Ezekiel

11 Ngan gin-alsa ako han usa nga espiritu ngan gindara ha este nga ganghaan han balay ni Jehova, an ganghaan nga naatubang ha este.+ Didto ha aragian tipasulod ha ganghaan nakakita ako hin 25 nga lalaki, upod na hi Jaazanias nga anak ni Azur ngan hi Pelatias nga anak ni Benaias; mga prinsipe hira han katawohan.+ 2 Katapos nagsiring Hiya ha akon: “Anak han tawo, ini hira an mga lalaki nga nagpaplano hin maraot ngan naghahatag hin maraot nga sagdon dinhi* hini nga syudad. 3 Nasiring hira, ‘Diri ba ini an panahon ha pagtukod hin mga balay?+ An syudad* amo an kaldero,*+ ngan kita amo an unod.’

4 “Salit pagtagna kontra ha ira. Pagtagna, anak han tawo.”+

5 Katapos, an espiritu ni Jehova kinanhi ha akon,+ ngan nagsiring Hiya ha akon: “Masiring ka, ‘Ini an siring ni Jehova: “Husto an iyo ginsiring, O panimalay ni Israel, ngan maaram ako han iyo ginhuhunahuna. 6 Iyo ginpahinabo nga damu an magkamatay hini nga syudad, ngan iyo ginpuno han mga patay an iya mga kalye.”’”+ 7 “Salit ini an siring ni Jehova nga Soberano nga Ginoo: ‘An patay nga mga lawas nga iyo iginsarang ha syudad amo an unod, ngan an syudad amo an kaldero.+ Pero kamo mismo igagawas tikang hito.’”

8 “‘Nahadlok kamo ha espada,+ kondi espada an akon dadad-on kontra ha iyo,’ nasiring hi Jehova nga Soberano nga Ginoo. 9 ‘Igagawas ko kamo ha iya ngan itutubyan ko kamo ha kamot han mga taga-iba nga nasud ngan ipapadapat ko ha iyo an paghukom.+ 10 Mamamatay kamo pinaagi han espada.+ Huhukman ko kamo ha giutan han Israel,+ ngan makikilala gud niyo nga ako hi Jehova.+ 11 An syudad diri magigin kaldero para ha iyo, ngan diri kamo an magigin unod ha sulod hito; huhukman ko kamo ha giutan han Israel, 12 ngan makikilala gud niyo nga ako hi Jehova. Kay waray niyo sunda an akon mga regulasyon ngan buhata an akon mga paghukom,+ kondi nagbuhat kamo uyon ha mga paghukom han mga nasud ha iyo palibot.’”+

13 Katapos ko gud magtagna, hi Pelatias nga anak ni Benaias namatay, ngan linuhod ako nga nahapa ngan ginuliat: “Abaadaw, O Jehova nga Soberano nga Ginoo! Pupoohon mo ba an mga nahisalin han Israel?”+

14 An pulong ni Jehova inabot utro ha akon, nga nasiring: 15 “Anak han tawo, an imo kabugtoan, adton imo kabugtoan nga may katungod ha pagtubos, pati na an bug-os nga panimalay ni Israel, ginsidngan han mga umurukoy han Jerusalem, ‘Pahirayo kamo kan Jehova. Amon ini nga tuna; iginhatag ini ha amon sugad nga panag-iya.’ 16 Salit masiring ka, ‘Ini an siring ni Jehova nga Soberano nga Ginoo: “Bisan kon igindistyero ko hira ha higrayo nga mga nasud ngan iginsarang hira ha katunaan,+ magigin santuaryo nira ako ha sulod hin gutiay nga panahon ha katunaan nga ira ginkadtoan.”’+

17 “Salit masiring ka, ‘Ini an siring ni Jehova nga Soberano nga Ginoo: “Titirukon ko liwat kamo tikang ha mga katawohan ngan pagtatarampuhon kamo tikang ha katunaan diin kamo iginsarang, ngan ihahatag ko ha iyo an tuna han Israel.+ 18 Ngan mabalik hira didto ngan kukuhaon nira tikang hito an ngatanan nga mangil-ad nga butang ngan mangil-ad nga mga binuhatan hito.+ 19 Ngan tatagan ko hira hin nagkakaurosa nga kasingkasing,*+ ngan bubutangan ko hira hin bag-o nga disposisyon;*+ ngan kukuhaon ko ha ira mga lawas an kasingkasing nga sugad katig-a han bato+ ngan tatagan ko hira hin kasingkasing nga sugad kahumok han unod,*+ 20 basi matuman nira an akon mga surundon ngan masunod an akon mga paghukom ngan masugot ito. Ngan hira magigin akon katawohan, ngan ako magigin ira Dios.”’

21 “‘“Kondi mahitungod han mga tawo nga an kasingkasing naruruyag gud ha pagpadayon ha ira mangil-ad nga mga butang ngan ha ira mangil-ad nga mga binuhatan, ipapadapat ko ha ira ulo an mga resulta han ira panggawi,” nasiring hi Jehova nga Soberano nga Ginoo.’”

22 Yana igin-igbaw han mga kerubin an ira mga pako, ngan sapit nira an mga kaliding,+ ngan nakada ha bawbaw nira an himaya han Dios han Israel.+ 23 Katapos, an himaya ni Jehova+ nagtipaigbaw tikang ha syudad ngan inundang ha bawbaw han bukid ha este han syudad.+ 24 Kahuman hito, gin-alsa ako han usa nga espiritu—pinaagi han bisyon nga nakarawat ko pinaagi han espiritu han Dios⁠—ngan gindara ako ha nadistyero nga katawohan ha Caldea. Katapos, an bisyon nga nakita ko binaya ha akon. 25 Ngan nagtikang ako pagsumat ngadto ha nadistyero nga katawohan han ngatanan nga butang nga iginpakita ni Jehova ha akon.