An Siyahan nga Surat ha mga Taga-Tesalonica
2 Mga kabugtoan, kamo mismo maaram gud nga an amon pagbisita ha iyo diri kay waray resulta.+ 2 Kay bisan kon nag-antos anay kami ngan ginmaltrato ha Filipos,+ sugad han iyo hinbabaroan, nagkaada kami hin kaisog pinaagi han aton Dios nga isumat ha iyo an maopay nga sumat han Dios+ ha atubangan han duro nga pagkontra.* 3 Kay an amon sinsero nga sagdon ha iyo diri tikang ha sayop nga mga ideya o tikang ha kahugawan o may limbong, 4 kondi sugad la nga gin-uyonan kami han Dios nga taporan han maopay nga sumat, amo nga nagyayakan kami basi lipayon, diri an mga tawo, kondi an Dios, nga nag-uusisa han amon kasingkasing.+
5 Ha pagkamatuod, maaram kamo nga waray gud kami mag-ulog-ulog o magpakunokuno tungod ha hakugnon nga mga motibo;+ testigo an Dios! 6 Waray liwat kami magtinguha hin kadungganan tikang ha mga tawo, tikang man ha iyo o tikang ha iba, bisan kon puydi unta kami makapabug-at ha pinansyal sugad nga mga apostol han Kristo.+ 7 Ha kabaliktaran, gintratar namon kamo ha malumo nga paagi, sugad hin nagpapasuso nga nanay nga malumo nga nagmamangno* han iya mismo mga anak. 8 Salit tungod han amon malumo nga pagpalangga ha iyo, determinado* kami nga ipaangbit ha iyo, diri la an maopay nga sumat han Dios kondi pati an amon mismo kalugaringon,*+ kay hinigugma gud namon kamo.+
9 Mga kabugtoan, sigurado nga nahinunumdom kamo han amon makuri nga trabaho ngan duro nga kakapoy. Nagtrabaho kami ha gab-i ngan adlaw, basi diri kami makapabug-at ha pinansyal ha bisan hin-o ha iyo,+ han iginsangyaw namon ha iyo an maopay nga sumat han Dios. 10 Mga testigo kamo, pati an Dios, kon mationan-o kamaunungon ngan kamatadong ngan waray ikasaway an amon paggawi ngada ha iyo nga mga tumuroo. 11 Maaram gud kamo nga padayon kami nga nagsinagdon ngan nagliniaw ha iyo ngan nagpamatuod kami ha tagsa ha iyo,+ sugad han ginbubuhat han usa nga tatay+ ha iya mga anak, 12 basi padayon nga maglakat kamo nga takos ha Dios,+ nga nagtatawag ha iyo ngadto ha iya Ginhadian+ ngan himaya.+
13 Oo, ito an hinungdan nga diri liwat kami naundang ha pagpasalamat ha Dios,+ kay han ginkarawat niyo an pulong han Dios, nga iyo hinbatian ha amon, ginkarawat niyo ito diri sugad nga pulong han mga tawo kondi kon ano gud ito, sugad nga pulong han Dios, nga nagios liwat ha iyo nga mga tumuroo. 14 Kay ginsubad niyo, mga kabugtoan, an mga kongregasyon han Dios nga kahiusa ni Kristo Jesus nga aada ha Judea, kay nag-antos kamo ha mga kamot han iyo mismo mga kahimungto+ han mga butang nga gin-aantos liwat nira ha mga kamot han mga Judio, 15 nga nagpatay pa ngani han Ginoo nga hi Jesus+ ngan han mga propeta ngan nagtimaraot ha amon.+ Dugang pa, diri nira ginpapalipay an Dios, lugod nakontra hira ha kaopayan han ngatanan nga tawo, 16 kay nagsasari hira nga pugngan kami ha pagsangyaw ha katawohan han mga nasud basi ini hira matalwas.+ Hini nga paagi pirme hira nakakabuhat hin damu nga sala. Pero ha kataposan, an iya kapungot inabot ha ira.+
17 Kondi mga kabugtoan, han iginbulag kami ha* iyo hin madaliay (ha pisikal, diri ha amon kasingkasing), tungod han amon duro nga hingyap, ginhimo namon an ngatanan nga pangalimbasog basi makita kamo hin personal.* 18 Tungod hini karuyag namon kumada ha iyo, oo ako, hi Pablo, nagsari diri la makausa kondi makaduha; pero gin-ulang kami ni Satanas ha amon aragian. 19 Kay ano ba an amon paglaom o kalipay o korona han duro nga pagrayhak ha atubangan han aton Ginoo nga hi Jesus ha iya presensya? Ha pagkamatuod, diri ba kamo?+ 20 Kamo gud an amon himaya ngan kalipay.