An Siyahan nga Libro han mga Hadi
19 Katapos, iginsumat ni Ahab+ kan Jezebel+ an ngatanan nga ginbuhat ni Elias ngan kon paonan-o niya ginpamatay an ngatanan nga propeta pinaagi han espada.+ 2 Salit hi Jezebel nagpadara hin mensahe para kan Elias, nga nasiring: “Magpahinabo unta an mga dios hin sunod-sunod nga sirot ha akon kon buwas ha sugad hini nga oras diri ko himoon ha imo an pariho han nahitabo ha kada tagsa* ha ira!” 3 Tungod hito nahadlok hiya, salit binuhát hiya ngan pinalagiw basi matalwas an iya kinabuhi.*+ Inabot hiya ha Beer-sheba+ nga sakop han Juda,+ ngan iya ginbilin didto an iya kabulig. 4 Nagbiyahe hiya hin usa ka adlaw pakadto ha kamingawan ngan inabot hiya ngan liningkod ha ilarom han kahoy nga retama,* ngan naghangyo hiya nga mamatay na unta hiya.* Hiya nagsiring: “Husto na! Yana, O Jehova, kuhaa an akon kinabuhi,*+ kay diri ako mas maopay kay han akon mga kaapoy-apoyan.”
5 Katapos, hinigda hiya ngan nahingaturog ha ilarom han kahoy nga retama.* Pero tigda nga may anghel nga kinapot ha iya+ ngan ginsidngan hiya: “Buhát ngan kaon.”+ 6 Pagkita niya, ha dapit han iya ulo may usa nga malidong nga tinapay ha bawbaw han ginpaso nga mga bato ngan hin usa ka tibod nga tubig. Kinaon hiya ngan ininom ngan binalik paghigda. 7 Ha urhi, an anghel ni Jehova binalik ha ikaduha nga higayon ngan ginkaptan hiya ngan ginsidngan: “Buhát ngan kaon, kay magigin makapoy hinduro para ha imo an biyahe.” 8 Salit binuhát hiya ngan kinaon ngan ininom, ngan nakahatag ito ha iya hin kusog ha pagbiyahe hin 40 ka adlaw ngan 40 ka gab-i tubtob nga inabot hiya ha Horeb, an bukid han tinuod nga Dios.+
9 Didto sinulod hiya ha lungib+ ngan nagpalabay han gab-i; ngan kitaa! inabot ha iya an pulong ni Jehova, nga nasiring ha iya: “Ano an imo ginbubuhat dinhi, Elias?” 10 Binaton hiya: “Nagin madasigon gud ako para kan Jehova nga Dios han mga hugpo;+ kay iginsalikway han katawohan han Israel an kasabotan nga imo ginhimo,+ ginbungkag nira an imo mga halaran, ngan ira ginpamatay an imo mga propeta pinaagi han espada,+ ngan ako na la an nahibilin. Yana ira ako gin-iikaparatay.”*+ 11 Pero Hiya nagsiring: “Gawas ngan tindog ha bukid ha atubangan ni Jehova.” Ngan kitaa! hi Jehova nalabay,+ ngan may makusog gud nga hangin nga nagtutunga han kabukiran ngan nagbubuka han dagku nga mga bato ha atubangan ni Jehova,+ pero hi Jehova waray dida ha hangin. Katapos han hangin, nagkaada hin linog,+ pero hi Jehova waray dida ha linog. 12 Katapos han linog, may-ada kalayo,+ pero hi Jehova waray dida ha kalayo. Katapos han kalayo, may-ada kalmado ngan mahinay nga tingog.+ 13 Pakabati gud hito ni Elias, iya gintahoban an iya nawong han iya panpropeta nga bado+ ngan ginawas hiya ngan tinindog ha may ganggang han lungib. Katapos, may tingog nga nagpakiana ha iya: “Ano an imo ginbubuhat dinhi, Elias?” 14 Binaton hiya: “Nagin madasigon gud ako para kan Jehova nga Dios han mga hugpo; kay iginsalikway han katawohan han Israel an kasabotan nga imo ginhimo,+ ginbungkag nira an imo mga halaran, ngan ira ginpamatay an imo mga propeta pinaagi han espada, ngan ako na la an nahibilin. Yana ira ako gin-iikaparatay.”*+
15 Hi Jehova nagsiring ha iya: “Balik, ngan kadto ha kamingawan han Damasco. Pag-abot mo didto, dihugi hi Hazael+ sugad nga hadi han Sirya. 16 Ngan sadang mo dihogan hi Jehu+ nga apo ni Nimsi sugad nga hadi han Israel, ngan sadang mo dihogan hi Eliseo* nga anak ni Safat nga taga-Abel-mehola sugad nga propeta nga kasaliwan mo.+ 17 An bisan hin-o nga makapalagiw ha espada ni Hazael,+ papatayon ni Jehu;+ ngan an bisan hin-o nga makapalagiw ha espada ni Jehu, papatayon ni Eliseo.+ 18 Ngan may-ada pa ako nahisalin nga 7,000 ha Israel,+ hira ngatanan waray lumuhod kan Baal+ ngan waray humarok ha iya.”+
19 Salit linarga hiya tikang didto ngan nakit-an niya hi Eliseo nga anak ni Safat samtang nag-aarado kaupod an 12 ka padis han todo nga baka ha unahan niya, ngan nakadto hiya ha ika-12 nga padis. Salit hi Elias kinadto ha iya ngan gin-itsa ni Elias an iya panpropeta nga bado+ ngadto ha iya. 20 Ngan iya ginbayaan an todo nga mga baka ngan ginlanat hi Elias ngan nagsiring: “Alayon, tuguti ako nga humarok ha akon tatay ngan ha akon nanay. Katapos, masunod ako ha imo.” Hi Elias binaton ha iya: “Lakat, uli, ginpupugngan ko ba ikaw?” 21 Salit inuli hiya ngan nagkuha hin usa ka padis nga todo nga baka ngan iginhalad ito, ngan iya gin-gamit an pan-arado basi lagaon an mga baka ngan iginhatag ito ha mga tawo, ngan nangaon hira. Katapos hito, binuhát hiya ngan sinunod kan Elias ngan nagserbi ha iya.+