Mga Hukom
4 Kondi pagkamatay ni Ehud, an mga Israelita nagbuhat na liwat hin maraot ha pagkita ni Jehova.+ 2 Salit iginbaligya hira ni Jehova ha kamot ni Jabin nga hadi han Canaan,+ nga nagmando ha Hazor. An lider han iya kasundalohan amo hi Sisera, nga nag-ukoy ha Haroset+ han mga nasud.* 3 An mga Israelita nangaraba kan Jehova,+ kay hi Jabin* may 900 nga pan-girra nga karuwahe nga may mga espada nga nautwal ha mga kaliding,*+ ngan mapintas nga gintalumpigos niya an mga Israelita+ ha sulod hin 20 ka tuig.
4 Hi Debora, usa nga propetisa+ nga asawa ni Lapidot, an naghuhukom ha Israel hito nga panahon. 5 Kasagaran na nga nalingkod hiya ha ilarom han kahoy nga palma ni Debora ha butnga han Rama+ ngan Bethel+ ha kabukiran han Efraim; an mga Israelita nasagka ngadto ha iya basi magpahukom. 6 Iginpatawag niya hi Barak+ nga anak nga lalaki ni Abinoam tikang ha Kedes-neptali+ ngan ginsidngan hiya: “Diri ba hi Jehova nga Dios han Israel an nagsugo? ‘Lakat ngan pakadto* ha Bukid Tabor, ngan pag-upod hin 10,000 nga lalaki tikang ha Neptali ngan ha Zebulon. 7 Dadad-on ko ha imo hi Sisera, an lider han kasundalohan ni Jabin, pati na an iya pan-girra nga mga karuwahe ngan an iya mga sundalo ngadto ha sapa* han Kison,+ ngan ihahatag ko hiya ha imo kamot.’”+
8 Salit hi Barak nagsiring ha iya: “Kon maupod ka ha akon, makadto ako, pero kon diri ka maupod ha akon, diri ako makadto.” 9 Hiya binaton: “Maupod gud ako ha imo. Pero an imo bubuhaton nga pagsulong diri maghahatag ha imo hin kadungganan, kay hi Sisera ihahatag ni Jehova ha kamot han usa nga babaye.”+ Katapos, binuhát hi Debora ngan inupod kan Barak ngadto ha Kedes.+ 10 Iginpatawag ni Barak an Zebulon ngan an Neptali+ ngadto ha Kedes, ngan 10,000 nga lalaki an sinunod ha iya mga pitad. Hi Debora sinagka liwat upod niya.
11 May kalabotan kan Heber nga Kenita, binulag na hiya ha mga Kenita,+ nga katulinan ni Hobab nga ugangan nga lalaki ni Moises,+ ngan an iya tolda gintindog hirani ha daku nga kahoy ha Zaananim, nga nahimumutang ha Kedes.
12 Nagsumat hira kan Sisera nga hi Barak nga anak ni Abinoam sinagka na ha Bukid Tabor.+ 13 Gintirok dayon ni Sisera an ngatanan niya nga pan-girra nga karuwahe—900 nga karuwahe nga may mga espada nga nautwal ha mga kaliding*—ngan an ngatanan nga sundalo nga upod niya tikang ha Haroset han mga nasud basi kumadto ha sapa* han Kison.+ 14 Nagsiring hi Debora kan Barak: “Buhát, kay ini an adlaw nga ihahatag ni Jehova hi Sisera ha imo kamot. Diri ba hi Jehova nagawas nga nag-uuna ha imo?” Ngan hi Barak linugsad tikang ha Bukid Tabor upod an 10,000 nga lalaki nga nasunod ha iya. 15 Katapos, ginsamok+ ni Jehova hi Sisera ngan an ngatanan niya nga pan-girra nga karuwahe ngan an ngatanan nga kasundalohan ngan ginpamatay hira pinaagi han espada ni Barak. Ha kataposan, hinaw-as hi Sisera ha iya karuwahe ngan pinalagiw nga nagdadalagan. 16 Ginlanat ni Barak an pan-girra nga mga karuwahe ngan an kasundalohan tubtob ha Haroset han mga nasud. Salit an ngatanan nga kasundalohan ni Sisera nagkamatay pinaagi han espada; waray bisan usa nga nahisalin.+
17 Pero hi Sisera pinalagiw nga nagdadalagan ngadto ha tolda ni Jael+ nga asawa ni Heber+ nga Kenita, kay may kamurayawan ha butnga ni Jabin+ nga hadi han Hazor ngan han panimalay ni Heber nga Kenita. 18 Katapos, ginawas hi Jael basi tapoon hi Sisera ngan nagsiring ha iya: “Sulod, ginoo ko, sulod ngadi. Ayaw kahadlok.” Salit sinulod hiya ha iya tolda, ngan gintaklapan hiya ni Jael. 19 Katapos, nagsiring hiya kan Jael: “Alayon tagi ako hin gutiay nga tubig nga maiinom, kay gin-uuhaw ako.” Salit nag-abri hi Jael hin anit nga surudlan hin gatas ngan ginpainom hiya,+ katapos iya na liwat hiya gintaklapan. 20 Nagsiring hiya kan Jael: “Tindog ha ganggang han tolda, ngan kon umabot an bisan hin-o ngan magpakiana ha imo, ‘May tawo ba dinhi?’ siring, ‘Waray!’”
21 Kondi hi Jael nga asawa ni Heber kumuha hin usok han tolda ngan hin martilyo. Katapos, samtang hi Sisera kapoy ngan hilarom an katurog, waray aringasa nga dinaop ha iya hi Jael ngan ginpukpok ha iya sentido an usok ngan ginpalapos ito ha tuna, ngan namatay hiya.+
22 Kinadto hi Barak basi lanaton hi Sisera, ngan ginawas hi Jael basi tapoon hiya ngan nagsiring: “Kadi ngan ipapakita ko ha imo an tawo nga imo ginbibiling.” Sinulod hi Barak upod niya ngan nakita hi Sisera nga nahigda nga patay na, nga an usok han tolda nakada ha iya sentido.
23 Salit hito nga adlaw, ginpirde han Dios hi Jabin nga hadi han Canaan ha atubangan han mga Israelita.+ 24 An kamot han mga Israelita mas nagtikakusog kontra kan Jabin nga hadi han Canaan,+ tubtob nga ginpatay nira hi Jabin nga hadi han Canaan.+