Genesis

37 Hi Jacob padayon nga inukoy ha tuna han Canaan, diin nag-ukoy sugad nga dayo an iya tatay.+

2 Ini an kasaysayan ni Jacob.

Han 17 anyos hi Jose,+ inin batan-on nga lalaki nag-aataman han panon+ kaupod an mga anak nga lalaki ni Bilha+ ngan an mga anak nga lalaki ni Zilpa+ nga mga asawa han iya tatay. Ngan hi Jose may maraot nga sumat mahitungod ha ira nga iya iginsumat ha ira tatay. 3 Yana mas hinigugma ni Israel hi Jose kay ha ngatanan niya nga iba nga anak nga lalaki+ kay hiya an anak han iya pagkalagas, ngan may-ada hiya iginpahimo nga espesyal nga hilaba nga bado* para ha iya. 4 Han nakita han iya kabugtoan nga lalaki nga mas hinigugma hiya han ira tatay kay ha ngatanan niya nga bugto, nangalas hira ha iya, ngan diri hira nakikiistorya ha iya hin mamurayawon.

5 Ha urhi, nag-inop hi Jose ngan iya ito iginsumat ha iya kabugtoan,+ ngan nagkaada hira dugang nga hinungdan nga mangalas ha iya. 6 Nagsiring hiya ha ira: “Alayon pamatii ini nga akon inop. 7 Didto ha butnga han uma nagpipinanbutok kita hin mga uhay han binangon an akon binutok ngan tinindog hin tadong, ngan an iyo mga binutok nagpalibot ngan nanyukbo ha akon binutok.”+ 8 An iya kabugtoan nagsiring ha iya: “Hihimoon mo gud ba an imo kalugaringon nga amon hadi ngan pagmamandoan kami?”+ Salit nagkaada hira usa pa nga hinungdan nga mangalas ha iya, tungod han iya mga inop ngan han iya ginsiring.

9 Katapos hito, nag-inop na liwat hiya, ngan iya ito iginsumat ha iya kabugtoan: “Nag-inop na liwat ako. Yana, an adlaw ngan an bulan pati an 11 nga bitoon nanyukbo ha akon.”+ 10 Katapos, iya ito iginsumat ha iya tatay ngan ha iya kabugtoan, ngan ginsaway hiya han iya tatay ngan ginsidngan hiya: “Ano an kahulogan hini nga imo inop? Madaop gud ba ako pati hi imo nanay ngan an imo kabugtoan ngan mayukbo ha imo atubangan?” 11 Ngan nangabugho ha iya an iya kabugtoan,+ pero an iya ginsiring gintipigan ha hunahuna han iya tatay.

12 Yana an iya kabugtoan nagpasabsab han panon han ira tatay hirani ha Sikem.+ 13 Ha urhi, hi Israel nagsiring kan Jose: “Diri ba an imo kabugtoan nag-aataman han mga panon hirani ha Sikem? Kadi, pakakadtoon ko ikaw ha ira.” Ngan hiya nagsiring ha iya: “Sige, makadto ako!” 14 Salit hiya nagsiring ha iya: “Alayon pagkadto, ngan kitaa kon maopay an imo kabugtoan. Kitaa an kahimtang han panon, ngan sumati ako.” Ngan iya ginpalakat hiya tikang ha walog* han Hebron,+ ngan nagtipakadto hiya ha Sikem. 15 Ha urhi, nakit-an hiya han usa nga tawo samtang naglilinakat-lakat hiya ha uma. An tawo nagpakiana ha iya: “Ano an imo ginbibiniling?” 16 Hiya nagsiring: “Ginbibiling ko an akon kabugtoan. Alayon sumati ako, diin nira gin-aataman an mga panon?” 17 An tawo binaton: “Binaya hira dinhi, kay nabatian ko hira nga nagsiring, ‘Kadto kita ha Dotan.’” Salit linanat hi Jose ha iya kabugtoan ngan nakita hira ha Dotan.

18 Ira nakit-an hiya han hirayo pa hiya, ngan antes hiya umabot ha ira, nagplano hira kontra ha iya basi patayon hiya. 19 Salit nagsiring hira ha usa kag usa: “Kitaa! Tikanhi an parainop.+ 20 Tana, patayon naton hiya ngan ihulog hiya ha usa han mga buho nga tirokan hin tubig, ngan masiring kita nga ginlamoy hiya hin mapintas nga hayop. Katapos, kitaon naton kon ano an mahitatabo ha iya mga inop.” 21 Han nabatian ito ni Ruben,+ nangalimbasog hiya pagtalwas ha iya tikang ha ira. Salit nagsiring hiya: “Ayaw naton hiya pagpataya.”*+ 22 Hi Ruben nagsiring ha ira: “Ayaw kamo pagpatay.*+ Ilabog hiya ngada hini nga buho nga tirokan hin tubig ha kamingawan, pero ayaw hiya pagbuhati hin maraot.”*+ Plano niya nga talwason hiya tikang ha ira basi maibalik hiya ha iya tatay.

23 Salit pakaabot gud la ni Jose ha iya kabugtoan, ira ginhukasan hi Jose han iya hilaba nga bado, an espesyal nga bado nga iya sul-ot,+ 24 ngan ira gindara hiya ngan iginlabog hiya ha buho nga tirokan hin tubig. Hito nga panahon waray sulod an buho; waray ito tubig.

25 Katapos, nanlingkod hira basi mangaon. Han pagsiplat nira, may usa ka grupo han mga Ismaelita+ nga tiabot tikang ha Gilead. An ira mga kamelyo may karga nga mahamot nga tagok,* balsamo, ngan tagukon nga panit han kahoy,+ ngan tipakadto hira ha Ehipto. 26 Hi Juda nagsiring ha iya kabugtoan: “Ano an magigin kapulsanan kon aton patayon an aton bugto ngan tabonan an iya dugo?+ 27 Tana, ibaligya naton hiya+ ha mga Ismaelita, ngan diri kita an magbubuhat hin maraot ha iya. Tutal bugto naton hiya, aton unod.” Salit namati hira ha ira bugto. 28 Ngan pag-agi han mga negosyante nga Midianita,+ ginkuha nira hi Jose ha buho nga tirokan hin tubig ngan iginbaligya hiya ha mga Ismaelita ha kantidad nga 20 ka bug-os nga silber.+ Hi Jose gindara hini nga mga tawo ngadto ha Ehipto.

29 Ha urhi, han pagbalik ni Ruben ha buho nga tirokan hin tubig ngan nakita niya nga hi Jose waray na didto ha buho, iya gin-gisi an iya bado. 30 Han binalik hiya ha iya kabugtoan, ginuliat hiya: “Waray na an bata! Ngan ako—ano an akon bubuhaton?”

31 Salit ira ginkuha an hilaba nga bado ni Jose ngan nag-ihaw* hin kanding nga lalakí ngan igintunlob an bado ha dugo. 32 Katapos hito, ira iginpadara an espesyal nga hilaba nga bado ngadto ha ira tatay ngan ginsumatan hiya: “Ini an amon nahiagian. Alayon kitaa kon ini an bado han imo anak o diri.”+ 33 Katapos, ginkita niya ito ngan ginuliat: “Bado ini han akon anak! Posible gud nga gin-atake hiya hin mapintas nga hayop! Sigurado nga ginkuniskunis hi Jose!” 34 Tungod hito gin-gisi ni Jacob an iya bado ngan nagsul-ot hin sako nga panapton ha iya hawak* ngan nagtaguminatay tungod han iya anak hin damu ka adlaw. 35 Ngan an ngatanan niya nga anak nga lalaki ngan an ngatanan niya nga anak nga babaye nangalimbasog pagliaw ha iya, pero diri hiya napaliaw, nga nasiring: “Mahingangadto ako ha Lubnganan*+ nga nagtataguminatay tungod han akon anak!” Ngan an iya tatay padayon nga nagtinangis tungod ha iya.

36 Yana iginbaligya hiya han mga Midianita didto ha Ehipto kan Potipar, usa nga opisyal ha palasyo han Paraon+ ngan an lider han mga gwardya han hadi.+