An Siyahan nga Surat kan Timoteo
3 Masasarigan ini nga mga pulong: Kon an usa nga lalaki nagtatalinguha pagkab-ot nga magin usa nga paramangno,+ maopay nga buhat an iya ginhihingyap. 2 Salit, an paramangno kinahanglan waray ikasaway, bana hin usa nga babaye, kontrolado an pamatasan, maopay an panhunahuna,*+ organisado, maabiabihon,+ kwalipikado ha pagtutdo,+ 3 diri parahubog,+ diri bayolente,* lugod makatadunganon,+ diri makiawayon,+ diri mahigugmaon ha kwarta,+ 4 lalaki nga nangunguna* hin maopay ha iya kalugaringon nga panimalay, an iya mga anak seryoso gud nga nagpapasakop+ 5 (kay kon an bisan hin-o nga lalaki diri maaram manguna* ha iya kalugaringon nga panimalay, paonan-o niya mamangnoan an kongregasyon han Dios?), 6 diri bag-o la nga nakombirte,+ kay bangin magpahitaas hiya ngan kumarawat hin paghukom nga pariho han nakarawat han Yawa. 7 Dugang pa, kinahanglan liwat nga maopay an iya bantog* ha mga taga-gawas,+ basi diri hiya mawad-an hin dungog* ngan mabitik han Yawa.
8 Sugad man, an mga ministeryal nga surugoon kinahanglan seryoso, diri malimbong an panyakan,* diri nagpapatakas hin damu nga bino, diri hakog nga namimiling hin mga paagi basi makabentaha,+ 9 gintitipigan an sagrado nga tinago han pagtoo nga may limpyo nga konsensya.+
10 Sugad man, sadang hira sarihan anay kon angayan hira;* katapos puydi na hira magin mga ministro, kay waray naiaakusar ha ira.+
11 An kababayin-an liwat kinahanglan seryoso, diri nagpapakaraot,+ kontrolado an pamatasan, matinumanon ha ngatanan nga butang.+
12 An mga ministeryal nga surugoon kinahanglan bana hin usa nga babaye, nangunguna hin maopay ha ira mga anak ngan ha ira kalugaringon nga panimalay. 13 Kay an kalalakin-an nga nag-aalagad ha maopay nga paagi nagkakaada maopay nga reputasyon ngan daku nga kagawasan ha pagyakan mahitungod han pagtoo kan Kristo Jesus.
14 Iginsusurat ko ha imo ini nga mga butang, bisan kon naglalaom ako nga diri mag-iiha makada na ako ha imo, 15 basi kon maatrasado ako maaram ka kon paonan-o magawi ha panimalay han Dios,+ nga amo an kongregasyon han buhi nga Dios, usa nga harigi ngan tukod han kamatuoran. 16 Oo, an sagrado nga tinago hini nga debosyon ha Dios importante gud: ‘Iginpakita hiya sugad nga unod,+ iginpahayag nga matadong sugad nga espiritu,+ nagpakita ha mga anghel,+ iginsangyaw ha mga nasud,+ gintoohan ha kalibotan,+ ginkarawat hin mahimayaon ha kahitas-an.’