“Lakat . . . Ngan Manhimo Kamo hin mga Tinon-an”

1-3. (a) Ano an ginbubuhat han parauma kon damu hinduro an aranihon ngan diri niya maaakos an pag-ani hito nga hiya la? (b) Ano an problema ni Jesus han katsaringsing han 33 K.P., ngan paonan-o niya ginsulbad ito?

DAKU hinduro an problema han usa nga parauma. Pipira ka bulan an naglabay, nag-arado hiya ngan nagsabwag hin mga liso ha iya kaumhan. Ginbantayan gud niya samtang nasaringsing an mga tanom, ngan nalipay gud hiya han nanagku na ito. Yana maopay an nagin resulta han ngatanan nga iya pangalimbasog, tungod kay panahon na han pag-ani. Ini an iya problema: Damu hinduro an aranihon salit diri niya maaakos an pag-ani hito nga hiya la. Basi masulbad ini, maaramon nga nagdesisyon hiya nga kumuha hin mga trabahador ngan pakadtoon hira ha iya kaumhan. Importante ini tungod kay limitado la an panahon ha pag-ani han iya birilhon nga aranihon.

² Ha katsaringsing han 33 K.P., sugad liwat hito an problema han nabanhaw nga hi Jesus. Durante han iya ministeryo ha tuna, nagsabwag hiya hin mga liso han kamatuoran. Yana damu na hinduro an aranihon. Damu nga makinarawaton an kinahanglan tirukon sugad nga mga disipulo. (Juan 4:35-38) Paonan-o ginsulbad ni Jesus ini nga problema? Ha usa nga bukid ha Galilea, han hirani na hiya sumaka ha langit, iya ginsugo an iya mga disipulo nga mamiling hin dugang pa nga magburuhat, nasiring: “Lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira . . . Pagtutdui hira han pagbantay han ngatanan nga mga bagay, nga akon iginsugo ha iyo.”​—Mateo 28:19, 20.

³ Pinaagi la ha pagtuman hito nga sugo matatawag an usa nga totoo nga sumurunod ni Kristo. Kon sugad, aton paghisgotan an masunod nga tulo nga pakiana. Kay ano nga nagsugo hi Jesus nga mamiling hin dugang pa nga magburuhat? Paonan-o niya ginbansay an iya mga disipulo ha pamiling ha ira? Ha ano nga paagi kita nahiuupod hini nga sugo?

Kon Kay Ano nga Ginkikinahanglan an Dugang nga Magburuhat

4, 5. Kay ano nga diri matatapos ni Jesus an buruhaton nga iya gintikangan, ngan hin-o an sadang magpadayon hito kon bumalik na hiya ha langit?

⁴ Han nagtikang hi Jesus ha iya ministeryo han 29 K.P., maaram hiya nga nagtitikang hiya hin buruhaton nga diri niya matatapos kon waray mabulig ha iya. Ha halipot nga nabibilin pa nga panahon niya dinhi ha tuna, limitado la an mga lugar nga iya makakadtoan sugad man an mga tawo nga iya masasangyawan han mensahe han Ginhadian. Oo, mga Judio ngan proselita an kadam-an han iya ginsangyawan, an “nagkawawara nga mga karnero, han balay ni Israel.” (Mateo 15:24) Kondi, ito nga “nagkawawara nga mga karnero” naukoy ha bug-os nga Israel, nga yinukot ka kilometro kwadrado an kahaluag. Gawas pa hito, ha maabot nga panahon an iba pa nga bahin han kalibotan kinahanglan madangat han maopay nga sumat.​—Mateo 13:38; 24:14.

⁵ Maaram hi Jesus nga ha kamatay niya damu pa nga trabaho an kinahanglan buhaton. Ha iya 11 nga magtinumanon nga apostol, hiya nagsiring: ‘Matuod, matuod, ako nasiring ha iyo, nga an natoo ha akon, magbubuhat man han mga buruhaton nga akon ginbubuhat; ngan darodaku nga buruhaton kay han hini an iya bubuhaton, kay ako makadto ha akon Amay.’ (Juan 14:12) Tungod kay an Anak mabalik ha langit, an iya mga sumurunod​—diri la an mga apostol kondi an ngatanan nga magigin disipulo ha tidaraon—​kinahanglan magpadayon ha pagsangyaw ngan panutdo. (Juan 17:20) Mapainubsanon nga ginkarawat ni Jesus nga an ira buruhaton magigin “darodaku” kay han iya. Paonan-o? Ha tulo nga paagi.

6, 7. (a) Ha ano nga mga paagi magigin darodaku kay han buruhaton ni Jesus an buruhaton han iya mga sumurunod? (b) Paonan-o naton maipapakita nga an pagtapod ni Jesus ha iya mga sumurunod waray makawang?

⁶ Siyahan, mas haluag nga teritoryo an kukobrehan han mga sumurunod ni Jesus. Yana an ira pagsangyaw inabot na ha mga sidsid han tuna, lahos na gud ha mga giutan han nasud nga ginsangyawan ni Jesus. Ikaduha, mas damu nga tawo an ira madadangat. An gutiay nga grupo han mga disipulo nga binayaan ni Jesus madagmit nga nagin yinukot an kadamu. (Buhat 2:41; 4:4) Yana minilyon na hira, ngan ginatos ka yukot nga bag-ohan an nababawtismohan kada tuig. Ikatulo, magsasangyaw hira hin mas hilawig nga panahon​—tubtob yana, haros 2,000 ka tuig na katapos han tulo ngan tunga ka tuig nga ministeryo ni Jesus.

⁷ Nagpahayag hi Jesus hin pagsarig ha iya mga sumurunod han hiya nagsiring nga hira magbubuhat hin ‘darodaku nga buruhaton kay han hini.’ Iya igintapod ha ira an buruhaton nga pinakaimportante ha iya, an pagsangyaw ngan pagtutdo han “maopay nga sumat han ginhadian han Dios.” (Lukas 4:43) Kombinsido hiya nga matinumanon nga bubuhaton nira ito. Ano an kahulogan hini para ha aton yana? Kon madasigon ngan bug-os-kasingkasing nga ginbubuhat naton an ministeryo, ipinapakita naton nga waray makawang an pagtapod ni Jesus ha iya mga sumurunod. Diri ba talagsahon gud ini nga pribilehiyo?​—Lukas 13:24.

Ginbansay ha Pagpamatuod

8, 9. Ano nga susbaranan an ipinakita ni Jesus ha ministeryo, ngan paonan-o naton masusubad hiya?

⁸ Naghatag hi Jesus ha iya mga disipulo han gimaopayi nga pagbansay para ha ministeryo. Labaw ha ngatanan, naghatag hiya hin hingpit nga susbaranan para ha ira. (Lukas 6:40) Ha Kapitulo 8, aton ginhisgotan an iya disposisyon ha ministeryo. Tagda hin madaliay an mga disipulo nga nagbiyahe kaupod ni Jesus ha iya mga pagsangyaw. Ira naobserbahan nga nagsangyaw hiya ha bisan diin nga may-ada tawo​—ha ligid han mga danaw ngan ha mga bakilid, ha mga syudad ngan merkado, ngan ha mga balay. (Mateo 5:1, 2; Lukas 5:1-3; 8:1; 19:5, 6) Ira nakita nga maduruto hiya, nabuhat hin temprano ha aga ngan nagsasangyaw tubtob ha hilarom na nga kagab-ihon. An ministeryo diri kay hilangkagan la ha iya! (Lukas 21:37, 38; Juan 5:17) Sigurado nga nasantop nira nga napagios hiya han hilarom nga gugma ha mga tawo. Posible nga ira nakita ha iya nawong an pagpaid nga iya inaabat. (Markos 6:34) Ha imo paghunahuna, ano an epekto han susbaranan ni Jesus ha iya mga disipulo? Kon nakadto ka hito nga panahon, ano daw la an epekto hito ha imo?

⁹ Sugad nga mga sumurunod ni Kristo, ginsusubad naton hiya ha aton ministeryo. Salit, ginbubuhat naton an ngatanan nga aton mahihimo basi makagpamatuod gud. (Buhat 10:42) Pariho kan Jesus, aton binibisita an mga tawo ha ira balay. (Buhat 5:42) Aton iginpapahiuyon an aton eskedyol, kon kinahanglanon, basi makabisita kita ha panahon nga mas posible nga aada hira ha balay. Aton liwat ginbibiling ngan mataktika nga ginsasangyawan an mga tawo ha publiko nga mga lugar​—ha mga kalsada, parke, tindahan, ngan lugar han trabaho. Padayon nga “nagbubuhat kita ngan nagtitinguha” ha ministeryo, tungod kay gintatagad naton nga importante ini. (1 Timoteo 4:10) An hilarom, kinasingkasing nga gugma ha iba nagpapagios ha aton nga padayon nga mamiling hin mga higayon ha pagsangyaw ha mga tawo ha bisan diin ngan ha bisan ano nga panahon.​—1 Tesalonika 2:8.

10-12. Ano nga importante nga mga leksyon an igintutdo ni Jesus ha iya mga disipulo antes hira sugoon ha pagsangyaw?

¹⁰ Usa pa nga paagi nga ginbansay ni Jesus an iya mga disipulo amo an paghatag ha ira hin detalyado nga instruksyon. Antes niya sugoon ha pagsangyaw an 12 nga apostol ngan sunod an 70 nga disipulo, iya ginbansay anay hira. (Mateo 10:1-15; Lukas 10:1-12) Mag-opay an resulta hito, tungod kay sumala ha Lukas 10:17: ‘An kapitoan nagkabalik nga maglipayon.’ Aton paghisgotan an duha nga importante nga leksyon nga igintutdo ni Jesus, samtang ginhuhunahuna nga an iya mga pulong sadang sabuton basado ha mga kustomre han mga Judio ha ira panahon.

¹¹ Gintutdoan ni Jesus an iya mga disipulo nga sumarig kan Jehova. Hiya nagsiring ha ira: “Diri kamo magbalon ha iyo mga bagkos hin bulawan, bisan salapi, bisan tumbaga: bisan balonan ha dalan, bisan duha nga panapton, bisan sapin, bisan sungkod; kay an magburuhat takos han iya karan-on.” (Mateo 10:9, 10) Nahiaraan hadto han mga biyahero nga magdara hin bagkos, balonan hin pagkaon, ngan reserba nga sapin o sandalyas.a Ha pagtugon ni Jesus ha iya mga disipulo nga diri mabaraka ha sugad nga mga butang, baga hin nasiring hiya: “Bug-os nga sumarig kamo kan Jehova, kay ihahatag niya an iyo panginahanglan.” Hi Jehova magtatagana ha ira pinaagi ha pagpagios ha mga nagkarawat han maopay nga sumat nga magin maabiabihon, nga kustomre hadto ha Israel.​—Lukas 22:35.

¹² Gintutdoan liwat ni Jesus an iya mga disipulo nga likyan an mga diri-kinahanglanon. Hiya nagsiring: “Diri kamo mangumusta [ha] bisan hin-o ha aragian.” (Lukas 10:4) Karuyag sidngon ba ni Jesus nga magin diri-makisangkayon o malabyaw hira? Diri. Ha ira panahon, an mga pangumusta agsob nga nag-uupod hin labaw pa ha simple nga pangumusta la. An nahiaraan nga mga pangumusta nag-uupod hin magkalain-lain nga pormalidad ngan higlaba nga iristorya. Usa nga eskolar ha Biblia an nagsiring: “An mga pangumusta han mga taga-Oriente diri sugad han aton nga nag-uupod hin gutiay nga pagduko, o hin paglamano, kondi ginbubuhat pinaagi hin damu nga paghangkopay, pagyukbo, ngan paghapa pa ngani ha tuna. Ini ngatanan nagkikinahanglan hin daku nga panahon.” Han ginsidngan ni Jesus an iya mga disipulo nga diri magbuhat han nahiaraan nga mga pangumusta, sugad hin nasiring hiya: “Gamita niyo hin maopay an iyo panahon, kay an mensahe nga iyo gindadara apurado.”b

13. Ha ano nga mga paagi maipapakita naton nga seryoso nga gintatagad naton an mga instruksyon ni Jesus ha iya mga disipulo ha siyahan nga siglo?

¹³ Seryoso nga gintatagad naton an mga instruksyon ni Jesus ha iya mga disipulo ha siyahan nga siglo. Ha pagtuman han aton ministeryo, bug-os nga nasarig kita kan Jehova. (Proberbios 3:5, 6) Maaram kita nga diri gud kita makukulangan han mga kinahanglanon ha kinabuhi kon aton padayon nga ‘pamimilngon siyahan an ginhadian.’ (Mateo 6:33) An bug-os-panahon nga mga magsarangyaw han Ginhadian ha bug-os nga kalibotan makakagpamatuod nga bisan durante han magkuri nga panahon, hi Jehova diri gud nagpapasibaya. (Salmo 37:25) Maaram liwat kita nga kinahanglan likyan an mga ulang. Kon diri kita magigin mabinantayon, masayon kita mahisimang hini nga sistema. (Lukas 21:34-36) Kondi, diri panahon yana ha pagpaulang. Tungod kay namimeligro an mga kinabuhi, apurado gud an aton mensahe. (Roma 10:13-15) An pirme pag-abat hin pagkaapurado mabulig ha aton nga diri pasagdan nga an mga ulang hini nga kalibotan makaubos han panahon ngan kusog nga mas maopay kon gamiton ha ministeryo. Hinumdumi, halipot na la an panahon nga nabibilin ngan an aranihon damu hinduro.​—Mateo 9:37, 38.

Usa nga Sugo Diin Nahiuupod Kita

14. Ano an nagpapasabot nga an sugo nga nakarekord ha Mateo 28:18-20 aplikado ha ngatanan nga sumurunod ni Kristo? (Kitaa liwat an footnote.)

¹⁴ Pinaagi han pagsiring nga “Lakat . . . ngan manhimo kamo hin mga tinon-an,” an nabanhaw nga hi Jesus naghatag hin mabug-at nga responsabilidad ha iya mga sumurunod. Nahunahuna niya diri la an mga disipulo nga presente hito nga adlaw didto ha bukid ha Galilea.c An iya sugo nag-uupod hin pagkadto ha mga tawo ha “ngatanan nga mga nasud,” ngan magpapadayon ito “tubtob ha kataposan han kalibotan.” Matin-aw nga ini nga sugo aplikado ha ngatanan nga sumurunod ni Kristo, upod na kita yana. Usisahon naton hin mas maopay an mga pulong ni Jesus ha Mateo 28:18-20.

15. Kay ano nga maaramon kita kon sugton naton an sugo ni Jesus nga manhimo hin mga disipulo?

¹⁵ Antes ihatag an sugo, hi Jesus nagsiring: “Ngatanan nga kagamhanan iginhatag ha akon ha langit ngan ha tuna.” (Bersikulo 18) Sugad gud ba hito kadaku an awtoridad ni Jesus? Oo! Hiya an arkanghel, nga nangunguna ha damu hinduro nga anghel. (1 Tesalonika 4:16; Pahayag 12:7) Sugad nga “ulo” han kongregasyon, may-ada hiya awtoridad ha iya mga sumurunod ha tuna. (Efeso 5:23) Tikang han 1914, nagmamando na hiya sugad nga Mesianiko nga Hadi ha langit. (Pahayag 11:15) May gahum pa ngani hiya ha pagbanhaw ha mga patay. (Juan 5:26-28) Pinaagi ha pagpahayag anay han iya daku nga awtoridad, iya iginpasabot nga an sunod nga iya ginsiring diri suhestyon kondi sugo. Maaramon kita kon masugot kita, tungod kay an iya awtoridad hatag han Dios, diri tikang ha iya kalugaringon.​—1 Korinto 15:27.

16. Pinaagi han pagsugo ha aton nga “lakat,” ano an iginpapabuhat ni Jesus ha aton, ngan paonan-o naton gintutuman ini nga bahin han sugo?

¹⁶ Iginsaysay yana ni Jesus an sugo, nga nagtitikang ha usa ka pulong: “Lakat.” (Bersikulo 19) Pinaagi hito hiya nagsusugo ha aton nga kinaburut-on nga isumat ha iba an mensahe han Ginhadian. Ha pagtuman hini nga bahin han sugo, magkalain-lain nga paagi an mahimo naton gamiton. An pagsangyaw ha balay-balay epektibo gud nga paagi nga personal nga makaistorya an mga tawo. (Buhat 20:20) Namimiling liwat kita hin mga higayon nga makasangyaw ha diri pormal nga paagi; naiikag kita ha pagtikang hin pakiistorya mahitungod han maopay nga sumat ha anoman nga angayan nga kahimtang ha aton adlaw-adlaw nga pagkinabuhi. An aton mga paagi ha pagsangyaw mahimo magkaiba-iba, depende ha mga ginkikinahanglan ngan kahimtang ha aton lugar. Kondi, nagpapapriho kita ha usa nga butang: ‘Nalakat’ kita ngan namimiling hin mga takos.​—Mateo 10:11.

17. Paonan-o kita ‘naghihimo hin mga tinon-an’?

¹⁷ Sunod, iginsaysay ni Jesus an katuyoan hito nga sugo, an ‘paghimo hin mga tinon-an ha ngatanan nga nasud.’ (Bersikulo 19) Paonan-o kita ‘naghihimo hin mga tinon-an,’ o disipulo? Ha literal, an disipulo usa nga nagkaada hin kahibaro, natutdoan. Kondi, an paghimo hin mga disipulo diri kay pagpaangbit la hin kahibaro ha iba. Kon nagdudumara kita hin pag-aram ha Biblia ha mga interesado, an aton tumong amo an pagbulig ha ira nga magin mga sumurunod ni Kristo. Ha kada higayon nga posible, aton ginpapabug-atan an susbaranan ni Jesus basi an aton mga estudyante mahibaro ha pagsarig ha iya sugad nga ira Magturutdo ngan Susbaranan, magsubad han iya paagi han pagkinabuhi ngan magbuhat sugad han iya ginbuhat.​—Juan 13:15.

18. Kay ano nga an bawtismo amo an pinakaimportante nga hitabo ha kinabuhi han usa nga disipulo?

¹⁸ An usa nga importante nga bahin han sugo iginpapahayag ha mga pulong: “Pamaptisan hira ha ngaran han Amay, han Anak, ngan han espiritu santo.” (Bersikulo 19) An bawtismo amo an pinakaimportante nga hitabo ha kinabuhi han usa nga disipulo, tungod kay ito an angayan nga simbolo han iya bug-os-kasingkasing nga dedikasyon ha Dios. Salit, importante ito para ha kaluwasan. (1 Pedro 3:21) Oo, pinaagi han pagpadayon ha pagbuhat han gimaopayi ha pag-alagad kan Jehova, an bawtismado nga disipulo makakasarig han waray tubtoban nga mga bendisyon ha maabot nga bag-o nga kalibotan. May nabuligan ka na ba nga magin bawtismado nga disipulo ni Kristo? Ha Kristiano nga ministeryo, ini na an gidadakui nga hinungdan nga magmalipayon.​—3 Juan 4.

19. Ano an aton igintututdo ha mga bag-ohan, ngan kay ano nga an pagtutdo mahimo ipadayon katapos han ira bawtismo?

¹⁹ Iginsaysay ni Jesus an sunod nga bahin han sugo, nasiring: “Pagtutdui hira han pagbantay han ngatanan nga mga bagay, nga akon iginsugo ha iyo.” (Bersikulo 20) Aton gintututdoan an mga bag-ohan nga sumugot ha mga sugo ni Jesus, upod na an sugo nga higugmaon an Dios ngan an igkasi-tawo, ngan maghimo hin mga disipulo. (Mateo 22:37-39) Progresibo nga gintututdoan naton hira ha pagsaysay han mga kamatuoran ha Biblia ngan pagdepensa han ira nag-uuswag nga pagtoo. Kon kwalipikado na hira ha pagsangyaw ha publiko, gin-uupdan naton hira, gintututdoan hira pinaagi han pulong ngan susbaranan kon paonan-o epektibo nga bubuhaton ito. Diri karuyag sidngon nga an pagtutdo ha bag-o nga mga disipulo tapos na antes hira bawtismohan. An bag-o nga mga nabawtismohan mahimo magkinahanglan hin dugang nga instruksyon basi mabuligan hira nga maatubang an mga ayat nga nahiuupod ha pagsunod kan Kristo.​—Lukas 9:23, 24.

“Ako Upod ha Iyo ha Ngatanan nga mga Adlaw”

20, 21. (a) Ha pagtuman han sugo ni Jesus, kay ano nga waray kita hinungdan nga mahadlok? (b) Kay ano nga diri yana panahon nga maghinay-hinay, ngan ano an sadang magin determinasyon naton?

²⁰ An pangataposan nga mga pulong ha sugo ni Jesus nagpapasarig gud: “Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:20) Maaram hi Jesus nga mabug-at ini nga toka. Maaram liwat hiya nga an pagtuman hito usahay mag-aaghat hin kasina han mga parakontra. (Lukas 21:12) Kondi, waray hinungdan nga mahadlok kita. An aton Lider diri nagsusugo ha aton nga buhaton ini nga toka nga waray nabulig ha aton o nag-uusahan la kita. Diri ba nakakaliaw gud nga an Usa nga may-ada han “ngatanan nga kagamhanan . . . ha langit ngan ha tuna” kaupod naton basi suportahan kita ha pagtuman hini nga sugo?

²¹ Ginpasarig ni Jesus an iya mga disipulo nga hiya makakaupod nira ha ira ministeryo ha ngatanan nga panahon tubtob ha “kataposan han kalibotan.” Tubtob ha pag-abot han kataposan, kinahanglan magpadayon kita ha pagtuman han sugo ni Jesus. Diri yana panahon nga maghinay-hinay. Nagpapadayon an abunda nga espirituwal nga pag-ani! Gintitirok an damu hinduro nga makinarawaton nga mga tawo. Sugad nga mga sumurunod ni Kristo, magin determinado kita ha pagtuman han importante nga buruhaton nga igintapod ha aton. Magin determinado kita ha paggamit han aton panahon, kusog, ngan mga katigayonan ha pagtuman han sugo ni Kristo: “Lakat . . . ngan manhimo kamo hin mga tinon-an.”