nahitabo ha ira.+
12 Ngan nakita ko han gintangtang niya an ikaunom nga selyo, ngan naglinog hin makusog; ngan an adlaw nag-itom sugad hin sako nga panapton nga hinimo ha barahibo,* ngan an bug-os nga bulan nagin sugad hin dugo,+ 13 ngan an mga bitoon ha langit nahulog ha tuna sugad hin kahoy nga igos nga nagkakahudlog an hilaw nga mga bunga hito kon nababay-og hin makusog nga hangin. 14 Ngan an langit nawara pariho hin basahon nga ginlukot,+ ngan an tagsa nga bukid ngan an tagsa nga isla nakuha ha hinmumutangan hito.+ 15 Katapos, an mga hadi ha tuna, an higtaas nga mga opisyal, an mga kumander han militar, an mga riko, an mga magkusog, an tagsa nga uripon, ngan an tagsa nga tawo nga may kagawasan nanago ha mga lungib ngan ha mga bato ha kabukiran.+ 16 Ngan padayon nga nasiring hira ha kabukiran ngan ha mga bato: “Matimpag kamo ha amon+ ngan tagoa kami tikang ha nawong han Dios nga nalingkod ha trono+ ngan tikang ha kapungot han Kordero,+ 17 kay an daku nga adlaw han ira kapungot inabot na,+ ngan hin-o an makakatindog?”+