Job
38 Katapos, ginbaton ni Jehova hi Job tikang ha buhawi:+
2 “Hin-o ini nga nagtatabon han akon katuyoan
Ngan nagyayakan nga waray kahibaro?+
3 Alayon iandam an imo kalugaringon sugad hin lalaki,
Papakianhan ko ikaw, ngan sumati ako.
4 Nakain ka han ginhimo ko an tuna?+
Sumati ako, kon naghuhunahuna ka nga nakakasabot ka.
5 Hin-o an nagbuot han mga sukol hito, bangin man la maaram ka,
O hin-o an nag-unat hin higot nga isurukol ha bawbaw hito?
6 Diin iginlubong an mga pundasyon hito,
O hin-o an nagbutang han bato nga pandugtong ha eskina hito,+
7 Han an mga bitoon ha kaagahon+ urosa nga nagsinggit hin malipayon,
Ngan an ngatanan nga anak han Dios*+ nagtikang pagsinggit hin pagdayaw?
8 Ngan hin-o an nag-ulang han dagat pinaagi hin mga purtahan+
Han binugwak ito tikang ha tagoangkan,
9 Han ginbadoan ko ito hin mga dampog
Ngan ginputos ito hin duro nga kasisidman,
10 Han iginpahamutang ko an mga tubtoban hito
Ngan iginbutang an mga trangka ngan mga purtahan hito,+
11 Ngan nagsiring ako, ‘Tubtob ka la dinhi, ngan diri ka puydi lumahos;
Dinhi la tubtob an imo dagku nga mga balud’?+
12 Nakagsugo ka na ba ha aga
O nakagsumat ha maagahon han pwesto hito,+
13 Basi kaptan an mga sidsid han tuna,
Ngan ipagpag an magraot tikang hito?+
14 Nababag-o ito pariho hin lapok ha ilarom han panselyo,
Ngan an ngatanan nga aada hito nagigin klaro sugad han disenyo han usa nga bado.
15 Pero an kalamrag han magraot ginkukuha tikang ha ira,
Ngan an ira nakaalsa nga butkon nababari.
16 Nakakadto ka na ba ha mga burabod han dagat,
O nalibot mo na ba an hilarom nga katubigan?+
17 Iginpakita na ba ha imo an mga ganghaan han kamatayon,+
O nakita mo na ba an mga ganghaan han duro nga kasisidman?*+
18 Hinbaroan mo na ba an kahaluag han tuna?+
Sumati ako, kon maaram ka hini ngatanan.
19 Hain nga direksyon naukoy an kalamrag?+
Ngan diin nahimumutang an kasisidman,
20 Basi madara mo ito ngadto ha teritoryo hito
Ngan mahibaroan an mga dalan tipakadto ha gin-uukyan hito?
21 Maaram ka ba hini tungod kay natawo ka na hito nga panahon
Ngan damu na an imo mga tuig?*
22 Nakasulod ka na ba ha mga bodega han niebe,+
O nakita mo na ba an mga bodega han uran nga yelo,+
23 Nga akon iginreserba para ha panahon han kasakitan,
Para ha adlaw han pakig-away ngan girra?+
24 Diin nagtitikang an pagsarang han kalamrag,*
Ngan diin nagtitikang an paghuyop ngada ha tuna han hangin nga tikang ha este?+
25 Hin-o an naghimo hin dalan para ha baha
Ngan an naghimo hin aragian para ha bunok nga may dalugdog,+
26 Basi magpauran ha lugar nga waray naukoy nga tawo,
Ha kamingawan nga waray mga tawo,+
27 Basi marepreskohan an nadaot ngan diri mabungahon nga katunaan
Ngan magpatubo han kabanwaan?+
29 Kan kanay tagoangkan nagawas an yelo,
Ngan hin-o an nag-aanak han pino nga mga yelo tikang ha langit,+
30 Ha panahon nga an bawbaw han katubigan nagigin matig-a sugad hin bato,
Ngan an bawbaw han hilarom nga katubigan nagigin yelo?+
31 Mahihigot mo ba an mga pisi han Kima nga konstelasyon*
32 Maigagawas mo ba an usa nga konstelasyon* ha kapanahonan hito
O matutugwayan an As nga konstelasyon* pati an mga anak hito?
33 Maaram ka ba han mga balaud nga nagkukontrol han kalangitan,+
O maipapatuman mo ba ha tuna an awtoridad hito?*
34 Makakaguliat ka ba ha mga dampog
Basi bumunok an uran ngada ha imo?+
35 Makakapagawas ka ba hin mga kidlat?
Maabot ba ito ngan masiring ha imo, ‘Aadi na kami!’
36 Hin-o an nagbutang hin kinaadman ha mga dampog*+
O naghatag hin pagsabot ha urusahon nga mga butang ha langit?*+
37 Hin-o an maaramon gud nga makakaihap han mga dampog,
O hin-o an makakahuwad han mga tibod han tubig ha langit+
38 Ha panahon nga an tapotapo nagigin lapok
Ngan an bug-os-bug-os nga tuna nagdudurugkot?
39 Makakadakop ka ba hin makakaon han usa nga leon
O mabubusog mo ba an gutom nga bata pa nga mga leon+
40 Kon naluob hira ha ira mga luruk-an
O nahapa ha mga lungib samtang naghuhulat hin mabibiktima?
41 Hin-o an nag-aandam hin pagkaon han uwak+
Kon an mga piyak hito nangangaro hin bulig ha Dios
Ngan naglilinupad-lupad kay waray nakakaon?