Mga Paramangno nga Nag-aataman ha Panon

DURANTE han ministeryo ni Jesus ha tuna, ginpamatud-an niya nga hiya “an maopay nga paraataman.” (Juan 10:11) Han nakita niya an damu nga tawo nga nagsisinunod ha iya, “nalooy hiya ha ira, kay ginpanitan hira ngan ginpabay-an sugad hin mga karnero nga waray paraataman.” (Mat. 9:36) Naobserbaran ni Pedro ngan han iba pa nga apostol an iya mahigugmaon nga pagtagad. Iba gud hi Jesus ha buwa nga mga paraataman han Israel nga nagpasibaya ha panon salit an mga karnero nagpatlaag ngan nagutom ha espirituwal! (Ezek. 34:7, 8) An maopay nga susbaranan han pagtutdo ngan pag-ataman ni Jesus ha mga karnero, bisan tubtob ha paghalad han iya kinabuhi para ha ira, nagtutdo ha mga apostol kon paonan-o bubuligan adton may pagtoo nga makabalik kan Jehova, an “paraataman ngan paramangno han [ira] kalag.”​—1 Ped. 2:25.

² Ha usa nga higayon, han nakiistorya hi Jesus kan Pedro, iya ginpabug-atan an pagkaimportante han pagpakaon ngan pag-ataman ha mga karnero. (Juan 21:15-17) Sigurado nga napagios gud hini hi Pedro salit ha urhi nagsagdon hiya ha mga tigurang ha siyahan-siglo nga Kristiano nga kongregasyon: “Atamana an panon han Dios nga iyo ginmamangnoan, nagsiserbi sugad nga mga paramangno nga diri napipiritan, lugod kinaburut-on nga ginbubuhat ito ha atubangan han Dios; diri tungod ha kahakog nga makabentaha ha diri tangkod nga paagi, lugod tungod han hingyap nga magserbi; diri nagmamayor-mayor ha panurundon han Dios, lugod magin mga susbaranan ha panon.” (1 Ped. 5:1-3) An mga pulong ni Pedro naaplikar liwat ha mga paramangno ha kongregasyon yana. Sugad nga pagsubad kan Jesus, an mga tigurang kinaburut-on ngan madasigon nga nagsiserbi sugad nga mga susbaranan ha panon, ngan nangunguna ha pag-alagad kan Jehova.​—Heb. 13:7.

³ Mapasalamaton gud kita ha mga paramangno ha kongregasyon nga ginpili pinaagi han espiritu. Damu nga kapulsanan an nakakarawat naton tungod han ira pagmangno. Pananglitan, an mga paramangno naghahatag hin pagdasig ngan personal nga atensyon ha ngatanan ha kongregasyon. Kada semana, maduruto nga gindudumara nira an mga katirok han kongregasyon, diin napaparig-on an ngatanan nga aada ha pagtoo. (Roma 12:8) An ira mga pangalimbasog ha pagpanalipod ha panon kontra ha bisan ano nga nakakadaot hito, sugad han magraot nga mga tawo, naghahatag ha aton hin seguridad. (Isa. 32:2; Tito 1:9-11) An ira pagpanguna ha ministeryo nagdadasig ha aton nga padayon nga magin aktibo ngan regular ha pagsangyaw han maopay nga sumat kada bulan. (Heb. 13:15-17) Pinaagi hini nga “mga regalo nga mga lalaki,” ginpaparig-on ni Jehova an kongregasyon.​—Efe. 4:8, 11, 12.

MGA KWALIPIKASYON PARA HA MGA PARAMANGNO

⁴ Basi masiguro nga husto nga naaataman an kongregasyon, an kalalakin-an nga ginpipili sugad nga mga paramangno kinahanglan makaabot ha mga kwalipikasyon nga iginsasaysay ha Pulong han Dios. Masisiring la nga ginpili hira pinaagi han baraan nga espiritu kon kwalipikado hira. (Buh. 20:28) Oo, hitaas an Kasuratanhon nga mga suruklan para ha Kristiano nga mga paramangno tungod kay an pagin paramangno usa nga seryoso nga responsabilidad. Kondi an mga suruklan diri hitaas hinduro nga diri maaabot han Kristiano nga kalalakin-an nga nahigugma gud kan Jehova ngan disidido nga magpagamit ha iya. Sadang makita han ngatanan nga an mga paramangno mga indibiduwal nga nag-aaplikar han sagdon han Biblia ha adlaw-adlaw nga pagkinabuhi.

⁵ Iginrekord ni apostol Pablo an nangunguna nga Kasuratanhon nga mga kwalipikasyon para ha mga paramangno ha iya siyahan nga surat kan Timoteo ngan ha iya surat kan Tito. Ha 1 Timoteo 3:1-7, aton mababasa: “Kon an usa nga lalaki nagtatalinguha pagkab-ot nga magin usa nga paramangno, maopay nga buhat an iya ginhihingyap. Salit, an paramangno kinahanglan waray ikasaway, bana hin usa nga babaye, kontrolado an pamatasan, maopay an panhunahuna, organisado, maabiabihon, kwalipikado ha pagtutdo, diri parahubog, diri bayolente, lugod makatadunganon, diri makiawayon, diri mahigugmaon ha kwarta, lalaki nga nangunguna hin maopay ha iya kalugaringon nga panimalay, an iya mga anak seryoso gud nga nagpapasakop (kay kon an bisan hin-o nga lalaki diri maaram manguna ha iya kalugaringon nga panimalay, paonan-o niya mamangnoan an kongregasyon han Dios?), diri bag-o la nga nakombirte, kay bangin magpahitaas hiya ngan kumarawat hin paghukom nga pariho han nakarawat han Yawa. Dugang pa, kinahanglan liwat nga maopay an iya bantog ha mga taga-gawas, basi diri hiya mawad-an hin dungog ngan mabitik han Yawa.”

⁶ Hi Pablo nagsurat kan Tito: “Ginbilin ko ikaw ha Creta basi tadungon mo an mga butang nga may depekto ngan magpili hin mga tigurang ha tagsa nga syudad, sugad han akon instruksyon ha imo: kon may bisan hin-o nga lalaki nga waray igin-aakusar ha iya, bana hin usa la nga babaye, an mga anak tumuroo ngan diri gin-aakusaran nga nagkikinabuhi hin maraot o rebelyoso. Kay sugad nga tinaporan han Dios, an usa nga paramangno kinahanglan waray igin-aakusar ha iya, diri nag-iinsister han iya karuyag, diri madagmit masina, diri parahubog, diri bayolente, diri hakog nga namimiling hin mga paagi basi makabentaha, lugod maabiabihon, mahigugmaon ha kaopayan, maopay an panhunahuna, matadong, maunungon, may pagpugong ha kalugaringon, nakapot hin marig-on ha masasarigan nga pulong may kalabotan ha iya arte ha pagtutdo, basi may kapas hiya ha pag-aghat pinaagi han maopay nga katutdoan ngan ha pagsaway ha mga nakontra.”​—Tito 1:5-9.

⁷ Bisan kon ha tinikangan an Kasuratanhon nga mga kwalipikasyon para ha mga paramangno baga hin makuri gud maabot, an Kristiano nga kalalakin-an diri sadang mag-alang ha pagkab-ot hito. Kon ira iginpapakita an mag-opay nga Kristiano nga kalidad nga ginkikinahanglan ha mga paramangno, nadadasig nira an iba nga kabugtoan nga magsubad. Nagsurat hi apostol Pablo nga ito nga “mga regalo nga mga lalaki” igintatagana “basi tadungon utro an mga baraan, para ha buruhaton ha ministeryo, basi maparig-on an lawas han Kristo, tubtob nga makab-ot naton ngatanan an pagin usa ha pagtoo ngan ha husto nga kahibaro mahitungod han Anak han Dios, basi magin adulto nga tawo, nga nakakaabot ha sukol han kahamtong han Kristo.”​—Efe. 4:8, 12, 13.

⁸ An mga paramangno diri mga batan-on o bag-o la nga nakombirte nga kalalakin-an. Lugod, mga eksperyensyado hira ha Kristiano nga pagkinabuhi, nga may daku nga kahibaro ha Biblia, hilarom nga pagsabot ha Kasuratan, ngan sinsero nga gugma ha kongregasyon. May kaisog hira ha pagyakan ngan ha pagtadong ha mga nakakabuhat hin sayop basi mapanalipdan an mga karnero kontra ha bisan hin-o nga may kahakog nga magdadaot ha ira. (Isa. 32:2) An mga paramangno kilala gud han ngatanan ha kongregasyon sugad nga hamtong ha espirituwal ngan sinsero nga nagtatagad ha panon han Dios.

⁹ Adton kwalipikado nga magin paramangno nagpapakita hin praktikal nga kinaadman ha ira pagkinabuhi. Kon inasaw-an, ginsusunod han usa nga paramangno an Kristiano nga suruklan ha pag-asawa, karuyag sidngon, bana hiya hin usa la nga babaye ngan nangunguna hin maopay ha iya kalugaringon nga panimalay. Kon an paramangno may mga anak nga tumuroo nga seryoso gud nga nagpapasakop ngan diri gin-aakusaran nga nagkikinabuhi hin maraot o rebelyoso, an kongregasyon may pagsarig nga makakadaop ha iya para ha sagdon mahitungod ha pamilya ngan ha Kristiano nga pagkinabuhi. Dugang pa, an paramangno waray ikasaway, waray igin-aakusar ha iya, ngan maopay an iya bantog bisan ha mga taga-gawas. Waray maiaakusar nga sayop nga panggawi kontra ha iya nga makakadaot ha reputasyon han kongregasyon. Diri hiya bag-o la nga ginsaway tungod hin seryoso nga sayop. An iba ha kongregasyon napapagios nga subaron an iya maopay nga susbaranan ngan nalilipay nga itapod ha iya pagmangno an ira espirituwal nga kaopayan.​—1 Cor. 11:1; 16:15, 16.

¹⁰ Inin kwalipikado nga kalalakin-an nakakagmangno ha Kristiano nga kongregasyon pariho han ginbuhat han mga tigurang ha Israel nga iginhulagway sugad nga “maaramon, masinabuton, ngan eksperyensyado.” (Deut. 1:13) Diri nangangahulogan nga an mga tigurang diri nakakabuhat hin sala, pero kilala hira ha kongregasyon ngan ha komunidad nga matadong ngan may kahadlok ha Dios nga ha sulod hin hilawig nga panahon napamatud-an nga nagkikinabuhi uyon ha mga prinsipyo han Dios. An ira pagin waray ikasaway naghahatag ha ira hin kagawasan ha pagyakan ha atubangan han kongregasyon.​—Roma 3:23.

¹¹ An kalalakin-an nga kwalipikado nga magin paramangno nagpapakita hin pagin kontrolado ha ira pamatasan ngan ha ira pagtratar ha iba. Diri hira panatiko. Lugod, nakikita ha ira pagkinabuhi an pagin timbang ngan pagpugong ha kalugaringon. Iginpapakita nira an pagin kontrolado ha mga butang sugad han pagkaon, pag-inom, pagpahalibway, hilangkagan, ngan kaliawan. Kontrolado an ira pag-inom hin de-alkohol nga irimnon basi diri hira maakusaran hin paghubog o pagin parahubog. An usa nga diri na nakakahunahuna hin maopay tungod han nakakahubog nga irimnon masayon mawad-an hin pagpugong ha kalugaringon ngan diri makakahimo pagmangno ha espirituwal nga kaopayan han kongregasyon.

¹² Basi mamangnoan an kongregasyon, an usa kinahanglan organisado. An iya maopay nga pamatasan nakikita ha iya hitsura, ha iya panimalay, ngan ha iya adlaw-adlaw nga mga buruhaton. Diri hiya naglalangan ha pagbuhat han mga buruhaton; nasasabtan niya kon ano an kinahanglanon ngan nagpaplano uyon hito. Ginsusunod niya an mga prinsipyo han Dios.

¹³ An paramangno kinahanglan makatadunganon. Kinahanglan nagbubuhat hiya kahiusa han lawas han mga tigurang ngan nakikigkooperar ha ira. Kinahanglan may-ada hiya husto nga pagtagad ha iya kalugaringon ngan diri sobra nga nag-oobligar ha iba. Sugad nga makatadunganon nga tawo, diri niya iginpipirit an iya personal nga opinyon, diri hiya naghuhunahuna nga an iya mga ideya mas maopay kay han mga ideya han iya mga igkasi-tigurang. An iba bangin may-ada maopay nga mga kalidad o abilidad nga bangin waray ha iya. Iginpapakita han tigurang an iya pagin makatadunganon kon an iya mga konklusyon iya iginbabasar ha Kasuratan ngan nangangalimbasog ha pagsubad kan Jesu-Kristo. (Fil. 2:2-8) An usa nga tigurang diri makiawayon o bayolente, lugod nagpapakita hiya hin husto nga pagtahod ha iba, ngan iya ginhuhunahuna nga an iba labaw ha iya. Diri niya igin-iinsister an iya karuyag, diri iginpipirit nga karawaton an iya paagi o punto de bista. Diri hiya madagmit masina, lugod mamurayawon nga gintatratar niya an iba.

¹⁴ Usa pa nga kwalipikasyon ha pagin paramangno ha kongregasyon amo an maopay nga panhunahuna. Karuyag sidngon, kalmado hiya ngan diri dayon naghuhukom. Husto an iya pagsabot ha mga prinsipyo ni Jehova ngan ha aplikasyon hito. An usa nga maopay an panhunahuna makinarawaton ha sagdon ngan giya. Diri hiya hipokrito.

¹⁵ Ginpahinumdoman ni Pablo hi Tito nga an paramangno mahigugmaon ha kaopayan. Sadang hiya magin matadong ngan maunungon. Ini nga mga kalidad nakikita ha iya pagtratar ha iba ngan ha iya pagin marig-on ha kon ano an husto ngan maopay. Marig-on an iya debosyon kan Jehova ngan nasunod pirme ha matadong nga mga prinsipyo. Matataporan hiya ha pagtipig hin kompidensyal nga mga butang. Tinuod liwat hiya nga maabiabihon, andam magsakripisyo ngan ihatag an iya mga panag-iya para ha kaopayan han iba.​—Buh. 20:33-35.

¹⁶ Basi epektibo nga makag-alagad an usa nga paramangno, kinahanglan kwalipikado hiya ha pagtutdo. Sumala ha ginsiring ni Pablo kan Tito, an paramangno “nakapot hin marig-on ha masasarigan nga pulong may kalabotan ha iya arte ha pagtutdo, basi may kapas hiya ha pag-aghat pinaagi han maopay nga katutdoan ngan ha pagsaway ha mga nakontra.” (Tito 1:9) Nakakapangatadongan hiya, nakakagpakita hin ebidensya, nakakaglampos ha mga pagriwa, ngan nakakagsaysay han Kasuratan ha paagi nga nakakakombinse ngan nakakaparig-on ha pagtoo han iba. Ginagamit han paramangno an sugad nga abilidad ha pagtutdo durante han maopay ngan han makuri nga mga panahon. (2 Tim. 4:2) May-ada hiya pagkapasensyoso nga ginkikinahanglan ha pagsaway nga may pagkamalumo ha usa nga nakasayop o ha pagkombinse ha usa nga maruhaduhaon ngan ha pagpagios ha iya nga magbuhat hin mag-opay nga buhat uyon ha pagtoo. An pagin kwalipikado ha pagtutdo ha atubangan man han damu nga mamarati o ha usa ka tawo nagpapamatuod nga naaabot han paramangno inin importante nga kwalipikasyon.

¹⁷ Importante nga an mga tigurang madasigon ha ministeryo. Sadang makita nga nangangalimbasog liwat hira ha pagsubad kan Jesus hini nga paagi, nga prayoridad ha iya kinabuhi an pagsangyaw han maopay nga sumat. Interesado hi Jesus ha iya mga disipulo ngan ginbuligan hira nga magin epektibo nga mga ebanghelisador. (Mar. 1:38; Luc. 8:1) An determinasyon han mga tigurang nga maggahin hin panahon ha ministeryo bisan pa han ira pagin okupado nag-aaghat ha bug-os nga kongregasyon nga magin madasigon liwat. Ngan kon an mga tigurang nagsasangyaw kaupod han ira pamilya ngan han iba pa ha kongregasyon, nagriresulta ito hin ‘pagdinasigay.’​—Roma 1:11, 12.

¹⁸ Kon huhunahunaon ini ngatanan, baga hin daku hinduro an ginlalaoman ha usa nga paramangno. Sigurado nga waray paramangno nga makakatuman hin hingpit ha hitaas nga suruklan han Biblia, kondi waray tigurang nga sadang magkaada daku nga kakulangan ha bisan usa la hini nga mga kalidad diin ito nga kakulangan tatagdon na nga seryoso nga kaluyahan. An iba nga tigurang bangin may pipira nga mag-opay gud nga kalidad, samtang an iba bangin mas maopay ha iba nga butang. Tungod hito, an lawas han mga tigurang ha kabug-osan nagkakaada han ngatanan nga mag-opay nga kalidad nga ginkikinahanglan para ha husto nga pagmangno ha kongregasyon han Dios.

¹⁹ Sugad nga usa nga lawas, kon an mga tigurang nagrirekomendar hin kalalakin-an nga magigin mga paramangno, sadang nira hinumdoman an ginsiring ni apostol Pablo: “Ginsusumatan ko an kada tagsa dida ha iyo nga diri maghunahuna mahitungod ha iya kalugaringon hin labaw kay ha angay niya hunahunaon, lugod ipakita niyo nga may-ada kamo maopay nga panhunahuna uyon ha pagtoo nga iginhatag han Dios ha kada tagsa ha iyo.” (Roma 12:3) Sadang hunahunaon han tagsa nga tigurang nga mas ubos hiya kay ha iba. Waray usa nga sadang magin “sobra kamatadong” kon gin-uusisa an mga kwalipikasyon han iba. (Ecles. 7:16) Tungod kay nasasabtan gud an Kasuratanhon nga mga kwalipikasyon para ha mga paramangno, ginsisiguro han lawas han mga tigurang kon naaabot han bugto nga iginrirekomendar ito nga mga suruklan ha makatadunganon nga paagi. Pinaagi han pagtagad ha pagkadiri-hingpit han tawo, kawaray-dinadapigan, ngan pagin diri hipokrito, makakagrekomendar an mga tigurang ha paagi nga nagpapakita hin daku nga pagtahod ha matadong nga mga suruklan ni Jehova ngan para ha kaopayan han kongregasyon. Mainampoon nga ikukonsiderar nira an tagsa nga rekomendasyon ngan susundon an giya han baraan nga espiritu han Dios. Usa ini han ira seryoso nga mga responsabilidad, ngan kinahanglan buhaton nira ini uyon ha sagdon ni Pablo: “Ayaw gud pagdali-dali pagtungbaw han imo mga kamot ha bisan hin-o nga lalaki.”​—1 Tim. 5:21, 22.

BUNGA HAN ESPIRITU

²⁰ Sadang makita ha kwalipikado ha espirituwal nga kalalakin-an nga ginigiyahan hira han baraan nga espiritu, ngan iginpapakita nira an bunga hito ha ira kinabuhi. Iginsurat ni Pablo an siyam nga bahin han bunga han espiritu nga amo an “gugma, kalipay, kamurayawan, pagin pasensyoso, pagkabuotan, pagkamaopay, pagtoo, pagkamalumo, pagpugong ha kalugaringon.” (Gal. 5:22, 23) An sugad nga mga paramangno nakakarepresko ha kabugtoan ngan nakakabulig ha pagkaurosa han kongregasyon ha sagrado nga pag-alagad. An ira panggawi ngan an mag-opay nga resulta han ira mga pangalimbasog nagpapakita nga ginpili hira pinaagi han baraan nga espiritu.​—Buh. 20:28.

KALALAKIN-AN NGA NAG-AAGHAT HAN PAGKAUROSA

²¹ Importante nga an mga tigurang magbinuligay ha pag-aghat han pagkaurosa ha kongregasyon. Bangin iba-iba gud an ira personalidad, kondi gintitipigan nira an pagkaurosa pinaagi han matinalahuron nga pagpamati ha usa kag usa bisan kon bangin diri hira nagkakauruyon ha pipira nga ira ginhihisgotan. Tubtob nga waray prinsipyo ha Biblia nga natatalapas, an kada usa sadang magin andam sumunod ngan sumuporta ha desisyon nga ginkaurosahan han lawas han mga tigurang. An pagin andam sumunod nagpapakita nga an usa ginigiyahan han “kinaadman nga tikang ha kahitas-an,” nga “mamurayawon, makatadunganon.” (San. 3:17, 18) Diri sadang maghunahuna an usa nga tigurang nga mas labaw hiya ha iba, ngan diri hiya sadang magdominar ha iba. Ha pagkamatuod, an mga tigurang nakooperar kan Jehova kon nakooperar hira sugad nga usa nga lawas para ha kaopayan han kongregasyon.​—1 Cor., kap. 12; Col. 2:19.

PANALINGUHA NGA MAGIN PARAMANGNO

²² Sadang hingyapon han hamtong nga Kristiano nga kalalakin-an nga magin paramangno. (1 Tim. 3:1) Kondi an pag-alagad sugad nga tigurang nagkikinahanglan hin pangalimbasog ngan pagsakripisyo. Nangangahulogan ito hin pagin andam ha pagserbi ha mga panginahanglan han kabugtoan ngan pag-ataman han ira espirituwal nga kaopayan. An panalinguha nga magin paramangno nangangahulogan hin pangalimbasog nga maabot an mga kwalipikasyon nga iginsasaysay ha Kasuratan.

MAHIMO MAGBAG-O AN PERSONAL NGA MGA KAHIMTANG

²³ An usa nga bugto nga maiha na nga matinumanon nga nag-aalagad mahimo magkasakit o magluya ha pisikal. Bangin tungod han kalagas, diri na hiya nakakatuman han mga responsabilidad han usa nga paramangno. Bisan pa hito, sadang pa gihapon hiya tahuron ngan kilalahon sugad nga tigurang tubtob nga pinili pa hiya. Diri kinahanglan nga umundang hiya ha pagin tigurang tungod han iya mga limitasyon. Takos pa gihapon hiya han doble nga kadungganan nga iginhahatag ha ngatanan nga maduruto nga tigurang nga nagbubuhat han ira gimaopayi ha pag-ataman ha panon.

²⁴ Kondi kon ha pag-abat han usa nga bugto mas maopay nga umundang na hiya ha iya pribilehiyo tungod han iya nabag-o nga kahimtang nga naglilimita han iya kapasidad ha pagserbi, mahimo niya buhaton ito. (1 Ped. 5:2) Sadang pa gihapon hiya tahuron. Daku an iya maibubulig ha kongregasyon, bisan kon waray na hiya mga toka ngan mga obligasyon sugad nga tigurang.

MGA RESPONSABILIDAD HA KONGREGASYON

²⁵ An mga tigurang may iba-iba nga responsabilidad ha kongregasyon. May-ada koordinetor han lawas han mga tigurang, sekretaryo, paramangno han pag-alagad, nagdudumara han Pag-aram ha Barantayan, ngan paramangno han Katirok ha Pagkinabuhi Ngan Ministeryo. Damu nga tigurang an nag-aalagad sugad nga mga paramangno han grupo. Waray itinanda nga kahilawig hin panahon kon tubtob san-o an pagserbi han usa nga tigurang ha iya responsabilidad. Syempre, kon an usa nga tigurang bumalhin hin kongregasyon, diri na nakakatuman han iya responsabilidad tungod han problema ha kahimsog, o diri na kwalipikado tungod kay diri na niya naaabot an Kasuratanhon nga mga kwalipikasyon, magpipili hin lain nga tigurang basi magtuman han iya toka. Ha mga kongregasyon nga kulang hin mga paramangno, bangin pagkinahanglanon nga an usa nga tigurang magkaada hin sobra usa nga toka tubtob nga magin kwalipikado na an iba nga kabugtoan nga kalalakin-an nga magin tigurang.

²⁶ An koordinetor han lawas han mga tigurang amo an tsirman ha mga miting han lawas han mga tigurang. Mapainubsanon hiya nga nagbubuhat kaupod han iba pa nga tigurang ha pag-ataman ha panon han Dios. (Roma 12:10; 1 Ped. 5:2, 3) Sadang hiya magin maopay nga organisador ngan nakakapanguna hin maduruto.​—Roma 12:8.

²⁷ An sekretaryo an nagtitipig han mga rekord han kongregasyon ngan ginsisiguro niya nga mahibaro an mga tigurang han importante nga mga surat. Kon kinahanglanon, mahimo itoka an lain nga tigurang o may kapas nga ministeryal nga surugoon nga bumulig ha iya.

²⁸ An mga kahikayan para ha pagministeryo ngan iba pa nga buruhaton may kalabotan hito gindudumara han paramangno han pag-alagad. Nag-ieskedyol hiya hin regular nga pagbisita ha ngatanan nga grupo han pagsangyaw basi ha usa nga kataposan han semana kada bulan, may mabisita hiya nga grupo. Ha mas gutiay nga mga kongregasyon diin pipira la an grupo han pagsangyaw, mahimo niya bisitahon an tagsa nga grupo hin makaduha ha usa ka tuig. Durante hini nga pagbisita, hiya an magdudumara han katirok para ha pagsangyaw, uupdan niya an grupo ha pagministeryo, ngan bubuligan niya an mga magwarali ha ira pagbalik-bisita ngan pagdumara hin pag-aram ha Biblia.

MGA PARAMANGNO HAN GRUPO

²⁹ Usa han gimaopayi nga mga pribilehiyo ha kongregasyon amo an pag-alagad sugad nga paramangno han grupo. An iya responsabilidad nag-uupod han (1) pagpanginano han espirituwalidad han tagsa nga indibiduwal ha grupo han pagsangyaw; (2) pagbulig ha kada tagsa dida ha grupo nga magin regular, epektibo, ngan malipayon ha pakigbahin ha ministeryo; ngan (3) pagbulig ngan pagbansay ha mga ministeryal nga surugoon ha grupo nga manalinguha pagkab-ot ngan magin kwalipikado ha mga responsabilidad ha kongregasyon. An lawas han mga tigurang an magdidesisyon kon hin-o an kwalipikado gud para hini nga toka.

³⁰ Tungod han mga buruhaton nga nahiuupod hini nga toka, an mga paramangno han grupo kinahanglan mga tigurang, kon posible. O usa nga may kapas nga ministeryal nga surugoon an mahimo tokahan tubtob nga may tigurang na nga mahimo sumaliwan. An ministeryal nga surugoon nga ginagamit hini nga buruhaton gintatawag nga surugoon han grupo, tungod kay diri hiya nag-aalagad sugad nga paramangno ha kongregasyon. Lugod, ginbubuhat niya an iya responsabilidad ilarom ha paggiya han mga tigurang.

³¹ Usa nga importante nga bahin han buruhaton han paramangno han grupo amo an pagpanguna ha ministeryo. An iya pagin regular, aktibo, ngan madasigon ha buruhaton makakaaghat ha kabugtoan dida ha iya grupo. Tungod kay gin-aapresyar han mga magwarali an pagdasig ngan bulig nga napapahimulosan ha pakig-upod ha kabugtoan, maopay nga an grupo magkaada eskedyol ha pagsangyaw diin kombinyente an kadam-an. (Luc. 10:1-16) Sadang siguruhon han paramangno nga may igo pirme nga teritoryo. Kasagaran nga hiya an magdudumara han katirok para ha pagsangyaw ngan mag-oorganisar ha mga magwarali para ha buruhaton hito nga adlaw. Kon diri hiya makakasangyaw, sadang hiya maghikay nga pangunahan ito hin lain nga tigurang, ministeryal nga surugoon, o kon waray, usa nga kwalipikado nga magwarali basi an kabugtoan magkaada han giya nga ginkikinahanglan.

³² An paramangno han grupo sadang magplano hin abanse para ha pagbisita han paramangno han pag-alagad. Susumatan niya an iya grupo mahitungod han pagbisita ngan dadasigon nga pamulaton an mga kapulsanan hito. Kon maaram an ngatanan ha grupo mahitungod han kahikayan, madasigon nga masusuportaran nira ito.

³³ An tagsa nga grupo han pagsangyaw gintuyo nga gutiay la. Mabulig ini ha paramangno han grupo nga makilala hin maopay an ngatanan. Sugad nga mahigugmaon nga paraataman, interesado gud hiya ha kada tagsa. Nangangalimbasog hiya pagbulig ngan pagdasig para ha pakigbahin ha ministeryo ngan ha pagsuporta ha mga katirok han kongregasyon. Nangangalimbasog liwat hiya nga buhaton an bisan ano nga ginkikinahanglan basi mabuligan an kada tagsa nga magpabilin nga marig-on ha espirituwal. Nabisita liwat hiya hadton may sakit o nadidepres. An makapadasig nga suhestyon o sagdon bangin magpagios ha pipira nga manalinguha pagkab-ot hin dugang nga mga pribilehiyo ha kongregasyon salit mas makakabulig hira ha kabugtoan. An paramangno han grupo labi nga nakapokus ha pagbulig ha iya mga kagrupo. Kondi sugad nga tigurang ngan paraataman, may gugma ngan pagtagad hiya ha ngatanan ha kongregasyon ngan andam bumulig ha bisan hin-o nga nanginginahanglan.​—Buh. 20:17, 28.

³⁴ Usa pa nga responsabilidad han paramangno han grupo amo an pagbulig ha pagtirok han mga report ha pag-alagad han iya mga kagrupo. Ini nga mga report ihahatag ha sekretaryo. An tagsa nga magwarali makakabulig ha paramangno han grupo kon iya ihahatag dayon an iya report. Mahimo niya ito idirekta paghatag ha paramangno han grupo ha kada kataposan han bulan o ihulog ha kahon para ha mga report ha pag-alagad ha Kingdom Hall.

KOMITE HA PAG-ALAGAD HAN KONGREGASYON

³⁵ May espisipiko nga mga obligasyon nga gindudumara an Komite ha Pag-alagad han Kongregasyon, nga ginkukompwesto han koordinetor han lawas han mga tigurang, han sekretaryo, ngan han paramangno han pag-alagad. Pananglitan, an komite ha pag-alagad an nag-aaprobar ha paggamit han Kingdom Hall para ha mga kasal ngan mga kahikayan ha lubong, ngan responsabilidad nira kon diin nga mga grupo han pagsangyaw itutoka an mga magwarali. Hira liwat an nag-aaprobar han aplikasyon ha pagregular ngan pag-auxiliary payunir ngan iba pa nga pribilehiyo han pag-alagad. An komite ha pag-alagad nagbubuhat ilarom han giya han lawas han mga tigurang.

³⁶ An espisipiko nga mga obligasyon hini nga kabugtoan​—upod na an obligasyon han nagdudumara han Pag-aram ha Barantayan, han paramangno han Katirok ha Pagkinabuhi Ngan Ministeryo, ngan han iba pa nga nagkukompwesto han lawas han mga tigurang—​iginsasaysay han sanga nga opisina.

³⁷ Ha panapanahon, an lawas han mga tigurang han kada kongregasyon nagmimiting basi paghisgotan an may kalabotan ha espirituwal nga pag-uswag han kongregasyon. Labot la ha miting nga ginhihimo durante han pagbisita han paramangno han sirkito, usa nga miting han mga tigurang an ginhihimo mga tulo ka bulan kada katatapos han pagbisita han paramangno han sirkito. Syempre, mahimo magmiting an mga tigurang bisan san-o kon ginkikinahanglan.

MAGIN MAPINASAKUPON

³⁸ An mga paramangno diri hingpit. Bisan pa hito, gin-aaghat an ngatanan ha kongregasyon nga magin mapinasakupon ha ira tungod kay kahikayan ito ni Jehova. An mga paramangno may baratunon ha iya tungod han ira mga buhat. Nagrirepresentar hira ha iya ngan ha iya teokratiko nga pagmando. An Hebreo 13:17 nasiring: “Magin masinugtanon ha mga nangunguna ha iyo ngan magin mapinasakupon, kay padayon nga nagbabantay hira ha iyo sugad nga hira an magkakaada baratunon, basi buhaton nira ini nga may kalipay ngan diri nanhahayhay, kay makakadaot ini ha iyo.” Sugad la nga ginagamit ni Jehova an iya baraan nga espiritu ha pagpili ha usa nga lalaki, ito liwat an ginagamit ni Jehova ha pagtangtang ha usa tikang ha pagin paramangno kon diri na niya naipapakita an bunga han espiritu ngan kon an iya pagkinabuhi diri na nakakaabot ha Kasuratanhon nga mga kwalipikasyon.

³⁹ Mapasalamaton gud kita han pagkamaduruto ngan han maopay nga susbaranan nga iginpapakita han mga paramangno han kongregasyon! Han nagsurat hi Pablo ha kongregasyon ha Tesalonica, iya gin-aghat an kabugtoan: “Ginhahangyo namon kamo, mga kabugtoan, nga respetuhon niyo an mga maduruto nga nagbubuhat nga kaupod niyo ngan nangunguna ha iyo ha buruhaton han Ginoo ngan nagsasagdon ha iyo; ngan magpakita kamo ha ira hin labaw ha kasagaran nga konsiderasyon nga may gugma tungod han ira buruhaton.” (1 Tes. 5:12, 13) An pagkamaduruto han mga paramangno han kongregasyon nakakabulig nga magin mas masayon ngan mas makalilipay an aton pag-alagad ha Dios. Dugang pa, ha siyahan nga surat ni Pablo kan Timoteo, iya gin-unabi an pagtagad nga sadang patuboon han mga aada ha kongregasyon para ha mga paramangno. Hiya nagsiring: “An mga tigurang nga nangunguna ha maopay nga paagi sadang tagdon nga angay han doble nga kadungganan, labi na an mga maduruto ha pagyakan ngan pagtutdo mahitungod han pulong.”​—1 Tim. 5:17.

IBA PA NGA RESPONSABILIDAD HA ORGANISASYON

⁴⁰ Usahay, an pipira nga tigurang gintutokahan nga mag-alagad sugad nga membro han Patient Visitation Group. An iba membro han Hospital Liaison Committee ngan nabisita ha mga hospital ngan mga doktor basi aghaton hira nga padayon nga tambalon an mga Saksi ni Jehova ngan tagan hin impormasyon mahitungod han alternatibo nga mga pagtambal nga diri nagamit hin dugo. An iba nabulig ha mga buruhaton han Ginhadian pinaagi han pagboluntaryo ha pagtukod ngan pagmintinar hin mga Kingdom Hall ngan Assembly Hall o pinaagi han pag-alagad sugad nga membro han Convention Committee. An pagkamaduruto ngan pagin andam magsakripisyo hini nga kabugtoan gin-aapresyar gud han ngatanan ha organisasyon. Oo, ‘padayon nga ginhihigugma naton an sugad nga klase hin mga tawo.’​—Fil. 2:29.

PARAMANGNO HAN SIRKITO

⁴¹ An Nagmamando nga Lawas naghihikay nga magpili hin kwalipikado nga mga tigurang nga mag-aalagad sugad nga mga paramangno han sirkito. Igintutoka hira han sanga nga opisina nga bumisita ha mga kongregasyon nga nagkukompwesto han ira mga sirkito, kasagaran nga duha ka beses ha usa ka tuig. Ha panapanahon, nabisita liwat hira ha mga payunir nga nag-aalagad ha isolated nga mga teritoryo. Nag-ieskedyol hira hin pagbisita ha tagsa nga kongregasyon ngan abanse nga ginpapahibaro ito basi magin mapulsanon gud an pagbisita.

⁴² An koordinetor han lawas han mga tigurang an nangunguna ha pag-organisar han mga butang basi an pagbisita magin makarepresko ha espirituwal para ha ngatanan. (Roma 1:11, 12) Kon makarawat na an surat mahitungod han pagbisita ngan an impormasyon mahitungod han personal nga panginahanglan han paramangno han sirkito ngan han iya asawa (kon inasaw-an), an koordinetor han lawas han mga tigurang maghihikay pinaagi hin iba-iba nga kabugtoan basi panginanoon an akomodasyon ngan an iba pa nga panginahanglan. Ginsisiguro niya nga an ngatanan, upod na an paramangno han sirkito, masumatan hini nga mga kahikayan.

⁴³ An paramangno han sirkito makikigkomunikar ha koordinetor han lawas han mga tigurang mahitungod han eskedyol han mga katirok, upod na an mga katirok para ha pagsangyaw. Hihikayon ini uyon ha mga suhestyon han paramangno han sirkito ngan ha instruksyon tikang ha sanga nga opisina. Kinahanglan abanse nga pahibaroon an ngatanan han oras ngan lugar nga pagdudumarahan han mga katirok han kongregasyon, han mga payunir, ngan han mga tigurang ngan mga ministeryal nga surugoon, pati han mga katirok para ha pagsangyaw.

⁴⁴ Ha Martes han kulop, uusisahon han paramangno han sirkito an Congregation’s Publisher Records, mga rekord han mga attendance ha katirok, mga rekord han teritoryo, ngan an accounts. Mabulig ini ha iya nga hibaroan kon ano an posible nga panginahanglan han kongregasyon ngan kon paonan-o niya mabubuligan adton may responsabilidad ha pagtipig hini nga mga rekord. Sadang siguruhon han koordinetor han lawas han mga tigurang nga maiandam an mga rekord para abanse nga maihatag ito ha paramangno han sirkito.

⁴⁵ Durante han bisita han paramangno han sirkito, naggagahin hiya hin panahon ha pakiistorya ha tagsa nga magwarali kon mahihimo​—ha mga katirok, samtang nagmiministeryo, ha pangaon, ngan ha iba pa nga panahon. Dugang pa, nakikigmiting hiya ha mga tigurang ngan mga ministeryal nga surugoon ngan naghahatag hin angayan nga Kasuratanhon nga sagdon, mga suhestyon, ngan pagdasig nga mabulig ha ira ha pagtuman han ira mga responsabilidad ha pag-ataman ha panon nga igintapod ha ira. (Prob. 27:23; Buh. 20:26-32; 1 Tim. 4:11-16) Nakikigmiting liwat hiya ha mga payunir basi dasigon hira ha ira buruhaton ngan buligan an kada tagsa ha anoman nga problema nga bangin naieksperyensyahan nira ha ministeryo.

⁴⁶ Kon may iba nga butang nga nagkikinahanglan hin atensyon, an paramangno han sirkito mabulig tubtob han iya mahihimo durante hito nga semana. Kon diri ito matapos durante hito nga panahon, mahimo hiya bumulig ha mga tigurang o ha nahidadabi nga mga indibiduwal ha pagsaliksik han Kasuratanhon nga giya nga aplikado hito. Kon an sanga nga opisina may kinahanglan buhaton nga dugang nga aksyon, hiya ngan an mga tigurang maghahatag ha sanga nga opisina hin detalyado nga report mahitungod hito.

⁴⁷ Samtang nabisita ha kongregasyon, an paramangno han sirkito natambong ha regular nga mga katirok han kongregasyon. Ha panapanahon, mahimo magkaada mga pagbag-o uyon ha mga instruksyon tikang ha sanga nga opisina. Maghahatag hiya hin mga pahayag nga gindisenyo ha pagdasig, pagpagios, pagtutdo, ngan pagparig-on ha kongregasyon. Nangangalimbasog hiya nga aghaton an kabugtoan nga higugmaon hi Jehova, hi Jesu-Kristo, ngan an organisasyon.

⁴⁸ Usa han mga katuyoan han pagbisita han paramangno han sirkito amo an pag-aghat hin kadasig ha ministeryo ngan paghatag hin praktikal nga mga suhestyon. Iginpapahiuyon han damu nga magwarali an ira eskedyol basi bug-os nga makigbahin ha pagministeryo hito nga semana, bangin pinaagi ha pangalimbasog nga makag-auxiliary payunir durante han bulan han iya pagbisita. Mahimo makigsabot adton naruruyag umupod ha iya o ha iya asawa ha ministeryo. Damu an kapulsanan kon ig-uupod an paramangno han sirkito o an iya asawa ha mga pag-aram ha Biblia ngan ha mga pagbalik-bisita. Gin-aapresyar gud an imo dugang nga pangalimbasog basi bug-os nga masuportaran ini nga bahin han usa ka semana nga bisita.​—Prob. 27:17.

⁴⁹ Kada tuig, duha nga sirkito nga asembleya an ginhihikay ha tagsa nga sirkito. An paramangno han sirkito an may responsabilidad nga magin organisado ini nga mga asembleya. An paramangno han sirkito nagtutoka hin usa nga assembly overseer ngan usa nga assistant assembly overseer. Makooperar gud hira ha iya ha pagpanginano basi magin organisado an asembleya. Tungod hini, an paramangno han sirkito makakapokus ha programa han asembleya. An paramangno han sirkito nagpipili liwat hin iba pa nga may kapas nga kalalakin-an nga magdudumara han magkalain-lain nga departamento. Hiya liwat an naghihikay ha pag-awdit han accounts han sirkito katapos han tagsa nga asembleya. Kada tuig, ha usa nga sirkito nga asembleya, an magigin bisita nga mamumulong usa nga representante han sanga nga opisina. Tungod han kahirayo o kagutiay han pasilidad, may mga sirkito nga ginbahin-bahin ha mga seksyon, ngan an tagsa hito may kalugaringon nga sirkito nga asembleya.

⁵⁰ Kada kataposan han bulan, direkta nga iginpapadara han paramangno han sirkito an iya report han pag-alagad ngadto ha sanga nga opisina. Kon may mga gastos hiya sugad han pamasahe, pagkaon, urukyan, ngan iba pa nga kinahanglanon ha pagtuman han iya buruhaton, ngan an kongregasyon nga iya ginbibisita waray magtapar hito, mahimo niya ito ipasa ha sanga nga opisina. Nasarig an nagbibiyahe nga mga representante nga kon padayon nga uunahon nira an mga buruhaton han Ginhadian ni Jehova, diri hira papabay-an ha ira materyal nga mga panginahanglan, sugad han iginsaad ni Jesus. (Luc. 12:31) An mga kongregasyon sadang magin mahunahunaon ha ira pribilehiyo ha pag-abiabi hinin matinumanon nga mga tigurang nga nagsiserbi ha ira.​—3 Juan 5-8.

KOMITE HAN SANGA

⁵¹ Ha tagsa nga sanga nga opisina han mga Saksi ni Jehova ha bug-os nga kalibotan, tulo o sobra pa nga kwalipikado ha espirituwal ngan hamtong nga kalalakin-an an nag-aalagad sugad nga Komite han Sanga basi manginano ha pagsangyaw nga buruhaton ha nasud o mga nasud nga sakop nira. Usa nga membro han komite an nag-aalagad sugad nga koordinetor han Komite han Sanga.

⁵² An mga membro han Komite han Sanga an nanginginano han mga butang nga may kalabotan ha ngatanan nga kongregasyon ha teritoryo nga sakop han sanga nga opisina. Ginpapanginano han komite an pagsangyaw han maopay nga sumat han Ginhadian ha bug-os nga teritoryo han sanga nga opisina ngan ginsisiguro nga magin organisado an mga kongregasyon ngan mga sirkito basi husto nga mapanginano an mga panginahanglan ha kanataran. Hira liwat an nanginginano han buruhaton han mga misyonero, espesyal payunir, regular payunir, ngan auxiliary payunir. Kon may mga asembleya ngan kombensyon, an komite naghihimo hin mga kahikayan ngan naghahatag hin mga toka basi ‘mabuhat an ngatanan nga butang hin desente ngan uyon ha kahikayan.’​—1 Cor. 14:40.

⁵³ Usa nga Komite han Nasud an gintutokahan ha pipira nga nasud nga sakop han pagmangno han Komite han Sanga ha lain nga nasud. Pinaagi hini, napapanginano hin maopay an buruhaton ha lugar diin nag-aalagad an Komite han Nasud. Nanginginano ito ha mga buruhaton ha Bethel Home ngan ha opisina, ha mga surat ngan mga report, ngan ha mga buruhaton ha kanataran. An Komite han Nasud nakooperar ha Komite han Sanga ha pagpauswag ha mga buruhaton han Ginhadian.

⁵⁴ An Nagmamando nga Lawas an nagpipili ha ngatanan nga membro han mga Komite han Sanga ngan mga Komite han Nasud.

MGA REPRESENTANTE HAN HEADQUARTERS

⁵⁵ Ha panapanahon, an Nagmamando nga Lawas nagtutoka hin kwalipikado nga kabugtoan ha pagbisita ha tagsa nga sanga nga opisina ha bug-os nga kalibotan. An bugto nga gintokahan hini gintatawag nga representante han headquarters. An iya nangunguna nga buruhaton amo an pagdasig ha pamilya han Bethel ngan pagbulig ha Komite han Sanga kon may-ada hira mga problema o mga pakiana may kalabotan ha pagsangyaw ngan paghimo hin disipulo nga buruhaton. Nakikigmiting liwat hiya ha ginpili nga mga paramangno han sirkito ngan ha panapanahon nakikigmiting ha mga misyonero. Durante hito, nakikiistorya hiya ha ira mahitungod han ira mga problema ngan mga panginahanglan ngan naghahatag han ginkikinahanglan nga pagdasig may kalabotan han ira pinakaimportante nga buruhaton, an pagsangyaw han Ginhadian ngan paghimo hin mga disipulo.

⁵⁶ An representante han headquarters interesado gud ha nahihimo ha kanataran may kalabotan ha pagsangyaw han Ginhadian ngan ha iba pa nga buruhaton han kongregasyon. Kon igintutugot han panahon, mahimo liwat hiya bumisita ha mga remote translation office. Kon an representante han headquarters nabisita ha usa nga sanga nga opisina, nakikigbahin liwat hiya ha pagsangyaw han Ginhadian tubtob ha iya mahihimo.

MAHIGUGMAON NGA PAGMANGNO

⁵⁷ Nagpapahimulos gud kita ha pangalimbasog ngan mahigugmaon nga pagmangno han hamtong nga Kristiano nga kalalakin-an. Samtang padayon kita nga nagpapasakop ha pinili nga mga paramangno nga gintaporan ha pag-ataman ha panon, nagigin kahiusa kita ha Ulo han kongregasyon, hi Kristo Jesus. (1 Cor. 16:15-18; Efe. 1:22, 23) Sugad nga resulta, an espiritu han Dios nagios ha mga kongregasyon ha bug-os nga kalibotan, ngan an Pulong han Dios naggigiya ha buruhaton ha bug-os nga tuna.​—Sal. 119:105.