Buligi an Kalalakin-an nga Mag-uswag ha Espirituwal

“Tikang niyan makapangisda ka hin mga tawo.”—LUK. 5:10.

1, 2. (a) Ano an ginbuhat han damu nga kalalakin-an han nakabati hira han pagsangyaw ni Jesus? (b) Ano an aton hihisgotan hini nga artikulo?

USA ka adlaw han nagsasangyaw hi Jesus ngan an iya mga disipulo ha Galilea, sinakay hira hin baluto basi kumadto ha mamingaw nga lugar. Kondi nagsinunod ha ira an mga tawo nga nagbabaktas ha baybayon. An ira kadamu mga “lima ka yukot nga kalalakin-an . . . , labot han kababayin-an ngan han kabataan.” (Mat. 14:21, Maopay nga Sumat) Ha lain nga higayon, dinaop kan Jesus an mga tawo nga karuyag magpatambal ngan mamati ha iya. Upod hito an “upat ka yukot nga kalalakin-an . . . , labot han kababayin-an ngan han kabataan.” (Mat. 15:38, Maopay nga Sumat) Matin-aw nga ha katawohan nga kinadto kan Jesus ngan interesado ha iya gintututdo, damu an kalalakin-an. Ha pagkatinuod, maaram hi Jesus nga damu pa an makarawat han kamatuoran, kay katapos niya maghimo hin milagro han ginpuno niya hin isda an pukot han iya mga disipulo, hiya nagsiring kan Simon: “Tikang niyan makapangisda ka hin mga tawo.” (Luk. 5:10) Karuyag sidngon ni Jesus nga an ira pagsangyaw pariho han pangisda. Bubuligan niya hira nga mabilngan an mga tawo nga makarawat han kamatuoran. Upod hito an damu nga kalalakin-an.

² Yana, may kalalakin-an liwat nga interesado ha mensahe nga aton iginsasangyaw ngan naruruyag mag-aram han Biblia. (Mat. 5:3) Pero damu ha ira an diri nag-uuswag ha espirituwal. Paonan-o naton hira mabubuligan? Bisan kon ha ministeryo ni Jesus waray hiya maghimo hin presentasyon nga para gud la ha kalalakin-an, naghisgot hiya hin mga topiko nga nababarak-an han kalalakin-an ha iya panahon. Basi masubad hi Jesus, aton hihisgotan kon paonan-o naton mabubuligan an kalalakin-an ha pag-atubang han masunod nga mga sitwasyon: (1) pagpakabuhi, (2) kahadlok ha isisiring han iba, ngan (3) pag-abat hin kawaray kapas.

Pagpakabuhi

3, 4. (a) Ano an importante ha damu nga kalalakin-an? (b) Kay ano nga mas importante ha iba nga kalalakin-an an pagpakabuhi kay han espirituwal nga mga buruhaton?

³ Usa nga eskriba an nagsiring kan Jesus: “Magturutdo, ako masunod ha imo, bisan diin ka kadto.” Kondi han ginsidngan hiya ni Jesus nga “an Anak han Tawo waray inoolnan han iya ulo,” nagruhaduha hiya. Baga hin waray niya maruyagi an kawaray kasigurohan kon ano an iya kakaunon o kon diin hiya maukoy, kay waray mababasa ha Biblia nga nagin sumurunod hiya ni Kristo.—Mat. 8:19, 20.

⁴ Kasagaran na nga mas importante ha kalalakin-an an kasigurohan ha pinansyal kay han espirituwal nga mga butang. Prayoridad han damu ha ira an pagkaada hitaas nga edukasyon ngan trabaho nga daku an sweldo. Para ha ira, mas importante ngan praktikal an pagkaada daku nga kità kay han bisan ano nga kapulsanan nga makukuha ha pag-aram han Kasuratan ngan pagin duok ha Dios. Bangin maruyagan nira an igintututdo han Biblia, kondi “an mga pangarit han kalibotan, ngan an limbong han mga manggad” nakakawara han ira interes. (Mar. 4:18, 19) Tagda kon paonan-o ginbuligan ni Jesus an iya mga disipulo nga bag-uhon an ira mga prayoridad.

5, 6. Ano an nakabulig kanda Andres, Pedro, Jakobo, ngan Juan nga bag-uhon an ira prayoridad may kalabotan ha pagsangyaw ngan pagpakabuhi?

⁵ Hi Andres ngan an iya bugto nga hi Simon Pedro magkasosyo ha negosyo nga pangisda. Sugad man hira Juan, an iya bugto nga hi Jakobo, ngan an ira tatay nga hi Sebedeo. Malampuson an ira negosyo ngan may mga trabahador hira. (Mar. 1:16-20) Han siyahan nga nakabati hira Andres ngan Juan mahitungod kan Jesus tikang kan Juan nga Parabaptis, nakombinse hira nga hin-agian na nira an Mesias. Iginsumat ito ni Andres ha iya bugto nga hi Simon Pedro ngan bangin iginsumat liwat ito ni Juan ha iya bugto nga hi Jakobo. (Juan 1:29, 35-41) Han sumunod nga mga bulan, hira nga upat inupod kan Jesus ha pagsangyaw ha Galilea, Judea, ngan Samaria. Katapos, inin upat nga disipulo binalik ha pangisda. Interesado hira ha espirituwal nga mga butang, pero diri nira prayoridad an ministeryo.

⁶ Ha urhi, gin-imbitar ni Jesus hira Pedro ngan Andres nga sumunod ha iya ngan magin “manaragat hin mga tawo.” Ano an ira ginbuhat? “Ira dayon binayaan an ira mga pukot ngan nanunod kan Jesus.” Ito liwat an ginbuhat nira Jakobo ngan Juan. “Ha gilayon ira binayaan an sakayan, ngan an ira amay, ngan sinunod ha iya.” (Mat. 4:18-22) Ano an nakabulig hini nga kalalakin-an nga mag-alagad hin bug-os-panahon? Nadara la ba hira han emosyon salit tigda nga nagdesisyon? Waray. Ha pipira ka bulan namati hira kan Jesus, nakakita han iya ginhimo nga mga milagro, nakaobserbar han iya kadasig ha katadongan, ngan nakakita han makalilipay nga resulta han iya pagsangyaw. Tungod hito nagin mas marig-on an ira pagtoo ngan pagsarig kan Jehova!

7. Paonan-o naton mabubuligan an aton gindudumarahan hin pag-aram ha Biblia nga mahibaro pagsarig kan Jehova?

⁷ Paonan-o naton masusubad hi Jesus ha pagbulig ha aton gindudumarahan hin pag-aram ha Biblia nga mahibaro pagsarig kan Jehova? (Prob. 3:5, 6) Daku an maibubulig han aton paagi han pagtutdo. Mahimo naton pabug-atan an saad han Dios nga hura nga bibendisyonan kita kon uunahon naton an Ginhadian. (Basaha an Malakias 3:10; Mateo 6:33.) Bisan kon mahimo kita gumamit hin mga teksto basi pabug-atan kon paonan-o igintatagana ni Jehova an panginahanglan han iya katawohan, diri liwat naton sadang hingalimtan nga daku an epekto han aton susbaranan. An pag-istorya han aton mga eksperyensya makakabulig gud ha aton gindudumarahan hin pag-aram ha Biblia nga mahibaro pagsarig kan Jehova. Puydi liwat naton hira istoryahan hin makapadasig nga mga eksperyensya tikang ha aton mga publikasyon.a

8. (a) Kay ano nga importante nga an usa nga nag-aaram han Biblia ‘makatilaw ngan makakita nga hi Jehova maopay’? (b) Paonan-o naton mabubuligan an aton gindudumarahan hin pag-aram nga maeksperyensyahan an pagkamaopay ni Jehova?

⁸ Basi magin marig-on an pagtoo han usa nga nag-aaram han Biblia, labaw pa an ginkikinahanglan kay han pagbasa ngan pamati la kon paonan-o ginbibendisyonan ni Jehova an iba. Kinahanglan maeksperyensyahan liwat niya an pagkamaopay ni Jehova. An salmista nagkanta: “Tilawi niyo ngan kitaa nga hi Jehova maopay: bulahan an tawo nga naayop ha iya.” (Sal. 34:8) Paonan-o naton mabubuligan an usa nga nag-aaram han Biblia nga makita nga maopay hi Jehova? Pananglitan an usa nga estudyante ha Biblia nga namumroblema ha pinansyal nangangalimbasog liwat nga bayaan an usa nga bisyo sugad han pagsigarilyo, paghuygo, o paghubog. (Prob. 23:20, 21; 2 Kor. 7:1; 1 Tim. 6:10) Diri ba mabubuligan naton hiya nga maeksperyensyahan an pagkamaopay ni Jehova kon tututdoan naton hiya nga mag-ampo para han bulig han Dios basi umundang ha iya bisyo? Tagda liwat an mahimo mahitabo kon dasigon naton an usa nga nag-aaram han Biblia nga unahon an espirituwal nga mga butang pinaagi han paggahin hin panahon ha pag-aram han Biblia kada semana ngan ha pangandam ngan pagtambong ha mga katirok. Kon maeksperyensyahan niya nga ginbibendisyonan ni Jehova an iya pangalimbasog, magririg-on an iya pagtoo.

Kahadlok ha Isisiring han Iba

9, 10. (a) Kay ano nga hi Nikodemo ngan hi Jose nga taga-Arimatea waray magpakilala nga mga disipulo hira ni Jesus? (b) Kay ano nga an iba nga kalalakin-an nag-aalang nga magin sumurunod ni Jesus?

⁹ An iba nga kalalakin-an nag-aalang nga magin sumurunod ni Jesus tungod han kahadlok ha isisiring han iba. Hi Nikodemo ngan hi Jose nga taga-Arimatea waray magpakilala nga mga disipulo hira ni Jesus kay nahadlok hira ha isisiring o bubuhaton han iba nga Judio. (Juan 3:1, 2; 19:38) May hinungdan an ira kahadlok. An mga lider han relihiyon nasisina hinduro kan Jesus salit an bisan hin-o nga natoo ha iya ginpapaiwas ha sinagoga.—Juan 9:22.

¹⁰ Ha pipira nga lugar yana, kon an usa nga lalaki nagpapakita nga interesado gud hiya ha Dios, ha Biblia, o ha relihiyon, bangin kontrahon hiya han iya mga katrabaho, kasangkayan, o paryente. Ha iba nga lugar bangin peligroso pa ngani an pagsumat nga mabalhin ka hin relihiyon. Kon an usa nga lalaki kaapi ha militar o politika o prominente ha komunidad, bangin umatubang hiya hin duro nga pagtamay han iya mga kaupod kon mag-istorya hiya mahitungod ha relihiyon. Pananglitan, usa nga lalaki ha Germany an nagsiring: “Tinuod an ginsasangyaw niyo nga mga Saksi mahitungod ha Biblia. Pero kon mag-Saksi ako yana, buwas maaram na an ngatanan. Ano an sisidngon han akon mga katrabaho, mga amyaw, ngan han mga nakilala ha akon ngan ha akon pamilya? Diri ko ito makakaya.”

11. Paonan-o ginbuligan ni Jesus an iya mga disipulo nga malamposan an kahadlok ha tawo?

¹¹ Maisugon an mga apostol ni Jesus, pero usahay nahahadlok hira han bangin hunahunaon ha ira han iba. (Mar. 14:50, 66-72) Paonan-o hira ginbuligan ni Jesus nga mag-uswag bisan kon ginkukontra? Igin-andam niya hira ha pag-atubang ha pagkontra. Hiya nagsiring: “Bulahan kamo kon an mga tawo magdumot ha iyo, ngan kon pabulagon kamo ha ira, ngan kon magpasipara ha iyo, ngan isikway an iyo ngaran sugad hin maraot, tungod han Anak han Tawo.” (Luk. 6:22) Ginpahamangnoan niya an iya mga sumurunod nga kukontrahon hira “tungod han Anak han Tawo.” Ginpasarig liwat hira ni Jesus nga bubuligan hira han Dios kon mangaro hira ha Iya hin bulig ngan kusog. (Luk. 12:4-12) Dugang pa, gin-aghat ni Jesus an mga bag-ohan nga makig-upod ngan makigsangkay ha iya mga disipulo.—Mar. 10:29, 30.

12. Ha ano nga mga paagi naton mabubuligan an mga bag-ohan nga malamposan an kahadlok ha tawo?

¹² Kita liwat kinahanglan bumulig ha mga gindudumarahan naton hin pag-aram ha Biblia nga malamposan an kahadlok ha tawo. Agsob nga mas masayon atubangon an usa nga sitwasyon kon maaram ka nga posible ito mahitabo. (Juan 15:19) Pananglitan, kay ano nga diri buligan an nag-aaram han Biblia nga mag-andam hin simple, makatadunganon, ngan basado ha Biblia nga mga baton ha mga pakiana ngan pagriwa han iya mga katrabaho ngan han iba pa? Labot han pagin iya sangkay, mahimo naton hiya ipakilala ha aton mga kakongregasyon, labi na hadton pariho ha iya an kahimtang o hilig. Labaw ha ngatanan, kinahanglan tutdoan naton hiya nga pirme mag-ampo hin kinasingkasing. Makakabulig ini ha iya nga magin duok ha Dios ngan himoon hi Jehova nga iya Arayopan ngan Bato.—Basaha an Salmo 94:21-23; Jakobo 4:8.

Pag-abat hin Kawaray Kapas

13. Kay ano nga an iba nga kalalakin-an nag-aalang pagkarawat han kamatuoran?

¹³ May kalalakin-an nga nag-aalang pagkarawat han kamatuoran tungod kay diri hira maopay magbasa o magyakan o bangin awdanon hira. An iba ha ira nakukurian pagpahayag han ira panhunahuna o pagbati ha atubangan han iba. Salit bangin makuri gud ha ira an pag-aram, pagkomento ha mga katirok, o pagsangyaw. “Han batan-on pa ako,” siring han usa nga bugto nga lalaki, “nagdadagmit ako pagkadto ha purtahan, kunohay ginpipindot an doorbell, ngan nabaya nga waray uroaringasa, naglalaom nga waray makakabati o makakakita ha akon. . . . Kon ginhuhunahuna ko an pagbalay-balay, nagkakasakit ako.”

14. Kay ano nga waray matambal han mga disipulo ni Jesus an usa nga bata nga ginsaniban hin demonyo?

¹⁴ Hunahunaa an kakulang hin kompyansa nga bangin inabat han mga disipulo ni Jesus han waray nira matambal an usa nga bata nga ginsaniban hin demonyo. An tatay han bata dinaop kan Jesus ngan nagsiring: ‘An akon anak buntugon ngan nag-aantos kaopay; kay agsob hiya mahulog ha kalayo, ngan agsob ha tubig. Ngan akon hiya gindara ha imo mga tinon-an, ngan waray hira makakaopay ha iya.’ Ginpagawas ni Jesus an demonyo salit nag-opay an bata. Ha urhi an mga disipulo nagpakiana kan Jesus: “Kay ano nga waray kami pakakapagpagawas han yawa?” Hi Jesus binaton: “Tungod han gutiay nga iyo pagtoo; kay matuod ako nasiring ha iyo: kon may-ada kamo pagtoo sugad hin liso han mustasa, masiring kamo hini nga bukid: Balhin dinhi ngadto ha unhan nga lugar, ngan ito mababalhin; ngan waray bagay nga diri niyo mahihimo.” (Mat. 17:14-20) Ginkikinahanglan an pagtoo kan Jehova basi malamposan an sugad-bukid nga mga ulang. Ano man kon an usa diri na sumarig kan Jehova ngan sumarig na la ha iya kalugaringon nga mga abilidad? Mapapakyas hiya ngan maabat nga waray hiya kapas ha pag-alagad kan Jehova.

15, 16. Paonan-o naton mabubuligan an usa nga nag-aaram han Biblia nga malamposan an pag-abat hin kawaray kapas?

¹⁵ Usa nga maopay nga paagi ha pagbulig ha usa nga naabat hin kawaray kapas amo an pagdasig ha iya nga hunahunaon hi Jehova imbes nga an iya kalugaringon. Hi Pedro nagsurat: “Magmapaubsanon kamo ha ilarom han makagagahum nga kamot han Dios, basi pagpahitas-on kamo niya ha igo nga panahon; nga ibutang niyo ha iya an ngatanan niyo nga pangarit.” (1 Ped. 5:6, 7) Kinahanglan buligan naton an nag-aaram han Biblia nga higugmaon hi Jehova ngan magpagiya ha Iya. Nangangahulogan ito nga kinahanglan niya higugmaon an iya hinbabaroan ha Biblia ngan ipakita an ‘bunga han espiritu’ ha iya kinabuhi. (Gal. 5:22, 23) Kinahanglan importante gud ha iya an pag-ampo. (Fil. 4:6, 7) Dugang pa, nasarig hiya nga an Dios maghahatag ha iya hin kaisog ngan kusog nga ginkikinahanglan ha pag-atubang ha bisan ano nga sitwasyon o ha pagtuman hin bisan ano nga toka.—Basaha an 2 Timoteo 1:7, 8.

¹⁶ An iba nga nag-aaram han Biblia bangin kinahanglan liwat buligan nga mapauswag an ira abilidad ha pagbasa ngan paagi han pagyakan. Inaabat liwat han iba nga diri hira takos mag-alagad ha Dios tungod han magraot nga ira ginbuhat antes nira nakilala hi Jehova. Ha sugad nga mga kahimtang, an aton mahigugmaon ngan mapailubon nga bulig bangin amo gud an ira ginkikinahanglan. “An mga mag-opay waray kinahanglan han magtarambal, kondi an mga may-ada sakit,” siring ni Jesus.—Mat. 9:12.

Buligi an Damu Pa nga Kalalakin-an

17, 18. (a) Paonan-o naton mabubuligan an damu pa nga kalalakin-an ha aton ministeryo? (b) Ano an aton hihisgotan ha sunod nga artikulo?

¹⁷ Hingyap naton nga damu pa nga kalalakin-an an kumarawat han makalilipay gud nga mensahe nga ha Biblia la hiaagian. (2 Tim. 3:16, 17) Salit paonan-o naton mabubuligan an mas damu nga kalalakin-an ha aton ministeryo? Pinaagi ha pagsangyaw ha gab-i, ha mga kulop han Sabado ngan Domingo, o durante han mga piyesta opisyal nga mas damu nga kalalakin-an an aada ha balay. Kon posible, mahimo kita maghangyo nga makaistorya an ulo han pamilya. Kon igintutugot han kahimtang, sangyawan naton an aton mga katrabaho nga lalaki ngan buligan an diri-Saksi nga mga bana han aton mga kakongregasyon nga magin interesado ha kamatuoran.

¹⁸ Samtang ginsasangyawan naton an ngatanan, makakasiguro kita nga an mga namimiling han kamatuoran makarawat han aton mensahe. Mapailubon nga buligan naton an ngatanan nga nagpapakita hin sinsero nga interes ha kamatuoran. Kondi paonan-o naton mabubuligan an bawtismado nga kalalakin-an nga maghingyap nga magkaada mga responsabilidad ha organisasyon han Dios ngan magin kwalipikado para hito? Ini an hihisgotan ha sunod nga artikulo.

[Footnote]

Ano an Imo Baton?

• Paonan-o mabubuligan an kalalakin-an nga himoon nga prayoridad an espirituwal nga mga butang?

• Paonan-o naton mabubuligan an mga bag-ohan nga malamposan an kahadlok ha isisiring han iba?

• Ano an makakabulig ha iba nga malamposan an pag-abat hin kawaray kapas?

[Retrato ha pahina 25]

Namimiling ka ba hin mga higayon nga masangyawan han maopay nga sumat an kalalakin-an?

[Retrato ha pahina 26]

Paonan-o mo mabubuligan an imo gindudumarahan hin pag-aram ha Biblia nga magin andam ha pag-atubang hin mga pagsari?