Ezekiel

9 Katapos, hinbatian ko nga ginuliat hiya ha daku nga tingog, nga nasiring: “Ipatawag adton magpapadapat hin sirot ha syudad, an tagsa ha ira dara an iya armas para ha pagbungkag!”

2 Nakakita ako hin unom nga lalaki nga nagkakaabot tikang ha dapit han igbaw nga ganghaan+ nga naatubang ha norte, an tagsa ha ira dara an iya armas para ha pagdugmok; ngan may kaupod hira nga usa nga lalaki nga nakasul-ot hin lino ngan may surudlan hin tinta han sekretaryo* dida ha iya hawak, ngan sinulod hira ngan tinindog ha sapit han halaran nga tumbaga.*+

3 Katapos, an himaya han Dios han Israel+ nagtipaigbaw tikang ha hinmumutangan hito ha bawbaw han mga kerubin ngan binalhin ngadto ha tamakán ha purtahan han balay,+ ngan nagtikang hiya pagtawag ha lalaki nga nakasul-ot hin lino ngan may surudlan hin tinta han sekretaryo dida ha hawak. 4 Hi Jehova nagsiring ha iya: “Libota an syudad, an bug-os nga Jerusalem, ngan markahi an mga agtang han mga tawo nga nanhahayhay ngan nangangaraba+ tungod han ngatanan nga mangil-ad nga butang nga ginbubuhat ha syudad.”+

5 Ngan nabatian ko nga nagsiring hiya ha iba pa: “Sundi niyo hiya ha paglibot ha syudad, ngan pamatay kamo. Ayaw tuguti nga malooy an iyo mata, ngan ayaw kamo pagpaid.+ 6 An lagas nga lalaki, an batan-on nga lalaki, an birhen, an gutiay nga bata, ngan an kababayin-an pamataya ngatanan.+ Pero ayaw kamo pagdaop ha bisan hin-o nga may marka.+ Sadang kamo magtikang ha akon santuaryo.”+ Salit nagtikang hira ha mga tigurang nga nakadto ha atubangan han balay.+ 7 Katapos nagsiring hiya ha ira: “Hugawi niyo an balay ngan pun-a niyo han mga ginpamatay an mga bungsaran.+ Lakat na kamo!” Salit nagkagawas hira ngan ginpamatay an mga tawo ha syudad.

8 Samtang ginpapamatay nira hira, ako la an nahisalin, ngan linuhod ako nga nahapa ngan ginuliat: “Abaadaw, O Jehova nga Soberano nga Ginoo! Pamamatayon mo ba an ngatanan nga nahisalin han Israel samtang iginhuhuwad mo ha Jerusalem an imo kapungot?”+

9 Salit nagsiring hiya ha akon: “Daku gud hinduro an sayop han panimalay ni Israel ngan ni Juda.+ An tuna napuno hin pamatay,*+ ngan an syudad puno hin karaotan.+ Kay nasiring hira, ‘Ginbayaan na ni Jehova ini nga tuna, ngan diri kita nakikita ni Jehova.’+ 10 Kondi mahitungod ha akon, an akon mata diri malolooy; diri liwat ako magpapakita hin pagpaid.+ Ipapadapat ko ha ira mismo ulo an mga resulta han ira panggawi.”

11 Katapos, nakita ko an lalaki nga nakasul-ot hin lino ngan may surudlan hin tinta dida ha iya hawak nga binalik ngan nagsiring: “Ginbuhat ko kon ano an imo iginsugo ha akon.”