Mga Buhat han mga Apostol
18 Katapos hini, binaya hiya ha Atenas ngan kinadto ha Corinto. 2 Ngan may nakita hiya nga Judio nga Aquila+ an ngaran, nga natawo ha Ponto ngan bag-o pa la nga inabot tikang ha Italya upod hi Priscila nga iya asawa, kay ginpabaya ni Claudio ha Roma an ngatanan nga Judio. Salit kinadto hiya ha ira, 3 ngan tungod kay pariho ha ira an iya trabaho, inukoy hiya ha ira balay ngan nagtrabaho kaupod nira,+ kay panhimo hin tolda an ira trabaho. 4 Kada sabbath+ nagpapahayag hiya* ha sinagoga+ ngan ginkukombinse an mga Judio ngan mga Griego.
5 Yana pag-abot nira Silas+ ngan Timoteo+ tikang ha Macedonia, hi Pablo nagtikang magin sagipo gud ha pagpasamwak han pulong, nga nagsasangyaw ha mga Judio basi pamatud-an nga hi Jesus amo an Kristo.+ 6 Pero katapos nira magkinontra ngan magyinakan hin maraot ha iya, ginpadparan niya an iya mga bado+ ngan nagsiring ha ira: “Kamo an magkakaada baratunon ha iyo kalugaringon nga dugo.+ Waray ako sala.+ Tikang yana makadto ako ha mga tawo han mga nasud.”+ 7 Salit binalhin hiya tikang didto* ngan kinadto ha balay han usa nga lalaki nga an ngaran hi Titio Justo, nga magsiringba han Dios, nga an balay sapit han sinagoga. 8 Pero hi Crispo,+ nga punoan nga opisyal han sinagoga, nagin tumuroo ha Ginoo, upod an bug-os niya nga panimalay. Ngan damu nga taga-Corinto nga nakabati han mensahe an tinoo ngan ginbawtismohan. 9 Dugang pa, an Ginoo nagsiring kan Pablo pinaagi hin bisyon ha gab-i: “Ayaw kahadlok, lugod magpadayon ka ha pagyakan ngan ayaw paghilom, 10 kay kaupod mo ako+ ngan waray tawo nga maatake ha imo basi dauton ka; kay damu an akon katawohan hini nga syudad.” 11 Salit inukoy hiya didto hin usa ka tuig ngan unom ka bulan, nga nagtututdo ha ira han pulong han Dios.
12 Han hi Galio an prokonsul* han Acaya, an mga Judio urosa nga nag-atake kan Pablo ngan gindara hiya ha lingkoran han paghukom, 13 nga nasiring: “Ini nga tawo nagkukombinse hin mga tawo nga magsingba ha Dios ha paagi nga kontra ha balaud.” 14 Kondi han magyayakan na hi Pablo, nagsiring hi Galio ha mga Judio: “Kon mahitungod ito hin sayop o hin seryoso nga krimen, O mga Judio, angay la nga pamatian ko kamo hin mapailubon. 15 Pero kon mga isyu ito mahitungod han mga pulong ngan mga ngaran ngan han iyo kalugaringon nga balaud,+ kamo an pagtuhay hito. Diri ko karuyag nga magin hukom hini nga mga butang.” 16 Katapos, ginpaiwas niya hira tikang ha lingkoran han paghukom. 17 Salit gindakop nira ngatanan hi Sostenes,+ nga punoan nga opisyal han sinagoga, ngan ginkastigo hiya ha atubangan han lingkoran han paghukom. Pero waray gud manginlabot hi Galio hini nga mga butang.
18 Kondi katapos ni Pablo magpabilin didto hin pipira pa ka adlaw, nagsarit hiya ha kabugtoan nga malakat na hiya ngan naglayag hiya ngadto ha Sirya, nga gin-uupdan nira Priscila ngan Aquila. Nagpaarot hiya hin halipot ha Cencrea,+ kay may saad hiya. 19 Inabot hira ha Efeso, ngan ginbayaan niya hira didto; pero sinulod hiya ha sinagoga ngan nangatadongan ha mga Judio.+ 20 Bisan kon naghinangyo hira ha iya nga mag-iha pa didto, waray hiya magpahawid 21 kondi nagsarit nga malakat na hiya ngan nagsiring: “Mabalik ako ha iyo kon kaburut-on ni Jehova.”* Ngan tikang ha Efeso nagbiyahe hiya ha dagat 22 ngan inabot ha Cesarea. Ngan sinagka hiya* ngan ginkumusta an kongregasyon, ngan katapos linugsad hiya ngadto ha Antiokia.+
23 Katapos magpabilin didto hin halipot nga panahon, binaya hiya ngan nagpakadto ha iba-iba nga lugar ha probinsya han Galacia ngan ha Frigia,+ nga ginpaparig-on an ngatanan nga disipulo.+
24 Yana usa nga Judio nga Apolos+ an ngaran, nga taga-Alejandria, an inabot ha Efeso; maopay hiya magyakan ngan maaram gud han Kasuratan. 25 Ini nga lalaki gintutdoan han dalan ni Jehova,* ngan madasigon gud hiya pinaagi han espiritu salit husto an iya ginyayakan ngan igintututdo mahitungod kan Jesus, kondi an iya la hinbabaroan amo an pagbawtismo ni Juan. 26 Nagtikang hiya pagyakan hin maisugon ha sinagoga, ngan han hinbatian hiya nira Priscila ngan Aquila,+ igin-upod nira hiya ngan iginsaysay ha iya hin mas husto an dalan han Dios. 27 Dugang pa, tungod kay karuyag niya tumabok ngadto ha Acaya, nagsurat an kabugtoan ha mga disipulo, nga gin-aaghat hira nga karawaton hiya hin maopay. Salit pag-abot niya didto, ginbuligan gud niya an nagin mga tumuroo tungod han diri matupngan nga pagkabuotan han Dios; 28 kay dayag ngan madasigon gud nga ginpamatud-an niya hin bug-os nga sayop an mga Judio, nga iginpapakita ha ira tikang ha Kasuratan nga hi Jesus amo an Kristo.+