Mga Buhat han mga Apostol
14 Yana ha Iconio, magkaupod nga sinulod hira ha sinagoga han mga Judio ngan nagyakan ha epektibo gud nga paagi salit damu han mga Judio ngan mga Griego an nagin mga tumuroo. 2 Pero an mga Judio nga waray tumoo nag-aghat ngan nag-impluwensya ha mga tawo* han mga nasud nga masina ha kabugtoan.+ 3 Salit naggahin hira hin maiha-iha nga panahon ha pagyakan nga may kaisog pinaagi han awtoridad ni Jehova,* nga nagpamatuod han mensahe mahitungod han iya diri matupngan nga pagkabuotan pinaagi ha pagtugot nga mabuhat an mga tigaman ngan urusahon nga mga butang pinaagi ha ira.+ 4 Pero nabahin an damu nga tawo ha syudad; an iba dinapig ha mga Judio pero an iba ha mga apostol. 5 Han an mga tawo han mga nasud ngan an mga Judio upod an ira mga magmarando nagsari pagtratar ha ira hin maraot ngan pagbato ha ira,+ 6 ginsumatan hira mahitungod hito, ngan pinalagiw hira ngadto ha mga syudad han Licaonia, an Listra ngan Derbe, ngan ha mga baryo nga hirani hito.+ 7 Didto nagpadayon hira ha pagpasamwak han maopay nga sumat.
8 Yana ha Listra may tawo nga nagliliningkod nga baldado an mga tiil. Piay hiya tikang ha katawo ngan waray pa gud makalakat. 9 Ini nga tawo nagpinamati kan Pablo samtang nagyayakan hiya. Hi Pablo, nga nagtinutok ha iya ngan nakita nga may pagtoo hiya nga mag-oopay hiya,+ 10 nagsiring ha daku nga tingog: “Tindog.” Salit tinindog hiya ngan nagtikang paglakat.+ 11 Pakakita han mga tawo han ginbuhat ni Pablo, ginuliat hira ha yinaknan han Licaonia: “An mga dios nagin pariho han mga tawo ngan linusad nganhi ha aton!”+ 12 Ngan gintawag nira hi Bernabe nga Zeus, pero hi Pablo naman Hermes, kay hiya an nangunguna ha pagyakan. 13 Ngan an saserdote ni Zeus, nga an templo nahimumutang ha aragian tipasulod ha syudad, nagdara hin todo nga mga baka ngan hin mga korona nga dahon ngan bukad ha mga ganghaan ngan karuyag niya maghalad upod han mga tawo.
14 Pero pakabati hito nira apostol Bernabe ngan Pablo, gin-gisi nira an ira mga bado ngan dinalagan ngadto ha mga tawo ngan ginuliat: 15 “Mga kasangkayan, kay ano nga ginbubuhat niyo ini nga mga butang? Kami liwat mga tawo nga may mga kaluyahan pariho ha iyo.+ Ngan iginpapasamwak namon ha iyo an maopay nga sumat, basi bayaan niyo inin waray pulos nga mga butang ngan magsingba ha buhi nga Dios, nga naghimo han langit ngan han tuna ngan han dagat ngan han ngatanan nga butang nga aada hito.+ 16 Ha naglabay nga mga henerasyon iya gintugotan an ngatanan nga nasud nga magpadayon ha ira mga pamaagi,+ 17 pero waray niya pasagdi nga waray pamatuod mahitungod ha iya+ tungod kay nagbuhat hiya hin maopay pinaagi ha paghatag ha iyo hin uran tikang ha langit ngan hin mabungahon nga mga panahon,+ nga gintatagan kamo hin damu nga pagkaon ngan ginpupuno an iyo kasingkasing hin kalipay.”+ 18 Kondi bisan pa han pagsiring nira hini nga mga butang, haros waray nira mapugngi an mga tawo ha paghalad ha ira.
19 Kondi may mga Judio nga inabot tikang ha Antiokia ngan Iconio ngan ginkombinse an mga tawo,+ ngan ginbato nira hi Pablo ngan gindanas hiya ngadto ha gawas han syudad, kay kahuna nira nga patay na hiya.+ 20 Pero han ginpalibotan hiya han mga disipulo, binuhát hiya ngan sinulod ha syudad. Kinabuwasan, kinadto hiya ha Derbe+ upod hi Bernabe. 21 Kahuman nira magpasamwak han maopay nga sumat hito nga syudad ngan maghimo hin damu nga disipulo, binalik hira ha Listra, ha Iconio, ngan ha Antiokia. 22 Didto ginparig-on nira an mga disipulo,*+ nga gindadasig hira nga magpabilin ha pagtoo ngan ginsisidngan: “Kinahanglan sumulod kita ha Ginhadian han Dios pinaagi hin damu nga kasakitan.”+ 23 Dugang pa, nagtuin hira hin mga tigurang para ha ira ha tagsa nga kongregasyon,+ nga nag-aampo ngan nagpupuasa,+ ngan igintapod nira kan Jehova* ini nga mga tigurang nga nagin mga tumuroo ha iya.
24 Katapos ginlatas nira an Pisidia ngan kinadto ha Pamfilia,+ 25 ngan kahuman ipasamwak an pulong ha Perga, linugsad hira ngadto ha Atalia. 26 Tikang didto naglayag hira tipakadto ha Antiokia, diin igintapod hira hadto ha diri matupngan nga pagkabuotan han Dios para ha buruhaton nga natapos na nira yana.+
27 Han nakaabot na hira ngan natirok na nira an kongregasyon, iginsumat nira an damu nga butang nga ginbuhat han Dios pinaagi ha ira, ngan an pag-abrihi niya ha mga nasud han purtahan ngadto ha pagtoo.+ 28 Salit naggahin hira hin maiha-iha nga panahon upod han mga disipulo.