Damu an Matatalwas ha Kataposan—Mahimo Ka Liwat Matalwas

An Biblia nagsusumat nga may kabungkagan nga mahitatabo ha kataposan: “Maabot an daku nga kasakitan nga waray pa mahitabo tikang ha tinikangan han kalibotan tubtob yana . . . Ha pagkamatuod, kon diri pahaliputon ito nga mga adlaw, waray tawo nga matatalwas.” (Mateo 24:21, 22) Kondi an Dios nagsasaad nga damu an matatalwas: “An kalibotan mawawara . . . , pero hiya nga nagbubuhat han kaburut-on han Dios magpapadayon ha waray kataposan.”—1 Juan 2:17.

Kon karuyag mo matalwas ha kawara hini nga kalibotan ngan ‘magpadayon ha waray kataposan,’ ano an sadang mo buhaton? Sadang ka ba magtikang ha pagtirok hin materyal nga mga butang o ha paghimo hin pisikal nga pagpangandam? Diri. An Biblia nag-aaghat gud ha aton nga magkaada iba nga mga prayoridad. Aton mababasa: “Tungod kay hito nga paagi matutunaw ito ngatanan nga butang, hunahunaa kon sadang magin ano nga klase kamo hin mga tawo may kalabotan ha baraan nga panggawi ngan ha mga buhat tungod han debosyon ha Dios, samtang ginhuhulat ngan ginhuhunahuna niyo pirme an presensya han adlaw ni Jehova.” (2 Pedro 3:10-12) Iginpapakita han konteksto nga kaupod han “ngatanan nga butang” nga matutunaw adton mga magmarando hinin maraot nga kalibotan ngan an ngatanan nga nagpipili nga sumuporta hini nga mga magmarando imbes nga ha Dios. Matin-aw, kon magtitirok kita hin materyal nga mga butang, diri ito makakatalwas ha aton tikang hito nga kabungkagan.

Oo, an aton katalwasan nag-uupod ha pagkaada debosyon kan Jehova nga Dios ngan ha paghibaro mahitungod ha kon ano nga panggawi ngan buhat an iya nalilipayan. (Sepania 2:3) Imbes nga sundon an kadam-an yana ngan igbalewaray an matin-aw nga mga tigaman nga nagkikinabuhi na kita hinin importante nga panahon, kinahanglan ‘hunahunaon naton pirme an presensya han adlaw ni Jehova.’ Mahimo ipakita ha imo han mga Saksi ni Jehova tikang ha Biblia kon paonan-o ka matatalwas hinin tiarabot nga adlaw.