Kon Paonan-o Mapapauswag an mga Abilidad ha Pakiistorya
KASAGARAN ba nga masayon para ha imo an pakiistorya ha iba? Para ha damu, an paghunahuna pa la han pakiistorya, labi na ha usa nga diri nira kilala, nagigin hinungdan na han kabaraka. Bangin awdanon an sugad nga mga tawo. Bangin maghunahuna hira: ‘Ano an akon ig-iistorya? Paonan-o ko titikangan an paghisgot? Paonan-o ko ito maipapadayon?’ An may-kompyansa, makisangkayon nga mga tawo bangin amo an manguna ha iristorya. Bangin makurian hira ha pag-aghat ha iba nga magyakan ngan ha pamati ha ginsisiring. Salit kita ngatanan, awdanon man o diri, kinahanglan kultibaron an abilidad ha pakiistorya.
Magtikang ha Balay
Basi mapauswag an imo mga abilidad ha pakiistorya, kay ano nga diri tikangan ha balay? An makaparig-on nga pakiistorya nakakaamot gud ha kalipayan han pamilya.
An importante nga yawi ha sugad nga pakiistorya amo an hilarom nga pagpaid ha usa kag usa. (Deut. 6:6, 7; Prob. 4:1-4) Kon kita napaid, nakikiistorya kita, ngan namamati kita kon an iba nga tawo naruruyag magyakan. Usa pa nga importante nga bahin amo an pagkaada mapulsanon nga impormasyon nga maiistorya. Kon may-ada kita regular nga programa han personal nga pagbasa ngan pag-aram ha Biblia, damu an aton maipapaangbit. An maaramon nga paggamit han Pag-usisa han Kasuratan Adlaw-adlaw nga bokleta makakadasig han paghisgot. Durante hito nga adlaw, bangin may-ada kita makalilipay nga eksperyensya ha pag-alagad ha kanataran. Bangin nakabasa kita hin impormatibo o pataraw-an. Himoon naton ito nga batasan nga ipaangbit an mga impormasyon durante han makalilipay nga pag-iristorya han pamilya. Mabulig liwat ini ha aton ha pakiistorya ha mga tawo ha gawas han pamilya.
Pakiistorya ha Diri-kakilala
Damu nga mga tawo an nag-aalang ha pagtikang hin pakiistorya ha usa nga diri nira kakilala. Kondi tungod han gugma ha Dios ngan ha ira amyaw, an mga Saksi ni Jehova sinsero nga nangangalimbasog basi mahibaro kon paonan-o makikiistorya basi ipaangbit ha iba an mga kamatuoran han Biblia. Ano an mabulig ha imo basi mapauswag ini nga bahin?
Birilhon an prinsipyo ha Filipos 2:4. Gin-aaghat kita nga tagdon, ‘diri la an kaopayan han aton kalugaringon nga mga butang, kondi liwat an personal nga kaopayan han iba.’ Hunahunaa ito hini nga paagi: Kon hadto waray mo pa igkaistorya ito nga tawo, tatagdon ka niya sugad nga diri kakilala. Ano an imo hihimoon basi magin komportable hiya? Makakabulig an malipayon nga hiyom ngan makisangkayon nga pangumusta. Kondi may-ada dugang pa nga tatagdon.
Bangin nadisturbo mo an iya mga panhunahuna. Kon mangangalimbasog ka nga madani hiya ha paghisgot kon ano an imo ginhuhunahuna, imbes nga tagdon kon ano an iya ginhuhunahuna, makikiistorya ba hiya hin maopay? Ano an ginbuhat ni Jesus han iginkaistorya niya an usa nga babaye ha atabay ha Samaria? An ginhuhunahuna han babaye amo an pag-alog hin tubig. Gintikangan ni Jesus an iya pakiistorya ha babaye mahitungod hito, ngan iya dayon nabalhin ito ngadto ha makalilipay nga paghisgot ha espirituwal.—Juan 4:7-26.
Kon paraobserba ka, masasabtan mo liwat kon ano an bangin ginhuhunahuna han mga tawo. Malipayon ba o masurub-on pagkit-on an tawo? Lagas na ba hiya, bangin masakiton? May-ada ka ba nakikita nga tigaman nga may kabataan ha panimalay? Baga hin riko ba an tawo o nangangalimbasog hiya nga magkaada mga kinahanglanon ha kinabuhi? An mga adorno ba ha balay o personal nga mga alahas nagpapakita han impluwensya han relihiyon? Kon imo gintatagad ha pangumusta an sugad nga mga butang, bangin hunahunaon han tawo nga may-ada kamo ginkakauyonan nga interes.
Kon diri mo nakakaistorya hin personal an tagbalay, bangin hinbabatian la an iya tingog ha luyo han nakakandado nga purtahan, ano an imo mahuhunahuna? Bangin nagkikinabuhi ha kahadlok an tawo. Magagamit mo ba ito nga impormasyon ha pagtikang hin pakiistorya ha purtahan?
Ha iba nga mga lugar posible nga madani mo an tawo ha pakiistorya pinaagi han pagsumat ha iya mahitungod ha imo kalugaringon—an imo gintikangan, kon kay ano nga kinadto ka ha iya balay, kon kay ano nga natoo ka ha Dios, kon kay ano nga nagtikang ka pag-aram ha Biblia, ngan kon paonan-o nakabulig an Biblia ha imo. (Buh. 26:4-23) Siyempre, kinahanglan buhaton ini hin maaramon ngan ginhuhunahuna an maopay nga katuyoan. Ini, ha baylo, mahimo magpagios ha tawo nga magsumat ha imo mahitungod ha iya kalugaringon ngan kon paonan-o niya gintatagad an mga butang.
Ha iba nga mga kultura, kustomre an pag-abiabi ha mga diri-kakilala. Bangin hangyoon ka dayon han mga tawo ha pagsulod ngan paglingkod. Pakalingkod mo, kon matinalahuron nga magpakiana ka mahitungod han kahimtang han pamilya ngan sinsero nga mamati ha baton, bangin mamati gud an tagbalay ha imo isisiring. An iba nga mga tawo nagpapakita pa ngani hin daku nga pagtagad ha mga bisita, salit mahimo ka magkaada dugang nga panahon ha pagtikang ha pakiistorya. Samtang nag-iiristorya, mahimo mahibaroan nira nga may-ada mga butang nga pariho niyo naruruyagan. Magtutugway ini ngadto ha mapulsanon nga paghisgot ha espirituwal.
Ano man kon damu nga tawo ha iyo lugar an nagyayakan hin lain han imo yinaknan? Paonan-o mo igkakaistorya ini nga mga tawo? Kon mahibabaro ka hin bisan la simple nga mga pangumusta ha pipira hito nga mga yinaknan, mahibabaro an mga tawo nga interesado ka ha ira. Mahimo ini pagtikangan han dugang pa nga pakiistorya.
Kon Paonan-o Ipapadayon an Pakiistorya
Basi magpadayon an pakiistorya, magin interesado ha mga opinyon han iba nga tawo. Aghata hiya ha pagpahayag han iya kalugaringon kon disidido hiya nga buhaton ito. Makakabulig an pinili-hin-maopay nga mga pakiana. An punto-de-bista nga mga pakiana amo an gimaopayi tungod kay kasagaran nga nag-aaghat ito hin baton nga labaw pa han oo o diri. Pananglitan, katapos paghisgotan an problema nga nakakabaraka ha mga tawo ha iyo lugar, mahimo ka magpakiana: “Ano ha hunahuna mo an hinungdan hini nga kahimtang?” o “Ano ha hunahuna mo an solusyon?”
Kon magpakiana ka, pamatii hin maopay an baton. Ipakita an imo totoo nga interes pinaagi han pulong, pag-uyon, pagsenyas. Ayaw pagsagbang. Pinaagi han abrido nga hunahuna, tagda kon ano an ginsisiring. “Magmaabtik ha [pamati], mahinay ha pagyakan.” (Jak. 1:19) Kon nabaton ka, ipakita nga namati ka gud han ginsiring.
Kondi, hunahunaa, nga diri ngatanan mabaton ha imo mga pakiana. An iba nga mga tawo bangin bumaton hin pagkinhat la han kiray o paghiyom. An iba bangin sumiring la hin oo o diri. Ayaw pagturaw. Magin mapailubon. Ayaw pagpirit ha pakiistorya. Kon disidido mamati an tawo, gamita an higayon ha pagpaangbit han makaparig-on Kasuratanhon nga mga impormasyon. Pag-abot han panahon, bangin tagdon ka han tawo sugad nga usa nga sangkay. Hito nga panahon bangin disidido na hiya ha pagpaangbit hin mas dayag han iya mga ideya.
Samtang nakikiistorya ka ha mga tawo, pag-andam para ha tiarabot nga pagbisita-utro. Kon nagbangon an tawo hin damu nga mga pakiana, batona an pipira hito kondi pagbilin hin usa o duha para ha sunod nga iyo paghisgot. Pagsaliksik, ngan ipaangbit ha iya an mga resulta. Kon diri na hiya magpakiana, taposa an pakiistorya pinaagi han usa nga pakiana nga ginhuhunahuna mo nga makapainteres ha iya. Magtanyag hin paghisgot hito ha sunod nga pagbisita. An damu nga mga ideya aada ha libro nga Reasoning From the Scriptures, ha brosyur nga Ano an Ginkikinahanglan ha Aton han Dios?, ngan ha bag-o nga mga gowa han An Barantayan ngan Awake!
Kon Kaupod an mga Igkasi-Tumuroo
Kon igkita mo an usa han mga Saksi ni Jehova ha siyahan nga higayon, nag-uuna ka ba ha pagpakilala? O nagpapabilin ka la nga hilom? An gugma ha aton kabugtoan sadang magpagios ha aton nga makilala hira. (Juan 13:35) Paonan-o ka magtitikang? Mahimo mo ipakilala an imo ngaran ngan magpakiana han iya ngaran. An pagpakiana ha iya kon paonan-o hiya nahibaro han kamatuoran kasagaran nga magtutugway ngadto ha makapainteres nga pag-istorya ngan mabulig ha iyo nga makilala an kada tagsa. Bisan kon an imo ginsiring baga hin diri maopay an pagkayakan, an imo pangalimbasog nagpapakita ha iba nga tawo nga gintatagad mo hiya, ngan amo ito an importante.
Ano an makakaamot ha mapulsanon nga pakiistorya ha usa nga membro han iyo kongregasyon? Ipakita an totoo nga interes ha tawo ngan ha iya pamilya. Katatapos pa la ba han katirok? Unabiha an mga ideya nga hinbaroan mo nga mapulsanon. Magigin mapulsanon ini ha iyo nga duha. Mahimo mo unabihon an usa nga punto nga makapainteres tikang ha bag-o nga gowa han An Barantayan o Awake! Diri ini sadang buhaton ha pagparayaw o pagsari han kahibaro. Buhata ito ha pagpaangbit han impormasyon nga nakalipay gud ha imo. Mahimo niyo paghisgotan an toka han usa ha iyo ha Teokratiko nga Eskwelahan ha Ministeryo ngan magbayloay hin mga ideya kon paonan-o ito pagdudumarahon. Mahimo mo liwat ipaangbit an mga eksperyensya ha pag-alagad ha kanataran.
Siyempre, an aton interes ha mga tawo agsob nga nagtutugway ngadto ha pag-istorya mahitungod han mga tawo—han mga butang nga ira ginsisiring ngan ginbubuhat. An pagpatawa mahimo liwat magin bahin han aton pakiistorya. An aton ba ginsisiring makakaparig-on? Kon kinasingkasing nga susundon naton an sagdon han Pulong han Dios ngan nagios pinaagi han gugma, sigurado nga makakaparig-on an aton pakiistorya.—Prob. 16:27, 28; Efe. 4:25, 29; 5:3, 4; Jak. 1:26.
Antes kita makigbahin ha ministeryo ha kanataran, nag-aandam kita. Kay ano nga diri mag-andam hin makapainteres nga impormasyon nga ig-iistorya ha kasangkayan? Samtang nababasa ngan nababatian mo an makapainteres nga impormasyon, tipigi ha hunahuna ito nga mga punto nga karuyag mo isumat ha iba. Maabot an panahon, magkakaada ka damu nga impormasyon nga mapipilian. An pagbuhat hini makakabulig ha imo nga mag-uswag lahos pa han pag-istorya mahitungod han adlaw-adlaw nga rutina han kinabuhi. Labaw han ngatanan, hinaot an imo mga pulong magpamatuod kon mationan-o kabirilhon an Pulong han Dios ha imo!—Sal. 139:17.
[Kahon ha pahina 63]
MGA PAAGI HA PAGTIKANG HAN PAKIISTORYA
• Sunda an lokal nga mga kustomre
• Paghatag hin sinsero nga pagdayaw
• Hisguti an punto nga ginkakauyonan
• Pagbangon hin punto-de-bista nga pakiana
[Kahon ha pahina 65]
MAPULSANON NGA MGA KALIDAD
• Malipayon nga personalidad
• Madasigon ngan sinsero
• Husto personal nga interes