Jonas

4 Pero nakapasubo gud ini kan Jonas, ngan nasina hiya hinduro. 2 Salit nag-ampo hiya kan Jehova: “Ah yana, Jehova, diri ba amo ini an akon ginkakabarak-an han nakadto pa ako ha akon kalugaringon nga tuna? Ito an hinungdan nga ha siyahan pa la nagsari ako pagpalagiw ngadto ha Tarsis;+ kay maaram ako nga ikaw mapinairon* ngan maloloy-on nga Dios, diri madagmit masina ngan hura hin maunungon nga gugma,+ ngan nasusubo ka tungod ha kadaot. 3 Yana, O Jehova, alayon kuhaa an akon kinabuhi,* kay mas maopay pa nga mamatay ako kay ha mabuhi.”+

4 Hi Jehova nagpakiana: “Husto ba nga masina ka hinduro?”

5 Katapos, ginawas hi Jonas ha syudad ngan liningkod ha este nga dapit han syudad. Naghimo hiya hin masisirongan didto ngan liningkod ha landong hito basi makita kon ano an mahitatabo ha syudad.+ 6 Katapos, hi Jehova nga Dios nagtagana hin tanom nga upo* para kumatay ha bawbaw ni Jonas, basi makalandong ha iya ulo ngan maibanan an iya kasakit. Ngan nalipay gud hi Jonas tungod ha tanom nga upo.

7 Pero ha pagpamanagbanag ha kaagahon han sunod nga adlaw, ginpahinabo han tinuod nga Dios nga dauton hin ulod an tanom nga upo, ngan nalaya ito. 8 Han pagsirang han adlaw, ginpahinabo han Dios nga humuyop an mapaso hinduro nga hangin nga tikang ha este, ngan naiigo han malanit nga kapaso han adlaw an ulo ni Jonas, ngan haros madismayo na hiya. Padayon nga naghangyo hiya nga mamatay na,* ngan nagsiniring hiya, “Mas maopay pa nga mamatay ako kay ha mabuhi.”+

9 Ginpakianhan han Dios hi Jonas: “Husto ba nga masina ka hinduro tungod han tanom nga upo?”+

Binaton hiya: “May katungod ako nga masina, duro an akon kasina nga karuyag ko na mamatay.” 10 Pero hi Jehova nagsiring: “Nanganugon ka ha tanom nga upo, nga diri ikaw an nagtanom, ngan diri liwat ikaw an nagpatubo; tinubo ito ha usa la ka gab-i ngan namatay ha usa la ka gab-i. 11 Diri ba liwat ako angay manganugon ha Nineve nga daku nga syudad,+ nga may sobra 120,000 ka tawo nga diri ngani maaram kon ano an husto ngan sayop,* pati ha ira damu nga hayop?”+